―Chen taj quin waꞌaric tiꞌ techex,

yʌn jun yarob ich mac a teraꞌ mʌꞌ u bin quimin hasta cu yiric bic Cꞌuj cu bin u reyintic yejer u chichir u mucꞌ.

2 Tiꞌ yʌn Jesús uch ich u cajar Cesarea de Filipo tuj u camsaj tiꞌob u camsʌwinicob.

Caj manij seis u qꞌuinin Jesús caj u pʌyaj Pedro yejer Juan yejer Jacobo.

Caj binob ich u joꞌr wits tu caꞌanan u joꞌr witsir.

Chen robob pay ten Jesús.

Ʌcʌtan u camsʌwinicob Jesús caj waysaꞌb Jesús.

3 Caj waysaꞌ u nocꞌ bajen u baꞌ jaꞌ,

sʌc tꞌinaꞌan u nocꞌ,

baxuc jach chaꞌaj u nocꞌ.

Mʌnaꞌ mac cꞌuchaꞌan yor u pꞌoꞌic u nocꞌ an ten bic a ray sʌcoꞌ.

4 Seb irir ixbaj Moisés yejer ixbaj Elías ten u camsʌwinicob a mʌnaꞌ u nupoꞌ.

Cu tsicbarob yejer Jesús caj irir ten u camsʌwinicob Jesús.

5 Pedro caj u tꞌʌnaj caj u yaꞌaraj tiꞌ Jesús:

―Jaj Tsꞌurir ―quij―,

jach tsoy teꞌ yʌnoꞌonexaꞌ teraꞌ.

Arej in chan tʌsej paser,

u tirir tiꞌ tech,

u tirir tiꞌ ixbaj Moisés,

u tirir tiꞌ ixbaj Elías.

6 Mʌꞌ ja wirej,

jach jacꞌaꞌan yorob u camsʌwinicob rajen Pedro caj yaꞌaraj aroꞌ quireꞌ mʌꞌ ju quiꞌ tucraj a baꞌ caj u yaꞌaraj.

7 Quireꞌ cu tsicbar Pedro caj tarij tuririꞌ u muyʌrir caj bobʌstaꞌb ten u muyʌrir caj jocꞌ u tꞌʌn Cꞌuj tiꞌ a ray u muyʌriroꞌ,

tan yaꞌaric:

―A jeꞌ in jach parar in jach yaj.

Caꞌ uꞌyex u tꞌʌn.

8 Seb caj u sut u bʌj pacatnʌjobeꞌ mʌꞌ ju wʌcꞌʌs irob mac yicnʌnob,

chen Jesús yʌn.

9 Quireꞌ cu yemanob ich u joꞌr pꞌuc wits caj u chen quiꞌ araj tiꞌob soc mʌꞌ ju yaꞌarob a baꞌ tsꞌoc u yiricob hasta caꞌ bin riqꞌuiquen tin quimirir a tenoꞌ a baxuquenechex.

10 Tu chen quibajob a baꞌ araꞌb tiꞌob ten Jesús,

chen cu chan ber sʌjʌj tꞌʌnob tan u yaꞌaricob:

―A baꞌ u cꞌat yaꞌaric a caꞌ bin wʌcꞌʌs riqꞌuic tu quimirir?

11 Caj u cꞌatajob tiꞌ,

tan yaꞌaricob:

―Quireꞌ tech caj a waꞌaraj tenob,

mʌꞌ in yʌn bin in waꞌaricob wa caj in wirob ixbaj Elías yejer ixbaj Moisés.

Biquinin cu yaꞌaricob yʌjcamsʌyʌjirob u tꞌʌn Moisés:

“Rajiꞌ cu batꞌan bin tar Elías uch quir u pʌyic u ber Cristo soc pachir cu tar a Cristojoꞌ”?

12 Caj u nuncaj rajiꞌeꞌ,

caj u yaꞌaraj tiꞌob:

―Taj ―quij Jesús―.

Elías cu yʌn batꞌan tar uch quir u pʌyic u bej Cristo soc u cꞌaxicob yorob soc u rʌc pꞌʌticob u cꞌasir u winiquirob judío.

Chen arex ten biquinin u tsꞌibaꞌan tꞌʌn Cꞌuj cu tsicbar caꞌ bin mucꞌyajnʌquen a tenoꞌ a baxuquenechexoꞌ,

bayiriꞌ xan caꞌ bin u xunpꞌʌtenob ten u jach tsꞌurirob u winiquirob judío.

13 A tenoꞌ ―quij Jesús―,

quin waꞌaric techex toc tarij Elías,

bayiriꞌ xan,

robob caj u betob tiꞌ tu cotor a baꞌ caj u pachtajob tu yorob an ten bic tiꞌ tsꞌibaꞌan ich u tꞌʌn Cꞌuj tiꞌ rajiꞌ a baꞌ u ber.

14 Caj urob Jesús ich u joꞌr wits yejer u mʌnaꞌ u nup camsʌwinicob caj tar tu yicnʌn a ju camsʌwinicob a pꞌatoboꞌ.

Caj urob Jesús yejer mʌnaꞌ u nup u camsʌwinicob jeroj caj u yiraj rʌc bʌcristaꞌb ten yaꞌab macob.

A yʌjcamsʌyʌjirob u tꞌʌn Moisés cu nunquicob u tꞌʌn yejer u camsʌwinicob Jesús.

15 A ray u qꞌuininoꞌ tuneꞌ,

caj irir Jesús ten a yaꞌab macob caj jaqꞌuij u yorob caj u cꞌʌnajob yacab tu yicnʌn quir u rʌc tꞌʌnicob.

16 Rajiꞌ caj u cꞌataj tiꞌob:

―Biquinin ca nunquiquex u tꞌʌnob a yʌjcamsʌyʌjirob u tꞌʌn Moisés?

17 Caj u nuncaj tuririꞌ ich a yaꞌab macoboꞌ,

caj u yaꞌaraj:

―In wʌjcamsʌyʌjirech,

taren in puric in parar tech quireꞌ acaꞌan quisin tiꞌ,

rajen mʌꞌ u jocꞌar u tꞌʌn.

18 Caꞌ bin chucuc purbir in parar ten quisin tu cu bin man,

cu rubsic ruꞌum,

cu yomancʌr u chiꞌ,

cu jʌchꞌic u coj,

cu tochtar u winquirir rajen jach mʌnaꞌ u mucꞌ xan.

Caj in waꞌaraj tiꞌ a camsʌwinicob caꞌ u jocꞌsejob tiꞌeꞌ,

barej mʌꞌ cꞌuchaꞌan yorob u jocꞌsej.

19 Caj u nuncaj Jesús caj u yaꞌaraj tiꞌob:

―A techexoꞌ a mac a cuxaꞌanechex u qꞌuinin bajeꞌrer,

am biquinin mʌꞌ a wacsic ta worex?

A mun u qꞌuinin yʌn in pꞌatʌr ta wicnʌnex quir a wacsic ta worex?

Joqꞌuen chꞌaꞌej ten.

20 Tabar u natsꞌʌr ich Jesús,

barej caj irir Jesús ten a quisinoꞌ,

jeroj seb titꞌab a pararoꞌ,

caj rub ruꞌum caj bʌcrʌnʌjij caj omnʌj u chiꞌ.

21 Caj cꞌataꞌb tiꞌ u tet ten Jesús:

―Ber ocac quisin tiꞌ a parar?

Caj u nuncaj u tet:

―Tu chichanin caj oc quisin tiꞌ.

22 Yaꞌab u tenin cu purur ich cꞌacꞌ bayiriꞌ ich jaꞌ quir u quinsic.

Barej wa cꞌuchaꞌan a wor a betiqueꞌ,

jocꞌsej a quisinoꞌ.

Yajquintenob ―quij u tet u parar―,

yʌm tenob.

23 Jesús tun,

caj u yaꞌaraj tiꞌ:

―Wa jeꞌ u cꞌuchur a wor a wacsic ta woreꞌ,

tu cotor cꞌuchaꞌan yor tiꞌ mac a cu yacsic tu yoroꞌ.

24 Jeroj tuneꞌ,

seb caj cꞌam tꞌʌnaj u tet a pararoꞌ,

caj u yaꞌaraj:

―Quin wacsic tin wor,

wa mʌꞌ tiꞌtiꞌ yam ten.

25 Barej caj u yiraj Jesús,

cu tar yacabob tu yicnʌn a yaꞌab macob,

jeroj Jesús caj u qꞌueyaj a quisinoꞌ,

tan yaꞌaric tiꞌ:

―A techoꞌ a mʌꞌ a chaꞌej u tꞌʌn,

bayiriꞌ a mʌꞌ a chaꞌej u yubic tꞌʌn.

A tenoꞌ quin waꞌaric tech,

joqꞌuen tiꞌ,

bayiriꞌ xan,

mʌꞌ a wʌcꞌʌs ocar tiꞌ a chan pararoꞌ.

26 Caj awatnʌjij a quisinoꞌ seb caj titaꞌb,

caj jocꞌ tiꞌ,

caj pꞌat an ten bic mac a quimeneꞌ,

rajen yaꞌab macob caj u yaꞌaraj:

“Jeroj quimij,

quij.”

27 Barej Jesúseꞌ caj u mʌchaj u cꞌʌb,

caj u ricꞌsaj caj chꞌiraj.

28 Barej caj oc ich naj,

u camsʌwinicob caj u cꞌatajob tiꞌ tu junan:

―Biquinin a tenobeꞌ mʌꞌ cꞌuchaꞌan in worob in jocꞌsicob a quisinobiꞌ?

29 Caj u yaꞌaraj tiꞌob:

―Wa ja cꞌatex caꞌ a jocꞌsex baxuc a baywoꞌ caꞌ a tꞌʌniquex Cꞌuj tu ca jamach pꞌʌtiquex a janʌnex.

30 Caj tsꞌoc u rucꞌurob tiꞌ taroꞌ,

caj manob tu ruꞌumin Galilea.

Mʌꞌ ju cꞌat wa mac u yerob wa tiꞌ yʌniꞌ.

31 Quireꞌ cu camsic u camsʌwinicob caj u yaꞌaraj tiꞌob uch:

―Quireꞌ bin u caj cꞌubiren a tenoꞌ tiꞌ mac a cu pꞌactiquenob a tenoꞌ a baxuquenechexoꞌ.

Bin quinsaquen ten a ray xiboboꞌ,

barej caꞌ bin tsꞌocac in quimeneꞌ bin in caj cuxtar caꞌ bin manʌc mʌnaꞌ u nup u qꞌuinin.

32 U camsʌwinicob Jesús mʌꞌ ju najtob a baꞌ araꞌb tiꞌob ten Jesús,

tu cu camsic tiꞌob,

sajacchʌjob u cꞌaticob tiꞌ.

33 Caj cꞌuchob tu cajar Capernaum.

Quireꞌ tiꞌ yʌnob ich naj caj u cꞌataj tiꞌob:

―Baꞌ ca sʌjʌj ariquex ich a bej?

34 Barej,

robobeꞌ mʌꞌ tu nuncajob,

quireꞌ ich bej cu nunquicob u tꞌʌnob soc yerob mac jach noꞌj ich u yet camsʌwinicob.

35 Barej caj curaj Jesús tuneꞌ,

caj u tꞌʌnaj a docejoꞌ caj u yaꞌaraj tiꞌob:

―Wa mac u cꞌat bin pʌyber arej u bin pachir soc rajiꞌ u cꞌurewintaꞌr ten tu cotor mac.

36 Jeroj caj u chꞌaꞌaj tuririꞌ chan parar quir u chꞌiquintic tan chumuc tu yicnʌnob,

caj u mecꞌaj,

caj u yaꞌaraj tiꞌob:

37 ―Wa tsoy ca betiquex tiꞌ a jeꞌ chichanaꞌ,

cax tiꞌ u jer xan,

quireꞌ ca yajquintiquenex.

Tsoy ca betiquenex ten xan.

Baxuc tsoy ca betiquex tiꞌ Cꞌuj a mac a caj u tuchiꞌtajen.

38 Caj u tꞌʌnaj Juan,

tan yaꞌaric tiꞌ:

―In wʌj camsʌyʌjirech,

caj in wirob tuririꞌ mac cu jocꞌsic quisin.

Cu tꞌʌnic a cꞌabaꞌ.

Caj in waꞌarob:

“Tsireꞌej”,

quireꞌ mʌꞌ u sayʌr ta pach quir u cʌnic a tꞌʌn,

an ten bic a tenob quin sayʌrob ta pach.

39 Jesús caj u yaꞌaraj:

―Tsireꞌej,

cax mʌꞌ a waꞌariquex tiꞌ quireꞌ mʌnaꞌ mac cꞌuchaꞌan yor u betic tsoy tin cꞌabaꞌ wa caꞌ bin tsꞌocaqueꞌ cu bin u pꞌastic in cꞌabaꞌ.

40 Quireꞌ a mac a mʌꞌ u pꞌacticoꞌonex cu yamticoꞌonex.

41 Taj quin waꞌaric techex,

wa mac jeꞌ u tsꞌic techex tuririꞌ ruch jaꞌ quir a wuꞌqꞌuiquex quireꞌ caj a wacsaj ta worex tiꞌ Cristo,

quin waꞌaric techex mʌꞌ u bin satʌr u boꞌorir tu cu tsꞌic a woj jaꞌex.

42 Jesús caj u yaꞌaraj tiꞌob:

―A mac a cu yacsic u siꞌpir u racꞌob a tu cʌnaj chichan a caj u yacsaj tu yor.

Arej jach manan tsoy caꞌ u jichꞌej ich u car yejer yajaw caꞌ.

Caꞌ u purej u bʌj ich cꞌacꞌnab quireꞌ caj u toc pʌyaj u siꞌpir u racꞌob.

43-46 Rajen quin waꞌaric techex:

Xonchꞌʌtej a cꞌʌb wa rajiꞌ cu pʌyic a siꞌpirex.

Cax a woc wa rajiꞌ cu pʌyic a siꞌpirex.

Cax bujuch cꞌʌbech cax bujuch oquech soc a taquic a bʌj soc mʌꞌ a bin tu ca werarex ich cꞌacꞌ munt qꞌuin yejer caꞌtur a cꞌʌb,

bayiriꞌ xan soc mʌꞌ a bin tu ca werarex ich cꞌacꞌ munt qꞌuin yejer caꞌtur a woc.

Mʌꞌ ja wirej,

tiꞌ taroꞌ u noqꞌuer bʌcꞌ mʌꞌ u quimin,

mʌꞌ biqꞌuin a cꞌacꞌoꞌ u tupur.

47 Baxuc xan,

a wichex.

Wa rajiꞌ cu pʌyic a siꞌpirex rʌquej a wichex,

jach manan tsoy caꞌ ocaquechex bujuch ichechex tu cu bin u reyintic Cꞌuj wa quet yejer caꞌtur a wichex cu bin u puriquechex ich tu cu yerar mac.

48 Tu yʌn nocꞌor bʌcꞌ mʌꞌ u quimin,

tu mʌꞌ u tupur a cꞌacꞌoꞌ.

49 Caj yaꞌaraj Jesús tiꞌob:

―A ʌrʌcꞌoꞌ a cu sijic u winiquirob judío tiꞌ Cꞌuj tabtaꞌan cu toquic ich cꞌacꞌ.

Bayiriꞌ xan,

cu bin tumtaꞌbir yor a mac a cu sayʌr tin pach.

Cu bin tumtaꞌbir yor ten a mac a cu chuquic u pach a cu sayʌr tin pachoꞌ.

Cu bin tumtaꞌbir yor mac soc yiric wa taj cu yacsic tu yor.

50 Tsoy yʌn u xaꞌanin,

chen wa cu rucꞌur u xaꞌanin,

mʌꞌ chꞌoꞌochiꞌ.

Taj ca cꞌʌmejex u tꞌʌn Cꞌuj soc irechex xaꞌan.

Caꞌ sisac a worex yejer a racꞌobex.