A mac jach carem tu cu bin u reyintejob Cꞌuj
18
Raꞌ u qꞌuinin caj tsicbanʌj Jesús yejer Pedro caj u jutsꞌob u bʌj u camsʌwinicob ich Jesús.
Caj cꞌataꞌb tiꞌ Jesús ten u camsʌwinicob:
―Arej toꞌon a mac jach carem tu cu bin u reyinticob Cꞌuj?
2 Jesús caj u pʌyaj u chan parar mac.
Caj u pʌyaj chꞌictar chumuc tu yʌn Jesús.
3 Caj yaꞌaraj Jesús:
―Jach taj quin waꞌaric techex.
Caꞌ a cꞌaxex a worex soc a cʌniquex chichan quireꞌ cu quibic u tꞌʌn mac.
Wa ja cꞌatex a wocarex tu cu bin u reyinticob Cꞌuj ich caꞌanan.
4 Rajen a mac a cu cʌnic a chichanoꞌ quireꞌ cu quibic u tꞌʌn mac caꞌ bin cꞌuchuc tu qꞌuinin u reyintic Cꞌuj raꞌ jach manan carem.
5 A mac cu yacsic mac a caj u cʌnaj chichan,
quireꞌ rajiꞌ caj u yacsaj tu yor tiꞌ ten bayiriꞌ cu yacsiquen xan.
Quiꞌ irej a wacsiquex a siꞌpir
6 Caj yaꞌaraj Jesús tiꞌ u camsʌwinicob:
―A mac a cu yacsic u siꞌpir u racꞌob,
a caj u cʌnaj chichan,
a caj u yacsaj tu yor.
Arej jach manan tsoy caꞌ u jichꞌej ich u car yejer yajaw caꞌ.
Caꞌ u purej u bʌj ich cꞌacꞌnab quireꞌ caj u pʌyaj u siꞌpir u racꞌob.
7 A mac cu jach cꞌasquintic mac ich tu cotor yocꞌocab jach yaj cu bin yubic yerar a jeꞌ xiboꞌ.
Yʌn u tar u jer mac quir u cꞌasquintic u racꞌob.
Rajraꞌ yʌn u tar quir u cꞌasquintic mac jach manan cꞌas aroꞌ.
8 ’Rajen quin wac techex:
Xonchꞌʌctej a cꞌʌb wa rajiꞌ cu yacsic a siꞌpir.
Cax a woc wa rajiꞌ cu yacsic a siꞌpir.
Cax bujuch cꞌʌbech,
cax bujuch oquech soc a taquic a bʌj.
Soc mʌꞌ a bin tu ca werar ich cꞌacꞌ munt qꞌuin yejer caꞌtur a cꞌʌb.
Bayiriꞌ soc mʌꞌ a werar yejer caꞌtur a woc.
9 Baxuc xan a wich.
Wa rajiꞌ cu pʌyic a siꞌpir rʌc a wich.
Cax bujuch ichech soc mʌꞌ a bin erar ich cꞌacꞌ.
Soc a taquic a bʌj wa yejer caꞌtur a wich ca bin tu ca werar.
Cax tʌmʌn yuc a irej satʌr Jesús quir u camsic
10 Caj yaꞌaraj Jesús tiꞌ:
―Mʌꞌ a yʌn cheꞌtic a chichan a caj u yacsaj tu yor ten,
a tiꞌ yʌn ich yocꞌocab,
a irob a jeꞌ chichanaꞌ.
Quireꞌ tiꞌ yʌn u yʌjmasirob u tꞌʌn Cꞌuj tiꞌ chichan ʌcʌtan tiꞌ Cꞌuj caꞌanan.
Rajiꞌob cʌnanticob yʌjmasirob u tꞌʌn Cꞌuj.
11 Caj yaꞌaraj Jesús:
―Taren in yamtic mac tu cotor ich yocꞌocab a mac satʌr quir u jawsic u siꞌpir.
12 ’Quiꞌ tucrex a baꞌ quin bin in camsic techex.
Mʌꞌ wa tiꞌ yʌn xib yʌjcʌnʌnyʌjir cien tʌmʌn yuc.
Caj satij tuririꞌ jeꞌ u bin u cʌxtej a tuririꞌ saꞌat.
Cu jamach pꞌʌtic yʌrʌcꞌ tʌmʌn yuc a noventa y nueve a tiꞌ yʌnob ich u joꞌr wits,
caꞌ xic u cʌxtej tuririꞌ.
13 Wa cu yiric yʌrʌcꞌ tʌmʌn yuc a tuririꞌ taj quin waꞌaric jach quiꞌ yor.
Cax tiꞌ yʌn a noventa y nueve a mʌꞌ saꞌatʌrob.
Mʌꞌ quiꞌ yor hasta cu yiric a tuririꞌ,
a raꞌ u qꞌuininoꞌ cu jach quiꞌ tar yor.
14 Caj yaꞌaraj Jesús:
―Rajen baxuc ic Tet Cꞌuj.
Mʌꞌ u cꞌat yiric u satʌr a chichan tuririꞌ a mac a cu yacsic tu yor tiꞌ ten,
a ca wiriquex bʌytʌc tu yʌnechex.
Bic tabar a jawsiquex u siꞌpir a wet acsaꞌorir
(Lc. 17.3)
15 Caj yaꞌaraj Jesús tiꞌ u camsʌwinicob:
―Wa ja wet acsaꞌorir cꞌas cu yac techex.
Cax wa baꞌ cu betic techex.
Tu junan ca waꞌariquex tiꞌ wa baꞌ cu yaꞌaric techex.
Wa caj u quibaj a tꞌʌn a wet acsaꞌorir,
pꞌeriꞌ a wor yejer.
Mʌꞌ ja wirej,
caj u yacꞌtaj u bʌj tu siꞌpir caj u pʌyaj.
Caj a tacaj soc mʌꞌ u tsꞌictar tiꞌ Cꞌuj.
16 Wa mʌꞌ u quibic a tꞌʌn a wet acsaꞌorir,
joqꞌuen pʌyej tuririꞌ wa caꞌtur.
Caꞌ a pʌyej soc yubic a wet acsaꞌorir yʌn u siꞌpir yet acsaꞌorir.
Soc yiric wa cꞌuchaꞌan yor u pꞌeriꞌquinticob yor.
Soc mʌnaꞌ u nup yubic yʌn u siꞌpir.
17 Wa mʌꞌ u yubiquex a tꞌʌnex a wet acsaꞌorir,
caꞌ a rʌc arex yubejob tu cotor u tsꞌurir a wet acsaꞌorir tu ca muchꞌquintiquex a bʌj.
Wa mʌꞌ yubic u tꞌʌn tu cotor u tsꞌurir yet acsaꞌorir.
Mʌꞌ ja tꞌʌniquex an ten bic mac mʌꞌ yer Cꞌuj.
18 Jach taj quin waꞌariquechex:
―A baꞌ quir mʌꞌ a cꞌatex tu ca muchꞌquintiquex a bʌj ich yocꞌocab,
baxuc xan,
a Cꞌujoꞌ mʌꞌ u cꞌat.
A baꞌ quir tsoy techex tu ca muchꞌquintiquex a bʌj,
baxuc a Cꞌujoꞌ,
tsoy yiric Cꞌuj.
19 ’Taj quin waꞌaric techex.
Cax wa chan caꞌturechex yejer a wet acsaꞌorir teꞌ ich yocꞌocab.
Jeꞌ u tsꞌic techex ic Tet Cꞌuj a baꞌ a cꞌat wa quet a worex.
20 Cax wa mʌnaꞌ u nup cu tar u muchꞌquinticob u bʌj tiꞌ yʌnen ―quij Jesús―.
Cax wa caꞌtur quir u cꞌujinticob Cꞌuj cu bin tsꞌabir ten Cꞌuj tiꞌ techex a baꞌ ca cꞌatiquex tiꞌ.
21 Caj tar Pedro ich Jesús caj u cꞌataj tiꞌ:
―Wa cu tar in bʌjob,
Jaj Tsꞌur.
Yaꞌarej caꞌ in jawsej u siꞌpir wa baꞌ caj u yaꞌaraj.
Arej ten mun caꞌ bin in jawsej u siꞌpir.
Yaꞌab u tenin,
cax wa siete quin jawsic u siꞌpir?
22 Caj u nuncaj Jesús:
―Mʌꞌ jin waꞌarej a jawsej siete,
cax yaꞌab u tenin u tar cax setenta.
Jesús cu camsic bic tabar mʌꞌ jawsic u yet cꞌurew
23 Rajen caj yaꞌaraj Jesús tu cu camsicob:
―U ruꞌumin tu cu bin u reyinticob Cꞌuj caꞌanan irej a rey a cu bin u cꞌatic u boꞌorir tiꞌ u cꞌurew,
a mac yʌn u boꞌor.
24 Caj u yʌnxchun yiric yʌn u boꞌor u cꞌurew tiꞌ u rey.
Caj tar purbir tiꞌ rey u cꞌurew quireꞌ rajiꞌ yʌn u boꞌor yaꞌab.
Jaj ix tʌcoj cuatro millones pesos.
25 U cꞌurew mʌꞌ cꞌuchaꞌan yor u boꞌotic u rey.
Caj u toc araj rey:
“Ar u rʌc cʌnej u baꞌtac.
Bayiriꞌ u racꞌ,
caꞌ u canej yejer u parar caꞌ u canej.
A baꞌ yʌneꞌ,
caꞌ u rʌc canej quir u boꞌotic rey.”
26 Caj xonrʌj u cꞌurew ʌcʌtan u rey.
Caj yaꞌaraj tiꞌ:
“Caꞌ a yajquin ten,
Jaj Tsꞌur.
Sisquintej a wor ten.
Jeꞌ in rʌc boꞌotiquech.”
27 Caj sisij yor rey,
caj u yajquintaj tiꞌ u cꞌurew.
Caj yaꞌaraj tiꞌ u cꞌurew:
“Tsireꞌej cax mʌꞌ a boꞌotic.”
Caj yaꞌaraj u rey:
“Siptej in cꞌurew caꞌ xic.”
28 Raꞌiriꞌ u cꞌurew tan tu jocꞌar ich rey caj u nupꞌob u bʌj u yet cꞌurewir a mac yʌn u boꞌor tiꞌ yet cꞌurewir.
Mʌꞌ necoꞌoj u boꞌor ten u yet cꞌurewir.
Yʌn ix tʌcoj cuatro pesos.
Caj chuc yʌtꞌbir u cꞌoꞌoch ten yet cꞌurewir.
Caj yaꞌaraj:
“Boꞌoten.”
29 Caj xonraj u yet cꞌurewir ʌcʌtan Caj u chich araj:
“Yajquinten.
Jeꞌ in rʌc boꞌotiquech tu cotor.”
30 “Jot” ―quij―.
Caj u cꞌubaj u yet cꞌurewir a mʌꞌ yaꞌab u boꞌor caꞌ xic mʌcbir hasta cu boꞌotic u boꞌor tiꞌ u yet cꞌurewir.
31 U yet cꞌurewir yaꞌab,
caj yajij yorob a baꞌ caj u yirob caj binob ich rey yaꞌarajob tiꞌ baꞌ u ber.
32 Caj u pʌyaj u cꞌurew rey.
Caj cꞌuchij u cꞌurew tu yʌn rey.
Caj yaꞌaraj tiꞌ u cꞌurew:
“Jach cꞌasech,
a tenoꞌ caj in waꞌaraj mʌꞌ a boꞌotej a boꞌor quireꞌ caj a chich cꞌataj ten.
33 Biquinin mʌꞌ ja yajquintaj a wet cꞌurewir an ten biquen caj in yajquin tech?”
34 A ju rey caj jach tsꞌiquij.
Caj u cꞌubaj u cꞌurew xan,
caꞌ maꞌcac hasta cu rʌc boꞌotic u boꞌor.
35 Jesús quir u tsꞌocar u camsic bic tabar u jawsic u siꞌpir mac caj yaꞌaraj:
―Baxuc in Tet xan a tar yʌn ich caꞌanan.
Mʌꞌ ju jawsic techex Cꞌuj wa mʌꞌ a jawsic u siꞌpir a wet acsaꞌorir jeꞌerer,
mʌꞌ u jawsej.