Jesús cu camsic tiꞌ tʌmʌn yuc a satʌroꞌ
15
Turiꞌ u qꞌuinin caj tarob a mac cu cꞌʌmicob u taqꞌuin gobierno yejer a mac yʌn u siꞌpirob.
Caj u muchꞌquintajob u bʌj ich Jesús.
Lucas 15.1-32
―A jeꞌ xibaꞌ cu man yejer a mac yʌn u siꞌpirob,
cu janʌn yejerob xan.
3 Rajen Jesús caj u camsaj baxuc a jeꞌraꞌ:
4 ―Wa tuririꞌ techex yʌn cien a wʌrʌcꞌ tʌmʌn yuc,
cu satʌr tuririꞌ,
mʌꞌ wa cu jamach pꞌʌtic u yʌrʌcꞌ tʌmʌn yuc a noventa y nueve tu cu janʌnob caꞌ xic u cʌxtej a saꞌataroꞌ?
Cu quiꞌ cʌxtic hasta cu yiric.
5 Caj tsꞌoc yiric caj quiꞌjij yor rajen caj u cꞌocha.
6 Caꞌ bin cꞌuchuc ich yatoch caj u pʌyaj a mac u jach yajob yejer u yet cajarob caj yaꞌaraj tiꞌob:
“Caꞌ ij quiꞌquintej ij cor quireꞌ caj in wiraj in wʌrʌcꞌ tʌmʌn yuc a cu satʌr uch.”
7 Baxuc xan,
rajen quin wac techex:
Jach manan cu bin u quiꞌ tar yor Cꞌuj ich caꞌanan yejer yʌjmasirob u tꞌʌn Cꞌuj quireꞌ caj u yiraj turiꞌ caj u cꞌaxaj yor,
caj u pꞌʌtaj u man tu cꞌasir.
Cax mʌꞌ baꞌwir aroꞌ a noventa y nueve quir u cꞌaxic yorob soc u pꞌʌticob u cꞌasirob quireꞌ jach tsoyob.
Jesús cu camsic tiꞌ taqꞌuin a satʌroꞌ
8 Jesús caj yaꞌaraj:
―Mʌꞌ wa tiꞌ yʌn xquic a yʌn diez u sʌc taqꞌuin wa cu sʌtic u taqꞌuin tuririꞌ.
Cu tꞌʌbic u quib quir u mistic yatoch soc u quiꞌ cʌxtic u taqꞌuin hasta cu yiric.
Jach taj cu bin u quiꞌ cʌxtic hasta cu yiric.
9 Barej caj u yiraj u taqꞌuin cu pʌyic a mac u jach yajob.
Baxuc u yet cajarob,
caj yaꞌaraj tiꞌob:
“Caꞌ ij quiꞌquintic ij cor quireꞌ caj in wiraj in taqꞌuin a tin sʌtaj uch.”
10 Quin wac techex baxuc xan quiꞌ yorob yʌjmasirob u tꞌʌn Cꞌuj ber cu yiricob u cꞌaxic yor mac.
Caj u pꞌʌtaj u man tu cꞌasir,
cax tuririꞌ.
Jesús camsic tiꞌ u parar a cu sataroꞌ
11 Jesús caj yaꞌaraj tiꞌ:
―Tiꞌ yʌn tuririꞌ xib yʌn caꞌtur u parar.
12 A itsꞌinbir u parar caj yaꞌaraj tiꞌ u tet:
“Tet ―quij―,
jʌse ten a baꞌ ca bin a pꞌʌtej wa ca quimin.”
Rajen u tet caj u jʌsaj tiꞌob u pararob a baꞌ cu bin u pꞌʌtic tiꞌob.
13 Caj manij mʌꞌ yaꞌab u qꞌuinin,
u parar a itsꞌinbiroꞌ caj u rʌc maraj u baꞌtac caj u pꞌʌtaj u tet caj bin ich tanxer u cajar nach.
Caj u rʌc xup u taqꞌuin tu cu man tu cꞌasir.
14 Caj tsꞌoc u rʌc xupic u taqꞌuin caj cꞌuchij tu qꞌuinin u tar wiꞌij tu ruꞌumin.
Caj u yʌnxchun u masic otsir.
15 Caj tar u chich cꞌataj u beyaj a tiꞌ cʌjaꞌan ich u ruꞌumin.
Rajiꞌ caj u tsꞌaj u beyaj ich u cor quir u jansic yʌrʌcꞌ qꞌuecꞌan.
16 Cu jach pachtic u najchʌjʌr yejer yoch qꞌuecꞌan a cu tsꞌabʌr tiꞌ.
Quireꞌ mʌꞌ u tsꞌabʌr tiꞌ a mac a cu cʌnanticob qꞌuecꞌan.
17 Chen caj u cꞌaxaj u tucur caj yaꞌaraj:
“Mun u cꞌurew in tet cu beyaj.
Toc yʌn yoꞌoch yaꞌab.
Mʌꞌ u rʌc janticob.
Chen a tenoꞌ tan in quimin yejer wiꞌij.
18 Bin in caꞌ sut ich in tet caꞌ bin in wac tiꞌ in tet:
Tet,
quen,
a tenoꞌ yʌn in siꞌpir tiꞌ Cꞌuj.
Baxuc tech,
mʌꞌ tin quibaj a tꞌʌn.
19 Caꞌ bin in wac tiꞌ in tet:
Mʌꞌ tsoyen a waquen wa ja pararen.
Chan chaꞌ in beyaj tech an ten bic a cꞌurew.”
20 A itsꞌinbiroꞌ caj riqꞌui,
caj sutnʌjij ich yatoch u tet.
’Tiꞌ toy yʌn nach caj irir ten u tet,
tan u sut.
Caj yajquintaꞌb ten u tet caj u cꞌʌnaj u yacab quir u nupꞌur caj cꞌuchij ich u parar.
Caj u pʌtʌx mecꞌtaj caj u tsꞌuꞌtsꞌaj u pꞌuc.
21 Rajen u parar caj u yaꞌaraj tiꞌ u tet:
“Tet,
quen,
a tenoꞌ yʌn in siꞌpir tiꞌ Cꞌuj.
Baxuc tech quireꞌ mʌꞌ tin quibaj a tꞌʌn.
Rajen mʌꞌ tsoyen a waquen wa ja pararen.”
22 Caj cꞌuchob yejer u tet ich yatoch.
U tet caj yaꞌaraj tiꞌ u cꞌurew:
“Chuquej u jer u nocꞌ a tsoyoꞌ caꞌ a tʌquej u nocꞌ tiꞌ.
Chuquej u cꞌʌb caꞌ a cꞌʌrej tu cꞌʌb.
Chuquej u pechꞌ xʌnʌb caꞌ a jupej ich yoc.
23 Joqꞌuen chuque bʌcꞌ a tan ic tsentic caꞌ ij quinsej caꞌ ij quiꞌ janʌnex caꞌ quiꞌac ij corex.
24 Quireꞌ a jeꞌ in pararaꞌ in wer ucheꞌ quimen chen tiꞌ yʌn bajeꞌrer cuxaꞌan quireꞌ caj u pꞌʌtenob uch chen bajeꞌrer tan tu cꞌuchur.”
Caj u yʌnxchun u betic tiꞌ u quiꞌ janʌnob.
25 ’U parar a sucuꞌunbiroꞌ tiꞌ yʌn ich u cor caꞌch caj ur u yitsꞌin.
Tan u yuꞌur tabar u cꞌuchur ich yatoch.
Caj yubaj u cꞌayob tan yocꞌatob xan.
26 Rajen caj u tꞌʌnaj tuririꞌ u cꞌurew u tet caj u cꞌata tiꞌ baꞌ cu yiricob.
27 Caj araꞌb tiꞌ ten u cꞌurew:
“Quireꞌ toc ur a witsꞌin rajen a tetex caj u yaꞌaraj caꞌ quinsac bʌcꞌ a toc tsemtaꞌan toc tiꞌ yʌn yor quireꞌ urij.”
28 A sucuꞌunbiroꞌ caj tsꞌiquij,
rajen mʌꞌ u cꞌat u yocar ich u tet.
Caj jocꞌ u tet caj u chich araj tiꞌ caꞌ ocac.
29 Caj u nuncaj tiꞌ u tet:
“Uꞌyej baꞌ quin wac.
Yaꞌab yaxqꞌuin caj in beyaj tech.
Tiꞌ toy quin beyaj tech a baꞌ ta waꞌaraj caꞌch,
caj in toc quibaj.
Mʌꞌ ta chuca bʌcꞌ teniꞌ,
a tsꞌaten mʌꞌ chichin soc in quiꞌ janʌn yejer a mac in jach yajob.
30 Chen caj urij a parar a jeꞌraꞌ a caj u rʌc xupaj a taqꞌuin yejer xquic a cu manob.
Biquinin caj a waꞌaraj u quinsaꞌ yoch bʌcꞌ yaꞌab a tsemtaꞌan ―quij―,
tiꞌ u tet?”
31 Chen u tet caj u yaꞌaraj tiꞌ:
“In pararech.
Rajraꞌ tiꞌ yʌnech tin wicnʌn.
Tu cotor baꞌ a yʌn ten,
tech yʌnin.
32 Mʌꞌ ja wirej ―quij―,
yʌn ij quiꞌquintic ij cor.
Yʌn ij quiꞌ janʌn xan quireꞌ urij a witsꞌin.
In wer quimij uch chen tiꞌ yʌn bajeꞌrer cuxaꞌan quireꞌ caj u pꞌʌtʌnenob uch chen bajeꞌrer tant u cꞌuchur.”