Jesús cu camsic tiꞌ u caꞌ tsꞌurir a mʌꞌ tu quiꞌ quibaj u tꞌʌn u Jach Tsꞌurir
16
Jesús caj u yaꞌaraj tiꞌ u camsʌwinicob xan:
―Tiꞌ yʌn mac u Jach Tsꞌurir,
neyʌn u taqꞌuin.
Aroꞌ yʌn u caꞌ tsꞌurir.
Caj araꞌb tiꞌ ten mac:
“A caꞌ tsꞌurir tech caj u rʌc xupur a baꞌ yʌn tech.”
Lucas 16.1-31
2 Rajen u Jach Tsꞌurir caj u pʌyaj caꞌ tac u caꞌ tsꞌurir caj cꞌuchij caj araꞌb tiꞌ ten u Jach Tsꞌurir:
“Arej ten baꞌ caj in wuꞌyaj u jumintic tech,
a racꞌob?
Toc tsꞌibtej ten mun caj a rʌc xupaj in baꞌtac baxuc a mun caj a jaraj ten quireꞌ bajeꞌrer mʌꞌ a bin a beyaj ten.”
3 Caj u tucraj u caꞌ tsꞌurir caj yaꞌaraj:
“Baꞌ quin bin in betej quireꞌ in jach tsꞌurir bin u jocꞌsiquen tiꞌ in beyaj tu quin cʌnantic u baꞌtac?
Mʌꞌ cꞌuchaꞌan in wor in chich beyaj.
Jeꞌ in chꞌic suraquir wa quin man in cꞌatic baꞌ tiꞌ in racꞌob.
4 In toc er baꞌ quin bin in betej soc u yacsiquen mac caꞌ bin jocꞌsaquen tiꞌ in beyaj tu tin cʌnantaj u baꞌtac in jach tsꞌur.”
5 Caj u pʌyaj jujuntur a mac yʌn u boꞌor tiꞌ u jach tsꞌurir caj araꞌb tiꞌ a yʌn cꞌuchij:
“Mun a boꞌor tiꞌ in jach tsꞌurir?”
6 A mac yʌn u boꞌor caj yaꞌaraj:
“A tenoꞌ yʌn in boꞌor cuatro mil litros tsats.”
Caj araꞌb tiꞌ ten a caꞌtsꞌuroꞌ:
“Curen ―quen―,
a jeꞌ u juꞌunin a boꞌor caꞌ a tsꞌbitej a boꞌor chen dos mil.”
7 Caj cꞌuchij ich u jer caj u cꞌataj tiꞌ:
“Mun a boꞌor tiꞌ in jach tsꞌurir?”
Caj yaꞌaraj:
“A tenoꞌ yʌn in boꞌor turiꞌ mil tzontle nʌr.”
Caj araꞌb tiꞌ:
“A jeꞌ u juꞌunin a boꞌor caꞌ a tsꞌibtej ocho cientos tzontle nʌr.”
8 Caj u cꞌʌꞌotaj u jach tsꞌurir tiꞌ u caꞌ tsꞌurir a mʌꞌ tu quiꞌ cʌnantaj u baꞌtac.
“Aroꞌ,
jach tꞌaj ―quij jach tsꞌurir―,
an bic tabar caj u tucraj soc u yacsaꞌ ten a mac yʌn u boꞌor ten.”
Quin wac techex ―quij Jesús―,
jach tꞌaj a mac a cu yajquinticob a baꞌ yʌn ich yocꞌocab.
Mʌꞌ ja wirej,
neyerob bic tabar cu cʌnanticob u bʌj.
Chen yaꞌab mac a yerob Cꞌuj mʌꞌ u netucricob bic tabar cu bin u jaricob u taqꞌuin yejer u baꞌtac.
9 Jesús caj yaꞌaraj:
―A tenoꞌ quin wac techex a baꞌ yʌn techex ich yocꞌocab.
Jeꞌ u rʌc xupur.
Chen a baꞌ yʌn techex cꞌʌnex tiꞌ mac soc tsoy yiriquechex.
Caꞌ bin xuruc tꞌʌn yʌn mac ich caꞌanan cu bin u yacsiquechex soc munt qꞌuin tiꞌ yʌnechex ich caꞌanan.
10 ’Wa mac cu quiꞌ cʌnantic a baꞌ mʌꞌ nenoꞌjiꞌ ,
jeꞌ u quiꞌ cʌnantic a baꞌ jach noꞌjoꞌ.
A mac mʌꞌ u cʌnantic a baꞌ mʌꞌ nenoꞌjiꞌ,
mʌꞌ ju bin u cʌnantic a baꞌ jach noꞌjoꞌ.
11 Rajen wa mʌꞌ ta quiꞌ cʌnantex a baꞌ tsꞌaꞌb techex ich yocꞌocab,
mʌꞌ ju bin tsꞌabir techex a baꞌ jach noꞌjoꞌ ich caꞌanan.
A tiꞌ taroꞌ,
mʌꞌ u xupur.
12 Mʌꞌ ja wirej ―quij Jesús―,
a baꞌ yʌn techex ich yocꞌocab Cꞌuj yʌnin,
mʌꞌ techex yʌnin.
Wa mʌꞌ ta quiꞌ cʌnantex a baꞌ yʌnin Cꞌuj mʌꞌ u bin u tsꞌic techex soc techex yʌnin a baꞌ mʌꞌ u xupur ich caꞌanan.
13 ’Mʌnaꞌ mac cꞌuchaꞌan yor u cʌjtar ich yatoch wa cu tsꞌurintic caꞌtur u jach tsꞌurir quireꞌ cu bin u pꞌactic tuririꞌ chen cu bin u yajquinbir juntur u jach tsꞌurir.
Mʌꞌ ja wirej ―quij Jesús―,
cu bin u quiꞌ beyaj tiꞌ a mac cu jach sʌtic.
Chen u jer u jach tsꞌur a mʌꞌ ju sʌjtic,
mʌꞌ ju quiꞌ beyaj tiꞌ.
Baxuc techex.
Mʌꞌ cꞌuchaꞌan a worex a cꞌujintiquex Cꞌuj wa caj a quiꞌ beyajex quireꞌ a cꞌat a nejariquex a taqꞌuinex.
14 Cꞌʌs bʌytʌc tiꞌ yʌnob u winiquirob judío a fariseojo caj tsꞌoc yubicob yaꞌaric tiꞌ u camsʌwinicob caj u pꞌastajob Jesús quireꞌ cu nepachticob u taqꞌuin u winiquirob judío a fariseojoꞌ.
15 Jesús caj yaꞌaraj tiꞌ a fariseojoꞌ:
―A techexoꞌ ca tus etsꞌtiquex jach tsoyechex ʌcʌtan a racꞌobex barej Cꞌuj yer a pixamex.
Mʌꞌ ja wirej,
yʌn a baꞌ cu tucricob winic,
jach noꞌjoꞌ.
Chen yaꞌab baꞌ cu tucricob winic noꞌj,
a Cꞌujoꞌ cu pꞌactic.
U tꞌʌn a caj u tsꞌibtaj Moisés yejer u tꞌʌn a caj u tsꞌibtaj yʌjtseqꞌuirob u tꞌʌn Cꞌuj
16 ’Mʌꞌ toy tac Juan,
raꞌ caj u pʌyaj a berex a baꞌ caj u tsꞌibtaj Moisés yejer a baꞌ caj u tsꞌibtaj yʌjtseqꞌuirob u tꞌʌn Cꞌuj.
Pachir a Juanoꞌ caj u tsecꞌtaj techex bic tabar cu bin u reyinticob Cꞌuj.
Bajeꞌrer yaꞌab mac u cꞌatob u yocar tu cu bin u reyinticob Cꞌuj.
17 ’Ca wiric,
a baꞌ tsꞌibaꞌan ich u tꞌʌn Cꞌuj a chichinoꞌ a puntojoꞌ,
mʌꞌ u bin tsꞌocar tiꞌ.
Chen a caꞌananoꞌ yejer a ruꞌumoꞌ cu bin rʌc tsꞌocar tiꞌ.
Tu cotor u tꞌʌn Cꞌuj cu bin nupsej.
Jesús cu camsic mʌꞌ tsoy u pꞌʌtic u racꞌ
18 Jesús caj yaꞌaraj tiꞌob:
―Wa mac cu pꞌʌtic u racꞌ quir u bin u chꞌic u jer.
Caj tsꞌoc u chꞌic u jer yʌn u siꞌpir,
irej wa man u caꞌ yejer.
Baxuc a mac a cu chꞌic u raqꞌuintej a pꞌatoꞌ.
Baxuc xan yʌn u siꞌpir aroꞌ irej wa man u caꞌ yejer mac a cu man.
Jesús cu camsic tiꞌ a mac neyʌn u taqꞌuin yejer a mac jach otsir u cꞌabaꞌ Lázaro
19 Jesús caj yaꞌaraj tiꞌob:
―Ij quer tiꞌ yʌn mac jach yʌn u taqꞌuin,
a baꞌ cu buquintic jach tsoy u nocꞌ,
quireꞌ jach coꞌoj.
Rajraꞌ cu quiꞌ janʌn xan.
20 Tiꞌ yʌn mac otsir u cꞌabaꞌ Lázaro pꞌachen tꞌuch u cʌnmʌn.
Tar cu bin purbir ten u racꞌob ich u jor u paꞌteꞌ a mac neyʌn u taqꞌuin.
21 Cu pachtic u jantic u pꞌupꞌir a cu pichꞌintic cu tsꞌocar u janticob a neyʌn u taqꞌuin.
Cu tar a pecꞌoꞌ cu retsꞌic u pꞌachen tꞌuch.
22 Caj cꞌuchij tu qꞌuinin caj quimij a otsiroꞌ caj bin purbir ten yʌjmasirob u tꞌʌn Cꞌuj caꞌanan tu yʌn u nunquir Abraham.
Baxuc caj quimij a neyʌn u taqꞌuin,
caj bin mucbir.
23 Caj binij tu cu bin mac a cu quimin a yʌn u siꞌpiroꞌ.
Tu cu mucꞌyaj,
a neyʌn u taqꞌuin caj u nacsaj u wich caj u pʌctaj nach.
Caj u yiraj tiꞌ yʌn Abraham yejer Lázaro ich caꞌanan.
24 Caj u yawʌt tꞌʌntaj caj yaꞌaraj:
“In nunquirech Abraham ―quen―,
yajquin ten ―quij―,
arej caꞌ tac Lázaro tu yʌnenaꞌ.
Arej caꞌ tʌre jaꞌ tu yar u cꞌʌb caꞌ tac u tʌrej jaꞌ tin wacꞌ caꞌ sisac in wacꞌ quireꞌ tan in jach mucꞌyaj ich cꞌacꞌ tu quin werar.”
25 Caj araꞌb ten Abraham:
“In pararech ―quij Abraham―,
cꞌaj tech a uchoꞌ tiꞌ toy cuxaꞌanech ich yocꞌocab quireꞌ caj a quiꞌquintaj a wor a baꞌ yʌn tech.
Baxuc Lázaro xan caj mucꞌyajnʌjij yaꞌab caꞌcheꞌ,
tiꞌ toy cuxaꞌan ich yocꞌocab.
Chen bajeꞌrer Lázaro quiꞌquintaꞌb yor chen a techoꞌ tsꞌaꞌb a mucꞌyaj.
26 Tiꞌ toy yʌn ―quij Abraham―,
mʌꞌ cꞌuchaꞌan yor Lázaro u tar tu yʌnech.
Quireꞌ toc betaꞌb ten Cꞌuj,
jach carem u chꞌic caꞌananin ich tech,
baxuc ich ten xan.
Soc a tenob mʌꞌ cꞌuchaꞌan in worob in tarob tu yʌnech.
Baxuc tech mʌꞌ cꞌuchaꞌan a wor a tar tub yʌnenob.”
27 Rajen caj u yaꞌaraj a mac neyʌn u taqꞌuin:
“Quin chich cꞌatic tech in nunquirech Abraham caꞌ a tuchiꞌtej Lázaro ich yatoch in tet.
28 Quireꞌ yʌn cinco in bʌjob.
Caꞌ yarej tiꞌob soc mʌꞌ u beticob xan an ten bic caj in betaj uch ich yocꞌocab soc caꞌ bin quimicob mʌꞌ u tarob yejeren tu quin mucꞌyajob.”
29 Abraham caj u nuncaj tiꞌ:
“A bʌjob tech toc yʌn a tsꞌibtaꞌb u tꞌʌn Cꞌuj a nanij cu xaquicob,
baxuc cu tsecꞌtic tiꞌob tu cu naj cꞌujinticob Cꞌuj u winiquirob judío.
Chen yʌn u quibejob a baꞌ cu yubicob,
yaꞌaraꞌ tiꞌob.”
30 Caj yaꞌaraj a mac neyʌn u taqꞌuin:
“In nunquirech Abraham ―quij―,
mʌꞌ u bin u quibicob tu cu tsecꞌtaꞌ tiꞌob u tꞌʌn Cꞌuj.
Jaj ixtʌcoj wa cu riqꞌuir a quimenoꞌ soc u bin u tsicbar tiꞌob jeꞌ u cꞌaxicob yor,
tan u pꞌʌticob u man tu cꞌasir.”
31 Abraham caj yaꞌaraj tiꞌ:
“Wa mʌꞌ u quibicob a tsꞌibaꞌan u tꞌʌn Cꞌuj cax wa riqꞌuir mac tu quimen mʌꞌ u bin u yacsejob tu yorob.”