Jesús cu tsicbar tiꞌ u camsʌwinicob
17
Jesús caj yaꞌaraj tiꞌ u camsʌwinicob:
―Rajraꞌ yʌn baꞌ quir u yacsic u siꞌpir chen jach otsir a mac cu tumtic yor soc u yacsic u siꞌpir u racꞌob.
Lucas 17.1-37
2 Wa cu jichꞌir tu car a jach ar u caꞌir tu cu juchꞌ tiꞌ a ray xibob soc u juruc ich cꞌacꞌnab caꞌ quimic.
Aroꞌ jach tsoy caꞌ juruc soc mʌꞌ cꞌuchaꞌan yor cu tumtic yor mac soc u yacsic tu siꞌpir quireꞌ cu tucric:
Jot mac aroꞌ.
3 Jesús caj u chich yaꞌaraj tiꞌob:
―Quiꞌ cʌnantej a bʌj ―quij―,
wa ja wet acsaꞌorir caj u cʌrʌxbetaj tech.
Caꞌ bin tsꞌocac a chich aric tiꞌ.
Soc u pꞌʌtic u cꞌasir caj u betaj.
Jaj ixtʌcoj jeꞌ u cꞌaxic u yor tan u pꞌʌtic.
Caꞌ a jawsej tiꞌ ―quij Jesús―.
4 Cax yaꞌab u tenin cu cʌrʌxbetic tech a wet acsaꞌorir.
Baxuc yaꞌab u tenin cu tar yac tech:
“Mʌꞌ in yʌn yʌn betej aroꞌ.”
Caꞌ a jawsej tiꞌ.
Jesús caj yaꞌaraj tiꞌ u camsʌwinicob: Taj yʌn a wacsic ta wor
5 A mac tuchiꞌtaꞌb ten Jesús caj yaꞌaraj tiꞌ:
―Jaj Tsꞌurir ―quij―,
yʌmtej a tenob soc in quiꞌ acsicob tin worob a tꞌʌn.
6 A Jaj Tsꞌuroꞌ caj yaꞌaraj:
―Wa ca wacsiquex ta wor tiꞌ Cꞌuj cax an ten bic mijin u yijir mostaza,
rajiꞌ jach mijin.
Jeroj cꞌuchaꞌan a wor a wac tiꞌ a jeꞌ cheꞌaꞌ carem:
“Joqꞌuen cheꞌ ―quech tiꞌ―.
Caꞌ xiquech a pʌcꞌ a bʌj ich cꞌacꞌnab.”
A cheꞌoꞌ cu bin yubic a tꞌʌn.
U cꞌurew mac a baꞌ araꞌb u betej rajiꞌ cu betic
7 Jesús caj yaꞌaraj tiꞌob:
―Wa ja cꞌurewex cu beyaj ich a corex tan u muxic ruꞌumin a corex soc a paqꞌuiquex a trigojoꞌ.
Baxuc tan u cʌnantic a wʌrʌcꞌ tʌmʌn yuc,
caꞌ bin uruc beyaj.
A techexoꞌ mʌꞌ a wac tiꞌ:
“Sepquintej caꞌ curaquechex ta janʌn.”
8 Mʌꞌ wa ca waquex tiꞌ:
“Toc tsꞌocsej in woꞌoch.
Cu tsꞌocar ca tsꞌicten.
Cu tsꞌocar in janʌn a tenoꞌ tsoy a bin janen tech xan.”
9 Jeꞌ wa ja wac tiꞌ a cꞌurew:
“Bayoꞌ” ―quech tiꞌ―,
quireꞌ quiꞌ beyanʌjij?
Mʌꞌ ja bin a waꞌaric tiꞌ baxucoꞌ quireꞌ caj u chen betaj a baꞌ caj a waꞌara tiꞌ.
10 Baxuc techex in wʌjcamsʌyʌjirechex caꞌ bin tsꞌocac a rʌc betiquex a baꞌ caj u yaꞌaraj Cꞌuj.
Caꞌ a waquex tiꞌ Cꞌuj:
“Caj in chen betajob a baꞌ yʌn in beticob.
Mʌꞌ tsoyenob a wactenob bayoꞌ.”
Jesús cu jawsic xibob u cʌnmʌn iqꞌuer u caꞌob
11 Tiꞌ toy cu bin Jesús ich u berij Jerusalén.
Tiꞌ manij tu xurij u ruꞌumin Samaria.
Baxuc tiꞌ u xur u ruꞌumin Galilea.
12 Caj cꞌuchij ich u chan cajar.
Tabar u yocar caj u nupꞌob xib diez,
u cʌnmʌn iqꞌuer u caꞌob.
Tiꞌ xurob nach.
13 Caj u cꞌam puraj u tꞌʌnob caj yaꞌarob:
―In Jaj Tsꞌurirob Jesús ―quij―,
yajquin tenob caꞌ a jawsenob.
14 Caj yiraj Jesús caj yaꞌaraj tiꞌob:
―Xenex ich ʌcʌtan sacerdote soc u yiriquechob jawechex.
Caj binob jaw iqꞌuer u caꞌob tiꞌ.
15 Tuririꞌ xib ich a diezoꞌ caj yiraj toc jawij,
rajen sutnʌjij ich Jesús.
Cꞌam caj awʌtnʌjij:
―Bayoꞌ Cꞌuj ―quij―,
caj a jawsajen.
16 Caj cꞌuchij ich Jesús caj xonrʌj caj yaꞌaraj:
―Bayoꞌ ―quij.
―Caj in jawsaj diez.
Tu binob a nuevejoꞌ?
18 Chen a jeꞌ turiꞌ xibaꞌ a cu tar ich tanxer ruꞌum wʌcꞌʌs tarij yaꞌaric tiꞌ Cꞌuj:
“Bayoꞌ.”
19 Jesús caj yaꞌaraj tiꞌ xib:
―Riqꞌuen caꞌ xiquech quireꞌ jawech quireꞌ caj a wacsaj ta wor ten.
Jesús cu tsicbar ber caꞌ bin tac u reyinticob Cꞌuj
20 Caj cꞌuchob u winiquirob judío a fariseojoꞌ ich Jesús.
Caj u cꞌatob:
―Ber caꞌ bin u reyintejob Cꞌuj?
21 Jesús caj u nuncaj tiꞌ:
―Mʌnaꞌ baꞌ cu bin yesic techex soc cꞌuchaꞌan a worex a werex tabar u reyinticob Cꞌuj.
Mʌnaꞌ mac cu bin yaꞌaric:
“Iric teꞌ yʌnaꞌ tan reyinticob Cꞌuj.
Baxuc tar yʌnoꞌ tan u reyinticob Cꞌuj.”
Quireꞌ toc tiꞌ yʌn bajeꞌrer tub yʌnechex tan u reyinticob Cꞌuj.
22 Jesús caj yaꞌaraj tiꞌ u camsʌwinicob:
―Caꞌ bin a pachtej a wirej a mac a cu bin tuchiꞌbir ten Cꞌuj.
Cax tuririꞌ u qꞌuinin ca wiriquex,
chen mʌꞌ a bin a wirexiꞌ.
23 Yʌn mac cu bin u yac techex:
“Iric tan u reyinticob teraꞌ”,
wa cu bin yaꞌaricob:
“Tan u reyinticob taroꞌ.”
Mʌꞌ ja sayʌrex tu pachob tu cu payiquechex.
24 An ten bic ca wiriquex u raram.
Seb cu sasichʌjʌr tu cotor caꞌanan.
Baxuc caꞌ bin taquen caꞌ bin cꞌuchuc tu qꞌuinin quireꞌ a tenoꞌ tu tuchiꞌtajen Cꞌuj,
baxuquenechexoꞌ.
Baxuc seb caꞌ bin raramnʌc baxuc tu cotor mac cu bin yiriquen.
25 Chen pʌyber quin bin in jach mucꞌyaj.
Bin u caꞌob u xumpꞌʌtiquenob u jach tsꞌurir sacerdote.
Baxuc a mac a cu camsicob u tꞌʌn Moisés.
Baxuc u tsꞌurirob u cajar u winiquirob judío.
Baxuc u winiquirob judío,
mʌꞌ yaꞌab.
Bin u caꞌob xumpꞌʌtiquenob quireꞌ mʌꞌ u yacsicob tu yorob ten.
26 An ten bic u qꞌuinin,
tiꞌ yʌn Noé uch,
baxuc cu bin u betej u qꞌuinin caꞌ bin urquen quireꞌ caj u tuchiꞌten Cꞌuj ―quij Jesús―.
27 Mʌꞌ ja wirej ―quij Jesús―,
a mac cʌjaꞌanob tu qꞌuinin Noé,
rajraꞌ tan u quiꞌ janʌnob.
Rajraꞌ tan u chꞌicob u yoꞌoch.
Rajraꞌ tan u tsꞌicob u pararob quir u raqꞌuinticob mac.
Hasta caj cꞌuchij tu qꞌuinin Noé,
caj oc ich chem caj tari yaꞌarir,
jach cꞌam.
A mac mʌꞌ rʌc ocob ich chem caj rʌc bint jaꞌ.
28 Baxuc caj betaꞌb u qꞌuinin cʌjaꞌan Lot ich Sodomajoꞌ.
A mac cʌjaꞌanob ich u cajar Sodoma,
rajraꞌ tan u janʌnob.
Rajraꞌ tan u yucꞌurob.
Rajraꞌ tan u canicob u baꞌtac.
Rajraꞌ tan u mʌnicob u baꞌtac.
Rajraꞌ tan u pʌqꞌuicob u nar.
Rajraꞌ tan u cꞌʌxicob yatochob.
29 Chen u qꞌuinin caj ruqꞌuij Lot tu cajar Sodoma Cꞌuj caj u chaj u tar cꞌacꞌ caꞌanan yejer tunich.
Erar u caꞌ an ten bic cu tar jaꞌ caꞌanan,
caj rʌc quinsaꞌbij ten cꞌacꞌ.
30 Baxuc caꞌ bin cꞌuchur tu qꞌuinin caꞌ bin urquen quireꞌ a tenoꞌ caj u tuchiꞌten Cꞌuj.
31 ’Caꞌ bin uruquen.
Wa tiꞌ yʌn xib ich u joꞌr yatoch tan u jesicob u bʌjob.
Quireꞌ tiꞌ taroꞌ u joꞌr yatoch taj,
chen u baꞌtac tiꞌ yʌn tu japnin yatoch.
Arej mʌꞌ u yeman u maric u baꞌtac.
Arej u toc pꞌʌtej.
Baxuc a mac tiꞌ yʌn tu cor cax mʌꞌ u sut tu yatoch.
32 Mʌꞌ wa cꞌajtechex baꞌ u ber tiꞌ u racꞌ Lot?
33 A maqueꞌ cu tucric u taꞌquic u bʌj soc mʌꞌ u mucꞌyaj soc mʌꞌ u quimin xan,
aroꞌ tar cu bin ich cꞌacꞌ.
Chen a mac a cu yac teꞌ yʌnenaꞌ quir in mucꞌyaj quir in quimin xan,
quir in yamtic Jesús.
Aroꞌ bin u caꞌ cuxtar munt qꞌuin.
34 ’Quin waꞌaric techex ―quij Jesús―,
soc a werex baꞌ u ber u qꞌuinin caꞌ bin uruquen.
Waj oqꞌuin quin wur.
Wa tiꞌ yʌn caꞌtur xib pꞌeriꞌ u wenenob.
Turiꞌ cu bin pʌybir ten yʌjmasir u tꞌʌn Cꞌuj.
Turiꞌ cu bin pꞌʌtbir.
35 Raꞌiriꞌ u qꞌuinin xan,
wa tiꞌ yʌn caꞌ tur xquic tan u juchꞌob tuririꞌ cu bin pʌybir ten yʌjmasirob u tꞌʌn Cꞌuj.
Tuririꞌ cu bin pꞌʌtbir.
36 Raꞌiriꞌ u qꞌuinin xan,
wa tiꞌ yʌn caꞌtur xib ich u cor.
Turiꞌ cu bin pʌybir ten yʌjmasirob u tꞌʌn Cꞌuj.
Turiꞌ cu bin pꞌʌtbir.
37 U camsʌwinicob caj tsꞌoc yubicob yaꞌaric Jesús a jeꞌ tꞌʌnaꞌ,
caj u cꞌatajob tiꞌ:
―Tu cu bin u betej aroꞌ,
Jaj Tsꞌurir?
Caj u nuncaꞌb tiꞌ,
caj u yaꞌaraj tu cu camsic tꞌʌn:
―A mac a mʌꞌ u cꞌat u quibicob u tꞌʌn Cꞌuj jeꞌ u cꞌuchur tu qꞌuinin cu bin tar u mucꞌyaj.