A cu bin jubsic carem naj ten u winiquirob romano
24
Jesús caj jocꞌ tu japnin carem naj tu cu naj cꞌujinticob Cꞌuj u winiquirob judío.
Toc bin u caꞌ caꞌch caj u jutsꞌob u bʌj u camsʌwinicob ich Jesús.
Caj yaꞌarajob:
―Iric carem naj.
Mʌꞌ wa quiꞌ cꞌʌxaꞌan carem naj?
2 Jesús caj u nuncaj tiꞌob:
―Cꞌʌꞌotex a jeꞌ carem naj bic tabar caj a wirex quireꞌ jach taj quin toc aric a wuꞌyex.
Caꞌ bin cꞌuchuc tu qꞌuinin cu bin jubsaꞌbir.
Mʌꞌ ju bin pꞌatʌr tunich tu tsꞌʌpaꞌan.
Mʌꞌ ja bin a wirex caꞌtur tsꞌʌpaꞌan.
Rajiꞌ cu bin yesic toꞌonex biqꞌuin bic tabar u xur tꞌʌn
3 Caj jocꞌ Jesús ich carem naj,
caj bin ich u joꞌr chan pꞌuc wits Olivos.
Jesús caj curʌj.
Tiꞌ curaꞌan Jesús,
caj u jutsꞌob u bʌj u camsʌwinicob ich Jesús soc tu junanob cu yubicob.
―Tar in cꞌatob a toc aric tenob wa ber caꞌ bin jubsac carem naj.
Biquiraꞌ carem naj caꞌ bin cꞌuchuc tu qꞌuinin cu xur tꞌʌn caꞌ bin urquech?
4 Caj u nuncaj Jesús caj yaꞌaraj:
―Quiꞌ cʌnantex a bʌj soc mʌnaꞌ mac cu tar u tusiquex.
5 Quireꞌ yaꞌab mac cu bin u tus aric:
“Cristojen quireꞌ caj u tuchiꞌtajen Cꞌuj.
Rajen quin tar quir in taquic tu cotor mac.”
Yaꞌab mac cu bin u quibicob a baꞌ cu yaꞌaric tus Cristo.
6 Raꞌ u qꞌuininoꞌ caꞌ bin a wuꞌyiquex u jumintac:
“Tan u quinsicob u bʌj ich u jer ruꞌum.”
Cax tub yʌnechex caꞌ bin u quinsicob u bʌj.
Jeꞌ a wuꞌyiquex tabar u quinsicob u bʌj.
Mʌꞌ ja chꞌaquex sajaquirex quireꞌ yʌn u tar u quinsicob u bʌj.
Cax cu manob u quinsicob u bʌj.
Mʌꞌ toy cꞌuchuc tu qꞌuinin u xur tꞌʌn.
7 Raꞌ u qꞌuininoꞌ ca wuꞌyiquex cu tsꞌictarob winic ich jumpet ruꞌum.
Cu bin u quinsicob u bʌj yejer u winiquirob ich jumpet ruꞌum.
Bayiriꞌ jeꞌ u wichʌjʌrob xan ich jumpet ruꞌum.
Cax jach bʌytʌc cu bin u wichʌjʌjrob.
Bayiriꞌ yʌn u tar u yajir.
Bayiriꞌ jeꞌ a wuꞌyiquex u pec u chꞌic yum ruꞌum.
8 Tu cotor aroꞌ tan u mucꞌyaj.
Rajiꞌ u yʌnx chꞌic chun u mucꞌyaj a cu bin tar ich yocꞌocab.
9 ’A raꞌ u qꞌuininoꞌ cu bin u pꞌastiquechex,
quireꞌ caj a wacsex ta worex tiꞌ ten.
Rajen cu bin u taꞌquicob a joꞌrex.
Rajen cu bin u chuquicob a pachex.
Bayiriꞌ cu bin u quinsiquechex.
Baxuc tu cotor mac xan.
10 Quireꞌ aroꞌ,
a raꞌ u qꞌuininoꞌ yaꞌab mac cu bin u pꞌʌtejob u yacsicob tu yorob.
Jeꞌ u bin u pꞌacticob u bʌj.
Jeꞌ u taꞌquic u joꞌr u racꞌob ʌcʌtan u jach tsꞌurirob u cajarob.
11 A raꞌ u qꞌuininoꞌ,
yaꞌab mac cu bin tar quir u tusaricob tuchiꞌtac ten Cꞌuj quir u tus camsicob a pimoꞌ.
Yaꞌab mac cu bin u quibicob.
12 A raꞌ u qꞌuininoꞌ,
yaꞌab mac cu bin manob tu cꞌasir.
Jach mananob tu cꞌasir.
Rajen a mac a cu manob tu tsoyir mʌꞌ u neyajquinticob u racꞌob.
13 A mac a mʌꞌ ju pꞌʌticob u quibicob in tꞌʌn hasta caꞌ bin manac a jeꞌ mucꞌyaj a tin waꞌaraj.
Raꞌ cu bin tacbir ten Cꞌuj.
14 Mʌꞌ toy cꞌuchuc tu qꞌuinin u xur tꞌʌn,
quireꞌ yʌn u man u tsecꞌticob u jach tsoyir u tꞌʌn an ten bic cu bin u reyintejob Cꞌuj caꞌanan.
Bin u caj tsecꞌtic ich tu cotor mac ich yocꞌocab soc yerob tu cotor mac tu cʌjaꞌanob.
Raꞌ u qꞌuinin caꞌ bin tsꞌocac u tsecꞌticob raꞌ u qꞌuinin cu bin xur tꞌʌn.
15 Caj yaꞌaraj Jesús tiꞌ u camsʌwinicob:
―Caj u tsꞌibtaj Daniel a caj u tsecꞌtaj u tꞌʌn Cꞌuj uch.
Raꞌ tu tsecꞌtaj uch:
“Wa ca wiriquex a baꞌ jach cꞌas chꞌicaꞌan ich u japnin carem naj tu cu naj cꞌujinticob Cꞌuj u winiquirob judío.
Quiꞌ tucrex,
quij Daniel,
quireꞌ rajiꞌ cu bin u cꞌasquintic u winiquirob israel.”
16 A ray u qꞌuininoꞌ ca wiriquex aroꞌ,
joqꞌuenex ta putsꞌurex ich u joꞌr wits.
Wa cʌjaꞌanechex ich u ruꞌumin Judea,
sebquintex a toc putsꞌurex.
17 A ray u qꞌuininoꞌ wa tiꞌ yʌn mac tu joꞌr yatoch tu taj u joꞌr yatoch.
Arex tiꞌ mʌꞌ tsoy u yocar u chꞌic u baꞌtac.
Arex u toc putsꞌur.
18 A ray u qꞌuininoꞌ wa tiꞌ yʌn mac ich u cor.
Arex mʌꞌ u sut u chꞌic u nocꞌ.
Arex u toc putsꞌur.
19 A ray u qꞌuininoꞌ,
jach otsirchʌjij a xquic a tabar u rochic u chan ochir.
Bayiriꞌ a xquicoꞌ,
a cu tsꞌic u chuch tiꞌ chan ochir.
20 A ray u qꞌuininoꞌ,
tꞌʌnex Cꞌuj soc mʌꞌ raꞌ u qꞌuinin a putsꞌurex tu qꞌuinin queꞌer.
Quireꞌ mʌꞌ ju cꞌuchur a worex a mucꞌtiquex queꞌer.
Tꞌʌnex Cꞌuj soc mʌꞌ ray u qꞌuinin tu ca jesiquex a bʌj.
21 Quireꞌ a ray qꞌuininoꞌ,
jach manan cu bin u mucꞌyajob winic.
U jer winic mʌꞌ u nemucꞌyajob an ten bic cu bin u mucꞌyajob u winiquirob tu qꞌuinin cu bin xur tꞌʌn.
Mʌꞌ biqꞌuin yubmʌnob.
22 A ray u qꞌuininoꞌ,
wa Cꞌuj u cꞌat u chaꞌic coch u pach qꞌuin soc omaꞌan cu bin mucꞌyaj.
Mʌnaꞌ mac cu bin pꞌatʌrob.
Chen tabar u mucꞌyajob,
quireꞌ tiꞌ yʌnob a toc tetaꞌb ten Cꞌuj quireꞌ yajbir ten Cꞌuj.
23 ’Caꞌ bin cꞌuchuc a ray u qꞌuininoꞌ wa mac cu bin yaꞌaric:
“Ire wirex Cristo toc cꞌuchij quir u taquic mac tu cotor.”
Mʌꞌ a quibiquex a baꞌ cu yaꞌaricob.
Cax cu yaꞌaricob:
“A ray Cristojoꞌ.”
24 Quireꞌ a ray u qꞌuininoꞌ,
yaꞌab cu bin tar quir u tusaricob tiꞌ u racꞌob:
“A tenoꞌ taren ich yocꞌocab quir in taquic mac quireꞌ caj u tuchiꞌten Cꞌuj.”
Tu cu tusaricob tiꞌ mac jeꞌ u tus esicob carem beyaj tiꞌ u racꞌob xan.
Cax a mac tetaꞌb ten Cꞌuj orac u quibicob quireꞌ cu tus esicob carem beyaj,
quireꞌ baxuc u cꞌatob,
chen mʌꞌ ju cꞌuchur u yorob tiꞌ.
25 Jesús caj yaꞌaraj tiꞌ u camsʌwinicob:
―Quin toc aric techex a jeꞌ tꞌʌnaꞌ soc a toc erex a baꞌ cu bin tar biqꞌuin soc mʌꞌ u jacꞌarex a worex.
26 Rajen a ray u qꞌuininoꞌ jeꞌ u yaꞌaric techex:
“Tiꞌ yʌn Cristo ich tʌcay ruꞌum.”
Bayiriꞌ jeꞌ u tusaricob techex:
“Tiꞌ yʌn Cristo teraꞌ ich yatoch.”
Mʌꞌ ja yʌn quibiquex xan.
27 Jeꞌ a wiriquex in wuꞌur,
a tenoꞌ taren in yamtic mac tu cotor,
teraꞌ ich yocꞌocab an ten bic a wiriquex u raram ich caꞌanan.
Mʌꞌ ja wirej,
sasir cu raram soc chʌcaꞌan yiric tu cotor mac ten quin tar.
28 Ray u qꞌuininoꞌ,
a mac yʌn u siꞌpir yʌn u boꞌotic u boꞌorir u siꞌpir mʌꞌ tu cu putsꞌur.
Bic tabar caꞌ bin uruc u parar Cꞌuj
29 Caj yaꞌaraj Jesús tiꞌ u camsʌwinicob:
―A ray u qꞌuininoꞌ,
tabar u tsꞌocar u mucꞌyaj a winiquiroꞌ.
Jeꞌ yacꞌbirchʌjʌr qꞌuin.
Mʌꞌ u sasichʌjʌr.
Bayiriꞌ ic nʌꞌ xan,
jeꞌ yacꞌbirchʌjʌr.
A saꞌaboꞌ cu bin yiricob irej wa tan u rʌc rubur.
Tu cotor a baꞌ yʌn ich caꞌanan cu chaꞌic u pec Cꞌuj.
30 A ray u qꞌuininoꞌ,
jeꞌ yesic carem beyaj Cꞌuj ich caꞌanan soc yer mac tu cotor tan in wuꞌur,
a tenoꞌ quir in yamtic mac tu cotor.
Tu cotor mac a tiꞌ cʌjaꞌan ich yocꞌocab cu bin u yacꞌticob u bʌj,
quireꞌ cu yiricob in wuꞌur ich u muyar yejer jach chich in mucꞌ.
Yejer u sasirir Cꞌuj quin bin ur.
31 Caꞌ bin uruquen,
jeꞌ yubicob u jum caꞌ bin usac ten yʌjmasir u tꞌʌn Cꞌuj.
Cꞌam cu bin yubicob.
Jeꞌ in tuchiꞌtic u yʌjmasirob u tꞌʌn Cꞌuj quir u muchꞌquintaꞌr a mac caj in tetaj ich yocꞌocab.
Cax tu yʌnob tiꞌ cu bin u muchꞌquintaꞌr.
32 ’A werex cu jutur u reꞌ cheꞌ quir u topꞌʌncʌr,
quireꞌ tan yocar yaxqꞌuin.
33 An bic taj aroꞌ,
bayiriꞌ xan baꞌ ca wiriquex a baꞌ caj in camsajechex sam tan u tar.
Jeroj tabar u xur tꞌʌn.
34 Jesús caj yaꞌaraj tiꞌ u camsʌwinicob:
―Taj quin waꞌaric techex.
Tiꞌ yʌn mac bajeꞌrer.
Raꞌ cu bin cuxtarob hasta cu yiricob a baꞌ caj in toc araj techex cu tar ich tu yʌnechex.
35 A caꞌananoꞌ,
jeꞌ u rʌc tsꞌocareꞌ a jeꞌ ruꞌumaꞌ jeꞌ u rʌc tsꞌocareꞌ xan.
Chen in tꞌʌnoꞌ mʌꞌ u bin tsꞌocar quireꞌ yʌn u toc rʌc nupꞌur in tꞌʌn ich yocꞌocab.
36 ’Chen a ray u qꞌuinin cu bin tar a baꞌ caj in toc araj techex.
Mʌnaꞌ mac yer wa ber u tar,
cax yʌjmasirob u tꞌʌn Cꞌuj.
Mʌꞌ u parar Cꞌuj yer,
chen u bʌjiriꞌ Cꞌuj yer wa ber u tar.
Rajen mʌnaꞌ mac yer wa ber hora cax beqꞌuin.
37 ’Caꞌ bin uruquen a tenoꞌ quir in yamtic mac tu cotor.
Cu bin tar an ten bic tu qꞌuinin cuxaꞌan Noé uch yejer u racꞌob caj rʌc burob.
38 U racꞌob Noé rajraꞌ quiꞌ yorob tan u janʌnob,
cu quiꞌ ucꞌurob xan.
Baxuc caj man u cʌxtob u racꞌ u parar.
Cax rajraꞌ caj u betob hasta oquij Noé ich u chem.
Mʌꞌ tu najtajob quireꞌ seb caj tar yaꞌarir.
Caj u yʌnxchun u burur.
Rajen rʌc quimij u racꞌob Noé.
39 Baxuc caꞌ bin uruquen a tenoꞌ taren in yamtic mac tu cotor.
Cax wa tan u janʌnob.
Cax tan yucꞌurob.
Mʌꞌ ju bin u najticob wa ber caꞌ bin uruquen a mac tan u man tu cꞌasir,
quireꞌ a baꞌ cu yiricob.
40 Ray u qꞌuinin caꞌ bin uruquen cax wa caꞌturoꞌ tan u beyajob ich u cor.
Caꞌ bin tac yʌjmasirob u tꞌʌn Cꞌuj,
jeꞌ u pʌyʌr tuririꞌ a caj u yacsaj tu yor.
Tuririꞌ cu bin pꞌatʌr.
41 Baxuc xan xquic.
Cax wa caꞌturoꞌ tan u juchꞌob.
Chen jeꞌ u payʌr tuririꞌ ten yʌjmasirob u tꞌʌn Cꞌuj.
Tuririꞌ cu pꞌatʌr xan.
42 ’Quiꞌ pajex u qꞌuinin wa ber caꞌ bin uruquen ―quij Jesús―.
Quireꞌ mʌꞌ a werex caꞌ bin uruquenex a Jaj Tsꞌurirenex.
43 Quiꞌ cʌnex a baꞌ quin bin in camsic techex.
Irej a mac cu tar yaꞌcric a baꞌtac.
Wa mac rajiꞌ yʌnin yatoch yer wa ber cu tar aꞌcraꞌbir u baꞌtac ten mac.
Acꞌbir cu pajic u tar soc mʌꞌ u chaꞌic yaꞌcraꞌr u baꞌtac.
Rajen cʌnex u jach tsꞌurir yatoch.
44 Baxuc techex,
caꞌ a quiꞌ pajenex quireꞌ seb caꞌ bin uruquen a tenoꞌ taren in yamtic mac tu cotor.
Wa raꞌ u qꞌuinin mʌꞌ ja pajiquenex.
Jesús cu camsic u cꞌurew mac bic tabar u pajic u jach tsꞌur
45 Caj yaꞌaraj Jesús tiꞌ u camsʌwinicob:
―Uꞌyex baꞌ quin waꞌaric techex bajeꞌrer.
Tiꞌ yʌn u cꞌurew mac cu nequiꞌ quibic u tꞌʌn u jach tsꞌurir.
Caj bin u jach tsꞌurir ich jumpet ruꞌum.
Caj araꞌb tiꞌ ten u jach tsꞌurir:
“Quiꞌ cʌnantej a wet cꞌurewirob.
Quiꞌ jansej a baꞌ quiriꞌ u cꞌatob.
Quiꞌ irej u beyajob a wet cꞌurewirob.”
Caj bin u jach tsꞌurir.
46 Jach quiꞌ yor u cꞌurew u jach tsꞌurir a rajraꞌ cu quibic u tꞌʌn u jach tsꞌurir hasta cu yuꞌur u jach tsꞌurir.
47 Taj quin waꞌaric techex ―quij Jesús―.
Wa tu quiꞌ quibaj u tꞌʌn u jach tsꞌurir a cꞌurewoꞌ.
Jeꞌ u quiꞌ tsꞌabʌr u mucꞌ tiꞌ quir u cʌnantic a baꞌquir yʌn tiꞌ u jach tsꞌurir.
48 Chen wa ju cꞌurew cu tucric mʌꞌ seb cu bin yuꞌur u jach tsꞌurir.
49 Rajen cu yʌnxchun u cʌrʌxbetic tiꞌ u yet cꞌurewirob.
Bayiriꞌ u cꞌurew cu jocꞌar janʌn.
Bayiriꞌ cu jocꞌar yucꞌur yet a mac cʌraꞌanob.
50 U jach tsꞌurir seb caꞌ bin caꞌ uruc raꞌ u qꞌuinin u cꞌurew mʌꞌ tan u pajic yuꞌur u jach tsꞌurir.
51 Caꞌ bin uruc u jach tsꞌurir jeꞌ u jach jʌtsꞌic u cꞌurew.
Jach yaj cu bin yubic an ten bic Cꞌuj cu bin jocꞌsic a mac cu tusaric tiꞌ u racꞌob.
Mʌꞌ ja wirej,
irob a mac a mʌꞌ tu cꞌʌmajob u tꞌʌn Cꞌuj.
Jeꞌ u bin mucꞌyaj ich cꞌacꞌ.
Tiꞌ cu bin yacꞌticob u bʌj ich cꞌacꞌ.
Tu cu bin mʌmʌx chiꞌicob u yacꞌ ich cꞌacꞌ.