Jesús cu yaꞌaric bin u caj jubur carem naj tu cu naj cꞌujinticob Cꞌuj u winiquirob judío
13
Quireꞌ cu jocꞌar Jesús tu japnin carem naj tu cu naj cꞌujinticob Cꞌuj u winiquirob judío.
Toc bin u caj uch,
caj u jutsꞌaj u bʌj tuririꞌ u camsʌwinicob ich yicnʌn Jesús.
Caꞌ araꞌb tiꞌ:
―In wʌjcamsʌyʌjirech,
chaꞌantej biquiraꞌ a tunichob.
Mʌꞌ wa jach caremoꞌ?
Chaꞌantej biquiraꞌ a najoboꞌ mʌꞌ jach carem xan?
San Marcos 13.1-27
2 Jesús caj u nuncaj,
caj u yaꞌaraj tiꞌ:
―Cꞌʌꞌotej tech a jeꞌ carem najaꞌ bic tabar caj a wirajiꞌ quireꞌ jach taj quin toc aric a wuꞌyej,
caꞌ bin cꞌuchuc tu qꞌuinin cu bin jubsaꞌbir.
Mʌꞌ u pꞌat tunich tub tsꞌʌpaꞌan,
mʌꞌ a bin a wirej caꞌtur tsꞌʌpaꞌan.
Bin rʌc jubucob a carem najoboꞌ.
A cu yesic tabar u xur tꞌʌn
3 Caj jocꞌ Jesús ich carem naj caj bin ich u joꞌr chan pꞌuc witsir Olivos,
Jesús caj curʌj,
ʌcʌtan tiꞌ a carem najoꞌ tu cu naj cꞌujinticob Cꞌuj u winiquirob judío,
quireꞌ cu pʌctic a carem najoꞌ,
barej caj u jutsꞌob u bʌj u camsʌwinicob Pedro yejer Jacobo yejer Juan yejer Andrés soc tu junanob cu yubicob:
4 ―Tarenob in cꞌatob a toc aric tenob ber caꞌ bin jubsac carem naj?
Biquiraꞌ carem naj caꞌ bin cꞌuchuc tu qꞌuinin cu xur tꞌʌn caꞌ bin urquech?
5 Caj nuncaꞌb tiꞌob ten Jesús caj u yʌnx chun u yaꞌaric:
―Quiꞌ cʌnantex a bʌjex soc mʌnaꞌ mac cu tar u tusaric techex,
soc u pʌyicob techex caꞌ a quibiquex a baꞌ cu tusaricob techex.
6 Quireꞌ yaꞌab mac cu bin tarob ich in cꞌabaꞌ,
tan yaꞌaricob:
“A tenoꞌ a Cristojenoꞌ.”
Rajen cu bin u beticob caꞌ a quibexob a baꞌ cu tusaricob techex.
7 Chen ber caꞌ bin a wuꞌyejex u jumintaꞌrob:
“Tan u quinsicob u bʌj ich u jer ruꞌum”,
cax tu yʌnechex xan,
caꞌ bin u quinsicob u bʌj.
Jeꞌ a wuꞌyiquex tabar u quinsicob u bʌj xan.
Cax tan u manob u quinsicob u bʌj,
mʌꞌ a chꞌaquex sajaquirex,
quireꞌ yʌn u tar u quinsicob u bʌj an ten bic u cꞌat Cꞌuj.
Mʌꞌ toy cꞌuchuc tu qꞌuinin u xur tꞌʌniꞌ.
8 Raꞌ u quininoꞌ ca wuꞌyiquex cu tsꞌictarob winiquirob ich jumpet ruꞌum.
Cu bin u quinsicob u bʌj yejer u winiquirob ich jumpet ruꞌum.
Bayiriꞌ xan,
u ruꞌumin tu reyintaꞌb ten rey cu bin u quinsicob u bʌj yejer u jer ruꞌum tu reyintaꞌb ten u jer rey.
Bayiriꞌ,
jeꞌ a wuꞌyiquex u pec chꞌic yum ruꞌumin ich u jerob yaꞌab ruꞌumob.
Bayiriꞌ jeꞌ u wichʌjʌrob xan ich jumpet ruꞌum,
cax baytʌc cu bin u wichʌjʌrob.
Rajiꞌ u yʌnx chꞌic chun u mucꞌyaj a cu bin tar ich yocꞌocab.
9 ’Barej a techexoꞌ yʌn cʌnatechex a bʌj.
Quireꞌ bin cꞌubuquechex quir u tocar a joꞌrex tu cu naj muchꞌquinticob u bʌj tu cotor u jach tsꞌurirob u winiquirob judío.
Jeroj tuneꞌ,
bin u caj u jʌtsꞌicob a pachex ich u chan najir tu cu naj cꞌujinticob Cꞌuj u winiquirob judío.
Tiꞌ cu bin u chopʌytiquechexob quir u bin u puriquechexob ʌcʌtan rey yejer ich gobernador quir u taquiquex a joꞌrex quireꞌ caj a wacsaj ta worex tiꞌ ten,
soc cꞌuchaꞌan a worex a waꞌariquex baꞌ u ber tiꞌ techex.
10 Mʌꞌ ja wirej,
mʌꞌ toy cꞌuchuc tu qꞌuinin u xur a tꞌʌnoꞌ u jach tsoyir u tꞌʌn Cꞌuj cu yʌn batꞌan tsecꞌtaꞌr ich tu cotor mac cax tu cʌjaꞌanob.
11 Ber caꞌ bin chucuquechex caꞌ cꞌubuquechex ʌcʌtan a juezoꞌ quir u taquiquex a joꞌrex.
Mʌꞌ ja tucriquex baꞌ ca bin a waꞌariquex tiꞌob,
cax mʌꞌ toy xiquechex ʌcʌtan a mac a cu bin u taquiquex a joꞌrex.
Barej cu bin tsꞌabir techex a ray a qꞌuininoꞌ,
raꞌ ca waꞌariquex quireꞌ mʌꞌ techex ca tꞌʌnexiꞌ wa mʌꞌ a Tajꞌor u Pixam Cꞌujoꞌ.
12 Mʌꞌ chen a mac a cu pꞌactiquechex cu bin u chuquicob a pachex,
a tet yejer a nʌꞌ cax a bʌjob jeꞌ u cꞌubiquechexob,
baxuc jeꞌ u quinsiquechexob.
Baxuc xan,
u wʌcꞌʌs pararob cu bin u cꞌubicob u tet yejer u nʌꞌ soc u quinsaꞌrob.
13 Quireꞌ techex caj a wacsajex ta worex ten,
tu cotor mac cu bin u pꞌactiquechexob,
jeꞌ u tsꞌabʌr techex a cuxtarex munt qꞌuin wa rajraꞌ ca mucꞌtiquex a baꞌ cu tar techex tu cu chuquicob a pachex.
14 ’Mʌꞌ ja wirej,
caj u tsꞌibtaj Daniel a tsꞌab u tucuric ten Cꞌuj quir u tsꞌibtic a baꞌ u cꞌat Cꞌuj uch.
Raꞌ caj u tsecꞌtaj uch:
“Wa ber ca wiriquex a baꞌ jach cꞌas chꞌicaꞌan ich u japanin carem naj tu cu naj cꞌujinticob Cꞌuj u winiquirob judío tu mʌꞌ tsoy u chꞌictaroꞌ quireꞌ mʌꞌ raꞌ u beyaj.
Quiꞌ tucriquex ―quij Daniel―,
quireꞌ rajiꞌ cu bin u cꞌasquintic u winiquirob Israel.”
Jeroj tuneꞌ,
arej tiꞌob a mac a tiꞌ yʌnob tu ruꞌumin Judea a ray u qꞌuininoꞌ caꞌ putsꞌucob ich wits.
15 A ray u qꞌuininoꞌ wa tiꞌ yʌn mac tu joꞌr yatoch tu taj u joꞌr yatoch.
Arex tiꞌ mʌꞌ tsoy u yocar u chꞌic u baꞌtac.
Arex u toc putsꞌur.
16 A ray u qꞌuininoꞌ wa tiꞌ yʌn mac ich u cor.
Arex mʌꞌ u sut u chꞌic u nocꞌ.
17 A ray u qꞌuininoꞌ jach otsirchʌjij a xquicoꞌ a tabar u rochic u chan ʌrʌcꞌ ochir.
Bayiriꞌ a xquic a cu tsꞌic chuch tiꞌ chan ʌrʌcꞌ och.
18 A ray u qꞌuininoꞌ tꞌʌnex Cꞌuj soc mʌꞌ raꞌ u qꞌuinin a putsꞌurex tu qꞌuinin queꞌer,
quireꞌ mʌꞌ a cꞌuchur a worex a mucꞌtiquex queꞌer.
19 Quireꞌ a ray u qꞌuininoꞌ,
jach manan cu bin mucꞌyajob a ra winiquiroboꞌ.
U jer winiquirob mʌꞌ u ne mucꞌyajob an ten bic cu bin u mucꞌyajob a ra winiquiroboꞌ tu qꞌuinin cu bin xur tꞌʌn.
Mʌꞌ biqꞌuin yubmʌnobiꞌ ra u qꞌuinin caj betaꞌb a ich yocꞌocaboꞌ tu chꞌic chun uch.
Mʌꞌ caꞌ bin tac u jer u qꞌuinin a baxucoꞌ.
20 A ray u qꞌuininoꞌ wa Jaj Tsꞌur u cꞌat u chaꞌic u cochtar u pach qꞌuin soc amaꞌan cu bin mucꞌyajob a ra winiquiroboꞌ,
mʌnaꞌ mac cu bin pꞌatʌrob.
Chen tabar u mucꞌyajob quireꞌ tiꞌ yʌnob a mac a toc tetaꞌb ten Cꞌuj quireꞌ yajbir ten Cꞌuj.
21 ’Caꞌ bin cꞌuchuc a ray u qꞌuininoꞌ wa mac cu bin yaꞌaric:
“Irewirex,
Cristo toc cꞌuchij quir u taquic mac tu cotor.”
Mʌꞌ a quibex a baꞌ cu yaꞌaricob.
Cax cu yaꞌaricob:
“A ray Cristojoꞌ.”
22 Quireꞌ a ray u qꞌuininoꞌ yaꞌab cu bin tarob quir u tusaricob tiꞌ u racꞌob:
“A tenoꞌ taren ich yocꞌocab quir in taquic mac,
quireꞌ tu tuchiꞌten Cꞌuj.”
Tu cu tusaricob tiꞌ mac jeꞌ u tus esicob carem beyaj xan.
Cax a mac a tetaꞌb ten Cꞌuj orac u quibicob quireꞌ cu tus iricob carem beyaj,
quireꞌ baxuc u cꞌatob,
chen mʌꞌ u cꞌuchur u yorob tiꞌ.
23 Quin toc aric techex a jeꞌ tꞌʌnaꞌ soc a toc erex a baꞌ cu bin tar biqꞌuin soc mʌꞌ u jacꞌʌr a worex.
Bic tabar caꞌ bin urac u parar Cꞌuj
24 Caj yaꞌaraj Jesús tiꞌ u camsʌwinicob:
―A ray u quininoꞌ a tabar u tsꞌocar u mucꞌyaj a winiquiroboꞌ.
Jeꞌ u yacꞌbirchʌjʌr qꞌuineꞌ.
Mʌꞌ u sasichʌjʌr.
Bayiriꞌ,
ic nʌꞌ mʌꞌ u bin u tsꞌabir u sasirir.
25 A saꞌaboꞌ,
cu bin yiricob irej wa cu rʌc rubur.
Tu cotor baꞌ a tiꞌ yʌn ich caꞌananoꞌ cu chaꞌic u pec Cꞌuj.
26 Jeroj tuneꞌ,
cu bin yiricob in wuꞌur a tenoꞌ a mac bayxuquenechexoꞌ.
Bin u yiriquenob quin tar tu muyʌrir yejer jach chich in mucꞌ,
yejer u sasirir Cꞌuj quin wuꞌur.
27 Jeroj tuneꞌ,
bin tuchiꞌtac ten Cꞌuj u yʌjmasirob u tꞌʌn quir u bin u muchꞌquintaꞌrob a mac caj in tetajob ich yocꞌocab,
cax tu yʌnob,
tiꞌ cu bin u muchꞌquintaꞌrob.
28 ’Cʌnex a baꞌ cu camsicoꞌonex cheꞌer higuera.
A werex cu jutꞌur u reꞌ cheꞌ quir u topꞌʌncʌr quireꞌ cu yocar yaxqꞌuin,
taj an ten bic aroꞌ.
San Marcos 13.28-37
29 Bayiriꞌ xan,
ber ca wiriquex a baꞌ caj in camsajechex sam cu tar,
jeroj tabar u xur tꞌʌn.
30 Cꞌaj techex a jeraꞌ,
quireꞌ taj quin waꞌaric techex.
Tiꞌ yʌn mac bajeꞌrer,
raꞌ cu bin cuxtarob tac cu yiricob a baꞌ caj in toc araj techex cu tar ich tu yʌnechex.
31 A caꞌananoꞌ jeꞌ u rʌc tsꞌocareꞌ,
a jeꞌ ruꞌumaꞌ jeꞌ u rʌc tsꞌocar xan.
Chen in tꞌʌnoꞌ mʌꞌ u bin tsꞌocar quireꞌ yʌn u toc rʌc nupur in tꞌʌn ich yocꞌocab.
32 ’Chen ber cu bin tar a baꞌ caj in toc araj techex,
mʌnaꞌ mac yer ber u tar.
Cax u yʌjmasirob u tꞌʌn Cꞌuj,
cax u parar Cꞌuj mʌꞌ yer,
chen u bʌjiriꞌ Cꞌuj yer ber u tar.
Rajen mʌnaꞌ mac yer ber hora,
cax ber u qꞌuinin mʌꞌ yer.
33 ’Quiꞌ cʌnatex a bʌj,
quiꞌ pꞌiric a wichex caꞌ a tꞌʌnejex Cꞌuj soc mʌꞌ u nayʌr a worex.
Quireꞌ mʌꞌ a werex biqꞌuin quin tar ―quij Jesús―.
34 Aroꞌ irej a xib a caj jocꞌ quir u bin nachir.
Caj u pꞌʌtaj u yatoch,
caj u tsꞌajaj u mucꞌ tiꞌ u cꞌurewob,
caj u jʌsaj jujuntur u beyajob,
caj u tuchiꞌtaj a mac a cu cʌnantic u jor yatoch tu cu naj ocar mac tu yatoch,
caj yaꞌaraj tiꞌ caꞌ u quiꞌ pꞌirej u wich soc yiric u yuꞌur u jach tsꞌurir.
35 Quiꞌ pꞌirej a wichex tun,
quireꞌ mʌꞌ a werex ber caꞌ bin tac u jach tsꞌurir a najoꞌ,
wa jix tiꞌ oqꞌuin cu yuꞌur,
wa jix tiꞌ chumuc acꞌbir cu yuꞌur,
wa jix tiꞌ caꞌ bin cꞌayʌnʌc cax cu yuꞌur,
wa jix tiꞌ aꞌaꞌcbir cu yuꞌur.
36 Mʌꞌ ja wirej,
wa jix tiꞌ seb cu yuꞌur caꞌ bin uruc jeroj cu yiric techex wenʌn a caꞌex.
37 A baꞌ quin waꞌaric techexaꞌ,
quin waꞌaric tiꞌ tu cotor mac:
“Quiꞌ pꞌirex a wichex.”