Quireꞌ Jesús cu yiric cu butꞌic taqꞌuin tu cu naj cꞌujinticob Cꞌuj a quimen u mamoꞌ
21
Jesús caj u yiraj tan u butꞌicob u taqꞌuin a mac neyʌn u taqꞌuin tu cuchir tu cu naj butꞌicob u taqꞌuin tu cu naj cꞌujinticob Cꞌuj u winiquirob judío.
Raꞌ taqꞌuin tiꞌ carem naj tu cu naj cꞌujinticob Cꞌuj.
Lucas 21.1-38
2 Caj u yiraj xan xquic a quimen u mamoꞌ otsir caj u butꞌaj u majan taqꞌuin,
caꞌtur chʌc taqꞌuin a mʌꞌ cojiꞌ.
3 Caj yaꞌaraj Jesús tiꞌ:
―Taj quin wac techex.
A jeꞌ xquicaꞌ a quimen u mamoꞌ cax otsir.
Chen caj u butꞌaj caꞌtur u chʌc taqꞌuin a mʌꞌ cojiꞌ chen ʌcʌtan tu wich Cꞌuj coꞌoj caj u butꞌaj.
Chen u racꞌob cax yaꞌab caj u butꞌajob chen ʌcʌtan tu wich Cꞌuj mʌꞌ coꞌojiꞌ.
4 A mac neyʌn u taqꞌuinob caj u butꞌob u taqꞌuin tu nanij cu butꞌicob u taqꞌuin tu cuchir tu cu naj cꞌujinticob Cꞌuj.
Quireꞌ jach manan yaꞌab caj u butꞌob quireꞌ jach manan tꞌaj u taqꞌuin chen raꞌ caj u butꞌob quireꞌ mʌꞌ u rʌc cꞌʌnicobeꞌ u taqꞌuin.
Chen a xquicoꞌ a otsiroꞌ caj u toc rʌc butꞌaj tiꞌoꞌ u taqꞌuin cax mʌnaꞌ tu cu mʌnic yoꞌoch.
Jesús cu yaꞌaric bin u caꞌ juburob carem naj tu cu naj cꞌujinticob Cꞌuj
5 Tiꞌ yʌn mʌꞌ yaꞌab mac caj yaꞌaraj tiꞌ Jesús:
―Ira wirej,
jach tsoy tu tsꞌʌpaꞌan u tunichir carem naj.
Baxuc u tunichir tiꞌ Cꞌuj a tsꞌabij ten,
mʌꞌ yaꞌab u winiquirob judío,
quireꞌ cu sʌjticob Cꞌuj.
Chen Jesús caj u yaꞌaraj tiꞌob:
6 ―A ca wiriquex carem naj caꞌ bin cꞌuchuc tu qꞌuinin jeꞌ u rʌc jubsaꞌ ten mac.
Cu bin u rʌc pipichꞌinticob,
mʌꞌ ju bin pꞌatʌr caꞌtur tsꞌʌpric.
Jesús cu tsicbʌtic a baꞌ cu bin yesic caꞌ bin xuruc tꞌʌn
7 U camsʌwinicob caj u cꞌatob tiꞌ Jesús:
―In wʌjcamsʌyʌjirech ―quij―,
ber caꞌ bin jubuc a caj a waꞌaraj?
Baꞌ cu bin u yesic toꞌon xan wa tabar u xur tꞌʌn?
8 Jesús caj yaꞌaraj tiꞌob:
―Quiꞌ cʌnantex a bʌj ―quij Jesús―,
quireꞌ jeꞌ u tar mac u tusiquechex.
Mʌꞌ a quibiquex aroꞌ.
Quireꞌ cu bin yaꞌaricob:
“A tenoꞌ Cristojen,
caj u tuchiꞌten Cꞌuj.”
Tan yaꞌaric:
“Tabar u xur tꞌʌn.”
Chen mʌꞌ ja yʌn sayʌrex tu pach.
9 Mʌꞌ ja chꞌiquex sajquir ―quij Jesús―,
wa tan a wuꞌyiquex tan u quinsicob u bʌj.
Cax wa cu wuꞌyiquex bin u caꞌ quinsicob u bʌj.
Rajiꞌ cu yʌnxchun u tar u quinsicob u bʌj chen mʌꞌ toy xuruc tꞌʌniꞌ.
10 Jesús caj u yaꞌaraj tiꞌob:
―Mʌꞌ toy cꞌuchuc tu qꞌuinin u xur tꞌʌniꞌ A jeꞌ u ruꞌumin tu cʌjaꞌanob mac.
Jeꞌ u tsꞌictar mac ich u ruꞌumin tu cʌjaꞌanob mac.
Baxuc xan,
mac ich u chan cajar.
Bin u caj tsꞌictarob yejer mac ich u jerob u chan cajarob.
11 Mʌꞌ toy xuruc tꞌʌn,
cax cu chen pec u ruꞌumin.
Jach cꞌam cu pec tu cʌjaꞌanob mac.
Yʌn a ruꞌumin mʌꞌ u pec juntur u cajar u ruꞌumin tu cʌjaꞌanob mac.
Yʌn u ruꞌumin jeꞌ u pec u ruꞌumin tu cʌjaꞌan mac.
Yʌn u qꞌuinin cu bin yubicob wiꞌij.
An bic cu cʌnic u yajirir seb cu cʌnicob.
Raꞌ cu bin u rʌc man tu cotor.
Jeꞌ u chꞌicob sajquir mac caꞌ bin yirob a baꞌ u ber ich caꞌanan a baꞌ cu bin yesej Cꞌuj.
12 ’Mʌꞌ cꞌuchuc tu qꞌuinin aroꞌ cu bin chuquex a pach quireꞌ caj a wacsajex ta wor ten ―quij Jesús―.
Baxuc cu bin u cꞌubiquechex yejer u tsꞌurirob tu cu naj cꞌujinticob Cꞌuj u winiquirob judío.
Baxuc xan,
quir u mʌquiquexob tu cu maꞌcʌr winic.
Tiꞌ cu bin u chopʌytiquexob quir u bin u puriquechex ʌcʌtan rey yejer ich gobernador quir u taquiquex a joꞌr.
13 Wa raꞌ u qꞌuinin cu beticob techex aroꞌ,
raꞌ u qꞌuinin cꞌuchaꞌan a wor a waquex tiꞌob u jach tsoyir u tꞌʌn Cꞌuj.
14 Mʌꞌ a tucriquex wa cu tar u chuquex a pach.
Baxuc mʌꞌ a tucriquex baꞌ ca bin a waꞌarex tiꞌob.
Mʌꞌ toy xiquex ʌcʌtan a mac a cu bin u taꞌquic a joꞌr.
15 A tenoꞌ ―quij Jesús―,
jeꞌ in tsꞌic techex a tꞌʌnex quireꞌ a neꞌer a nuquiquex u tꞌʌnob.
Jeꞌ a nunquiquex tiꞌ soc mʌꞌ cꞌuchaꞌan yor u pʌqꞌuiquex a pach a mac u pꞌec yiriquechex.
16 Mʌꞌ chen a mac cu pꞌactiquechex cu bin u chuquiquex a pachex.
A tet xan,
yejer a nʌꞌ,
cax a bʌjob xan,
cax a mac a u jach yajechex xan,
cu bin u chuquiquex a pachex,
tan u cꞌubicob techex.
Baxuc jeꞌ u quinsiquechex xan,
mʌꞌ yaꞌabiꞌ ich techex.
17 Quireꞌ techex caj a wacsajex ta wor ten tu cotor mac cu bin u pꞌactiquechex.
18 Quiꞌ cʌnex a jeꞌraꞌ.
Mʌꞌ ja wirej,
a Cꞌujoꞌ cu cʌnantic techex soc mʌnaꞌ baꞌ u ber techex,
mʌꞌ ja bin satʌr turiꞌ u tsotser a joꞌr.
19 Jeꞌ u tsꞌabʌr techex a cuxtarex munt qꞌuin wa rajraꞌ ca mucꞌtiquex a baꞌ cu tar techex tu cu chuquicob a pachex.
20 ’Quireꞌ wa ca wiriquex yʌjquinsirob mac jach pim tan u bʌcristicob u cajar Jerusalén.
A werex cꞌuchij tu qꞌuinin u rʌc jubsicob u cajar Jerusalén.
21 Barej ca wiriquex bʌcrisaꞌan u cajar Jerusalén.
Arej tiꞌ a mac tiꞌ yʌn ich u ruꞌumin Judea caꞌ rʌc putsꞌucob ich wits.
Arej tiꞌ a mac tiꞌ yʌn ich u cajar Jerusalén caꞌ putsuc xan.
Arej tiꞌ a mac tiꞌ yʌn ich tancab u cajar Jerusalén.
Arej tiꞌob mʌꞌ u putsꞌurob ich u cajar Jerusalén.
22 Raꞌiriꞌ u qꞌuinin cꞌuchij tu qꞌuinin u boꞌoticob u boꞌorir u siꞌpir tiꞌ Cꞌuj u winiquirob judío ich u cajar Jerusalén quireꞌ baxuc caj u yaꞌaraj tu tsꞌibaꞌan u tꞌʌn Cꞌuj.
Rajen cu bin u nupsej.
23 Jach otsir a xquicoꞌ,
raꞌ u qꞌuinin jach naꞌaj.
Baxuc xquic cu tsꞌic u chuꞌch u chan tiꞌar.
Mʌꞌ ja wirej,
tu cotor mac a tiꞌ yʌn tu ruꞌumin Judea,
cu bin tsꞌabir u mucꞌyajob ten Cꞌuj.
Quireꞌ tsꞌiquij a Cꞌujoꞌ quireꞌ caj u yiraj mʌꞌ quibob u tꞌʌn.
24 Yʌn cu bin chꞌʌcbirob u car ten yʌjquinsirob winiquirob ich u winiquirob judío.
Yʌn yaꞌab xan cu bin purbirob ich u jer ruꞌumin quir u cꞌanʌn beyajob tu cu binob ich tu cotor u cajarob ich yocꞌocab u winiquirob judío.
Tiꞌ cu bin tsꞌurinbir u cajar Jerusalén ten a mʌꞌ u winiquirob judío hasta cꞌuchij tu qꞌuinin u tsꞌocar u tsꞌurinticob u tsꞌurirob u ruꞌumob.
Yʌn baꞌ cu bin yesej tabar u tar Jesús
25 Caj yaꞌaraj Jesús tiꞌ u camsʌwinicob:
―Raꞌ u qꞌuinin caꞌ bin tsꞌocac u tsꞌurinticob a mʌꞌ u winiquirob judío.
A baꞌ u ber ich ic yum,
baxuc ich ic nʌꞌ.
Baxuc ich a saboꞌ,
cu bin u jacꞌʌr yor tu cotor mac.
Mʌꞌ yerob mac baꞌ cu bin u beticob.
Caꞌ bin yubejob u jum cꞌacꞌnab,
jach cꞌam yejer u yamin xan.
Cu bin u chꞌicob sajquirob.
26 Raꞌiriꞌ u qꞌuinin tu cotor mac a tiꞌ yʌn ich yocꞌocab cu bin u chꞌic sajquirob caꞌ bin jacꞌʌcob yorob.
Quireꞌ a baꞌ u ber ich yocꞌocab.
Quireꞌ a Cꞌujoꞌ cu bin u rʌc siptic a saboꞌ.
27 Raꞌiriꞌ u qꞌuinin mac tiꞌ yʌnob ich yocꞌocab cu bin yiricob in tar ich u muyarir caꞌ bin taquen yejer in mucꞌ soc yer tu cotor mac jach noꞌjen a tenoꞌ.
Quin bin in tar yejer jach manan u sasirir Cꞌuj xan.
A tenoꞌ baxuquenechexoꞌ.
28 Barej u qꞌuinin cu yʌnxchun arayoꞌ chichquintej a worex ―quij Jesús―,
quiꞌquintex a worex quireꞌ tabar u cꞌuchur tu qꞌuinin in caꞌ ur quir in taꞌquiquechex tiꞌ a cꞌasoꞌ.
29 Jesús caj u camsaj baxuc a jeꞌraꞌ caj yaꞌaraj:
―Cꞌaj techex caꞌ bin a wirex u cheꞌer higuera yejer tu cotor cheꞌ.
30 Cu tsꞌocar u jocꞌar u mumun reꞌ,
tabar u yocar yaxqꞌuin.
31 Baxuc xan,
caꞌ bin a wirex a baꞌ u ber ich ic yum.
Baxuc ich ic nʌꞌ.
Baxuc ich a saboꞌ,
jeꞌ a werex cꞌuchij tu qꞌuinin u tar Cꞌuj quir u reyinticob.
32 ’Taj quin waꞌaric techex ―quij Jesús―,
cu yʌn tar tu cotor baꞌ a caj in waꞌaraj techex.
Mʌꞌ toy quimiquechex a mac cuxaꞌan bajeꞌrer.
33 Jeꞌ u cꞌuchur tu qꞌuinin a caꞌananoꞌ cu bin tsꞌocar baxuc cu bin tsꞌocar u ruꞌumin.
Chen in tꞌʌn a caj in waꞌaraj techex a Cꞌujoꞌ cu bin u nupsic.
34 ’Quiꞌ cʌnantex a bʌj.
Mʌꞌ a jen janʌnex,
mʌꞌ ja wuqꞌuiquex quir a carchʌjʌrex.
Mʌꞌ ja man a tucriquex bic tabar a jariquex a taqꞌuinex.
Mʌꞌ ja wirej,
quireꞌ a mac a cu jen janʌn yejer a cu yuqꞌuic quir u carchʌjʌrob yejer mac a cu tucric u nejaric u taqꞌuin caꞌ bin taquen a tenoꞌ u qꞌuinin mʌꞌ tan u pajicob quir u bin ich caꞌanan quireꞌ seb quin bin ur.
35 Baxuc a mac mʌꞌ yerob Cꞌuj ich yocꞌocab cu bin u jacꞌʌr yorob caꞌ bin uruquen wa raꞌ u qꞌuinin mʌꞌ tan u pajicob in wur.
Baxuc a bʌcꞌoꞌ ca rejiquex mʌꞌ yer.
36 Chen techex rajraꞌ ca cʌnantiquex a bʌj.
Rajraꞌ ca tꞌʌniquex Cꞌuj soc caꞌ bin cꞌuchuc tu qꞌuinin tabar u xur tꞌʌn cu bin u yamtiquechex Cꞌuj quir a mucꞌtiquex a baꞌ u ber techex.
Soc a tarex ʌcʌtan tu yʌnen quireꞌ a tenoꞌ baxuquenechexoꞌ.
37 U burur qꞌuin Jesús caj u camsaj a pimoꞌ ich carem naj tu cu naj cꞌujinticob Cꞌuj u winiquirob judío.
Chen oqꞌuin raraꞌ cu bin ich u joꞌr pꞌuc wits u cꞌabaꞌ Olivos.
Tiꞌ pꞌatij ich u joꞌr wits.
38 Aꞌacꞌbir tu cotor mac cu binob ich tu cu naj cꞌujinticob Cꞌuj u winiquirob judío quir yubic u tsicbar Jesús.