Judas u cꞌat u cꞌubic Jesús
22
Tabar u cꞌuchur tu qꞌuinin u quiꞌquiꞌ janʌnob u winiquirob judío raꞌ u qꞌuinin cu janticob yoch pan a mʌꞌ u sipeꞌ.
Pʌchaꞌan u cꞌabaꞌ pascua quireꞌ raꞌ u qꞌuinin caj u potmastaj yʌjtꞌʌnir Cꞌuj uch soc mʌꞌ u quimin chan xib chichin.
Lucas 22.1-71
2 U tsꞌurirob sacerdote yejer yʌjcamsʌyʌjirob u tꞌʌn Moisés,
u cꞌat u muc u chuquicob Jesús.
Baxuc u cꞌatob quireꞌ cu sʌjticob a pimob.
Caj u cʌxtajob mac quir u cꞌubic quinsbir Jesús.
3 A Judasoꞌ caj u tsꞌurintaj quisin rajiꞌ pʌchaꞌan u cꞌabaꞌ Iscariote,
rajiꞌ turiꞌ ich u doce u camsʌwinicob Jesús.
4 Judas caj u pꞌʌtaj Jesús yejer u yet camsʌwinicob caj bin ich u jach tsꞌurirob sacerdote yejer u capitán policía caj pacran tsicbanʌjij yejerob soc yerob bic tabar cu cꞌubic Jesús tiꞌob.
5 Caj quiꞌjij yorob u jach tsꞌurirob sacerdote rajen caj u toc arob jeꞌ u boticob tu cꞌubij Jesús ten Judas.
6 Judas caj yaꞌaraj:
―Tsoy.
Caj u yʌnxchun u chanber tucric u cꞌubic Jesús raꞌ u qꞌuinin mʌꞌ tiꞌ yʌn a pimoꞌ,
soc mʌꞌ yerob wa bin u caꞌ chucbir Jesús.
Jesús caj u tuchiꞌtaj u camsʌwinicob quir u chanber chʌquicob yoch quir u quiꞌquiꞌ janʌnob u qꞌuinin pascua
7 Caj cꞌuchij tu qꞌuinin a cu janticob yoch pan a mʌꞌ u sipeꞌ.
Raꞌ u qꞌuinin xan cu quinsicob yʌrʌcꞌ tʌmʌn yuc u chan ar soc u cꞌʌꞌotic bic Cꞌuj caj u taꞌcaj u nunquir u winiquirob judío ich u ruꞌumin Egipto.
8 Rajen Jesús caj u tuchiꞌtaj Pedro yejer Juan caj yaꞌaraj tiꞌob:
―Joqꞌuenex caꞌ a toc chʌquex ij cochex quir ij quiꞌ janʌnex quir ij cꞌʌꞌotic u qꞌuinin pascua.
9 Robob caj yaꞌarob:
―Tub a cꞌat ic chʌquex?
Arej toꞌon tuba?
10 Jesús caj yaꞌaraj tiꞌob:
―Uꞌyex baꞌ quin waquex techex.
Caꞌ bin oquechex ich u cajar,
jeꞌ a wiriquex xib tuririꞌ,
u cꞌochmʌn u pꞌurir yoch jaꞌ.
Sayenex tu pach hasta ca wiric tu cu yocar tu yatoch a caꞌ tsꞌap yatochoꞌ.
Quet a wocarex yejer.
11 Arej tiꞌ mac yʌnin yatoch:
“Ij cʌjcamsʌyʌjirex caj u yaꞌaraj tenob caꞌ in cꞌatejob a watoch junxotꞌ soc pꞌeriꞌ quin janʌnob yejer in camsawinic quir in cꞌʌꞌoticob u qꞌuinin pascua.”
12 A mac yʌnin yatoch ―quij Jesús―,
jeꞌ u yestic techex junxotꞌ yatoch tu caꞌ tsꞌap,
toc yʌn u pojcheꞌir tu cu janʌn.
Toc yʌn u cutan xan.
Ti taroꞌ ca chʌquiquex ij cochex.
13 Caj binob u camsʌwinicob Jesús caj yirob an ten bic Jesús caj u yaꞌaraj tiꞌob,
caj u chʌcob yoꞌoch quir u quiꞌ janʌnob quir u cꞌʌꞌoticob u qꞌuinin pascua.
14 Caj cꞌuchij tu qꞌuinin u janticob yoch u qꞌuinin pascua caj curaj Jesús baxuc u camsʌwinicob.
15 Jesús caj u yaꞌaraj tiꞌ u camsʌwinicob:
―Caj in jach pachtaj in jantej yoch tu qꞌuinin pascua yejerechex.
Mʌꞌ toy mucꞌyajnʌquen.
16 Quin wac techex caꞌ bin tsꞌocac in jantic a jeꞌraꞌ.
Mʌꞌ jin yʌn yʌn caꞌ jantic hasta caꞌ bin cꞌuchuc tu qꞌuinin cu reyinticob Cꞌuj.
A raꞌ u qꞌuininoꞌ quin caꞌ jantic.
17 Caj tsꞌaꞌb tiꞌ Jesús u cꞌab uva ich ruch caj u peꞌaj.
Caj u yaꞌaraj tiꞌ Cꞌuj:
―Bayoꞌ Cꞌuj.
Caj tsꞌoc yaꞌaric aroꞌ caj u tsꞌaj tiꞌ u camsʌwinicob,
caj yaꞌaraj tiꞌob:
―Caꞌ caꞌ xotꞌ a wuqꞌuiquex.
18 Quin wac techex tin toc ucꞌaj a jeꞌraꞌ.
Mʌꞌ in yʌn yʌn uqꞌuej hasta caꞌ bin cꞌuchuc tu qꞌuinin u reyinticob Cꞌuj.
Jeꞌ in caꞌ uqꞌuiqueꞌ.
19 Caj u chuca yoch pan caj u mʌchaj caj u yaꞌaraj:
―Bayoꞌ Cꞌuj.
Caj tsꞌoc yaꞌaric aroꞌ caj u xatꞌaj caj u jʌsej tiꞌob u camsʌwinicob.
Caj u yaꞌaraj tiꞌob:
―A jeꞌ a woch panaꞌ,
rajiꞌ in winquirir quir in cꞌubʌr techex soc in quinsaꞌ.
Baxuc yʌn a jantiquex soc a cꞌʌꞌotiquex u qꞌuinin tu quimen.
20 Caj tsꞌoc u rʌc janʌnob yoch u qꞌuinin pascua caꞌ u peꞌaj a ruchoꞌ xan caj yaꞌaraj tiꞌob:
―Tucrex a jeꞌraꞌ u cꞌab uva,
rajiꞌ in qꞌuiqꞌuer.
Irej bin u caꞌ jocꞌar in qꞌuiqꞌuir tu quin quinsaꞌ,
u boꞌorir a siꞌpirirex.
Soc toc ricꞌben an ten bic caj in toc araj techex.
Mʌꞌ ja wirej,
u tꞌʌn Moisés rucꞌsabij soc yʌn u jer ricꞌben a jach manan tsoy.
21 Caj yaꞌaraj Jesús:
―Taj quin wac techex a mac cu bin u cꞌubiqueneꞌ pꞌeriꞌ cu janʌn yejeroꞌon bajeꞌrer.
Rajiꞌ cu bin u cꞌubiquen tiꞌ mac quir in quinsaꞌ.
22 A tenoꞌ,
yʌn in quinsaꞌ a tenoꞌ,
baxuquenechexoꞌ.
An ten bic caj u toc araj Cꞌuj uch.
Chen jach otsir a mac a cu cꞌubiquen.
23 Caj u yʌnxchun u pacran cꞌaticob u camsʌwinicob Jesús.
Caj yaꞌarajob mac cu bin cꞌubic Jesús.
Jesús cu camsic a mac jach noꞌj ʌcʌtan tu wich Cꞌuj
24 U camsʌwinicob caj u pacran tsꞌictarob soc yiricob a mac jach noꞌj ich u racꞌob.
25 Jesús caj yaꞌaraj tiꞌob:
―Ich yocꞌocab a reyoꞌ tiꞌ jujuntur u ruꞌumin,
cu tsꞌurintic u winiquirob.
U cꞌat u winiquirob caꞌ yaꞌarejob tiꞌ caꞌ yamtac a reyoꞌ.
Baxuc u caꞌ tsꞌurir u cꞌat yubejob xan.
26 Aroꞌ mʌꞌ baxuc ca betiquex.
A mac jach noꞌj ich techex,
arej mʌꞌ u pachtej yubej yaꞌaraꞌ jach noꞌjech ten u racꞌob.
Wa ca wocar techex a tsꞌurintic tu cu cꞌujintic Cꞌuj toc yʌn a yamtiquex a racꞌob.
27 Quiꞌ tucrex a baꞌ quin wac techex.
Mac jach noꞌjeꞌ,
wa raꞌ cu janʌn ich u pojcheꞌir u janʌn?
Wa raꞌ jach noꞌj a cu beyaj tiꞌ?
Mʌꞌ ja wirej,
a mac a cu cutar tu pojcheꞌir u janʌn,
rajiꞌ jach noꞌj.
Chen a tenoꞌ cax a tsꞌurirenex tiꞌ yʌnen ich techex quir in beyaj techex.
28 Jesús caj u yaꞌaraj tiꞌ u camsʌwinicob:
―Techex rajraꞌ tiꞌ yʌnechex tu yʌnen mʌꞌ ja pꞌʌtenexiꞌ pꞌeriꞌ quic mucꞌtiquex a baꞌ cu tar toꞌonex uch.
29 An ten bic in Tet Cꞌuj caj u teten quir in reyintic.
Baxuc techex in tetiquechex quir a wocarex a reyintiquex.
30 Baxuc quin tetic techex soc pꞌeriꞌ quic janʌnex.
Baxuc pꞌeriꞌ ij cucꞌurex tu pojcheꞌir caꞌ bin cꞌuchuc tu qꞌuinin in reyintic.
Quin bin in wacsiquechex a reyintiquex a wet winiquirob judío a doce u yoꞌnen u winiquirob Israel.
Jesús caj yaꞌaraj tiꞌ Pedro: Jeꞌ a waꞌaric mʌꞌ a cꞌʌꞌoreniꞌ
31 Jesús caj yaꞌaraj tiꞌ Pedro:
―Wa mac cu chachtic yoꞌoch cu pꞌatʌr u bʌqꞌuer chen u soroꞌ cu puric.
Baxuquech Simón ―quen―,
a quisinoꞌ caj u cꞌataj tiꞌ Cꞌuj quir u tumtic a wor soc yiric wa taj caj a wacsaj ta wor.
32 Chen a tenoꞌ caj in tꞌʌnaj Cꞌuj tiꞌ tech soc mʌꞌ a pꞌʌtic a wacsic ta wor ten.
Caꞌ bin tsꞌocac a cꞌaxic a wor toc chichquintej yor a wet camsʌwinicob a teꞌ yʌnaꞌ.
33 Pedro caj yaꞌaraj:
―Jaj Tsꞌurir ―quij―,
tin toc chꞌuctic in bin yejerech tu cu maꞌcʌr winic cax quet ij quimin.
34 Jesús caj yaꞌaraj tiꞌ Pedro:
―Taj quin waꞌaric tech.
Mʌꞌ toy cꞌʌynʌc cax bajeꞌrer acꞌbir.
Mʌnaꞌ u nup ca bin a waꞌaric mʌꞌ a cꞌʌꞌoreniꞌ.
Cu tsꞌocor a wac mʌꞌ a cꞌʌꞌoreniꞌ cu bin u cꞌay cax.
Jesús caj yaꞌaraj: Tabar u qꞌuinin in mucꞌyaj
35 Jesús caj u cꞌataj tiꞌ u camsʌwinicob:
―Caj in tuchiꞌtechex caꞌch quir a tsecꞌtiquex in tꞌʌn.
Cax mʌnaꞌ a chimex.
Cax mʌnaꞌ a taqꞌuinex cax mʌnaꞌ a xanabex.
Yʌn wa baꞌ a cꞌatex caꞌch?
U camsʌwinicob caj u nuncajob:
―Mʌnaꞌ baꞌ in cꞌatob.
36 Jesús caj yaꞌaraj tiꞌob:
―Chen bajeꞌrer,
wa yʌn a taqꞌuinex toc chꞌaꞌex.
Baxuc wa yʌn a chimex toc chꞌaꞌex.
Wa mʌnaꞌ techex a mascab canex u caꞌ yarir a nocꞌ quir a mʌnic tuririꞌ a mascab.
37 Mʌꞌ ja wirej ―quij Jesús―,
tiꞌ tsꞌibaꞌan ich u tꞌʌn Cꞌuj uch,
caj yaꞌaraj:
“A winiquirob caj yaꞌaraj chen cꞌas a ray xiboꞌ.”
Aroꞌ ―quij Jesús―,
quin wac techex.
Yʌn in nupsej quireꞌ tabar in quinsaꞌ.
38 Caj yaꞌarob u camsʌwinic:
―Jaj Tsꞌurir ―quij―,
a jeꞌ mascabaꞌ caꞌturaꞌ.
Jesús caj yaꞌaraj tiꞌob:
―Tiꞌ tiꞌ a mascabex.
Jesús cu tꞌʌnic Cꞌuj ich u pꞌuc witsir u cꞌabaꞌ Olivos
39 Jesús caj jocꞌ ich u cajar caj binij an ten bic nanij u bin ich u pꞌuc witsir u cꞌabaꞌ Olivos.
Yet binac u camsʌwinicob.
40 Caj cꞌuchij tu nanij u bin,
caj yaꞌaraj tiꞌ u camsʌwinicob:
―Tꞌʌnex Cꞌuj soc mʌꞌ u chaꞌbaꞌ u tar tumbir a worex.
41 Jesús caj jocꞌ nanach an ten bic mun nachir cu rubur tunich a cu chꞌinin ten mac.
Caj xonrʌj quir u tꞌʌnic Cꞌuj.
42 Jesús caj yaꞌaraj:
―In Tetech Cꞌuj ―quij―,
wa raꞌ cu quiꞌquintic a wor quir a tsꞌicten a baꞌ in cꞌat,
rucꞌsej a jeꞌ mucꞌyajaꞌ a cu bin tar ten.
Wa raꞌ a cꞌat caꞌ mucꞌyajnʌquen jeꞌ in mucꞌyajeꞌ quireꞌ in cꞌat in betic a baꞌ a cꞌat tech.
43 Caj tar tuririꞌ yʌjmasir u tꞌʌn Cꞌuj ich Jesús quir u tsꞌabʌr u mucꞌ tiꞌ.
44 Caj jach mucꞌyajnʌjij Jesús caj u yʌnxchun u mucꞌyaj jach manan tu cu tꞌʌnic Cꞌuj.
Tan u jach chichquintic u tꞌʌnic Cꞌuj hasta cu qꞌuicab.
U qꞌuicabeꞌ irej u qꞌuiqꞌuer cu chꞌojar ich ruꞌum.
Jach carem u chꞌojar.
45 Caj riqꞌuij tub xonrʌj tu cu tꞌʌnic Cꞌuj.
Caj bin ich u camsʌwinicob caj yiraj tan u wenʌnob quireꞌ mʌꞌ quiꞌ yorobiꞌ.
46 Jesús caj yaꞌaraj tiꞌob:
―Mʌꞌ a yʌn wenʌnex.
Caꞌ a chꞌictarex soc a yʌn tꞌʌniquex Cꞌuj soc mʌꞌ u chaꞌbʌr u tar tumbir a worex.
Chuc Jesús
47 Tiꞌ toy cu tsicbar Jesús.
Caj cꞌuchob a pimob quireꞌ pay ten Judas.
Rajiꞌ tuririꞌ ich camsʌwinicob a docejoꞌ.
Caj u nʌtsꞌ u bʌj Judas quir u tsꞌutsꞌic u pꞌuc Jesús.
48 Caj yaꞌaraj Jesús tiꞌ Judas:
―Tan wa ja tsꞌutsꞌic in pꞌuc quir a cꞌubiquen tiꞌ a mac a cu pꞌactiquenob?
A tenoꞌ baxuquenechexoꞌ Cꞌuj.
49 U camsʌwinicob a tiꞌ yʌn yicnan Jesús caj u yirob baꞌ u ber tiꞌ,
caj u yaꞌarob tiꞌ Jesús:
―Arej toꞌon Jaj Tsꞌurir caꞌ tsꞌicacoꞌon yejerob caꞌ ic chꞌʌquej u car yejer mascab.
50 Tuririꞌ u camsʌwinicob caj u chꞌʌcaj u xiquin,
rajiꞌ u cꞌurew u jach tsꞌurir sacerdote.
Caj u rac chꞌʌctaj u xiquin,
tu noj.
51 Jesús caj yaꞌaraj tiꞌ:
―Tsireꞌej,
mʌꞌ a chꞌʌquiquex.
Jesús caj u tʌra u xiquin u cꞌurew u jach tsꞌurir sacerdote caj jawij u xiquin tu chꞌaquij.
52 Jesús caj yaꞌaraj tiꞌob u jach tsꞌurirob sacerdote yejer u yʌjtꞌʌnin policía ich carem naj tu cu naj cꞌujinticob Cꞌuj u winiquirob judío,
yejer u jach tsꞌurirob u cajar u winiquirob judío.
Quireꞌ tarob u chuquejob Jesús.
Caj yaꞌaraj Jesús:
―Tarechex a chuquiquenex yejer a mascabex yejer cheꞌ.
Irej wa yʌjaꞌcrʌyʌjiren baꞌ,
ca chuquiquenex.
53 Rajraꞌ tiꞌ yʌnen ich carem naj uch.
Tan in camsicob,
chen mʌꞌ ta chuquenex.
Chen tarechex a chuquenex quireꞌ cꞌuchij tin qꞌuin.
An ten bic Cꞌuj caj yaꞌaraj uch.
Cꞌuchij tin qꞌuin xan,
quireꞌ baxuc u cꞌat a quisinoꞌ a mac a cu tsꞌurintic a mac a cu man ich yacꞌbirir quireꞌ raꞌ u siꞌpirob.
Pedro cu yaꞌaric mʌꞌ u cꞌʌꞌotic Jesús
54 Caj u chucob Jesús caj u mʌchob u cꞌʌb caj binob u purej ich yatoch u jach tsꞌurir sacerdote.
Chen Pedro caj tar tu pach Jesús chen nach cu xur.
55 Caj cꞌuchob caj ocob tu reꞌaꞌan u chiꞌ naj.
Tiꞌ tu tꞌʌbaj u qꞌuich chumuc.
Caj curajob tu qꞌuich.
Pꞌeriꞌ yejer Pedro.
56 Tiꞌ yʌn xquic u cꞌurew u jach tsꞌurir sacerdote caj irir Pedro tiꞌ curaꞌan qꞌuich ich chiꞌ cꞌacꞌ.
Caj u quiꞌ pʌctaj caj u yaꞌaraj tiꞌ a mac tiꞌ yʌnob:
―A jeꞌ xibaꞌ u yet man Jesús uch.
57 Pedro caj yaꞌaraj:
―Xquic ―quen―,
mʌꞌ in cꞌʌꞌormʌniꞌ.
58 Sasam caj irir Pedro ten u jer caj araꞌb ten xib tiꞌ Pedro:
―A techoꞌ ―quij―,
caj a chaj nupintej Jesús caꞌch,
tiꞌ yʌnech yejer Jesús uch.
Chen Pedro caj yaꞌaraj tiꞌ xib:
―Mʌꞌ teniꞌ.
59 Caj manij tuririꞌ hora caj cꞌuch u jer xib caj chich araꞌb tiꞌ u racꞌob:
―Taj a jeꞌ xibaꞌ tiꞌ yʌn ich Jesús uch.
Quireꞌ tiꞌ u tar ich u ruꞌumin Galilea quireꞌ baxuc u tꞌʌnobob.
60 Chen Pedro caj yaꞌaraj tiꞌ xib:
―Mʌꞌ in wer mac a ca waꞌaricoꞌ.
Tiꞌ toy cu tsicbar Pedro,
seb caj cꞌaynʌj cax.
61 A Jaj Tsꞌuroꞌ caj u sut u bʌj u pʌcaj Pedro.
Pedro caj cꞌaj tiꞌ a baꞌ araꞌb tiꞌ ten Jesús caꞌch.
An bic caj yaꞌaraj Jesús:
“Mʌꞌ toy cꞌaynʌc a caxoꞌ mʌnaꞌ u nup ca bin a wac mʌꞌ a cꞌʌꞌoreniꞌ.”
62 Caj jocꞌ Pedro ich yatoch u jach tsꞌurir sacerdote caj chich ocꞌnʌjij quireꞌ tucur u caꞌ.
Pꞌastaꞌb Jesús jatsꞌ xan
63 A policíajoꞌ a cu beyajob ich carem naj tu cu naj cꞌujinticob Cꞌuj a ju chucmʌnob Jesús caj u yʌnxchun u pꞌasticob Jesús tan u jʌtsꞌicob xan.
64 Robob tu pixob u wich Jesús caj u raxob caj u yaꞌarob tiꞌ:
―Quireꞌ yʌjtseqꞌuirech u tꞌʌn Cꞌuj,
arej tenob mac tu raxech?
65 Caj yaꞌarob yaꞌab baꞌ tu cu pꞌasticob Jesús.
Tu cotorob u tsꞌurirob u winiquirob judío cu taꞌquicob u joꞌr Jesús
66 Caj sasij caj u muchꞌquintajob u bʌj u tsꞌurirob u winiquirob judío.
Quet baxucob u tsꞌurirob sacerdote yejer yʌjcamsʌyʌjirob u tꞌʌn Moisés.
Caj u muchꞌquintajob u bʌj quir u taꞌquicob u joꞌr Jesús.
Robob caj u pʌyob caꞌ tac Jesús.
Caj cꞌuchij Jesús caj u cꞌatob tiꞌ Jesús:
67 ―Wa Cristojech caj u tuchiꞌtech Cꞌuj,
arej tenob?
Chen Jesús caj u nuncaj tiꞌob,
caj yaꞌaraj:
―Wa quin waꞌaric Cristojen caj u tuchiꞌten Cꞌuj,
mʌꞌ ja bin a wacsiquex ta worex ten.
68 Wa quin cꞌatiquex techex baꞌ,
mʌꞌ a bin a nunquiquex ten.
69 Caꞌ bin tsꞌocac in riqꞌuir tin quimirir tiꞌ quin bin in cutar tu noj Cꞌuj soc ten cu bin u tsꞌurintiquen tu cotor mac.
Pꞌeriꞌ quin tsꞌurintic yejer Cꞌuj a caj u tuchiꞌtajen Cꞌuj.
70 Tu cotor u tsꞌurirob u winiquirob judío caj u cꞌatajob:
―Arej tenob wa ju jach pararech Cꞌuj?
Jesús caj u nuncaj tiꞌob:
―An ten bic caj a waꞌarex sam,
rajiꞌen.
71 Caj yaꞌarob:
―Baꞌ wir u jer yʌjtaꞌquic u joꞌr.
Tic toc uꞌyaj.
Pochꞌ u caꞌ quireꞌ u bʌjiriꞌ caj u yaꞌaraj.