Quimij Lázaro
11
Tiꞌ yʌn mac uch tu cʌnaj u yajir.
Rajiꞌ u cꞌabaꞌ Lázaro,
tiꞌ u tar uch ich u cajar Betania,
raꞌ u waꞌan u ruꞌumin Judea.
Lázaro tiꞌ cʌjaꞌanob ich u cajar uch yejer u yitsꞌinob María yejer Marta.
2 María,
rajiꞌ a tu jayaj a quiꞌ u bocoꞌ tu yoc Jesús caj u tisaj yejer u tsotser u joꞌr caꞌ tijic.
A mac u cʌmʌn u yajir rajiꞌ u sucuꞌunob Lázaro.
Jesús resucita a Lázaro (Juan 11.1-57)
―Jaj Tsꞌurir ―quij―,
a mac a jach yaj a wiric bajeꞌrer yajij ―baxuc caj yaꞌarob a mac tuchiꞌtaꞌb ten María yejer Marta.
4 Jesús caj yuba caj yaꞌaraj:
―A tu cʌnaj u yajir,
mʌꞌ quir u jach quimin chen quir u sʌjtaꞌ Cꞌuj ten tu cotor mac.
Cu bin quimij soc ten xan cu sʌjtiquenob tu cotor mac quireꞌ u pararen Cꞌuj a tuchiꞌtaꞌben ten Cꞌuj.
5 Jesús tu yajquintaj Marta yejer u yitsꞌin María yejer Lázaro,
6 chen pꞌatij Jesús u jer caꞌtur u qꞌuinin tuꞌ yʌniꞌ cax tu yubaj tu cʌnaj u yajir Lázaro.
7 Pachir caj yaꞌaraj tiꞌ u camsʌwinicob:
―Jeroj cuxex caꞌ wʌcꞌʌs xicoꞌon ich u ruꞌumin Judea ―quij Jesús.
8 Chen u camsʌwinicob caj yaꞌarob:
―A wʌjcamsʌyʌjirenob ―quij―,
u winiquirob judío u cꞌat u chꞌinicob a joꞌr uch.
Biquinin a cꞌat a caꞌ bin tiꞌ taroꞌ?
9 Jesús caj u yaꞌaraj tiꞌob bic yiraꞌ u beyaj Cꞌuj.
Rajen caj u yaꞌaraj tiꞌob:
―A Cꞌujoꞌ tu tsꞌaj toꞌonex juntur u qꞌuinin doce horas.
Mʌꞌ ja wirej,
a mac a cu man chunqꞌuineꞌ,
mʌꞌ ju cojar yoc,
quireꞌ tiꞌ toy chunqꞌuiniꞌ.
10 Chen wa cu yacꞌbirchʌjʌr cꞌuchij tu qꞌuinin cu cojar yoc quireꞌ mʌꞌ sasiriꞌ.
Baxuc a jeraꞌ Jesús tu chaꞌ ic najtic mʌꞌ ju bin quinsbir Jesús hasta cu cꞌuchur tu qꞌuinin a tu pꞌisa Cꞌuj uch.
Rajen mʌnaꞌ baꞌ u ber tiꞌ Jesús ten mac.
11 Pachir Jesús caj u yaꞌaraj tiꞌ u camsʌwinicob:
―A Lázarojoꞌ a jic jach yaj tan u wenʌn.
Tar quin binoꞌ quir in wʌsic quireꞌ wenʌn u caꞌ ―quij Jesús.
12 U camsʌwinicob caj yaꞌarob tiꞌ:
―Jaj Tsꞌurir ―quij―,
wa wenʌn u caꞌ,
jeꞌ u chꞌic yoreꞌ.
13 Baxuc Jesús caj u yaꞌara tiꞌob quireꞌ jach quimen Lázaro chen u camsʌwinicob cu tucricob jach wenʌn u caꞌ tan u jeꞌsic u bʌj.
Rajen cu bin u chꞌic yor.
14 Rajen Jesús mʌꞌ tu mucraj caj u yaꞌaraj tiꞌob:
―Lázaro jach quimij.
15 Caj yaꞌaraj Jesús:
―Quiꞌ in wor quireꞌ mʌꞌ tiꞌ yʌnenob tuꞌ yʌn Lázaro,
soc a wacsiquex ta wor ten.
Chen cuxex ij quirej.
16 Rajen Tomás caj u yaꞌaraj tiꞌ u yet camsʌwinicob,
rajiꞌ cu yaꞌaricob u yet camsʌwinicob Gemelo,
mʌꞌ ja wirej,
caj rochaꞌb ten u naꞌ toc caꞌtur:
―Cuxex caꞌ quimicoꞌonex yejer Jesús.
Yer jeꞌ u quinsaꞌr Jesús.
Quireꞌ a tenoꞌ yʌn u cuxtar mac munt qꞌuin
17 Caj u bin Jesús yejer u camsʌwinicob caj cꞌuchob cuatro u qꞌuinin tub butꞌi u baquer ich u japꞌnin tunich Lázaro.
18 U cajar Lázaro,
rajiꞌ Betania baytʌc ich u cajar Jerusalén.
Yaꞌaric caꞌtur kilómetro chumuc u nachir.
19 Yaꞌab u winiquirob judío caj binob tuꞌ yʌn Marta yejer María quir u quiꞌquintaꞌ yorob soc pꞌeriꞌob yaꞌcticob u sucuꞌunob.
20 Marta caj yuba tabar u cꞌuchur Jesús caj binij quir u nupꞌic ich bej.
Chen María tiꞌ pꞌatij ich naj.
21 Marta caj cꞌuchij ich Jesús caj yaꞌaraj:
―Jaj Tsꞌurir ―quij―,
wa tiꞌ yʌnech uch caj u cʌnaj u yajir in sucuꞌun mʌꞌ quimij uch jeꞌ a jawsiqueꞌ.
22 Quireꞌ in wer Cꞌuj cu tsꞌic tech bajeꞌrer a baꞌ ca cꞌatic tiꞌ ―quij Marta.
23 Jesús caj yaꞌaraj tiꞌ:
―A sucuꞌun jeꞌ u riqꞌuireꞌ tu butꞌij ich japꞌnin tunich ―quij Jesús.
24 Marta caj u yaꞌaraj tiꞌ:
―In wer in sucuꞌun jeꞌ u caꞌ cuxtareꞌ caꞌ bin xuruc tꞌʌn caꞌ bin cuxrac tu cotor mac.
25 Jesús caj u yaꞌaraj tiꞌ:
―Quireꞌ a tenoꞌ yʌn u cuxtar mac.
Quireꞌ a tenoꞌ yʌn u caꞌ cuxtar mac,
a maqueꞌ cu yacsic tu yor ten quireꞌ yer yʌjtaquiren a tenoꞌ cax cu bin quimin cu bin cuxtar munt qꞌuin.
26 Tu cotor mac a cu cuxtar munt qꞌuin a mac a cu yacsic tu yor ten quireꞌ yer yʌjtaquiren a tenoꞌ.
Mʌꞌ ju bin satʌr mʌꞌ biqꞌuin.
Ta quibaj aroꞌ ―quij Jesús.
27 Marta caj u yaꞌara tiꞌ:
―Quin quibic Jaj Tsꞌurir in wer a techoꞌ Cristojech,
u pararech Cꞌuj a mac a cu bin tar ich yocꞌocab ―quij Marta.
Jesús ocꞌnʌjij
28 Marta caj tsꞌoc yaꞌaric aroꞌ caj bin u pʌyej u yitsꞌin caj u muc u araj tiꞌ:
―Ij cʌjcamsʌyʌjir cꞌuchij caj u tuchiꞌtajen caꞌ in pʌyech.
29 Caj yuba yaꞌaric aroꞌ María seb caj riqꞌuij caj bin irbir Jesús.
30 Jesús mʌꞌ toy cꞌuchuc ich u cajar tiꞌ yʌn tub u nupꞌa Marta ich bej caꞌch.
31 Rajen u winiquirob judío a tarob u quiꞌquinticob yor a tiꞌ yʌnob ich yatoch yejer caꞌch.
Caj yirob seb u jocꞌar María caj sayob tu pach quireꞌ cu tucricob tiꞌ cu bin tuꞌ butꞌ u baquer u sucuꞌun quir u yactic.
32 Caj cꞌuchij María tuꞌ yʌn Jesús caj xonrʌj tuꞌ yʌn Jesús tan yaꞌaric tiꞌ:
―Jaj Tsꞌurir ―quij―,
wa tiꞌ yʌnech uch caj u cʌnaj u yajir in sucuꞌun mʌꞌ quimij uch jeꞌ a jawsiqueꞌ ―quij María.
33 Jesús caj u yiraj yocꞌar María baxuc u winiquirob judío a sayob tu pach María yaj yubaj tu yor quireꞌ mʌꞌ u cꞌat yiric u quimin mac.
34 Jesús caj u cꞌataj tiꞌob:
―Tub a butꞌex u baquer Lázaro?
Caj yaꞌarob:
―Jaj Tsꞌurir,
cojen irej ―quij.
―Iric,
cu yajquintic Lázaro.
37 Tiꞌ yʌn mac caj u yaꞌarob:
―Aroꞌ rajiꞌ a tu jawsaj u wich a chꞌopoꞌ uch.
Mʌꞌ wa rajiꞌ cꞌuchaꞌan yor yamtaꞌbir Lázaro soc mʌꞌ u quimij?
Ricꞌsaꞌb Lázaro ten Jesús quir u cuxtar
38 Jesús caj cꞌuchij tuꞌ butꞌaꞌan u baquer Lázaro yʌn u japꞌnin tunich caj u tucraj tu yor quireꞌ mʌꞌ u cꞌat yiric quimin mac.
Tuꞌ butꞌij yʌn u mac u jor.
39 Jesús caj yaꞌaraj:
―Rucꞌsex ―quij―,
u mac u jor tunich.
Marta,
a yitsꞌin ixba Lázaro caj u yaꞌaraj tiꞌ:
―Jaj Tsꞌurir ―quij―,
tuꞌjij tin tꞌʌn quireꞌ toc yʌn cuatro qꞌuin caj butꞌij.
40 Jesús caj u yaꞌaraj tiꞌ:
―Mʌꞌ wa tin waꞌaraj tech wa ca wacsic ta wor ca bin a wirej jach manan u mucꞌ Cꞌuj?
―quij Jesús.
41 Caj u rucꞌsob u tunichir u mac u jor tuꞌ butꞌaꞌan u baquer Lázaro.
Jesús caj u pʌctaj ich caꞌanan caj u yaꞌaraj:
―In Tet Cꞌuj ―quij―,
quin waꞌaric tech:
“Bayoꞌ” quireꞌ rajraꞌ ca wuꞌyic in tꞌʌn.
42 In wer rajraꞌ ca wuꞌyic in tꞌʌn.
Baxuc quin wac tiꞌ tech quireꞌ tiꞌ yʌn mac teraꞌ soc yubic baꞌ caj in waꞌaraj tech soc yacsicob tu yorob tech ta tuchiꞌtajen.
43 Caj tsꞌoc yaꞌaric aroꞌ Jesús caj u cꞌam tꞌʌnaj:
―Lázaro ―quen―,
joqꞌuen tiꞌ taroꞌ ―quij Jesús.
44 A quimenoꞌ caꞌ joqꞌuij toc sʌsʌ cꞌʌxaꞌan u cꞌʌb yejer nocꞌ,
baxuc u yoc xan.
Baxuc u wich tapaꞌan yejer panyu.
Jesús caj yaꞌaraj tiꞌob a mac tiꞌ yʌnob:
―Jitex u nocꞌ soc u bin ―quij Jesús.
Cu tucricob bic tabar cu bin u chuquicob Jesús
45 Rajen yaꞌab u winiquirob judío a tiꞌ yʌnob yejer María tu yacsob tu yorob tiꞌ Jesús quireꞌ yerob yʌjtaquirob quireꞌ tu yirob Jesús u ricꞌsic Lázaro.
46 A mac mʌꞌ tu yacsajob tu yorob quireꞌ mʌꞌ u cꞌat yiricob baꞌ cu betic Jesús.
Rajen caj binob ich a fariseojoꞌ caj u tsicbʌtajob a baꞌ caj u betaj Jesús.
47 Rajen u tsꞌurirob sacerdote yejer a fariseojoꞌ caj u muchꞌquintajob u bʌj u yet tsꞌurirob u winiquirob judío,
caj yaꞌarob:
―Baꞌ quic bin ic betejex tiꞌ a xiboꞌ a tar yʌnoꞌ quireꞌ tan u yesic carem u beyajob?
48 Quireꞌ wa quic aric:
“Tsireꞌej”,
tu cotor mac cu bin u yacsicob tu yorob tiꞌ quireꞌ yerob yʌjtaquirob.
A baywoꞌ cu bin acsaꞌbir ten a pimob quir ic tsꞌurintiquex,
rajen u rey ich u cajar Roma cu bin u tsꞌictar yejeroꞌonex.
Cu bin tuchiꞌtic a soldadojoꞌ caꞌ tacob u quinsicoꞌonex caꞌ tacob u rʌc jocꞌsicoꞌonex.
49 Chen tuririꞌ u yet tsꞌurirob u cꞌabaꞌ Caifás,
rajiꞌ a jeꞌ yaxqꞌuinaꞌ cꞌuchij tu qꞌuinin u yocar u jer u jach tsꞌurir sacerdote,
rajiꞌ Caifás.
Rajiꞌ caj yaꞌaraj tiꞌob:
―Mʌnaꞌ baꞌ a werex a techexoꞌ.
50 Mʌꞌ wa ca najtiquex wa tsoy cu quimin tuririꞌ mac tiꞌ tu cotoroꞌonex soc tu cotor mac mʌꞌ u bin quinsbir ten u winiquirob romano.
51 A Caifásoꞌ mʌꞌ u bʌjiriꞌ tu yaꞌaraj a jeraꞌ quireꞌ rajiꞌ u jach tsꞌurir sacerdote quireꞌ cꞌuchij tu qꞌuinin u yocar u jer u jach tsꞌurir sacerdote.
52 Mʌꞌ chen tiꞌ toꞌonex,
quij Caifás,
cu bin quinsbir Jesús.
Cu bin quinsbir u parar Cꞌuj tiꞌ tu cotor a mac Cꞌuj yʌnin a tiꞌ yʌnob ich yocꞌocab soc u pꞌeriꞌquinticoꞌonex a mac a Cꞌuj yʌninoꞌ.
53 Rajen u tsꞌurirob sacerdote seb caj u tucrajob u cꞌat u quinsicob Jesús.
54 Rajen Jesús mʌꞌ ju yes u bʌj tiꞌ u winiquirob judío.
Tu junan caj binij yejer u camsʌwinicob ich u ruꞌumin Judea,
caj bin ich tʌcay ruꞌum.
Caj cꞌuchij ich u cajar Efraín.
Tiꞌ pꞌatij yejer u camsʌwinicob.
55 Tabar u cꞌuchur tu qꞌuinin u quiꞌquiꞌ janʌnob u winiquirob judío.
Raꞌ u qꞌuinin pascua,
raꞌ u qꞌuinin cu cꞌʌꞌoticob tu potmastaꞌb ten yʌjmasirob u tꞌʌn Cꞌuj uch soc mʌꞌ u quimin u parar a yʌn rochaꞌb ten u naꞌ.
Yaꞌab winiquirob caj rʌc binob ich u cajar Jerusalén cax mʌꞌ cꞌuchuc tu qꞌuinin pascua soc u nupꞌsic a baꞌ cu yaꞌaric ich u tꞌʌn Moisés soc tsoy yiricob Cꞌuj.
56-57 Caj cꞌuchob u winiquirob judío ich u cajar Jerusalén.
Caj yubob yaꞌaricob a baꞌ araꞌb tiꞌob ten u jach tsꞌurirob sacerdote yejer a fariseojoꞌ:
“Wa mac cu yiric tuꞌ yʌn Jesús caꞌ tac yaꞌarej tuꞌ tu yiraj Jesús soc u bin chucbirob quir u maꞌcʌr.”
Rajen tan u manob cʌxtaꞌbir Jesús.
Tu cotor mac tiꞌ yʌn ich carem naj tan u pacran cꞌaticob tan yaꞌaricob:
―Baꞌ ca tucric jeꞌ wa ju tar Jesús caꞌ bin cꞌuchuc tu qꞌuinin u quiꞌquiꞌ janʌn?
―baxuc tan u pacran tsicbarob tiꞌ Jesús.