U tsꞌurirob u winiquirob judío cu tucricob bic tabar u bin u chuquicob Jesús
26
Caj tsꞌoc yaꞌaric Jesús a baꞌ caj u camsaj sam tiꞌ u camsʌwinicob.
Caj u rʌc araj tiꞌ u camsʌwinicob:
2 ―Techex a werex ―quij Jesús―.
Caꞌbej cu cꞌuchur tu qꞌuinin u quiꞌquiꞌ janʌnob u winiquirob judío.
Raꞌ u qꞌuinin quir u cꞌʌꞌoticob caj u potmastajob yʌjmasir u tꞌʌn Cꞌuj uch.
Soc mʌꞌ u quimin u parar a yʌn rochaꞌb ten u nʌꞌ uch.
Raꞌ u qꞌuinin caꞌbej,
quir u cꞌubiquenob,
a tenoꞌ taren in yamtic mac tu cotor,
caꞌ quinsaquen ten u jach tsꞌurirob u winiquirob judío.
3 U jach tsꞌurirob sacerdote caj u rʌc muchꞌquintob u bʌj yejer yʌjcamsayʌjirob u tꞌʌn Moisés yejer u jach tsꞌurirob u cajar u winiquirob judío a cu yaꞌaric a Nuxiboꞌ.
Tiꞌ cu muchꞌquinticob u bʌj ich yatoch Caifás.
Raꞌ u jach tsꞌurir tiꞌ tu cotor sacerdote,
tu reꞌaꞌan yatoch tu pach u paꞌteꞌ.
4 Robob u cꞌat u tucricob bic tabar cu bin u muc u chuquicob Jesús soc u quinsaꞌr.
5 Caj yaꞌarajob:
―Caꞌ ic yʌn pajej u tsꞌocar u qꞌuinin u quiꞌquiꞌ janʌnob.
Quireꞌ jeꞌ u tsꞌictarob a pimoꞌ wa quic chuquic Jesús tan u quiꞌquiꞌ janʌnob.
A xquic cu bin jayic tu joꞌr Jesús a quiꞌ u boqueꞌ
6 Jesús tiꞌ yʌn ich u cajar Betania.
Tiꞌ yʌn ich yatoch Simón a ju cʌnmʌn iqꞌuer u caꞌ uch.
7 Tiꞌ yʌn Jesús,
cu janʌn ich u pocheꞌir och.
Caj u juts u bʌj xquic.
U chꞌamʌn tu tꞌajaꞌan a quiꞌ u boqueꞌ.
U cꞌabaꞌ u chujir,
alabastro,
tunich u chujir tu tꞌajaꞌan yaꞌarir a quiꞌ u bocoꞌ.
Jach manan coj a quiꞌ u bocoꞌ.
Caj joy tu joꞌr Jesús tu curaꞌan janʌn.
8 U camsʌwinicob Jesús caj yirob caj u jayaj tu joꞌr Jesús a quiꞌ u bocoꞌ caj pꞌujob.
Caj yaꞌarajob:
―Tu chen rʌc xup u taqꞌuin.
Baꞌwir tiꞌ caj u chen mʌnaj?
Mʌꞌ ja wirej,
jach coꞌoj a quiꞌ u bocoꞌ.
9 Wa caj cʌnaj caꞌcheꞌ,
caj u caꞌ jaraj yaꞌab u taqꞌuin quir u jasʌr tiꞌ a jach otsir.
10 Jesús caj yuba baꞌ yaꞌarajob u camsʌwinicob.
Caj yaꞌaraj tiꞌ u camsʌwinicob:
―Baꞌwir ca tsꞌiquintiquex xquic.
Tsoy caj u jayaj tin joꞌr a quiꞌ u boqueꞌ.
11 A otsireꞌ rajraꞌ tiꞌ yʌn tu yʌnechex.
Wa ber a cꞌat a yamtej a otsiroꞌ,
caꞌ a yʌn yamtex.
A tenoꞌ mʌꞌ rajraꞌ tiꞌ yʌnen tu yʌnechex.
12 A xquicoꞌ,
rajen caj u jayaj tin joꞌr a quiꞌ u boqueꞌ.
Quireꞌ tabar u muquic in baquer mac.
13 Jach taj quin waꞌaric techex ―quij Jesús―.
Cax wa tu cu bin u tsecꞌtic u jach tsoyir u tꞌʌn Cꞌuj.
Jeꞌ yaꞌaric bic caj u jayaj tin joꞌr xquic a quiꞌ u boqueꞌ soc u cꞌʌꞌotic a jeꞌ xquicaꞌ.
Judas cu bin cꞌubic Jesús
14 Caj tsꞌoc yiric u joyaj tu joꞌr Jesús a quiꞌ u boqueꞌ.
Caj bin Judas Iscariote quir u tsicbar yejer u jach tsꞌurirob sacerdote.
Judas rajiꞌ u camsʌwinic Jesús.
Tuririꞌ ich u doce camsʌwinicob Jesús.
15 Judas caj cꞌuchij caj u cꞌataj tiꞌ u jach tsꞌurir sacerdote:
―Mun ca bin a boꞌoten wa quin cꞌubic Jesús?
Caj boꞌotaꞌb yejer sʌc taqꞌuin treinta.
16 Raꞌ u qꞌuininoꞌ,
caj u toc cʌxtaj bic tabar cu bin u cꞌubic Jesús tu junan.
Jesús caj janij oqꞌuin yejer u camsʌwinicob
17 Yʌn turiꞌ u qꞌuinin quir u cꞌuchur tu qꞌuinin u quiꞌquiꞌ janʌnob saman.
Raꞌ u qꞌuinin caꞌ bin u jantejob pan,
rajiꞌ mʌnaꞌ u tsꞌac quir u sip.
Cꞌuch u camsʌwinicob ich Jesús caj u cꞌatajob tiꞌ:
―Arej tenob tub a cꞌat a jantej a woꞌoch oqꞌuin tu qꞌuinin u quiꞌquiꞌ janʌnob u winiquirob judío?
18 Caj u nuncaj Jesús caj yaꞌaraj tiꞌob:
―Xenex ich u cajar Jerusalén.
Jeꞌ a wiriquex turiꞌ xib ich yatoch.
Arex tiꞌ:
“A wʌjcamsʌyʌjir u cꞌat u tar tu janʌn oqꞌuin soc u cꞌʌꞌotic u qꞌuinin caj u potmastaj yʌjmasir u tꞌʌn Cꞌuj uch.
Tabar u quinsaꞌr a wʌjcamsʌyʌjir rajen cu tar.”
19 U camsʌwinicob caj binob ich u cajar Jerusalén.
Caj araꞌb tiꞌ xib an ten bic toc araꞌb ten Jesús.
Caj toc botaꞌb yoꞌoch Jesús ten u camsʌwinicob quir u cꞌʌꞌotic u qꞌuinin caj potmastaꞌb yʌjmasir u tꞌʌn Cꞌuj uch.
20 Caj acꞌbirchʌjij,
caj cꞌuchij Jesús quir u janʌn.
Yet tarac doce u camsʌwinicob.
Caj curob tu janʌnob yejer Jesús ich pojcheꞌir yoꞌoch.
21 Tan tu janʌn Jesús caj yaꞌaraj:
―Jach taj quin waꞌaric techex.
Yʌn tuririꞌ techex ca bin a mucu cꞌubiquen.
22 Caj jach choquij yorob u camsʌwinicob Jesús.
Jujuntur u camsʌwinicob cu bin u cꞌaticob tiꞌ Jesús:
―Ten wa quin bin in cꞌubiquech Jaj Tsꞌurir?
23 Caj u nuncaj Jesús caj yaꞌaraj tiꞌob:
―A jeꞌ cu ruchic yoꞌoch,
rajiꞌ cu bin u cꞌubiquen tiꞌ yʌn yejerechex.
24 A tenoꞌ taren in yamtic mac tu cotor.
Rajen yʌn in bin quinsbir,
quireꞌ tabar u nupꞌur u tꞌʌn Cꞌuj.
Chen otsir a mac a cu bin u mucu cꞌubiquen.
Jach manan tsoyir wa mʌꞌ tiꞌ yʌn teraꞌ ich yocꞌocab.
25 Judas a tu mucu cꞌubaj Jesús.
Caj cataꞌb tiꞌ Jesús:
―Ten ix tiꞌ,
quin bin in cꞌubiquech Jaj Tsꞌurir?
Caj u nuncaj Jesús:
―Taj,
tech ca bin cꞌubiquen.
26 Tiꞌ toy u janʌnob caj u chꞌaj yoꞌoch pan caj u yʌn tꞌʌnaj Cꞌuj:
―Bayoꞌ Cꞌuj,
quireꞌ caj a tsꞌaj tenob in coꞌochob pan.
Caj u rʌc tꞌaxaj tiꞌ u camsʌwinicob caj yaꞌaraj tiꞌob:
―Jantex a jeꞌ pan quireꞌ in bʌqꞌuer.
Jantex.
27 Caj tsꞌoc u rʌc janticob yoꞌoch pan.
Jesús caj u chucaj u chan ruch yejer u cꞌab u wich uva.
Caj u yʌn tꞌʌnaj Cꞌuj:
―Bayoꞌ Cꞌuj,
tech caj a tsꞌaj tenob u cꞌab u wich uva.
Caj u tsꞌaj tiꞌ u camsʌwinicob.
Caj yaꞌaraj tiꞌob:
―Rʌc uqꞌuex caꞌcaꞌ xotꞌ techex a wuꞌquiquex u cꞌab u wich uva.
28 A jeꞌ u cꞌab u wich uva in qꞌuiqꞌuer quir u nupꞌur u tꞌʌn a baꞌ caj u chꞌic araj Cꞌuj uch.
A jeꞌ cu bin jocꞌar in qꞌuiqꞌuer soc yiric yaꞌab mac cu bin u jawsicob u siꞌpirob.
29 Quin waꞌaric techex.
Mʌꞌ in yʌnyʌn caꞌ uqꞌuic u cꞌab u wich uva hasta cu xur tꞌʌn.
Caꞌ bin in wuqꞌuej yejerechex tu cu bin u reyinticob Cꞌuj.
Jesús cu tsicbar tiꞌ Pedro: Ca bin a waꞌaric mʌꞌ a wer maquen
30 Caj tsꞌoc u cꞌayob caj jocꞌob,
caj binob ich u witsir Olivos.
31 Caj cꞌuchob ich u joꞌr u witsir Olivos.
Caj yaꞌaraj Jesús tiꞌ u camsʌwinicob:
―Techex tu cotorechex ca bin a pꞌʌtiquenex acꞌbir bajeꞌrer,
quireꞌ caꞌ nupꞌuc u tꞌʌn Cꞌuj tu cu yaꞌaric:
“Quin chaꞌic u quinsic a mac a cu cʌnantic yʌrʌcꞌ tʌmʌn yuc.
Rajen cu bin u putsꞌurob yʌrʌcꞌ tʌmʌn yuc.”
32 Caꞌ bin in wʌcꞌʌs riqꞌuir tin quimirir ―quij Jesús―,
tiꞌ ca bin a wiriquenex ich u ruꞌumin Galilea.
Chen a tenoꞌ quin yʌn cꞌuchur ich u ruꞌumin Galilea.
33 Pedro caj yaꞌaraj tiꞌ Jesús:
―Cax tu cotor in wet camsʌwinicob cu bin u pꞌʌtiquechob.
Chen a tenoꞌ,
mʌꞌ in pꞌʌtiquech.
34 Jesús caj yaꞌaraj:
―Jach taj quin waꞌaric tech Pedro.
Mʌꞌ toy cꞌaynʌc cax acꞌbir cax mʌnaꞌ u nup u tenin u cꞌay cax ca bin a waꞌaric tiꞌ mac:
“Mʌꞌ jin wer mac Jesús.”
35 Caj yaꞌaraj Pedro:
―Cax wa in quet quimin yejerech.
Mʌꞌ jin waꞌaric,
mʌꞌ jin werech.
Bayiriꞌ xan,
caj yaꞌaraj u yet camsʌwinicob.
Jesús cu tꞌʌnic Cꞌuj ich u chan corir Getsemaní
36 Caj cꞌuchij Jesús yejer u camsʌwinicob ich u chan corir u cꞌabaꞌ Getsemaní.
Caj yaꞌaraj tiꞌ u camsʌwinicob:
―Teꞌ a yʌn cutarex.
Tar quin bin bʌytʌc quir in tꞌʌnic Cꞌuj.
37 Jesús caj u pʌyaj tu pach Pedro yejer u pararob Zebedeo.
Caꞌtur u pararob.
Jesús caj u yʌnxchun u tucur tu yor,
bayiriꞌ xan,
caj u yʌnxchun u mucꞌyaj.
Jach manan cu tucur caj cꞌuchij bʌytʌc.
38 Caj yaꞌaraj tiꞌob:
―Jach tucur in caꞌ.
Tan u jach bin in wor irej wa bin in caꞌ quimin.
Teꞌ a pꞌatʌrex mʌꞌ ja wenʌnex soc a yamtiquenex.
39 Jesús caj bin u tꞌʌnej Cꞌuj.
Jach bʌytʌc caj bin.
Caj pʌchꞌraj caj u tꞌʌnej Cꞌuj.
Caj yaꞌaraj tiꞌ Cꞌuj:
―Wa tsoy ta tꞌʌn tech,
Tet.
Mʌꞌ ja chaꞌic in jach mucꞌyaj an ten bic caj a toc araj uch.
Wa tsoy ta tꞌʌn tech ca chaꞌic in mucꞌyaj.
Baxuc ten tsoy tin tꞌʌn xan,
caꞌ tac tiꞌ ten a baꞌ a cꞌat ten.
40 Caj riqꞌuij Jesús caj wʌcꞌʌs ur tu yʌn u camsʌwinicob.
Caj yiraj wenʌn u caꞌob.
Caj u tꞌʌnaj Pedro:
―Mʌꞌ wa cꞌuchaꞌan a worex a mucꞌtic a wenex a tresechexeꞌ caꞌ a yamtenex cax turiꞌ hora?
41 Mʌꞌ ja wenʌnex,
tꞌʌnex Cꞌuj soc mʌꞌ u tumtiquex a worex quisin.
Cax a chen cꞌat ajaꞌanechex soc a tꞌʌniquechex Cꞌuj tiꞌ ten.
Chen mʌꞌ ju cꞌuchur a worex a mucꞌtic a wenʌnex quireꞌ jach tac a wenʌnex.
42 Caj wʌcꞌʌs bin Jesús caj u wʌcꞌʌs tꞌʌnaj u Tet:
―Wa tsoy ta tꞌʌn,
Tet,
in mucꞌyaj ich cruz cax a baꞌ cu tar ten,
tsoy.
43 Caj ricꞌ Jesús caj wʌcꞌʌs urij ich u camsʌwinicob.
Caj yiraj wenʌn u caꞌob.
Mʌꞌ tu mucꞌtob u wenʌnob.
Mʌꞌ u pꞌirir u wichob.
44 Caj u pꞌʌtaj u camsʌwinicob Jesús caj bin u caꞌ tꞌʌnej Cꞌuj.
Mʌnaꞌ u nup u tenin u bin u tꞌʌnic Cꞌuj.
Bayiriꞌ caj u wʌcꞌʌs tꞌʌnaj u Tet an ten bic caꞌcheꞌ.
Baxuc caj u yʌn tꞌʌnaj sam.
45 Caj ur Jesús ich u camsʌwinicob caj yaꞌaraj tiꞌob:
―Tsoy a wenʌnex bajeꞌrer,
jes a bʌjex.
Bajeꞌrer cꞌuchij tu qꞌuinin tu chuquenob a tenoꞌ taren in yamtic mac tu cotor.
Bin u cꞌubiquenob tiꞌ mac a yʌn u siꞌpir.
46 Riqꞌuenex ―quij―,
caꞌ xicoꞌon ic pajic a mac a mucu cꞌubiquen quireꞌ tan u tar.
Chuc Jesús
47 Tiꞌ toy cu tsicbar Jesús caj cꞌuchij Judas Iscariote raꞌiriꞌ tiꞌ u camsʌwinicob Jesús yejer a oncejoꞌ.
Yet taracob a jach pim.
U rʌc chꞌamʌnob u mascab,
bayiriꞌ u rʌc chꞌamʌnob cheꞌ,
caj tarob quireꞌ tuchiꞌtaꞌb ten u jach tsuririrob sacerdote yejer u jach tsꞌurirob u cajar u winiquirob judío a cu yaꞌaric a Nuxiboꞌ.
48 Mʌꞌ toy cꞌuchuc Judas ich Jesús caj u toc araj tiꞌob a pimoꞌ:
―A ca wiriquex in tsꞌuꞌtsꞌic u pꞌuc.
Raꞌ ca chuquiquex.
49 Seb caj u juts u bʌj ich Jesús caj yaꞌaraj Judas tiꞌ Jesús:
―Taren in wʌjcamsʌyʌjirech.
―In yajech baj tarech a wirej?
Caj u jutsꞌob u bʌj a pim caj chucob u cꞌʌb Jesús caꞌ xicob mʌcbir.
51 Tiꞌ yʌn raꞌ u camsʌwinic Jesús u nup.
Caj u jitꞌaj u mascab caj u chꞌʌcaj u xiquin u cꞌurew u jach tsꞌurir sacerdote.
Caj rac u xiquin.
52 Jesús caj yaꞌaraj:
―Jup a mascab tu pix.
Mʌꞌ ja wirej,
a mac cu quinsic mac yejer mascab rajiꞌ cu wʌcꞌʌs bin quinsaꞌr yejer mascab.
53 Mʌꞌ ja wirej,
wa cꞌuchaꞌan in wor in tꞌʌnic in Tet soc seb cu tuchiꞌtaꞌr yʌjmasirob u tꞌʌn Cꞌuj quir u taquicob ten.
Jach pim yʌjmasirob u tꞌʌn Cꞌuj.
54 Chen mʌꞌ in tꞌʌnic in Tet quireꞌ caꞌ u yʌn nupꞌur u tꞌʌn,
a caj u toc araj uch,
soc u tar ten an bic caj u toc araj uch.
55 Caj tsꞌoc u tꞌʌnan Pedro caj yaꞌaraj Jesús tiꞌ a mac yʌjchuquirob Jesús:
―Biquinin caj tarechex teraꞌ yejer cheꞌ,
bayiriꞌ yejer a mascabex quir a chuquiquenex iren wa yʌjacꞌricyʌjiren baꞌ.
Rajraꞌ tiꞌ yʌnen ich carem naj caj in camsechex tu ca wocarex a cꞌujintex Cꞌuj.
Biquinin mʌꞌ a toc chuquenex uch?
56 A baꞌ u ber ten bajeꞌrer,
quireꞌ caj u toc araj uch yʌjtseqꞌuirob u tꞌʌn Cꞌuj.
Quireꞌ nupꞌ a baꞌ tsꞌibaꞌan uch.
Raꞌiriꞌ u qꞌuinin u camsʌwinicob Jesús caj rʌc putsꞌob.
Pꞌat Jesús tu junan.
Jesús caj bin purbir ʌcʌtan u jach tsꞌurir u winiquirob judío
57 Yʌjchuquirob Jesús caj bin purbir Jesús ich Caifás.
Raꞌ u jach tsꞌurir sacerdote.
Bayiriꞌ tiꞌ yʌn yʌjcamsʌyʌjirob u tꞌʌn Moisés.
Tiꞌ yʌnob u jach tsꞌurirob u cajar u winiquirob judío a cu yaꞌaric a Nuxiboꞌ.
U rʌc muchꞌquinmʌnob u bʌj xan.
58 Pedro pachir u bin tu cu binob Jesús.
Cꞌʌs nanach cu tar Pedro hasta cꞌuchij tu reꞌaꞌan yatoch Caifás.
Caj oc ich tu reꞌaꞌan yatoch Caifás.
Caj curaj yejer policía soc u yiric baꞌ u ber tiꞌ Jesús.
59 U jach tsꞌurirob sacerdote yejer tu cotor u tsꞌurirob u winiquirob judío.
Tiꞌ u muchꞌquinmʌnob u bʌj quir u wayticob quir u tus taꞌquicob u joꞌr Jesús soc u quinsaꞌr Jesús.
60 Mʌꞌ cꞌuchaꞌan yor u waytob quir u tus taꞌquicob u joꞌr Jesús.
Cax jach pim mac cu tar quir u tus taꞌquicob u joꞌr Jesús.
Pachir caj tarob caꞌtur u winiquirob judío.
61 Caj yaꞌarajob tiꞌ u jach tsꞌurirob u winiquirob judío:
―Tij cuꞌyaj yaꞌaric a jeꞌ xibaꞌ,
cu bin u rʌc jubsic carem naj tu quij cꞌujintiquex Cꞌuj.
Jeꞌ u caꞌ tsꞌʌpquintiqueꞌ u jer carem naj caꞌ bin tsꞌocac u man mʌnaꞌ u nup u qꞌuinin.
62 Caj ricꞌ u chꞌictar Caifás caj yaꞌaraj tiꞌ Jesús:
―Biquinin mʌꞌ a cꞌʌs nunquic tiꞌ a mac tan u taꞌquic a joꞌr tech?
63 Jesús mʌꞌ u cꞌʌs nunquic.
U jach tsꞌurir sacerdote caj u chuchaj Cꞌuj caj yaꞌaraj:
―Cꞌuj cu yiric,
a cuxaꞌanoꞌ.
Arej toꞌon wa tech u pararech Cꞌuj a mac caj u toc araj Cꞌuj yʌn u tar quir u taꞌquic tu cotor mac?
Arej toꞌon soc taj quic najtic.
64 Jesús caj u nuncaj caj yaꞌaraj:
―An ten bic caj a waꞌaraj rajiꞌ ten.
Rajiꞌ ten ca bin a wiren ich u noj Cꞌuj a jach manan chich u mucꞌ.
Quireꞌ taren in yamtej tu cotor mac.
Jeꞌ a wiric in tar tu muyarir caꞌanan.
65 U jach tsꞌurir sacerdote seb caj u jʌtaj u nocꞌ quireꞌ tsꞌic.
Quireꞌ cu tucraꞌ cu pachꞌic Cꞌuj Jesús,
an ten bic caj u nuncaj Jesús rajen Caifás caj yaꞌaraj:
―Baꞌwir tiꞌ u jer mac quir u taꞌquic u joꞌr?
A bʌjirex caj a wuꞌyajex cu pachꞌic Cꞌuj.
66 Arex ten baꞌ ca tucriquex tiꞌ?
Robob u tsꞌurirob u winiquirob judío caj yaꞌarajob:
―Toc yʌn u siꞌpir caꞌ u yʌn u quimin.
67 Caj u tubajob u wich Jesús caj u jʌtsꞌajob.
U jerob caj u tacꞌ jʌtsꞌtajob Jesús.
68 Caj u tus yaꞌarajob:
―Arej tenob mac tu tacꞌ jʌtsꞌtajech wa Cꞌuj caj u tuchiꞌtajech quir a taꞌquic mac tu cotor,
quireꞌ baxuc caj a waꞌaraj.
Mʌꞌ in wer mac Jesús
69 Tiꞌ toy yʌn Pedro ich tancab tu reꞌaꞌan yatoch Caifás.
Caj u jutsꞌ u bʌj tuririꞌ xquic ich Pedro.
Raꞌ u cꞌurew Caifás.
Caj araꞌb tiꞌ Pedro:
―A techoꞌ ―quij yaꞌaraj―,
a wet man Jesús ich u ruꞌumin Galilea xan.
70 Pedro caj yaꞌaraj ʌcʌtan tu cotor mac:
―A tenoꞌ,
mʌꞌ in wer baꞌ ca waꞌaric a techoꞌ.
71 Sansam caj bin Pedro ich u jor yatoch Caifás.
U jer xquic caj yiraj caj yaꞌaraj:
―A jeꞌ xibaꞌ xanoꞌ,
yet man Jesús raꞌ cu tar ich u cajar Nazaret.
72 Pedro caj yaꞌaraj,
caj u chucaj Cꞌuj,
caj yaꞌaraj:
―A Cꞌujoꞌ cu yiric.
Mʌꞌ jin wiramʌn xib a ca cꞌatic tenoꞌ.
73 Sansam caj u jutsꞌ u bʌj xib ich Pedro caj araꞌb tiꞌ Pedro:
―Taj tech a wet mʌn Jesús uch.
A mʌꞌ quet baxuc a tꞌʌn yejer Jesús.
74 Caj araꞌb Pedro,
caj u chucaj Cꞌuj,
Pedro caj yaꞌarajeꞌ:
―Cꞌuj cu yiric,
mʌꞌ in wiramʌn xib a jeꞌ ca waꞌaric tenoꞌ.
Cax cu quinsiquen Cꞌuj.