A xquicoꞌ cu jicꞌtic tsꞌac tu yoc Jesús
12
Yʌn seis u qꞌuinin quir u cꞌuchur tu qꞌuinin pascua.
Caj binob Jesús yejer u camsʌwinicob ich u cajar Betania tu cʌjaꞌan Lázaro a tu ricꞌsaj Jesús tu quimirir.
2 Marta caj u pʌyaj Jesús yejer u camsʌwinicob quir u quiꞌ janʌnob.
Tiꞌ yʌn Lázaro yejer u jer macob tan u janʌnob yejer ich u pojcheꞌob.
Marta cu tar purbir yoch tiꞌob.
María unge a Jesús (Juan 12.1-11)
3 María,
u yitsꞌin Marta,
tu chꞌaj tuꞌ yʌn Jesús chumuc kilo a quiꞌ u boqueꞌ u cꞌabaꞌ nardo.
Jach coꞌoj a nardojoꞌ caj u rʌc jicꞌtaj tu yoc Jesús,
María caj u tisaj yejer u wʌcꞌʌs tsotser u joꞌr.
Tu cotor u japnin yatoch tu rʌc bacꞌaj u boc nardo.
4 Tiꞌ yʌn Judas Iscariote u yet janʌn Jesús,
rajiꞌ u parar Simón Iscariote.
Rajiꞌ tuririꞌ ich u camsʌwinicob Jesús chen rajiꞌ,
Judas,
cu wʌcꞌʌs bin u cꞌubic Jesús caꞌ quinsac.
Rajiꞌ caj yaꞌaraj:
5 ―Wa tu canaj a jeꞌ quiꞌ u boc a tu jicꞌtaj tu yoc Jesús,
a tu chen jaraj u taqꞌuin caꞌch tres cientos denarios ―u cꞌat yaꞌaric u taqꞌuin a mac a cu jaric tuririꞌ yaxqꞌuin tu cu beyaj―.
Jach tsoy caꞌ u jʌsej tiꞌ a mac otsireꞌ ―baxuc caj yaꞌaraj Judas.
6 Judas mʌꞌ u jach tucric a mac otsir tu chen araj aroꞌ quireꞌ Judas cu cʌnantic u taqꞌuin u yet camsʌwinicob Jesús.
Mʌꞌ ja wirej,
a Judasoꞌ,
cu chʌc aꞌcric taqꞌuin tu cu tsꞌabʌr u cʌnantej tiꞌ ten u yet camsʌwinicob Jesús.
7 Jesús caj yaꞌaraj tiꞌ Judas:
―Tsireꞌej mʌꞌ a waꞌaric aroꞌ quireꞌ tu cʌnantaj a jeroj soc u cꞌuchur tu qꞌuinin in quimin.
8 Rajraꞌ tiꞌ yʌn otsir tuꞌ yʌnechex.
Chen a tenoꞌ mʌꞌ rajraꞌ tiꞌ yʌnen tuꞌ yʌnechex ―quij Jesús.
U tsꞌurirob sacerdote cu tucricob u quinsej Jesús
9 Jach pim a winiquirob judío a tu muchꞌquintajob u bʌj ich u cajar Jerusalén caj yubob cꞌuchij Jesús yejer u camsʌwinicob ich u cajar Betania.
Rajen binob u yirejob Jesús.
Mʌꞌ chen cꞌuchob quir u yiricob Jesús quir yiric Lázaro xan a mac ricꞌsaꞌb tuꞌ quimen ten Jesús.
10-11 Caj tarob ich u cajar Betania mʌꞌ toy u yacsajob tu yorob tiꞌ Jesús.
Caj jocꞌob tu cajar Betania tu yacsob tu yorob tiꞌ Jesús quireꞌ yerob yʌjtaquirob quireꞌ tu yirob Lázaro rajiꞌ ricꞌsaꞌb ten Jesús tuꞌ quimen.
Rajen u jach tsꞌurirob sacerdote tu pꞌeriꞌquintob yorob u tucricob u quinsicob Lázaro xan.
Jesús cʌpaꞌan ich u pach chan tsimin tan u yocar ich u cajar Jerusalén
12 Caj sasij a pimob tan u muchꞌquinticob u bʌj ich u cajar Jerusalén quireꞌ cꞌuchij tu qꞌuinin u quiꞌquiꞌ janʌnob u winiquirob judío.
Caj yubob tan u cꞌuchur Jesús ich u cajar Jerusalén.
Entrada triunfal a Jerusalén (Juan 12.12-19)
13 Rajen caj jocꞌob u janchꞌʌtejob u reꞌ pajoꞌ caj jocꞌob tancab ich u cajar Jerusalén.
U mʌchmʌnob u reꞌ pajoꞌ quir u binob u nupꞌicob Jesús ich bej.
Cꞌam tan u tꞌʌnob tu cu tarob ich bej.
Caj yaꞌarob:
―Jeꞌ cu tar ij cʌjtaquirex jach quiꞌ ij corex quireꞌ bajeꞌrer tuchiꞌtaꞌb ten Cꞌuj.
Caꞌ quiꞌac ij corex.
Rajiꞌ cu bin yocar quir ic reyintiquex a tenoboꞌ u pararenob ic nunquirex Israel.
Caꞌ ij carex tiꞌ Cꞌuj:
“Jach caremech Cꞌuj.”
14 Tiꞌ yʌn chan tsimin taroꞌ.
Jesús caj naquij quir u cʌptar tu pach an ten bic tsꞌibaꞌan ich u tꞌʌn Cꞌuj uch tan yaꞌaric:
15 A techexoꞌ,
a xquicoꞌ a mac cʌjaꞌan ich u cajar Jerusalén,
u jer u cꞌabaꞌ Sión,
mʌꞌ a chꞌiquex sajaquir,
jeꞌ u tar a mac caꞌ bin a reyintiquex.
Jeꞌ u tar cʌpʌcbar tu pach chan tsimin.
Baxuc cu yaꞌaraꞌ tiꞌ Jesús uch.
16 U camsʌwinicob Jesús,
mʌꞌ ju najtobiꞌ caj yirob Jesús u captar tu pach chan tsimin quir u sʌjtaꞌ ten tu cotor mac.
Caj wʌcꞌʌs binij Jesús ich caꞌanan caj cꞌaj tiꞌob a baꞌ tsꞌibtaꞌb tiꞌ Jesús uch.
17 A pimob a tarob ich bej quir u nupꞌicob Jesús quireꞌ tu yubob yaꞌaric:
“Rajiꞌ tu tꞌʌnaj caꞌ jocꞌac Lázaro tu butꞌ u baquer.
18 Rajiꞌ tu ricꞌsaj Lázaro tuꞌ quimen.”
19 Rajen a fariseojoꞌ caj u pacran arob:
―Iriquex mʌꞌ cꞌuchaꞌan ij corex tiꞌ quireꞌ tu cotor mac tan u binob tu pach quir u cʌnicob u tꞌʌn ―baxuc caj u pacran arob.
A mac a cu tꞌʌn griego u cꞌat u tsicbarob yejer Jesús
20 Tiꞌ yʌnob u winiquirob griego a rajraꞌ cu tarob cu cꞌuchur tu qꞌuinin u quiꞌquiꞌ janʌnob u winiquirob judío quir u cꞌujinticob Cꞌuj,
irob u winiquirob judío.
Caj tarob u sijejob baꞌ tiꞌ Cꞌuj xan.
Jesús predice su muerte (Juan 12.20-36)
21 Robob caj tarob u tsicbarob yejer Felipe.
Rajiꞌ u camsʌwinic Jesús a cu tar tu cajar Betsaida a tiꞌ yʌn tu ruꞌumin Galilea,
caj u chich arajob tiꞌ:
―Jach tsꞌurir,
quen,
in cꞌatob in wiricob Jesús ―quij.
22 Rajen Felipe caj bin ich Andrés caj yaꞌaraj tiꞌ.
Rajen caꞌturoꞌ u camsʌwinicob Jesús caj binob ich Jesús caj yaꞌarob tiꞌ.
23 Jesús caj yaꞌaraj tiꞌob:
―Cꞌuchij tin qꞌuin a tenoꞌ a tu tuchiꞌten Cꞌuj soc u caremquintiquen Cꞌuj,
a tenoꞌ irenechex.
24 Taj a baꞌ quin wac techex,
u yijir u wich trigo cu tsꞌabʌr u wich wa cu pʌcꞌʌr ich ruꞌum.
Wa pʌcꞌaꞌan cu netsꞌajic u wich trigo.
Wa mʌꞌ pʌcꞌaꞌan chen tu junan yʌn.
Baxuc ten ―quij Jesús―,
wa quin quimin,
yaꞌab mac cu bin u yacsicob tu yorob ten quir u tar tin pach ―quij Jesús―.
25 Baxuc yejer techex.
A mac mʌꞌ u cꞌat u cꞌubic u bʌj tiꞌ ten soc u quinsaꞌ irej ten,
cu bin tsꞌabir u mucꞌyaj munt qꞌuin.
Chen a mac u cꞌat u cꞌubic u bʌj tiꞌ ten soc u quinsaꞌ,
rajiꞌ cu bin u cuxtar munt qꞌuin.
26 Tu cotor mac u cꞌat u yamtiquen caꞌ tacob tin pach.
Baxucoꞌ cu bin cꞌuchur ich caꞌanan tuꞌ yʌnen quireꞌ a mac a tu yamtajen cu bin quiꞌ acsaꞌbir ten Cꞌuj.
Yʌn in quinsaꞌ
27 Jesús caj yaꞌaraj:
―Yaj in wuꞌyic tin wor bajeꞌrer.
Mʌꞌ cꞌuchaꞌan in wor in wac tiꞌ in Tet Cꞌuj:
“Yʌmtej ten,
Tet”,
quireꞌ taren ich yocꞌocab quir in mucꞌyaj a baꞌ cu bin tar ten.
Rajen taren quir in mucꞌyaj.
28 Jesús caj u tꞌʌnaj Cꞌuj tan yaꞌaric:
―Baxuc in cꞌat caꞌ u sʌj techob Cꞌuj.
Jeroj tuneꞌ,
caj yubob u tꞌʌn caꞌanan.
Cꞌuj caj u nuncaj,
tiꞌ u tar u tꞌʌn ich caꞌanan:
―Tan in toc sʌjtaꞌreꞌ,
jeꞌ in caꞌ sʌjtaꞌreꞌ ―quij Cꞌuj―,
raꞌ u qꞌuinin caꞌ bin quinsaquech.
29 A mac a tiꞌ yʌnob a tan u chꞌictarob caj yubob u tꞌʌn cꞌam a tar u tar ich caꞌanan.
Robob caj u pacran arajob tan yaꞌaricob:
―Baꞌ pecnʌjij sam,
a tiꞌ ij cuꞌyajex?
U jer caj yaꞌarob:
―Yʌjmasir u tꞌʌn Cꞌuj,
rajiꞌ tꞌʌnʌjij.
Rajiꞌ tin wuꞌyajob,
tin tꞌʌn.
30 Jesús caj yaꞌaraj tiꞌob:
―In Tet,
Cꞌuj,
caj u tꞌʌnajen,
mʌꞌ chen jariꞌ tiꞌ ten,
tiꞌ techex xan caꞌ a wuꞌyex soc a werex in Tet,
Cꞌuj,
cu yubic in tꞌʌn.
31 Bajeꞌrer ―quij Jesús―,
cꞌuchij tu qꞌuinin cu bin jʌsbir mac a yʌn u siꞌpireꞌ quireꞌ mʌꞌ biqꞌuin u cꞌat yacsicob tu yor ten.
Bajeꞌrer ―quij Jesús―,
cꞌuchij tu qꞌuinin xan cu bin rucꞌsaꞌbir u beyaj a quisinoꞌ quireꞌ rajiꞌ cu tsꞌurinticob ich yocꞌocab.
32 Quireꞌ a tenoꞌ quin bin quinsbir ich cruz.
A baywoꞌ tu cotor mac cu bin tar tuꞌ yʌnen quir u yacsicob tu yorob ten cax u winiquirob judío cax mʌꞌ u winiquirob judío.
33 Baxucoꞌ caꞌ u chaj u najticob tiꞌ cu bin quimin ich cruz.
34 Rajen a pimob caj u nuncob tan yaꞌaricob:
―Tij cuꞌyajex a baꞌ tsꞌibaꞌan ich u tꞌʌn Cꞌuj tiꞌ a Cristojoꞌ cu yaꞌaric:
“Munt qꞌuin cu bin u cuxtar a Cristojoꞌ.”
Wa Cristojech biquinin ca waꞌaric:
“Bin in caꞌ quinsaꞌ ich cruz?”
A techoꞌ ca waꞌaric:
“Iren techex”,
quireꞌ baxuc ca waꞌaric.
35 Jesús caj u yaꞌaraj tiꞌob:
―Irej a mac a cu ximbar ich bej,
cu jach pꞌisic u bʌj soc mʌꞌ u yacꞌbirchʌjʌr tu bej wa tabar u bin qꞌuin.
Quireꞌ wa cu yacꞌbirchʌjʌr mʌꞌ yer tu cu bin.
Aroꞌ baxuc ten,
tabar in bin,
a mac cu camsiquechex.
Rajen toc acsex ta wor ten bajeꞌrer.
Tiꞌ toy yʌn u qꞌuinin quir a wacsiquex ta worex soc a bin tacbirex munt qꞌuin.
36 Tiꞌ toj yʌnen tuꞌ yʌnechex,
toc acsex ta worex ten.
Quireꞌ a werex a wʌjtaquirenex a tenoꞌ soc a werex jach jaj u pararintechex Cꞌuj.
Caj tsꞌoc yaꞌaric aroꞌ caj binij Jesús.
Mʌꞌ u caꞌ u tsicbar tiꞌob.
Yaꞌab u winiquirob judío mʌꞌ cꞌuchaꞌan yorobob yacsicob tu yor ti Jesús
37 Cax yaꞌab tu yesaj carem beyaj Jesús tiꞌob,
mʌꞌ tu yacsob tu yorob tiꞌ.
Creyentes y no creyentes (Juan 12.37-50)
38 Baxuc caj u nupꞌsaj a baꞌ araꞌb ten yʌjtseqꞌuir u tꞌʌn Cꞌuj Isaías uch.
Quireꞌ Isaías tu tsꞌibtaj uch:
Jaj Tsꞌurir,
quij Isaías,
a mac a tin tsecꞌtaj a tꞌʌn tiꞌ uch,
mʌꞌ tu yacsob tu yorob tiꞌ.
Cax ta yamtaj tiꞌob,
mʌꞌ tu sʌjtech Jaj Tsꞌurir,
quij Isaías.
A techoꞌ yʌn tu cotor a mucꞌ.
39 Rajen mʌꞌ cꞌuchaꞌan yor u winiquirob judío u yacsicob tu yor tiꞌ.
Tu caꞌ ten Isaías tu tsꞌibtaj uch tan yaꞌaric:
40 Acꞌbirquintaꞌb u wich ten Cꞌuj u winiquirob judío,
bayiriꞌ caj chichquintaꞌb u joꞌr soc mʌꞌ u yiricob baꞌ soc mʌꞌ u najtic baꞌ xan,
soc quir u cꞌaxicob yorob,
soc u toꞌcarob ten Cꞌuj.
41 Baxuc caj yaꞌaraj Isaías uch quireꞌ u cꞌat caꞌ ij quirex Cristo,
rajiꞌ yʌn tu cotor u mucꞌ.
Rajen yaꞌaraj aroꞌ.
42 Cax yaꞌab u winiquirob judío mʌꞌ ju yacsob tu yorob tiꞌ Jesús.
Chʌc yʌn u tsꞌurirob u winiquirob judío tu yacsajob tu yorob tiꞌ Jesús.
Tu muc u acsajob tu yorob quireꞌ cu sʌjticob a fariseo cu bin jocꞌsabirob ich carem naj soc mʌꞌ u yʌnyʌn tar.
43 Mʌꞌ ja wirej,
cu tucricob soc tsoy irir ten u racꞌob chen mʌꞌ u tucricob soc tsoy irirob ten Cꞌuj,
rajen mʌꞌ tu toc arob tiꞌ u racꞌob wa tu yacsob tu yorob.
A mac mʌꞌ u yacsicob tu yorob tiꞌ Jesús cu bin tsꞌabir u mucꞌyajob ten Cꞌuj
44 Jesús caj u cꞌam araj tiꞌ a pimoꞌ tan yaꞌaric:
―Tu cotor mac a cu yacsicob tu yorob tiꞌ in tꞌʌn,
mʌꞌ chen ten cu yacsic tu yor tiꞌ in tꞌʌn.
Baxuc cu yacsicob tu yor tiꞌ u tꞌʌn in Tet Cꞌuj a mac tu tuchiꞌtajen.
45 Tu cotor mac u yirmʌnen baxuc xan yirmʌn in Tet,
a mac tu tuchiꞌtajen.
46 A tenoꞌ ―quij Jesús―,
iren quib quir in yercꞌacꞌtic techex a mac tiꞌ yʌn ich yocꞌocab.
Tu cotor mac a cu yacsicob tu yorob ten mʌꞌ u mʌn tu yacꞌbirirob quireꞌ yerob Cꞌuj.
47 A mac cu yubicob in tꞌʌn wa mʌꞌ ju yacsic tu yor tiꞌ in tꞌʌn mʌꞌ taren quir in taquic u joꞌr mac bajeꞌrer.
Quireꞌ mʌꞌ taren quir in taquic u joꞌr mac quireꞌ taren quir in taquic mac.
48 A maqueꞌ a mʌꞌ u sʌjtiquen a mʌꞌ ju yacsic tu yor tiꞌ in tꞌʌn caꞌ bin cꞌuchuc tu qꞌuinin u xur tꞌʌn cu bin tsꞌabir u mucꞌyaj in tꞌʌn a tin waꞌaraj tiꞌ.
Rajiꞌ cu bin u taꞌquic u joꞌr quireꞌ mʌꞌ tu quibaj in tꞌʌn.
Rajen cu bin tsꞌabir u mucꞌyaj quireꞌ mʌꞌ tu quibaj in tꞌʌn ―quij―.
49 A tenoꞌ mʌꞌ tin chen araj techex in bʌjiriꞌ in tꞌʌn.
In Tet Cꞌuj a mac tu tuchiꞌtajen tu yaꞌaraj baꞌ yʌn in wac techex.
Baxuc a baꞌ yʌn in camsiquechex xan.
50 In wer a baꞌ caj u yaꞌaraj ten in Tet,
raꞌ quin tsecꞌtic techex soc yʌn techex a cuxtarex munt qꞌuin.
Raꞌiriꞌeꞌ a tu yaꞌaraj ten in Tet,
quin wac techex,
quet bayiriꞌ quin wac techex.