Jesús cu pꞌoꞌic u yoc u camsʌwinicob
13
Tabar u cꞌuchur tu qꞌuinin u quiꞌquiꞌ janʌnob u winiquirob judío u qꞌuinin pascua.
Jesús yer cꞌuchij tu qꞌuinin tiꞌ cu wʌcꞌʌs bin ich u Tet caꞌanan.
Jesús caj u yajquintaj a mac tsꞌaꞌb tiꞌ ten u Tet Cꞌuj.
Jach manan caj u yajquintaj a tsꞌaꞌb ten u Tet.
2-4 A quisinoꞌ toc acaꞌan tiꞌ Judas Iscariote.
U tet Judas,
Simón u cꞌabaꞌ.
Rajen u cꞌat u cꞌubic Jesús soc u chucur.
Jesús yer tsꞌaꞌb tiꞌ u beyaj ten u Tet Cꞌuj quir u cʌnantic tu cotor baꞌ.
An ten bic caj tuchiꞌtaꞌb ich yocꞌocab yer xan jeꞌ u caꞌ bin ich caꞌanan ich u Tet Cꞌuj.
Tiꞌ toy cu janʌnob oqꞌuin tu qꞌuinin pascua.
Cax Jesús tarij ich Cꞌuj caj riqꞌuij caj u pitaj u caꞌ yarir u nocꞌ caj u chꞌaj u nocꞌ tu cu tisic baꞌ caj u witꞌcꞌʌxtaj tu nʌcꞌ,
irej cꞌurew a nanij cu pꞌoꞌic yoc a mac acsaꞌb ich naj.
Jesús lava los pies de los discipulos (Juan 13.1-17)
5 Jesús caj u peꞌaj yaꞌarir ich palancan quir u pꞌoꞌic yocob u camsʌwinicob a curaꞌanob tu janʌnob.
Caj u tisaj u yocob yejer a nocꞌoꞌ a tu witꞌcꞌʌxtaj tu nʌcꞌ.
6 Jesús caj cꞌuchij ich Simón Pedro quir u pꞌoꞌic u yocob caj yaꞌaraj:
―Jaj Tsꞌurir,
mʌꞌ jin najtic.
Biquinin ca pꞌoꞌic in woc?
―quij.
7 Jesús caj u nuncaj tiꞌ,
tan yaꞌaric:
―A baꞌ quin betic bajeꞌrer mʌꞌ ja najtic chen pachir ca bin a najtic.
8 Pedro caj yaꞌaraj:
―Mʌꞌ in chaꞌic a pꞌoꞌic in woc,
mʌꞌ biqꞌuin.
Jesús caj u nuncaj tiꞌ,
tan yaꞌaric:
―Wa mʌꞌ jin pꞌoꞌic a woc,
mʌꞌ ten yʌninechiꞌ.
9 Simón Pedro caj yaꞌaraj:
―Jaj Tsꞌurir,
quen,
mʌꞌ chen in woc ca pꞌoꞌic,
pꞌoꞌej in cꞌʌb xan yejer in joꞌr.
10 Jesús caj yaꞌaraj tiꞌ:
―A mac tsꞌoc u yichir mʌꞌ baꞌwir cu pꞌobar tu cotor chen u yoc cu pꞌobar chen tiꞌ u yoc.
Baxucoꞌ toc pꞌoꞌaꞌanechex.
Mʌꞌ ja wirej,
toc rucꞌsaꞌan a siꞌpirex chen tiꞌ yʌn tuririꞌ tu yʌnechex mʌꞌ rucꞌsaꞌan u siꞌpiriꞌ.
11 Quireꞌ Jesús yer Judas cu bin cꞌubic,
rajen tu yaꞌaraj:
“Tuririꞌ tuꞌ yʌnechex mʌꞌ rucꞌsaꞌan u siꞌpiriꞌ.”
12 Caj tsꞌoc u pꞌoꞌic yoc u camsʌwinic,
Jesús tu caꞌ buquintaj u caꞌyarir u nocꞌ.
Caj wʌcꞌʌs cura tu poꞌcheꞌir u janʌn caj u cꞌataj tiꞌob:
―A wer wa biquinin caj in pꞌoꞌaj a woquex?
13 Quireꞌ techex ca tꞌʌniquenex in wʌjcamsayʌjirechex,
baxuc ca tꞌʌniquenex Jaj Tsꞌurir.
Tsoy ca tꞌʌniquenex quireꞌ taj ten tin camsiquechex quireꞌ taj a Jaj Tsꞌurirenex xan.
14 A tenoꞌ a Jaj Tsꞌurirenex,
baxuc a yʌjcamsʌyʌjirenechex tan in pꞌoꞌic a woquex.
Baxuc techex soc mʌꞌ a tucriquex jach noꞌjechex,
caꞌ a yamtex a wet acsaꞌorirex.
15 A techexoꞌ ta wirex baꞌ tin betaj,
baxuc techex,
rajraꞌ caꞌ a betex,
an ten bic ten tin betaj.
16 Taj a baꞌ quin waꞌaric techex,
mʌꞌ tsoy wa ju cꞌurew cu tucric jach nenoꞌj u beyaj ―quij Jesús―,
rajen mʌꞌ u bin u betic an ten bic u jach tsꞌurir.
Mʌꞌ tsoy wa mac tuchiꞌtaꞌb cu tucric jach nenoꞌj u beyaj.
Rajen bin u betic an ten bic a mac tuchiꞌtej.
17 Wa ca najtiquex a jeꞌ quin camsiquechex ca bin a cʌniquenex.
Rajen cu bin u quiꞌ tar a worex.
18 ’Mʌꞌ tan in tsicbar tiꞌ tu cotorechex.
In wer mac tin tetajechex quir in camsiquechex.
Chen tiꞌ yʌn tuririꞌ ich techex a mac tin tetaj,
aroꞌ mʌꞌ quir u yamtiquen.
A tenoꞌ tin chen tetaj quir in nupꞌsic a baꞌ tsꞌibaꞌan ich u tꞌʌn Cꞌuj tu cu yaꞌaric ich u tꞌʌn Cꞌuj uch:
“A mac pꞌeriꞌ in janʌn yejeren a mac in wet man.
Rajiꞌ cu bin u cꞌubiquen.”
Raꞌ cu tsicbar tiꞌ ten.
Jesús predice la traición (Juan 13.18-38)
19 Mʌꞌ toy cꞌuchuc tu qꞌuinin u cꞌubiqueniꞌ quin toc aric techex soc a najtiquex soc caꞌ bin jach cꞌuchuc tu qꞌuinin u cꞌubiquen caꞌ bin a quiꞌ acsex ta worex ten.
Quireꞌ a werex yʌjtaquirenechex.
20 A mac a cu yacsic a mac tin tuchiꞌtaj,
irej wa cu yacsiquen.
A mac a cu yacsiquen,
irej wa cu yacsic a mac a tu tuchiꞌtajeneꞌ.
Jesús cu yaꞌaric Judas cu bin u cꞌubic
21 Caj tsꞌoc yaꞌaric aroꞌ Jesús yaj cu yubic caj yaꞌaraj tiꞌ u camsʌwinicob:
―Taj a baꞌ quin wac techex,
tuririꞌ ich techex cu bin u cꞌubiquen.
22 Rajen u camsʌwinicob caj u yʌnxchun u pacran pʌcticob u bʌj quireꞌ mʌꞌ yerob mac tan u tsicbariꞌ tiꞌ.
23 Tiꞌ yʌnen,
quij Juan,
rajiꞌ Jesús cu jach yajquintic jach bʌytʌc curaꞌan janʌn yejer Jesús.
24 Simón Pedro caj yesaj tiꞌ Juan caꞌ u cꞌatej tiꞌ Jesús wa mac tan u tsicbar tiꞌ.
25 Tiꞌ yʌn Juan bʌytʌc tuꞌ yʌn Jesús,
rajen caj u cꞌataj:
―Mac aroꞌ?
Jaj Tsꞌurir ―quij.
26 Rajen Jesús caj u nuncaj tiꞌ,
tan yaꞌaric:
―A mac a quin tsꞌic tiꞌ yoch pan a tsꞌoc in chuquic,
rajiꞌ cu bin u cꞌubiquen.
Caj tsꞌoc u chuquic yoch pan caj u tsꞌaj tiꞌ Judas,
rajiꞌ u tet Judas Simón Iscariote.
27 Caj tsꞌoc u tsꞌabʌr yoch pan Judas,
caj oc quisin tiꞌ Judas.
Rajen Jesús caj u yaꞌaraj:
―A baꞌ ca bin a betej bajeꞌrer toc sebquintej,
betej bajeꞌrer.
28 U camsʌwinicob a mac yet janʌnob ich u pojcheꞌir mʌꞌ yerob biquinin caj yaꞌaraj aroꞌ tiꞌ Judas.
29 Quireꞌ Judas raꞌ u beyaj quir u cʌnantic u taqꞌuin u yet camsʌwinicob,
rajen caj u sosoc tucrajob Jesús tan yaꞌaric:
―Joqꞌuen mʌnej a baꞌ ij cꞌat quir ij quiꞌquiꞌ janʌnex.
Chen u jer caj u sosoc tucrajob araꞌb ten Jesús tiꞌ Judas caꞌ u jʌsej taqꞌuin tiꞌ a mac mʌnaꞌ.
30 Caj tsꞌoc u jantic yoch pan Judas sep caj joqꞌuij,
jach acꞌbir.
Jesús tu yaꞌaraj u jer u tꞌʌn ricꞌben
31 Caj tsꞌoc u bin Judas,
Jesús caj u yaꞌaraj tiꞌ u camsʌwinicob:
―Bajeꞌrer cꞌuchij tu qꞌuinin cu bin u sʌjtiquen tu cotor mac.
A tenoꞌ tu tuchiꞌ ten Cꞌuj a mac irenechex.
Cu bin sʌjtaꞌbir Cꞌuj xan quireꞌ a baꞌ quin bin in betej.
32 Quireꞌ a baꞌ quin bin in betej cu bin sʌjtaꞌbir Cꞌuj ten mac.
Baxuc a Cꞌujoꞌ cu bin u yiric jach caremen a tenoꞌ.
Bajeꞌrer cꞌuchij tu qꞌuinin cu yiric caremen a tenoꞌ.
33 In chan pararechex,
tabar in bin,
caꞌ bin a cʌxtiquenex an ten bic caj in waꞌaraj tiꞌob u winiquirob judío.
Baxuc xan quin waꞌaric techex tuꞌ quin bin a tenoꞌ,
mʌꞌ toy cꞌuchaꞌan a wor a tarex tuꞌ quin bin.
34 Quin toc aric techex u jer in tꞌʌn ricꞌben.
Quin wac techex:
Yajquintex a pacran bʌjex.
An ten bic quin yajquintic techex.
35 Wa baxucoꞌ tu cotor cu bin u yerob in camsʌwiniquechex wa ca pacran yajquintex a bʌjex.
Jesús cu yaꞌaric tiꞌ Pedro: Jeꞌ a waꞌaric mʌꞌ a cꞌʌꞌoteneꞌ
36 Simón Pedro caj u cꞌataj tiꞌ Jesús,
tan yaꞌaric:
―Jaj Tsꞌurir ―quij―,
tub u wich a bin?
Jesús caj u nuncaj tiꞌ:
―A tuꞌ quin bin a tenoꞌ mʌꞌ cꞌuchaꞌan a wor a tar bajeꞌrer.
Chen pachir jeꞌ a tareꞌ ―quij Jesús.
37 Pedro,
caj u yaꞌaraj:
―Jaj Tsꞌurir ―quij―,
biquinin ca waꞌaric mʌꞌ cꞌuchaꞌan in wor in tar ta pach bajeꞌrer?
―quij Pedro―.
Cax quimiquen tiꞌ tech jach tsoy tin tꞌʌn.
38 Jesús caj yaꞌaraj tiꞌ:
―A techoꞌ Pedro mʌꞌ a cꞌat a quiminiꞌ,
taj quin wac tech mʌꞌ toy cꞌaynʌc a caxoꞌ mʌnaꞌ u nup u tenin caꞌ bin a waꞌarej mʌꞌ a cꞌʌꞌoteniꞌ.
Tabar in bin,
caꞌ bin a cʌxtiquenex a tenoꞌ.