A tenoꞌ pꞌeriꞌen yejer in Tet Cꞌuj, quij Jesús
14
Jesús caj yaꞌaraj tiꞌ u camsʌwinicob:
―Mʌꞌ a xacꞌ a tucriquex baꞌ,
acsex ta wor tiꞌ Cꞌuj.
Baxuc ten acsex ta worex ten xan.
2 Tar quin binoꞌ ich in Tet Cꞌuj.
Wa mʌꞌ taj caꞌch mʌꞌ in wac techex.
Tar quin binoꞌ quir in tsoyquintic quir a wocarex quir a cʌjtarex.
El único camino a Dios (Juan 14.1-14)
3 Cu tsꞌocar in tsoyquintiqueꞌ,
jeꞌ in caꞌ tareꞌ quir in pʌyiquechex soc rajraꞌ tiꞌ yʌnechex tuꞌ yʌnen.
4 A tuꞌ quin bin a tenoꞌ a toc erex bic tabar a tarex.
5 Tomás caj u yaꞌaraj tiꞌ:
―Jaj Tsꞌurir ―quij―,
mʌꞌ in werob tuꞌ ca bin.
Bic in weticob bic tabar in tar tuꞌ yʌnech?
6 Jesús caj u nuncaj tiꞌ,
tan yaꞌaric:
―Quireꞌ a tenoꞌ caꞌ bin cꞌuchuquechex tuꞌ yʌn in Tet Cꞌuj.
Quireꞌ a tenoꞌ caꞌ bin a wetiquex a baꞌ taj.
A tenoꞌ quin tsꞌic a cuxtarex ricꞌben.
Chen a mac a cu yacsic tu yor ten cu bin u cꞌuchur tuꞌ yʌn in Tet Cꞌuj.
A mac mʌꞌ u yacsic tu yor in tꞌʌn mʌꞌ cꞌuchaꞌan yor u yer Cꞌuj.
7 Raꞌ u qꞌuinin mʌꞌ a werenexiꞌ,
rajen mʌꞌ a werex in Tetiꞌ.
Bajeꞌrer a chʌc erex in Tet xan quireꞌ tan a cʌnic a werenex xan.
8 Rajen Felipe caj yaꞌaraj tiꞌ:
―Jaj Tsꞌurir ―quij―,
chaꞌ in wiricob ic Tet Cꞌujex a baxucoꞌ tiꞌtiꞌ tenob.
9 Jesús caj yaꞌaraj:
―Mun qꞌuin tiꞌ yʌnen yejerechex?
Mʌꞌ toy a weren,
Felipe?
A mac yirmʌnen baxuc yirmʌn in Tet Cꞌuj xan.
Biquinin ca wac ten:
“Chaꞌ in wiricob ic Tetex Cꞌuj”?
10 Mʌꞌ wa ta wacsex ta worex raꞌiriꞌenob yejer in Tet Cꞌuj?
A baꞌ quin waꞌaric techex mʌꞌ in tꞌʌniꞌ.
A quin waꞌaric techexoꞌ u tꞌʌn in Tet Cꞌuj.
Mʌꞌ ja wirej,
in Tet tiꞌ cʌjaꞌan tin pixam rajiꞌ cu betic a carem beyajoꞌ.
11 Acsex ta worex ten raꞌiriꞌenob yejer in Tet Cꞌuj.
Wa mʌꞌ cꞌuchaꞌan a wor a wuꞌyic a baꞌ quin waꞌaric techex,
rajen acsex ta worex tiꞌ a baꞌ quin betic.
12 Taj a baꞌ quin wac techex.
Acsex ta worex wa quin yamtiquechex soc quet bayiriꞌ carem a beyajex xan an ten bic ten carem in beyaj.
Chen jach manan ca bin a betiquex quireꞌ caꞌ bin xiquen ich in Tet Cꞌuj.
13 Quireꞌ ta wacsex ta worex ten,
rajen cꞌuchaꞌan a worex a cꞌatic baꞌ tiꞌ Cꞌuj.
Rajen a tenoꞌ quin bin in tsꞌic tu cotor a baꞌ ca cꞌatiquex tiꞌ in Tet.
Soc a baxucoꞌ cu bin yaꞌaricob mac jach carem in Tet Cꞌuj quireꞌ ten tin yamtajechex ―quij Jesús―.
Mʌꞌ ja wirej,
u pararen Cꞌuj.
14 Quireꞌ ca wacsiquex ta worex ten,
rajen ca bin a cꞌatiquex baꞌ ten,
rajen quin tsꞌic techex xan.
Jeꞌ in tuchiꞌtic techex u Tajꞌor u Pixam Cꞌuj
15 Jesús caj yaꞌaraj tiꞌob:
―Wa ca yajquintiquenex jeꞌ a quibiquex tu cotor in tꞌʌn.
Jesús habla del Espíritu Santo (Juan 14.15-31)
16 Wa ca quibiquex in tꞌʌn jeꞌ in tꞌʌnic in Tet Cꞌuj soc u tsꞌic techex u Tajꞌor u Pixam Cꞌuj quir u yamtiquechex.
Rajraꞌ tiꞌ yʌn yejerechex.
Rajiꞌ cu cʌnantic in tꞌʌn xan a baꞌ jach tajeꞌ.
17 A mac tiꞌ yʌn ich yocꞌocab mʌꞌ cꞌuchꞌaꞌan yorob u cꞌʌmic u Tajꞌor u Pixam Cꞌuj quireꞌ mʌꞌ u yacsicob tu yorob tiꞌ wa tiꞌ yʌn quireꞌ mʌꞌ yerob bic tabar cu beyaj.
Quireꞌ caꞌ bin tac u Tajꞌor u Pixam Cꞌuj,
jeꞌ a wetiquexeꞌ quireꞌ a wet binex yejer.
Baxuc cu bin u cʌjtar ta pixamex.
18 Mʌꞌ jin bin in pꞌʌtiquechex,
jeꞌ in caꞌ tar soc tiꞌ yʌnen yejerechex tu caꞌ ten.
19 A mac a tiꞌ yʌnob ich yocꞌocab,
mʌꞌ yaꞌab u qꞌuinin cu bin yiriquenob.
Chen techex rajraꞌ ca bin a wiriquenex quireꞌ ca bin a wiriquex in beyaj.
Quireꞌ a tenoꞌ quin bin in cuxtar,
rajen ca bin a cꞌʌmiquex ricꞌben cuxtar techex.
20 Quireꞌ caꞌ bin tac u Tajꞌor u Pixam Cꞌuj quir u cʌjtar ta pixamex jeꞌ a cꞌʌꞌotiquex a tenoꞌ raꞌiriꞌen yejer in Tet Cꞌuj.
Jeꞌ a cꞌʌꞌotiquex tiꞌ yʌnen yejerechex raꞌiriꞌen yejerechex quireꞌ tiꞌ yʌnen ta pixamex.
21 A mac cu quibic in tꞌʌn a tu yubaj rajiꞌ cu yajquintiquen.
A mac cu yajquintiquen rajiꞌ yajbir ten in Tet Cꞌuj.
Baxuc ten quin yajquintic xan.
Jeꞌ in tar tiꞌ soc u jach cꞌʌꞌotiquenob.
22 Judas mʌꞌ raꞌ Iscariote caj yaꞌaraj tiꞌ Jesús:
―Jaj Tsꞌurir ―quij―,
biquinin mʌꞌ a wesic a bʌj tiꞌ tu cotor mac a tiꞌ yʌn ich yocꞌocab?
23 Jesús caj u nuncaj tiꞌ,
tan yaꞌaric tiꞌ:
―A mac a cu yajquintiqueneꞌ cu quibic a baꞌ quin wac tiꞌ.
Rajiꞌ yajbir ten in Tet Cꞌuj.
Quin tarob yejer in Tet quir in cʌjtarob tu pixamoꞌ.
24 A mac a mʌꞌ u yajquintiquen,
rajiꞌ mʌꞌ u quibic a baꞌ quin waꞌaric tiꞌ.
Mʌꞌ ten in tꞌʌn a quin waꞌaric techexoꞌ.
Rajiꞌ u tꞌʌn in Tet a mac tu tuchiꞌtajen.
25 ’Quin waꞌaric techex aroꞌ tiꞌ toy yʌnen yejerechex.
26 Quireꞌ tin cꞌataj tiꞌ in Tet caꞌ u tuchiꞌtej techex u Tajꞌor u Pixam Cꞌuj quir u yamtiquechex.
Jeꞌ u camsiquechex tu cotor baꞌ.
Baxuc jeꞌ u cꞌasic techex tu cotor a baꞌ caj in waꞌaraj techex uch.
27 ’Mʌꞌ toy xiquen,
jeꞌ in chichquintic a worex.
Mʌꞌ in chichquintic a worex an ten bic mac cu chichquintic u yor u racꞌob a tiꞌ yʌn ich yocꞌocabeꞌ.
Quin bin in tsꞌic techex u quiꞌir in wor soc rajraꞌ quiꞌ a worex.
Rajen mʌꞌ a xaꞌxacꞌ tucurex,
baxuc mʌꞌ a chꞌiquex sajaquirex.
28 Quireꞌ tin waꞌaraj techex bin in caꞌ.
Quireꞌ tin waꞌaraj techex jeꞌ in caꞌ tar in wiriquechex.
Wa ca yajquintiquenex cu quiꞌ tar a worex quireꞌ wʌcꞌʌs bin in caꞌ ich in Tet Cꞌuj.
In Tetoꞌ jach manan noꞌj,
a tenoꞌ mʌꞌ nejach noꞌjeniꞌ.
29 Quireꞌ quin wac techex aroꞌ tiꞌ toy yʌnen yejerechex quireꞌ mʌꞌ toy xiquen.
Baxucoꞌ caꞌ bin xiquen jeꞌ a quibiquex a baꞌ tin waꞌaraj techexoꞌ.
30 ’Mʌꞌ yaꞌab u qꞌuinin quir in tsicbar yaꞌab techex quireꞌ tabar u cꞌuchur a quisinoꞌ quir u cʌxtiquen.
Rajiꞌ cu cʌnantic tu cotor mac ich yocꞌocab a mac mʌꞌ yer Cꞌujoꞌ.
Mʌꞌ ju cꞌuchur yor u betic mʌꞌ cꞌʌs baꞌ ten.
31 A tenoꞌ quin chen betic an ten bic tu yaꞌaraj ten in Tet.
Baxuc soc yer mac quin yajquintic in Tet.
Jeroj riqꞌuenex cuxex ―quij Jesús.