A tenoꞌ iren u yaqꞌuir u wich uva
15
Jesús caj yaꞌaraj tiꞌ u camsʌwinicob:
―A tenoꞌ ―quij―,
iren u yaqꞌuir u wich uva.
In Tet Cꞌuj irej a mac cu cʌnantic u yaqꞌuir u wich uva.
2 Tu cotor mac cu tar tin wicnʌn irob u xaꞌyar yaqꞌuir uva.
A mac a cu tar tin wicnʌn a mʌꞌ u betic a baꞌ u cꞌat in Tet Cꞌuj,
rajiꞌ irej u xaꞌyar yaqꞌuir uva a mʌꞌ u tsꞌic u wicheꞌ.
Wa ju xaꞌyar yaqꞌuir a mʌꞌ u tsꞌic u wich a mac cu cʌnantic u yaqꞌuir uva cu jancꞌubtic u xaꞌyar yaqꞌuir.
Baxucoꞌ in Tet Cꞌuj cu bin u betej tiꞌ a mac a mʌꞌ u betic a baꞌ u cꞌat Cꞌuj.
Chen a mac cu tar tin wicnʌn a cu betic a baꞌ u cꞌat Cꞌuj cu bin yamtaꞌbir ten Cꞌuj soc u man tu tsoyir.
Rajiꞌ irej u xaꞌyar yaqꞌuir uva cu racʌr a baꞌ mʌꞌ tsoyeꞌ,
ten a mac a cu cʌnantic soc u netsꞌic u wich.
La vid y las ramas (Juan 15.1-17)
3 Mʌꞌ ja wirej,
in Tet Cꞌuj tu toc rucꞌsaj a cꞌasirex a ta betajex quireꞌ ta wacsajex ta worex in tꞌʌn a tin waꞌaraj techex.
4 Pꞌatenex tin wicnʌn soc in pꞌatʌr ta pixamex.
Cꞌaj techex wa ju xaꞌyar yaqꞌuir wa mʌꞌ tiꞌ yʌn ich u jach aqꞌuir,
mʌꞌ cꞌuchaꞌan yor u tsꞌic u wichiꞌ.
Rajen,
wa ca pꞌatʌrex tin wicnʌn soc in pꞌatʌr ta pixamex baxucoꞌ cꞌuchaꞌan a worex a betic a baꞌ u cꞌat Cꞌuj.
Quireꞌ wa mʌꞌ a pꞌatʌrex tin wicnʌn mʌꞌ cꞌuchaꞌan a worex a betic a baꞌ u cꞌat Cꞌuj.
5 ’A tenoꞌ,
iren u jach aqꞌuir uva,
a techexoꞌ irechex u xaꞌyar yaqꞌuir uva.
A mac a cu pꞌatar tin wicnʌn quin pꞌatar xan tu pixam rajiꞌob cu tsꞌic u wich,
cu beticob a baꞌ u cꞌat Cꞌuj.
A wʌcꞌʌs bʌjiriꞌex mʌꞌ cꞌuchaꞌan a worex tiꞌ mʌnaꞌ baꞌ,
quireꞌ yʌn in yamtiquechex.
6 A mac a mʌꞌ u cꞌat u quibic in tꞌʌn,
rajiꞌ mʌꞌ u cꞌat u pꞌatʌr tin wicnʌn.
Rajiꞌ irej u xaꞌyar yaqꞌuir uva a mʌꞌ u tsꞌic u wich.
Rajen cu janchꞌʌctic.
U xaꞌyar yaqꞌuir uva a tu janchꞌʌctaj cu tijir.
Pachir cu tar u maric quir u toquic ich cꞌacꞌ.
7 ’Wa ca pꞌatʌrex tin wicnʌn,
baxuc wa cu pꞌatʌr in tꞌʌn ta pixamex,
cꞌuchaꞌan a worex a cꞌatiquex tu cotor baꞌ a cꞌatex tiꞌ Cꞌuj.
Jeꞌ u tsꞌic techex.
8 Wa rajraꞌ ca betiquex a jach tsoyoꞌ in Tet Cꞌuj cu bin sʌjtaꞌbir Cꞌuj ten tu cotor mac.
Baxucoꞌ ca wesiquex in jach camsawiniquechex.
9 An ten bic in Tet cu yajquintiquen,
baxuc techex quin yajquintiquechex.
Pꞌatenex soc in yajquintiquechex.
10 Wa ca quibiquex tu cotor a baꞌ quin wac techex.
A baywoꞌ quin yajquintic techex an ten bic in Tet Cꞌuj cu yajquintiquen quireꞌ tin quibaj tu cotor a baꞌ caj u yaꞌaraj ten.
11 ’Rajen quin waꞌaric techex aroꞌ soc rajraꞌ quiꞌex a worex an ten bic ten quiꞌ in wor.
A baywoꞌ jach manan quiꞌex a worex.
12 A jeꞌ in tꞌʌnaꞌ tan in wac techex caꞌ a pacran yajquintiquex a bʌjex an ten bic ten caj in yajquin techex.
13 A mac a cu cꞌubic u bʌj quir u quinsaꞌ tiꞌ a mac a cu jach yajquintic,
rajiꞌ jach manan cu yajquintic.
Baxuc quin bin in betej a tenoꞌ,
rajen yʌn cʌniquenex.
14 Techex jach manan quin yajquintiquechex wa ca betiquex a baꞌ tin waꞌara techex bajeꞌrer.
15 Bajeꞌrer raꞌiriꞌoꞌonex quireꞌ tin chaꞌ a najtiquex tu cotor a baꞌ in wuꞌymʌn ich in Tet Cꞌuj.
A mac a cu beyaj mʌꞌ araꞌb ten u tsꞌurireꞌ tu cotor baꞌ cu tucric u betic.
Chen ten tin toc araj techex rajen bajeꞌrer mʌꞌ in cꞌurewechex quireꞌ raꞌiriꞌoꞌonex.
16 A techexoꞌ mʌꞌ ta tetajenex chen ten tin tetajechex.
An ten bic u yaqꞌuir uva tsꞌaꞌb u beyaj ten Cꞌuj quir u wichʌncʌr.
A tenoꞌ tin tsꞌaj techex a beyajex soc a wesic u beyaj Cꞌuj ta pixamex.
U yaqꞌuir uva yʌn u qꞌuinin quir u wichʌncʌr.
Chen mʌꞌ baxuc techex quireꞌ techex rajraꞌ cꞌuchaꞌan a worex a wesiquex u beyaj Cꞌuj ta pixamex.
Rajraꞌ ca bin a betiquex aroꞌ quireꞌ ta wacsex ta worex ten.
Rajen a baꞌ ca cꞌatiquex tiꞌ in Tet Cꞌuj jeꞌ u tsꞌic techex.
17 A jeꞌ in tꞌʌnaꞌ tan in wac techex:
caꞌ a pacran yajquintex a bʌjex.
U camsʌwinicob cu bin pꞌactabir ten a mac tiꞌ yʌn ich yocꞌocab
18 Jesús caj yaꞌaraj tiꞌ u camsʌwinicob:
―Wa mac cu pꞌactiquechex mʌꞌ a pꞌʌtiquex in tꞌʌn,
cꞌaj techex ten tu yʌn pꞌacten a tenoꞌ.
Jesús advierte sobre la persecución (Juan 15.18-16.4)
19 Wa techex irechex a mac tiꞌ yʌn yocꞌocab cu yajquintiquechexob quireꞌ irechexob a mac tiꞌ yʌn yocꞌocab.
Chen mʌꞌ irechex a mac tiꞌ yʌnob ich yocꞌocab quireꞌ ten tin tetajechex ich a mac a mʌꞌ ju yacsob tu yorob in tꞌʌn.
Rajen cu bin u pꞌactiquechex a mac tiꞌ yʌnob yocꞌocab.
20 Cꞌaj techex a baꞌ caj in waꞌara techex:
“A mac a cu beyaj tiꞌ u jer,
mʌꞌ noꞌj u beyaj.
Chen u tsꞌurir a mac a cu beyaj,
rajiꞌ jach noꞌj u beyaj.”
Robob caj u chucob in pach,
baxuc techex xan cu bin u chuquicob a pachex.
Robob wa tu quibajob in tꞌʌn,
baxuc techex cu bin u quibicob a tꞌʌnex xan.
21 Baxuc tu cotor aroꞌ,
cu bin u beticob tiꞌ techex quireꞌ mʌꞌ tu yacsob tu yorob in tꞌʌn quireꞌ mʌꞌ yerob mac tu tuchiꞌtajen.
22 ’Wa mʌꞌ taren in tsicbar tiꞌob uch,
mʌꞌ chʌcaꞌan yiricob u siꞌpirob.
Quireꞌ taren,
rajen mʌꞌ cꞌuchaꞌan yor yaꞌaricob mʌnaꞌ u siꞌpirob.
23 Chen a mac a cu pꞌactiquen baxuc cu pꞌactic in Tet xan.
24 Wa mʌꞌ tin wesob tiꞌ carem beyaj an ten bic mʌnaꞌ mac yiramʌn uch,
mʌꞌ chʌcaꞌan yiricob u siꞌpirob cax tu yirob a baꞌ tin betaj caj u pꞌactajenob yejer in Tet.
25 Chen robob caj u nupꞌsaj tuꞌ tsꞌibaꞌan ich u tꞌʌn Cꞌuj uch:
“Tu chen pꞌactajenob quireꞌ baxuc u cꞌatob u bʌjiriꞌ cu pꞌacticquenob.”
Baxuc tsꞌibtaꞌb ten uch yʌjtseqꞌuirob u tꞌʌn Cꞌuj uch.
26 ’Caꞌ bin cꞌuchuc tu qꞌuinin cu bin tar u Tajꞌor u Pixam Cꞌuj a mac quin tuchiꞌtic soc u yamtiquechex.
Taj a baꞌ cu bin yac techex quireꞌ tiꞌ u tar ich u Tet Cꞌuj.
Rajiꞌ cu bin u tsecꞌtiquen ―quij Jesús―.
27 Techex xan ca bin a tsecꞌtiquenex tiꞌob quireꞌ techex tiꞌ yʌnechex yejeren caj u yʌnxchun in beyaj hasta bajeꞌrer.