16
’Quin toc aric techex a jeraꞌ soc mʌꞌ a pꞌʌtiquex in tꞌʌn pachir quireꞌ a werex mac cu pꞌactiquex.
2 Robob cu bin u jocꞌsiquechex tu cu naj cꞌujinticob Cꞌuj u winiquirob judío.
Jeꞌ u cꞌuchur tu qꞌuinin xan jeꞌ u quinsiquechex xan quireꞌ cu tus tucricob wa quet u beyaj Cꞌuj a cu beticob.
3 Baxuc cu bin u beticob techex quireꞌ mʌꞌ yerob in Tet Cꞌuj.
Baxuc ten xan mʌꞌ yerenobiꞌ.
4 Mʌꞌ ja wirej,
quin toc aric techex aroꞌ bajeꞌrer soc caꞌ bin cꞌuchuc tu qꞌuinin cu chuquicob a pachex ca bin a cꞌʌꞌotiquex a baꞌ caj in toc araj techexeꞌ.
U Tajꞌor u Pixam Cꞌuj cu bin u tsecꞌtic tiꞌ toꞌonex Jesús
’Caj in yʌn tetajechex uch mʌꞌ jin toc araj techex quireꞌ tiꞌ toy yʌnen yejerechex.
Mʌꞌ ju bin u tar tiꞌ techex aroꞌ hasta caꞌ bin xiquen.
5 Jesús caj yaꞌaraj tiꞌ u camsʌwinicob.
Bajeꞌrer bin in caꞌ ich in Tet Cꞌuj a mac tu tuchiꞌtajen.
Mʌnaꞌ tuririꞌ techex a cꞌatmʌnex ten biquinin ca bin.
Más enseñanza sobre el Espíritu Santo (Juan 16.5-33)
6 Jach yaj tan a wuꞌyiquex quireꞌ tucur a caꞌex quireꞌ tin waꞌaraj techex bin in caꞌ ich in Tet.
7 Quireꞌ taj quin wac techex.
Jach tsoy tiꞌ techex caꞌ xiquen ich in Tet Cꞌuj.
Quireꞌ wa mʌꞌ jin bin mʌꞌ ju tar u Tajꞌor u Pixam Cꞌuj.
Chen wa caꞌ bin xiquen jeꞌ in tuchiꞌtic techex u Tajꞌor u Pixam Cꞌuj.
8 Caꞌ bin tac u Tajꞌor u Pixam Cꞌuj jeꞌ u yesic soc chʌcaꞌan yiric tu cotor mac ich yocꞌocab yʌn u siꞌpirob.
Baxuc xan,
jeꞌ u yesic mac soc chʌcaꞌan yiricob bic tabar u cuxtaroꞌ,
a jach tajoꞌ.
Baxuc xan jeꞌ u yesic soc chʌcaꞌan yiric cu bin u jʌsbir tiꞌob.
9 Jeꞌ u yesic soc chʌcaꞌan yiric yʌn u siꞌpirob quireꞌ mʌꞌ tu toc acsajob tu yorob ten quireꞌ ten quin taquicob.
10 Jeꞌ u yesic mac a cuxtaroꞌ a jach tajoꞌ an ten bic caj cuxrajen ich yocꞌocab quireꞌ mʌꞌ cꞌuchaꞌan yorob yiriquenob quireꞌ caꞌ bin tsꞌocac in beyaj bin in caꞌ caꞌanan.
11 Jeꞌ u yesic soc chʌcaꞌan yiric Cꞌuj cu bin jʌsbirob quireꞌ toc jʌsaꞌanob ten Cꞌuj quir u binob mucꞌyajob munt qꞌuinob.
12 ’Yʌn toy yaꞌab quir in camsiquechex chen mʌꞌ cꞌuchaꞌan a worex a najtiquex bajeꞌrer.
Quireꞌ mʌꞌ toy cꞌuchuc tu qꞌuinin quir a najtiquexiꞌ.
13 Caꞌ bin tac u Tajꞌor u Pixam Cꞌuj cu bin u camsiquechex tu cotor a baꞌ jach tajoꞌ.
Mʌꞌ ju bin u tsicbar techex u wʌcꞌʌs bʌjiriꞌ u tꞌʌn.
Raꞌ cu bin u tsicbar techex a baꞌ araꞌb ten in Tet Cꞌuj.
Jeꞌ u tsicbar tiꞌ techex a baꞌ cu bin tar ich yocꞌocab.
14 Jeꞌ u tsicbar techex soc a sʌjtiquenex quireꞌ raꞌ u beyaj u Tajꞌor u Pixam Cꞌuj quir u tsecꞌtic tiꞌ techex tiꞌ ten soc a werex u jach tajiren a tenoꞌ.
15 Tu cotor a baꞌ yʌn tiꞌ in Tetoꞌ tu cotor ten yʌnin.
Rajen tin waꞌaraj techex u beyaj u Tajꞌor u Pixam Cꞌuj raꞌ quir u tsecꞌtic tiꞌ techex tiꞌ ten soc a werex u jach tajiren a tenoꞌ.
Caꞌ bin cꞌuchuc tu qꞌuinin jeꞌ u quiꞌ tar a worex, quij Jesús
16 Jesús caj yaꞌaraj:
―Chen sasameꞌ ca bin a wiriquenex.
Chen mʌꞌ yaꞌab u qꞌuinin mʌꞌ ja bin a wiriquenex.
Pachireꞌ jeꞌ a caꞌ iriquenex.
Cu tsꞌocar aroꞌ quin caꞌ bin ich in Tet Cꞌuj ―quij Jesús.
17 Jun yarob u camsʌwinicob caj u pacran aricob:
―Baꞌ u cꞌat yaꞌaric aroꞌ?:
“Chen sasameꞌ ca bin a wiriquenex.
Chen mʌꞌ yaꞌab u qꞌuinin mʌꞌ ja bin a wiriquenex.
Pachireꞌ jeꞌ a caꞌ iriquenex.
Cu tsꞌocar aroꞌ quin caꞌ bin ich in Tet Cꞌuj”,
quij Jesús.
18 Baꞌ u cꞌat yaꞌaric:
Sansameꞌ?
Mʌꞌ ic najtic a baꞌ cu yaꞌaric ―baxuc cu pacran aꞌaricob u camsʌwinicob Jesús.
19 Jesús caj u najtaj u cꞌatob u cꞌatic a baꞌ u cꞌat yaꞌaric,
a baꞌ araꞌb tiꞌob sameꞌ.
Rajen Jesús caj yaꞌaraj tiꞌob:
―In wer a baꞌ ca pacran ariquexeꞌ.
Chen sasameꞌ ca bin a wiriquenex.
Chen mʌꞌ yaꞌab u qꞌuinin mʌꞌ ja bin a wiriquenex.
Pachireꞌ jeꞌ a caꞌ iriquenexeꞌ.
Cu tsꞌocar aroꞌ quin caꞌ bin ich in Tet Cꞌuj ―quij Jesús―.
20 Taj a baꞌ quin waꞌaric techex.
Ca bin a wocꞌarex,
ca bin a tucurex.
Chen a pimob cu bin u quiꞌ tar u yorob.
Sansameꞌ ca chen tucurex.
Pachireꞌ cu quiꞌ tarex a worex jach jaj.
21 Caꞌ bin cꞌuchuc tu qꞌuinin a xquicoꞌ cu bin u rochic chan och.
Tucur u caꞌ quireꞌ mucꞌyaj u caꞌ,
chen caꞌ bin tsꞌocac u rochic chan och,
cu tubur tiꞌ u mucꞌyaj a tu yubaj.
Chen pachir quiꞌ yor quireꞌ tu rochaj chan och.
22 Baxuc techex xan bajeꞌrer tucur a caꞌex,
irej a xquicoꞌ.
Cu man mʌꞌ yaꞌab u qꞌuinin jeꞌ a caꞌ iriquenex.
Baxuc cu bin u quiꞌtar a worex xan.
Mʌnaꞌ mac cu bin u rucꞌsic u quiꞌir a worex.
23 ’Caꞌ bin cꞌuchuc a ray qꞌuinoꞌ mʌꞌ ja bin a cꞌatic baꞌ ten.
Taj a baꞌ quin wac techex.
Caꞌ bin a tꞌʌnex Cꞌuj chich a wor caꞌ bin a tꞌʌnejex.
Jeꞌ u tsꞌic techex tu cotor baꞌ quireꞌ ta cꞌʌnex in cꞌabaꞌ.
24 Mʌꞌ toy a tumtex chen bajeꞌrer a yʌnx chun techex a cꞌatiquex tiꞌ in Tet.
Tan a cꞌʌniquex in cꞌabaꞌ tu ca tꞌʌniquex Cꞌuj.
Toc cꞌuchaꞌan in wor tiꞌ tu cotor baꞌ ich yocꞌocab, quij Jesús
25 ’A tenoꞌ ―quij Jesús―,
tin cꞌʌs mucraj a baꞌ tin waꞌaraj techex uch.
Jeꞌ u cꞌuchur tu qꞌuinin mʌꞌ in mucric techex quin bin in toc aric techex in Tet Cꞌuj.
26 Jeꞌ u cꞌuchur tu qꞌuinin caꞌ bin xiquen ich in Tet Cꞌuj a ray u qꞌuininoꞌ.
A bʌjiriꞌex ta junanex ca bin a cꞌatex baꞌ tiꞌ in Tet Cꞌuj quireꞌ ta wacsex ta worex ten.
Mʌꞌ baꞌwir quin cꞌatic tiꞌ in Tet Cꞌuj tiꞌ techex.
27 Quireꞌ u bʌjiriꞌ in Tet cu yajquintiquechex.
Cu yajquintiquechex quireꞌ ta yajquintenex quireꞌ techex ta quibex tiꞌ in tar ich Cꞌuj.
28 Rajiꞌ taj,
a tenoꞌ taren ich Cꞌuj teraꞌ ich yocꞌocab.
Rajen bajeꞌrer quin pꞌʌtic yocꞌocab quireꞌ wʌcꞌʌs bin in caꞌ ich in Tet Cꞌuj.
29 U camsʌwinicob caj yaꞌarob tiꞌ:
―Bajeꞌrer tan a tsicbar soc in najticob a baꞌ ca waꞌaric.
Mʌꞌ tan a cꞌʌs mucric a baꞌ ta waꞌaraj tenob tu ca pꞌeriꞌquintic a baꞌ ca camsic tiꞌ tenob uch.
30 A tenoboꞌ,
in werob tu cotor baꞌ a wer.
Quireꞌ a wer yʌn baꞌ quin cꞌaticob tech cax mʌꞌ toy in cꞌatob tiꞌ tech a toc er.
Rajen mʌꞌ baꞌwir mac quir u cꞌatic tech baꞌ.
Rajen quin quibicob tu tuchiꞌtech Cꞌuj.
31 Jesús caj yaꞌaraj tiꞌob:
―A wacsmʌnex ta worex chen yʌn toy a cꞌatex.
32 Tabar u cꞌuchur tu qꞌuinin ca bin a pꞌʌtiquenex tantanxer caꞌ bin xiquechex.
Chen tin junan ca bin pꞌʌtenex.
Chen mʌꞌ tin junaniꞌ quireꞌ tiꞌ yʌn in nup,
rajiꞌ in Tet Cꞌuj.
33 Quin waꞌaric techex tu cotor aroꞌ soc mʌꞌ a chꞌiquex sajaquirex quireꞌ ta wacsex ta worex ten.
Tiꞌ toy cuxaꞌanechex ich yocꞌocab,
jeꞌ a mucꞌyajex.
Chen mʌꞌ a chꞌiquex sajaquirex quireꞌ a tenoꞌ tsꞌoc in toc rucꞌsic u mucꞌ u tsꞌurir a mac tiꞌ yʌnob ich yocꞌocab.
Baxuc techex ca bin a rucꞌsiquex u mucꞌ u tsꞌurir a tiꞌ yʌn ich yocꞌocabeꞌ.