Jesús cu tꞌʌnic Cꞌuj tiꞌ u camsʌwinicob
17
Jesús caj tsꞌoc u yaꞌaric aroꞌ caj u nacsaj u wich caꞌanan quir u tꞌʌnic Cꞌuj.
Caj yaꞌaraj:
―Tet ―quij―,
cꞌuchij tin qꞌuin esej tiꞌob a winicoꞌ jach caremen a tenoꞌ quireꞌ a pararen soc cꞌuchaꞌan in wor in wesic tiꞌ a winicoꞌ jach caremech xan.
2 Quireꞌ ta tsꞌaj in cʌnantej tu cotor mac a tiꞌ yʌn ich yocꞌocab cax a mun tiꞌ yʌn soc cꞌuchaꞌan in wor in tsꞌic tiꞌob u cuxtar muntqꞌuin a mac ta tsꞌaja ten.
Jesús ora por sus seguidores (Juan 17.1-26)
3 In Tet jach Cꞌujech quireꞌ mʌnaꞌ u jer baxuquech.
A tenoꞌ Jesucristojen a mac a ta tuchiꞌtaj ich yocꞌocab.
Tu cotor mac u yerech,
baxuc u yeren xan.
Jeꞌ u cꞌʌmicob u cuxtar munt qꞌuin.
4 ’Tsꞌoc in wesic tiꞌ tu cotor mac a tiꞌ yʌn ich yocꞌocab jach caremech a techoꞌ.
Quireꞌ tin tsꞌocsaj in beyaj a ta tsꞌaja ten bajeꞌrer.
5 Bajeꞌrer Tet ―quij Jesús―,
esej tiꞌ tu cotor mac jach caremen a tenoꞌ ʌcʌtanech an ten bic tiꞌ yʌnen uch yejerech cax mʌnaꞌ toy ruꞌum uch.
6 ’A tenoꞌ,
tin wesaj tiꞌob bicyʌraꞌech tiꞌ a mac ta tetaj ich yocꞌocab quir a tsꞌic ten.
Tech yʌnin caꞌ ta tsꞌajob ten caj u quibob a tꞌʌn.
7 Tu cotor baꞌ a ta tsꞌaja ten u tar tiꞌ tech in Tetech.
8 A tenoꞌ tin toc araj tiꞌob a tꞌʌn,
a ta waꞌaraj ten.
Robob caj u cꞌʌmajob a tꞌʌn quireꞌ yerob taj,
tiꞌ in tar tub yʌnech.
Caj u yacsajob tu yorob tech ta tuchiꞌtajen.
9 ’A tenoꞌ ―quij Jesús―,
quin cꞌatic tech caꞌ a yamtejob.
Mʌꞌ jin cꞌatic tech quir a yamtic tu cotor mac ich yocꞌocab.
Chen caꞌ a yamtej a mac a pararob a mac a ta tetaj caꞌ u yacsejob tu yor ten.
10 Tu cotor mac tech yʌnin,
ten yʌnin xan.
Tu cotor a mac ten yʌnin tech yʌnin xan.
Pꞌeriꞌ toꞌon yʌnin quireꞌ a baꞌ cu bin u beticob quin bin sʌjtaꞌbir.
11 ’Bajeꞌrer tar in caꞌ ich tech tu caꞌten.
Mʌꞌ jin pꞌatʌr ich yocꞌocab.
Chen robob cu bin u pꞌatʌrob ich yocꞌocab tu junanob.
In Tet ʌcʌtan tech a mʌnaꞌ u siꞌpiroꞌ quin cꞌatic tech caꞌ a cʌnantej tu cotor mac a ta tsꞌaj ten uch.
Soc cꞌuchaꞌan yorob tiꞌ wa baꞌ cu tar u tumtic yorob.
Quin cꞌatic tech caꞌ a cʌnantej tiꞌob soc pꞌeriꞌ u tucurob an ten bic tenob quireꞌ pꞌeriꞌ in tucurob xan.
12 Tiꞌ toy yʌnen yejerob ich yocꞌocab a mac a ta tsꞌaja ten tin cʌnantajob tin camsaj tiꞌob a baꞌ a cꞌat.
Tin cʌnantaj soc mʌꞌ u satʌrob.
Chen tiꞌ toy cu sayʌrob tin pach a mac a ta tsꞌaja ten.
Chen tuririꞌ satij.
Quireꞌ tiꞌ tsꞌibaꞌan ich u tꞌʌn Cꞌuj cu bin satʌr.
13 ’Quireꞌ tar in caꞌ ta wicnʌn,
Tet.
Chen tan in tꞌʌniquech tiꞌob,
tiꞌ toy yʌnen yejerob teraꞌ ich yocꞌocab.
Soc cu yubicob soc cu chichquintaꞌr yorob quireꞌ in tꞌʌn.
14 Tin waꞌaraj tiꞌob a tꞌʌn.
Bajeꞌrer robob caj pꞌactabir ten mac.
Quireꞌ mʌꞌ pꞌeriꞌob u tucurob yejer a mac tiꞌ yʌn yocꞌocab.
Quireꞌ baxuc ten ―quij Jesús―,
mʌꞌ pꞌeriꞌ in tucur yejer a mac tiꞌ yʌn ich yocꞌocab.
15 Mʌꞌ tan in cꞌatic tech caꞌ a jocꞌsicob ich yocꞌocab.
Tan in cꞌatic tech caꞌ a cʌnantob tiꞌ a quisinoꞌ soc mʌꞌ u pꞌʌticob u tꞌʌn Cꞌuj.
16 Quireꞌ mʌꞌ pꞌeriꞌ u tucurob yejer a mac tiꞌ yʌn ich yocꞌocab quireꞌ baxuc ten ―quij Jesús―,
mʌꞌ pꞌeriꞌ in tucur yejer a tiꞌ yʌn ich yocꞌocab.
17 Tsoyquintej yorob yejer a tꞌʌn quireꞌ a tꞌʌn a techoꞌ,
rajiꞌ taj.
18 An ten bic ta tuchiꞌtajen ich a mac a tiꞌ yʌnob yocꞌocab quir in waꞌaric a tꞌʌn.
Baxuc tiꞌob quin tuchiꞌtic ich yocꞌocab quir u yaꞌaricob a tꞌʌn yocꞌocab.
19 Quireꞌ tan in cꞌubic in bʌj quir in betic a baꞌ a cꞌat quireꞌ quin yajquinticob xan soc jach jaj tech yʌninob tu cotorob.
Cꞌuchaꞌan yorob u beticob aroꞌ quireꞌ baxuc tin betaj ten xan.
20 ’Mʌꞌ chen tiꞌob quin cꞌatic tech,
quin cꞌatic tech tiꞌob a mac a cu bin u yacsic tu yor pachir caꞌ bin yubej u tsecꞌticob a tꞌʌn.
21 Quin tꞌʌniquech tiꞌob,
Tet,
soc pꞌeriꞌob u tucurob an ten bic tech yejeren,
Tet,
pꞌeriꞌenob in tucurob.
Soc tu cotor mac cu bin u yacsicob tu yorob tech ta tuchiꞌtajen.
22 A tenoꞌ tin tsꞌaja tiꞌob u tsoyir u pixamob an ten bic ta tsꞌajten u tsoyir in pixam soc pꞌeriꞌ u tucurob an ten bic tenob pꞌeriꞌ in tucurob xan ―quij Jesús―.
23 A tenoꞌ tiꞌ yʌnen tu pixamob,
a techoꞌ tiꞌ yʌnech tin pixam xan soc rajiꞌob jach jaj pꞌeriꞌob u tucurob soc tu cotor mac yerob tech ta tuchiꞌtajen soc yerob xan tech ta yajquintaj a mac a cu yacsicob tu yorob in tꞌʌn an ten bic ten ca yajquintiquen,
Tet.
24 ’Tet ―quij Jesús―,
in cꞌat u tarob a mac a ta tsꞌaja ten tuꞌ quin bin a tenoꞌ soc munt qꞌuin tiꞌ yʌnob yejerenob.
Soc yiricob a tenoꞌ u sasiriren a ta tsꞌaja ten quireꞌ ta yajquinten cax mʌnaꞌ toy yocꞌocab uch.
25 In Tetech,
Cꞌuj,
taj a wor a techoꞌ.
A mac a tiꞌ yʌn ich yocꞌocab mʌꞌ yerech chen ten in werech.
In camsʌwinicob yerob tech ta tuchiꞌtajen.
26 Tin camsaj tiꞌob soc yerechob.
Tiꞌ toy jach yaꞌab u qꞌuinin bin in camsic tiꞌob soc yerechob a techoꞌ jach manan.
Soc u yajquintiquechob an ten bic ca yajquintiquen soc tiꞌ quin cʌjtar ich u pixamob,
―baxuc caj u tꞌʌnaj Cꞌuj Jesús.