Cu muchꞌquinticob u tucurob u chuquejob Jesús
14
Caꞌbej cu cꞌuchur tu qꞌuinin u quiꞌ quiꞌ janʌnob u winiquirob judío.
Raꞌ u qꞌuinin quir u cꞌʌꞌoticob u potmasticob yʌjmasir u tꞌʌn Cꞌuj uch,
soc mʌꞌ u quiminob u parar xib a yʌn rochaꞌb ten u nʌꞌ.
Raꞌ u qꞌuinin xan,
a panoꞌ a mʌꞌ u sipeꞌ,
quireꞌ mʌꞌ pʌjiꞌ.
U jach tsꞌurirob u sacerdote u winiquirob judío yejer a yʌjcamsʌyʌjirob u tꞌʌn Moisésoꞌ caj u cʌxtob bic tabar u tusaricob tiꞌ Jesús soc u chuquicob u quinsicob Jesús.
San Marcos 14.1-16
―Mʌꞌ tu qꞌuinin u quiꞌ quiꞌ janʌnob a pascuajoꞌ.
Caꞌ ic yʌn pajex u tsꞌocar u quinin u quiꞌ quiꞌ janʌnob,
soc mʌꞌ ic pꞌusiquex u yorob ij quet winiquirob judío a pimoꞌ.
Jesús ich u cajar Betania
3 Quireꞌ tiꞌ yʌn Jesús ich u cajar Betania,
curucbar tu janʌn tu yatoch Simón.
Raꞌ u cʌnmʌn iqꞌuer u caꞌ uch.
Jeroj tuneꞌ,
tarij tuririꞌ xquic ich yatoch Simón yejer tuririꞌ chan pꞌurir,
chup yejer a ne quiꞌ u boqueꞌ,
chen nardo u cꞌabaꞌ,
a quiꞌ u boqueꞌ.
A nardojoꞌ,
jach coꞌoj u boꞌorir.
A xquicoꞌ caj u paꞌaj a chan pꞌuroꞌ caj u wecaj a quiꞌ u boqueꞌ tu joꞌr Jesús.
4 Yan jun yarob a tiꞌ yʌnob,
caj pꞌujob,
caj u yaꞌarajob:
―A biquinin caj u sʌtaj a raꞌ quiꞌ u boqueꞌ ich u joꞌr Jesús?
5 Wa caj u canaj caꞌcheꞌ tu caꞌ jaraj u taqꞌuin quir u jasʌr tiꞌ a jach otsiroboꞌ.
Quireꞌ u boꞌorir jach manij tres cientos sʌc taqꞌuinob.
Choc yorob tiꞌ a xquicoꞌ quireꞌ caj u xupaj a quiꞌ u boqueꞌ.
6 Barej Jesúseꞌ caj u yaꞌaraj:
―Tsireꞌej,
baꞌwir ca tsꞌiquintex a xquicoꞌ.
Mʌꞌ ja wirej,
caj u betaj tsoy ten,
caj u jayaj tin joꞌr a quiꞌ u boqueꞌ.
7 A otsireꞌ,
rajraꞌ tiꞌ yʌn tu yʌnechex an ber a cꞌatex,
jeꞌ u cꞌuchur a worex a betiquex tsoy tiꞌob,
barej a tenoꞌ mʌꞌ rajraꞌ tiꞌ yʌnen tub yʌnechex.
8 A jeꞌ xquicaꞌ,
a baꞌ caj u betaj a baꞌ cꞌuchaꞌan yor tiꞌ,
rajen caj u jayaj tin joꞌr a quiꞌ u boqueꞌ,
quireꞌ tabar u muquicob in baquer.
9 Jach taj quin waꞌariquex tech ―quij Jesús―.
Cax wa tu cu bin u tsecꞌtic u jach tsoyir u tꞌʌn Cꞌuj,
jeꞌ yaꞌariqueꞌ bic caj u jayaj tin joꞌr a xquicoꞌ,
a quiꞌ u boqueꞌ soc u cꞌʌꞌotic u cꞌabaꞌ a jeꞌ xquicaꞌ.
Judas cu bin cꞌubic Jesús
10 Caj tsꞌoc yiric u joyar tu joꞌr Jesús a quiꞌ u boqueꞌ,
caj bin Judas Iscariote quir u tsicbar yejer u jach tsꞌurirob sacerdote u winiquirob judío.
Rajiꞌ tuririꞌ ich doce u camsʌwinicob Jesús.
Caj bin u cꞌubic tiꞌob.
11 Caj quiꞌjij yorob u jach tsꞌurirob sacerdote rajen caj u toc arajob jeꞌ u boꞌotaꞌ ten u jach tsꞌurir tu cotor u sacerdote quir u cꞌubic Jesús.
Caj u yʌnxchun u cʌxtic bic tabar jeꞌ u cꞌubiqueꞌ.
A oqꞌuin janʌn u qꞌuinin pascua
12 Caj cꞌuchij tu qꞌuinin u qꞌuinin a cu janticob yoꞌoch pan a mʌꞌ u sipeꞌ.
Raꞌ u qꞌuinin xan,
cu quinsicob yʌrʌcꞌ tʌmʌn yuc,
chan ar soc u cꞌʌꞌoticob bic Cꞌuj caj u tacaj u nunquirirob u winiquirob judío ich u ruꞌumin Egipto.
Cꞌuch u camsʌwinicob ich Jesús caj u cꞌatajob tiꞌ:
―Arej tenob tub a cꞌat a jantej a woꞌoch oqꞌuin tu qꞌuinin u quiꞌ quiꞌ janʌnob u winiquirob judío?
Arej tenob tub a cꞌat in chʌcob?
13 Caj u tuchiꞌtaj caꞌtur u camsʌwinicob,
caj u yaꞌaraj tiꞌob:
―Xenex a jeꞌ cajaroꞌ,
tiꞌ ca bin a nupex tun,
tuririꞌ xib cu cuchic u pꞌurir u yoꞌoch jaꞌ,
sayenex tu pach.
14 Tu ca wiriquex tu cu yocar tu yatoch a caꞌ tsꞌap yatochoꞌ,
arex tiꞌ u yumin a najoꞌ:
“Yʌjcamsʌyʌnirecheꞌ cu cꞌatic:
Tu yʌn u cuchir tu quin bin in jantejob a baꞌ cu naj janticob u winiquirob judío tu qꞌuinin pascua yejer in camsʌwinicob?”
15 Rajiꞌeꞌ cu bin yesic techex junxotꞌ yatoch u caꞌ tsap yatochoꞌ toc yʌn u pojcheꞌir tu cu janʌn.
Toc yʌn u cutan xan.
Tiꞌ taroꞌ ca chʌquiquex ij coꞌochex.
16 Caj binob u camsʌwinicob Jesús caj yirajob an ten bic Jesús caj u yaꞌaraj tiꞌob,
jeroj tuneꞌ,
caj chʌcajob yoꞌoch quir u cꞌʌꞌoticob u qꞌuinin pascua.
17 Barej caj acꞌbirchʌjij,
caj cꞌuchij Jesús quir u janʌn.
Yet tarac u doce u camsʌwinicob.
San Marcos 14.17-31
―Jach taj quin waꞌaric techex.
Yʌn tuririꞌ ich techex,
a docejoꞌ,
a mac a pꞌeriꞌ ic janʌnex,
a cu bin u mucu cꞌubiqueneꞌ.
19 Caj jach choquij yorob u camsʌwinicob Jesús.
Jujuntur u camsʌwinicob cu bin u cꞌaticob tiꞌ Jesús:
―Ten wa quin bin in cꞌubiquech Jaj Tsꞌurir?
20 Rajiꞌ tuneꞌ,
caj u nuncaj,
caj u yaꞌaraj tiꞌob:
―A mac tuririꞌ ich techex a docejoꞌ a jeꞌ cu ruchic yoꞌoch yejeren,
rajiꞌ cu bin u cꞌubiquen a tiꞌ yʌn yejerechex.
21 A tenoꞌ a baxuquenechexoꞌ,
bin in caꞌ quinsbir,
quireꞌ tabar u nupꞌur u tꞌʌn Cꞌuj.
Chen otsir a mac a cu bin u mucu cꞌubiquen a mac a tar soc u yamtic mac tu cotor.
Jach manan tsoyir wa mʌꞌ tiꞌ yʌn teraꞌ ich yocꞌocab.
22 Quireꞌ tu cu janʌnobeꞌ,
Jesús caj u chꞌaj yoꞌoch pan caj u yʌn tꞌʌnaj Cꞌuj:
―Bayoꞌ Cꞌuj,
quireꞌ caj a tsꞌaja toꞌonex ij coꞌochex pan.
Caj u rʌc xatꞌaj tiꞌ u camsʌwinicob caj u yaꞌaraj tiꞌob:
―Jantex a jeꞌ panaꞌ quireꞌ in bʌqꞌuer.
Jantex.
23 Caj tsꞌoc u rʌc janticob yoꞌoch pan,
Jesús caj u chucaj u chan ruch yejer u cꞌab u wich uva.
Caj u yʌn tꞌʌnaj Cꞌuj:
―Bayoꞌ Cꞌuj,
tech caj a tsꞌaja toꞌonex u cꞌab u wich uva.
Caj u tsꞌaja tiꞌ u camsʌwinicob,
caj u yaꞌaraj tiꞌob:
―Rʌc uqꞌuex caꞌ caꞌ xotꞌ techex a wuꞌqꞌuiquex u cꞌab u wich uva.
24 Caj yaꞌaraj tiꞌob:
―A jeꞌ u cꞌab u wich uva,
in qꞌuiqꞌuer quir u nupꞌur u tꞌʌn a baꞌ tu chꞌic araj Cꞌuj uch.
A jeꞌ baꞌ cu bin jocꞌar in qꞌuiqꞌuer soc yiric mac,
yaꞌab cu bin u jawsicob u siꞌpirob.
25 Taj quin waꞌaric techex.
Mʌꞌ in yʌnyʌn caꞌ uqꞌuic u cꞌab u wich uva hasta cu xur tꞌʌneꞌ,
caꞌ bin in wuqꞌuej yejerex tu cu bin u reyinticob Cꞌuj.
Jesús cu tsicbar tiꞌ Pedro: A techoꞌ ca bin a waꞌaric mʌꞌ a wer maquen
26 Caj tsꞌoc u cꞌayob caj jocꞌob caj binob ich u witsir Olivos.
27 Jesús tuneꞌ,
caj u yaꞌaraj tiꞌob:
―Techex tu cotorechex ca bin a pꞌʌtiquenex acꞌbir bajeꞌrer quireꞌ caꞌ nupꞌuc u tꞌʌn Cꞌuj tu cu yaꞌaric:
“Quin chaꞌic u quinsic a mac a cu cʌnantic yʌrʌcꞌ tʌmʌn yuc,
rajen cu bin putsꞌurob yʌrʌcꞌ tʌmʌn yuc.”
28 Caꞌ bin wʌcꞌʌs riqꞌuiquen tin quimirir ―quij Jesús―,
tiꞌ ca bin a wiriquenex ich u ruꞌumin Galilea.
Chen a tenoꞌ quin yʌn batꞌan cꞌuchur ich u ruꞌumin Galilea.
29 Pedro tuneꞌ,
caj u yaꞌaraj tiꞌ:
―Cax tu cotor in wet camsʌwinicob cu bin u pꞌʌtiquechob,
chen a tenoꞌ mʌꞌ in pꞌʌtiquech.
30 Jesús caj u yaꞌaraj tiꞌ:
―Jach taj,
quin waꞌaric tech,
Pedro.
Mʌꞌ toy cꞌaynʌc cax acꞌbir bajeꞌrer,
cax mʌnaꞌ u nup u tenin u cꞌay cax,
ca bin a waꞌaric tiꞌ mac:
“Mʌꞌ in wer mac Jesús.”
31 Barej rajiꞌeꞌ caj u jach chen aꞌaraj tiꞌ:
―Cax wa quet ij quimin,
mʌꞌ in waꞌaric:
“Mʌꞌ in cꞌʌꞌotechiꞌ.”
Bayiriꞌ xan,
caj yaꞌaraj u yet camsʌwinicob.
Jesús cu tꞌʌnic Cꞌuj ich u chan corir Getsemaní
32 Caj cꞌuchij Jesús yejer u camsʌwinicob ich u chan corir u cꞌabaꞌ Getsemaní.
Caj u yaꞌaraj tiꞌ u camsʌwinicob:
―Teꞌ a yʌn cutarexaꞌ,
quireꞌ tar quin bin baytʌc quir in tꞌʌnic Cꞌuj.
San Marcos 14.32-52
33 Caj u pʌyaj tu pach Pedro yejer Jacobo yejer u yitsꞌin Juan.
Jesús caj u yʌnxchun u tucur,
jach manan cu tucur caj cꞌuchij baytʌc.
34 Caj u yaꞌaraj tiꞌob:
―Jach tucur in caj.
Cu jach bin in wor irej wa bin in caj quimin.
Teꞌ a pꞌatarexaꞌ mʌꞌ a wenʌnex soc a yamtiquenex.
35 Jesús caj bin u tꞌʌnej Cꞌuj.
Jach baytʌc caj bin,
caj pʌchꞌraj quir u tꞌʌnej Cꞌuj ich ruꞌum.
Caj u yaꞌaraj tiꞌ Cꞌuj:
―Wa tsoy ta tꞌʌn tech Tet,
wa mʌꞌ a chaꞌic in jach mucꞌyaj an ten bic caj a toc araj uch.
Wa tsoy ta tꞌʌn tech ca chaꞌic in mucꞌyaj,
baxuc ten tsoy tin tꞌʌn xan,
caꞌ tac tiꞌ ten a baꞌ a cꞌat ten.
36 Tu cu tꞌʌnic Cꞌuj rajiꞌ caj u yaꞌaraj:
―In Tetech Cꞌuj ―quij―,
cꞌuchaꞌan a wor tiꞌ tu cotor baꞌ,
rucꞌsej a jeꞌ mucꞌyajaꞌ a cu bin tar ten wa raꞌ a cꞌat caꞌ mucꞌyajnʌquen,
jeꞌ in mucꞌyajeꞌ,
quireꞌ in cꞌat in betic a baꞌ a cꞌat techeꞌ.
37 Caj riqꞌuij,
caj bin ich u camsʌwinicob caj yiraj cu wenʌnob caj u yaꞌaraj tiꞌ Pedro:
―Simón,
tan wa ja wenʌn?
Mʌꞌ wa cꞌuchaꞌan a wor a mucꞌtic a wenʌn caꞌ a yamtejen cax turiꞌ hora?
38 Tꞌʌnex Cꞌuj,
soc mʌꞌ u tumtic a worex,
a quisinoꞌ.
Cax a chen cꞌat ʌjaꞌanechex soc a tꞌʌniquex Cꞌuj tiꞌ ten.
Chen mʌꞌ u cꞌuchur a worex a mucꞌtic a wenʌnex quireꞌ jach tac a wenʌnex.
39 Caj wʌcꞌʌs bin Jesús caj u wʌcꞌʌs tꞌʌnaj u Tet,
caj u yaꞌaraj raꞌiriꞌ u caj wʌcꞌʌs tꞌʌnoꞌ.
40 Caj ricꞌ Jesús caj wʌcꞌʌs ur tiꞌ yʌn u camsʌwinicob.
Caj yiraj wenʌn u caꞌob,
mʌꞌ u mucꞌtob u wenʌnob.
Mʌꞌ u pꞌirir u wichob.
Mʌꞌ u yerob baꞌ u nunquicob tiꞌ Jesús.
41 Caj tar mʌnaꞌ u nup u tenin ich u camsʌwinicob,
caj u yaꞌaraj tiꞌob:
―Tsoy a wenʌnex bajeꞌrer,
jesej a bʌjex,
bajeꞌrer,
cꞌuchij tu qꞌuinin u tarob u chuquenob a tenoꞌ a baxuquenechexoꞌ,
rajen tsireꞌej.
Bin u cꞌubiquenob a mac a yʌn u siꞌpirobeꞌ.
42 Riqꞌuenex,
caꞌ xicoꞌonex iric a mac a cꞌubiqueneꞌ tiꞌ yʌn jach baytʌc.
Chuc Jesús
43 Tiꞌ toy cu tsicbar Jesús barej seb caj cꞌuchij Judas Iscariote,
rajiꞌ tiꞌ u camsʌwinicob Jesús yejer once.
Yet taracob jach pim mac,
u rʌc chꞌamʌnob u mascabir,
bayiriꞌ u rʌc chꞌamʌnob cheꞌ.
Tarob quireꞌ tuchiꞌtaꞌbob ten u jach tsꞌurirob sacerdote u winiquirob judío,
yejer u jach tsꞌurirob u cajarob u winiquirob judío,
a cu yaꞌaric a Nuxiboꞌ,
yejer u yʌjcamsʌyʌjiriob u tꞌʌn Moisés.
44 Mʌꞌ toy cꞌuchuc Judas ich Jesús caj u toc araj tiꞌob,
a pimoꞌ:
―A ca wiriquex in tsꞌutsꞌic u pꞌuc,
raꞌ ca chuquiquex,
caꞌ a quiꞌ cꞌʌxex u cꞌʌb,
caꞌ a purex tiꞌ yejer mac a cu cʌnanticob tiꞌ soc mʌꞌ u putsꞌur Jesús.
45 Seb caj u jutsꞌ u bʌj ich Jesús,
caj yaꞌaraj Judas tiꞌ Jesús:
―In wʌjcamsʌyʌjirech,
in wʌjcamsʌyʌjirech.
Jeroj tuneꞌ,
caj u tsꞌutsꞌaj u pꞌuc an ten bic cu naj tꞌʌnic a cu camsic mac u winiquirob judío.
46 Robob tuneꞌ,
caj u mʌchajob,
caj u chucajob.
47 Tuririꞌ ich a macob a tiꞌ yʌn tiꞌ taroꞌ,
caj u jitaj u mascab caj u chꞌʌcaj u xiquin u cꞌurew u jach tsꞌurir sacerdote,
caj rac u xiquin u cꞌurew u jach tsꞌurir sacerdote.
48 Caj u tꞌʌnaj Jesús caj u yaꞌaraj tiꞌob:
―Biquinin caj tarechex teraꞌ yejer mascab,
bayiriꞌ yejer cheꞌ quir a chuquiquenex iren wa yʌjaꞌcriryʌjiren baꞌ.
49 Rajraꞌ tiꞌ yʌnen ich carem naj tu ca naj cꞌujintiquex Cꞌuj,
caj in camsechex.
Biquinin mʌꞌ ta chuquenex uch?
A baꞌ u ber ten bajeꞌrer quireꞌ caj u toc araj uch yʌjtseqꞌuir u tꞌʌn Cꞌuj,
a tsꞌaꞌb u tucuric ten Cꞌuj quir u tsꞌibtic a baꞌ u cꞌat Cꞌuj,
raꞌ quireꞌ u nupꞌur a baꞌ tsꞌibaꞌan.
50 Raꞌiriꞌ u qꞌuinin tu cotor u camsʌwinicob Jesús caj rʌc putsꞌob.
Pꞌat Jesús tu junan.
Putsꞌij a mac a mʌꞌ uch xuruc u baqueroꞌ
51 Barej say tu pach Jesús tuririꞌ xib,
mʌꞌ uch xuruc u baquer,
u chen buquinmʌn u winquirir yejer tuririꞌ sʌc nocꞌ,
a linojoꞌ u cꞌabaꞌ u nocꞌ.
Rajiꞌ caj chucob ten a pimoꞌ.
52 Barej caj chuquij ten a pimoꞌ caj tsꞌub u nocꞌ caj putsꞌij,
chʌcꞌʌren.
ʌcʌtan chꞌiriquic Jesús ich u jach tsꞌurirob u winiquirob judío
53 Yʌjchuquirob Jesús caj bin purbir Jesús ich Caifás.
Rajiꞌ u jach tsꞌurir tu cotor sacerdote,
yejer u jer u caꞌ jach tsꞌurirob sacerdote,
yejer u jach tsꞌurirob tu cotor u cajarob u winiquirob judío,
a cu yaꞌaric,
a Nuxiboꞌ,
yejer u yʌjcamsʌyʌjirib u tꞌʌn Moisés,
quireꞌ caj u muchꞌquintob u bʌj.
San Marcos 14.53-72
54 Barej Pedrojeꞌ nach bin tu pach tu cu binob Jesús.
Cꞌʌs nanach cu tar Pedro tac cꞌuchur tub reꞌaꞌan yatoch Caifás.
Curucbar Pedro yejer a policíajoꞌ cu qꞌuich,
pꞌeriꞌ yejerob.
55 U jach tsꞌurirob sacerdote yejer tu cotor u tsꞌurirob u winiquirob judío,
tiriꞌ u rʌc muchꞌquinmʌnob u bʌj quir u wayticob quir u tus taquicob u joꞌr Jesús soc u quinsaꞌrob Jesús.
Mʌꞌ cꞌuchaꞌan yor u wayticob quir u tus taquicob u joꞌr.
56 Cax jach pim mac cu tar quir u tus taquicob u joꞌr Jesús,
mʌꞌ tu quetquintajob u tꞌʌnob.
57 Jeroj tuneꞌ,
caj tarob caꞌtur u winiquirob judío quir u tus taquicob u joꞌr Jesús,
robob tan yaꞌaricob:
58 ―A toꞌonoꞌ,
tij cuꞌyaj yaꞌaric a jeꞌ xibaꞌ cu bin u rʌc jubsic carem naj tu quic naj cꞌujintiquex Cꞌuj.
A jeꞌ betaꞌanaꞌ yejer u cꞌʌb mac,
jeꞌ u caꞌ tsꞌʌpquintic u jer carem naj caꞌ bin tsꞌocac u man mʌnaꞌ u nup u qꞌuinin,
a mʌꞌ betaꞌan yejer u cꞌʌb mac.
59 Cax baxuc cu tsicbarob mʌꞌ tu quetquintajob u tꞌʌnobiꞌ.
60 Jeroj tuneꞌ,
caj ric chꞌictar Caifás ich ʌcʌtan tu cotor u yet jach tsꞌurirob u winiquirob judío caꞌ u cꞌatej baꞌ tiꞌ Jesús,
tan yaꞌaric:
―Biquinin mʌꞌ a cꞌʌs nunquic tiꞌ a mac cu taquicob a joꞌr tech?
61 Jesús u mʌcmʌn u chiꞌ uch,
mʌꞌ u cꞌʌs nunquic tiꞌ u jach tsꞌurir.
U jach tsꞌurir tu cotor sacerdote caj u wʌcꞌʌs cꞌatej tiꞌ tan yaꞌaric:
―Arej tenob wa tech a Cristojoꞌ a mac caj u toc araj Cꞌuj yʌn u tar quir u taquic tu cotor mac?
Arej tenob wa tech u pararech Cꞌuj a cu cꞌujintaꞌboꞌ ten mac?
62 Jesús caj u yaꞌaraj tiꞌ:
―Ten ―quij―,
bin a wirenex xan a tenoꞌ a baxuquenechexoꞌ curucbaren ich u noꞌoj Cꞌuj,
a jach manan chichir u mucꞌoꞌ.
Jeꞌ a wiriquex in tar tu muyʌrir caꞌanan.
63 U jach tsꞌurir tu cotor sacerdote u winiquirob judío,
seb caj u jʌtaj u nocꞌ quir u yesic tsꞌiquij,
quireꞌ cu tucraꞌ cu pachꞌic Cꞌuj Jesús an ten bic caj u nuncaj Jesús,
caj u yaꞌaraj u jach tsꞌurir tu cotor sacerdote:
―Baꞌwir tiꞌ u jer mac quir u taꞌquic u joꞌr?
A bʌjiriꞌex caj a wuꞌyajex cu pachꞌic Cꞌuj.
64 Arex ten baꞌ ca tucriquex teꞌex?
Robob u jach tsꞌurirob tu cotor u winiquirob judío,
caj u yaꞌarajob:
―Toc yʌn u siꞌpir,
caꞌ quinsac.
65 Jun yarob caj u yʌnx chun u tubob u wich,
u jerob caj u pixob u wich Jesús caj u raxajob xan,
cu yaꞌaricob:
―Arej tenob mac caj u raxech.
U policía a caj u chucajoboꞌ caj u tacjʌtsꞌajob Jesús.
Pedro cu yaꞌaric: Mʌꞌ in wer maquiꞌ Jesús
66 Tiꞌ toy yʌn Pedro ich tancab tu reꞌaꞌan yatoch Caifás,
caj u jutsꞌaj u bʌj tuririꞌ xquic ich Pedro.
Raꞌ u cꞌurew xquic Caifás;
67 Barej caj u yiraj cu qꞌuich Pedrojeꞌ,
caj u pʌctaj,
caj u yaꞌaraj tiꞌ:
―A tech xaneꞌ ―quij yaꞌaraꞌ―,
tiꞌ a wet man Jesús a cu tar tu cajar Nazaret.
68 Barej rajiꞌ,
caj u yaꞌaraj:
―Mʌꞌ teniꞌ ―quij Pedro―.
Mʌꞌ in wer baꞌ ca waꞌaric.
Mʌꞌ in wer maquiꞌ.
Pedro caj jocꞌ tancab baytʌc tu yʌn u jor naj,
jeroj caj cꞌaynʌj a caxoꞌ.
69 Caj wʌcꞌʌs irir ten u cꞌurew xquic Caifás caj wʌcꞌʌs aꞌara tiꞌ a macob a tiꞌ yʌnob taroꞌ:
―A jeꞌ xibaꞌ,
jach taj,
u yet man Jesús.
70 Barej rajiꞌ caj u wʌcꞌʌs aꞌaraj:
―Mʌꞌ teniꞌ ―quij caj yaꞌaraj.
Chen sansameꞌ,
a mac a tiꞌ yʌnob uch taroꞌ,
caj u wʌcꞌʌs aꞌarajob tiꞌ Pedro:
―Jach tajeꞌ tech a wet mʌn Jesús uch,
a mʌꞌ quet baxuc a tꞌʌn yejer Jesús quireꞌ u xibirech u ruꞌumin Galilea.
71 Caj araꞌb Pedro,
cu chuquic Cꞌuj,
tan yaꞌaric:
―Cꞌuj cu yiric,
wa mʌꞌ in wer a mac a ca waꞌariquexeꞌ,
cax u quinsiquen Cꞌuj.
72 Bayiriꞌ caj caꞌ cꞌaynʌj cax tu caꞌ ten,
Pedro caj u cꞌasaj yicꞌ a baꞌ araꞌb ten Jesús uch:
“Mʌꞌ toy wʌcꞌʌs cꞌaynʌc a caxoꞌ mʌnaꞌ u nup u tenin ca bin a waꞌaric mʌꞌ a wer maqueniꞌ.”
Pedro caj ocꞌnʌjij.
Caj jach quiꞌ ocꞌnʌjij Pedro tun.