A JEꞌRAꞌ U JACH TSOYIR U TꞌɅN CꞌUJ TU TSꞌIBTA MATEO
Raꞌ u nunquirob Jesucristo uch
1
A tan in tsꞌibtic techex,
quij Mateo,
tʌcʌ robob u nunquirob Jesucristo uch.
A Jesúsoꞌ u chꞌic parar u nunquir David.
Bayiriꞌ xan a Jesúsoꞌ u chꞌic parar u nunquir Abraham.
2 Abraham raꞌ u tet Isaac.
A Isaacoꞌ caj cꞌuchij tu qꞌuinin u pararʌncʌr u racꞌ yʌn u parar Jacob.
A Jacobojoꞌ caj cꞌuchij tu qꞌuinin u pararʌncʌr u racꞌ yʌn u parar u cꞌabaꞌ Judá.
A Jacobojoꞌ raꞌ u tet.
Mʌꞌ ja wirej,
pꞌeri u tetob yejer yitsꞌinob yejer u sucuꞌunob.
3 A Judájoꞌ yʌn caꞌtur u pararob yejer u racꞌ Tamar.
Tuririꞌ raꞌ u cꞌabaꞌ Fares.
U jer tuririꞌ u parar,
Zara u cꞌabaꞌ.
A Faresoꞌ caj cꞌuchij tu qꞌuinin u pararʌncʌr u racꞌ yʌn u parar,
raꞌ u cꞌabaꞌ Esrom.
A Esromoꞌ caj cꞌuchij tu qꞌuinin u pararʌncʌr u racꞌ yʌn u parar u cꞌabaꞌ Aram.
4 Baxuc xan,
quij Mateo,
a Aramoꞌ caj cꞌuchij tu qꞌuinin u pararʌncʌr u racꞌ yʌn u parar uch raꞌ u cꞌabaꞌ Aminadab.
A Aminadaboꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Naasón.
A Naasónoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Salmón.
5 A Salmónjoꞌ caj u raqꞌuintaj raꞌ u cꞌabaꞌ Rahab.
Caj cꞌuchij tu qꞌuinin u pararʌncʌr u racꞌ Rahab yʌn u parar raꞌ u cꞌabaꞌ Booz.
A Boozoꞌ caj u raqꞌuintaj raꞌ u cꞌabaꞌ Rut.
Caj cꞌuchij tu qꞌuinin u pararʌncʌr u racꞌ Rut yʌn u parar raꞌ u cꞌabaꞌ Isaí.
6 A Isaíajoꞌ caj cꞌuchij tu qꞌuinin u pararʌncʌr u racꞌ yʌn u parar David.
A Davidoꞌ rajiꞌ oc rey u winiquirob israel.
Caj u raqꞌuintaj David u racꞌ Urías.
Caj cꞌuchij tu qꞌuinin u pararʌncʌr u racꞌ David yʌn u parar David raꞌ u cꞌabaꞌ Salomón.
7 A Salomónoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Roboam.
A Roboamoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Abías.
A Abíasoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Asa.
8 A Asajoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Josafat.
A Josafatoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Joram.
A Joramoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Uzías.
9 A Uzíasoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Jotam.
A Jotamoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Acaz.
A Acazoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Ezequías.
10 A Ezequíasoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Manasés.
A Manasésoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Amón.
A Amónoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Josías.
11 A Josíasoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Jeconías.
A Jeconíasoꞌ yʌn yaꞌab u sucuꞌunob.
A Jeconíasoꞌ caj pararnʌjij u racꞌ tu qꞌuininin caj bin purbir ich u ruꞌumin Babilonia u winiquirob israel.
Chucbir u winiquirob israel caj bin purbir ich u ruꞌumin Babilonia.
12 Caj tsꞌoc u purbir u winiquirob israel tu ruꞌumin Babilonia.
Caj pararnʌjij u racꞌ yʌn u parar raꞌ u cꞌabaꞌ Salatiel.
A Salatieloꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Zorobabel.
13 A Zorobabel caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Abiud.
A Abiudoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Eliaquim.
A Eliaquimoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Azor.
14 A Azoroꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Sadoc.
A Sadocoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Aquim.
A Aquimoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Eliud.
15 A Eliudoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Eleazar.
A Eleazaroꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Matán.
A Matánoꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ Jacob.
16 A Jacoboꞌ caj cꞌuchij tu qꞌuinin u pararʌncʌr u racꞌ yʌn u parar raꞌ u cꞌabaꞌ José.
José rajiꞌ caj u raqꞌuintaj María.
A Maríajoꞌ raꞌ u cꞌabaꞌ u nʌꞌ Jesús.
Rajiꞌ Jesús a tuchiꞌtaꞌb ten Cꞌuj ich yocꞌocab rajen u cꞌabaꞌ Cristo.
17 Mʌꞌ ja wirej,
quij Mateo,
yʌn catorce u nunquirob Jesús.
Cu yʌnx chun yejer Abraham cʌjaꞌan ich yocꞌocab hasta cꞌuchij tu qꞌuinin tiꞌ u rey David.
Yʌn u jerob catorce u nunquirob Jesús.
Caj quimij u rey David hasta caj bin purbir u winiquirob israel ich u ruꞌumin Babilonia.
Yʌn u jerob catorce u nunquirob Jesucristo caj wʌcꞌʌs urob ich u ruꞌumin Canaán hasta caj rochaꞌb Jesucristo ten u nʌꞌ.
Mʌꞌ ja wirej,
raꞌ u qꞌuinin quir u taquic winic a tiꞌ yʌnob ich yocꞌocab.
Ber caj rochaꞌb Jesucristo ten u nʌꞌ
18 Baxuc a jeraꞌ caj rochaꞌb Jesucristo ten u nʌꞌ uch.
Caj cꞌataꞌb María,
u nʌꞌ Jesús.
José caj u cꞌata tiꞌ u tet María.
Chen caj u toc cꞌataj.
Mʌꞌ toy u raqꞌuintej.
Caj yʌnjij u parar María quireꞌ u Tajꞌor u Pixam Cꞌuj.
Rajiꞌ caj u yaꞌaraj u yʌntar u parar María.
19 Caj yuba yʌn u parar María.
A Joséjoꞌ mʌꞌ u cꞌat u raqꞌuintej María quireꞌ tsoy yor a Joséjoꞌ.
Chen u cꞌat u muc u tuchiꞌtic María,
José,
soc mʌꞌ u cheꞌtaꞌr ten u racꞌob.
20 José caj u tucraj ich yor bic cu bin u pꞌʌtic María.
Caj u wʌyʌcꞌtaj José yʌjmasir u tꞌʌn Cꞌuj.
Araꞌb tiꞌ ten yʌjmasir u tꞌʌn Cꞌuj:
―Mʌꞌ ja chꞌic sajaquir ―quij yaꞌaraj tiꞌ José―,
quireꞌ a techoꞌ u pararech a nunquir David.
Tsoy a chꞌic a raqꞌuintej María.
Yʌn u parar quireꞌ araꞌb tiꞌ ten u Tajꞌor u Pixam Cꞌuj caꞌ yanac u parar.
21 A Maríajoꞌ ―caj u yaꞌaraj yʌjmasir u tꞌʌn Cꞌuj―,
bin u caꞌ pararʌncʌr María xib u parar María.
Caj u toc araj yʌjmasir u tꞌʌn Cꞌuj tiꞌ José:
―Caꞌ a pʌchej u cꞌabaꞌ JESÚS caꞌ bin a pʌchej u cꞌabaꞌ.
Rajen pʌchaꞌan u cꞌabaꞌ Jesús,
quireꞌ bin u jawsic u siꞌpir a mac a cu quibic u tꞌʌn soc mʌꞌ u bin ich cꞌacꞌ.
22 Mʌꞌ ja wirej,
quij Mateo,
a Cꞌujoꞌ caj u toc araj jeꞌ u tar Cristojeꞌ.
Quireꞌ baxuc caj u tsecꞌtaj yʌjtseqꞌuir u tꞌʌn Cꞌuj Isaías uch.
Rajen nupꞌ u tꞌʌn bajeꞌrereꞌ.
Mʌꞌ ja wirej,
tarij Cristo.
Uꞌyex baꞌ caj u yaꞌaraj yʌjtseqꞌuir u tꞌʌn Cꞌuj uch:
23 Irej a xquicoꞌ ―quij Isaías:
Mʌꞌ toy u chꞌaꞌiꞌ caj yʌnjij u parar ―quij Isaías―.
Bin u pachej u cꞌabaꞌ Emanuel ―quij Isaías.
U cꞌabaꞌ Emanuel u cꞌat yaꞌaric:
Tiꞌ yʌn Cꞌuj yejeroꞌon ich yocꞌocab.
Baxuc caj u yaꞌaraj yʌjmasir u tꞌʌn Cꞌuj caj u wʌyʌcꞌtaj José.
24 Caj tsꞌoc u wʌyʌcꞌ José.
Caj ajij caj u chꞌaj u raqꞌuintej María quireꞌ baxuc caj u yaꞌaraj yʌjmasir u tꞌʌn Cꞌuj.
Rajen caj u chꞌaj u raqꞌuintej José.
25 Barej José mʌꞌ u wenʌn yejer,
yiric yʌn u parar María,
hasta caj rochaꞌb u parar Cꞌuj ten u nʌꞌ.
Caj pach u cꞌabaꞌ JESÚS quireꞌ caj u toc araj yʌjmasir u tꞌʌn Cꞌuj.