Tsꞌiquij Jonás; u chꞌaꞌ otsir Cꞌuj
4
Jach manan choquij yor Jonás quireꞌ yiraj chꞌaꞌb otsir tiꞌ u winicob Níneva ten Jaj Tsꞌur.
Jach tsꞌiquij Jonás.
2 Tu cu tꞌʌnic Jaj Tsꞌur Jonás caj u yaꞌaraj tiꞌ Jaj Tsꞌur:
--A baꞌ u ber ich u cajar Níneva baxuc caj in waꞌaraj tech uch.
Baxuc caj in sʌjtaj tiꞌ xan.
¿Mʌꞌ mʌ tin waꞌaraj tech Jaj Tsꞌur jeꞌ a cꞌaxic a wor tiꞌ u winicob Níneva soc mʌꞌ a tsꞌic u mucꞌyaj a tiꞌob?
Raꞌ tin waꞌaraj cax mʌꞌ rucuquen tin watoch.
Rajen tin tucraj in putsꞌur ich u ruꞌumin España.
Rajen seb in cꞌat in bin.
Mʌꞌ ja wirej,
in wer ca yajquintic mac a techoꞌ Jaj Tsꞌur.
Bayiriꞌ ca wesic ca chꞌic otsir tiꞌ mac xan.
In wer chanchan ber ne mʌꞌ biquech tiꞌ mac.
Jonás aric aroꞌ.
In wer a techoꞌ jach tsoy a wor tiꞌ tu cotor mac xan.
Baxuc ca nʌj betic.
3 Tiꞌ toj cu tsicbar Jonás tiꞌ Cꞌuj:
--Tiꞌ a baꞌ u ber ich u cajar Níneva.
Arej caꞌ quimiquen bʌjeꞌrer.
¿Jach tsoy wʌ quin toc quimin,
baꞌwir in cuxtar?
4 A Jaj Tsꞌuroꞌ caj u cꞌata tiꞌ Jonás quir yubic baꞌ cu bin caꞌ arbir tiꞌ,
caj yaꞌaraj Jaj Tsꞌur:
--¿Baꞌwir ca chen tsꞌictar?
Jonás cu chꞌuctic yirej baꞌ u ber tiꞌ u cajar Níneva
5 Quireꞌ toc jocꞌ ich u cajar Níneva Jonás sam.
Tar u wichir u bin,
tu cu tar ic yum.
Tiꞌ tu cꞌʌxaj pʌsʌr soc tiꞌ yʌn boꞌoy.
Curaj Jonásoꞌ tiriꞌ tu chꞌucta yirej a baꞌ u ber tiꞌ u cajar Níneva.
6 A Jaj Tsꞌuroꞌ rajiꞌ Cꞌuj caj u waysaj u cheꞌir cꞌoꞌoch soc u boꞌoy a Jonás,
soc mʌꞌ nechʌco qꞌuin yubic Jonás.
Rajiꞌ tu quiꞌquintaj yor Jonás.
7 Jach aꞌacꞌbir tan u tar ic yum a Jaj Tsꞌuroꞌ caj u tuchiꞌtaj nocꞌ quir u jantic u cheꞌir cꞌoꞌoch quir u quimin.
Jeroj quim,
saj u reꞌ a cꞌoꞌocheꞌ.
8 Jeroj,
caj naquij ic yum.
Cꞌuj ar u tar yicꞌar tu cu tar ic yum,
chʌcoj.
Tu jach pocaꞌ ten u cꞌaqꞌuir ic yum.
Tabar u quimin Jonás yejer u chʌcwirir qꞌuin tu joꞌr.
Tiꞌ u bʌjiriꞌ tan yaꞌaric:
--In cꞌat in toc quimin.
Jach tsoy wʌ quin toc quimin,
¿baꞌwir in cuxtar?
--baxuc tu yaꞌaraj Jonás.
9 A Jaj Tsꞌuroꞌ caj u cꞌataj tiꞌ Jonás quir yubic baꞌ cu bin caꞌ arbir tiꞌ:
--¿Baꞌwir cu choctar a wor quireꞌ a baꞌ u ber tiꞌ u cheꞌir cꞌoꞌoch?
--quij,
yaꞌaric Jaj Tsꞌur.
Caj u nuncaj Jonás:
--¿Mʌꞌ wʌ uts tin tꞌʌn caꞌ tsꞌicaquen?
Jach manan choc in wor,
rajen in cꞌat in quimin --Jonás tan yaꞌaric.
10 Tan yaꞌaraꞌ tiꞌ Jonás ten Cꞌuj:
--¿Baꞌwir chen otsir a wiric u cheꞌir cꞌoꞌoch?
Mʌꞌ baꞌwir chen otsir a wiric quireꞌ mʌꞌ ta yamtaj a techoꞌ.
Mʌꞌ ta chꞌisaj.
Turiꞌ acꞌaꞌ caj chꞌijij,
turiꞌ qꞌuin caj quim.
Chen a techoꞌ otsir ta wiraj a baꞌ u ber tiꞌ u cheꞌir cꞌoꞌoch.
11 Mʌꞌ wʌ jach manan tsoy caꞌ in chꞌic otsir tiꞌ u winicob ich u cajar Níneva,
a yajaw cajar quireꞌ tan u manob tu yacꞌbir u beriꞌ mʌꞌ yerobiꞌ xan.
Mʌꞌ ja wirej,
rajiꞌob irob a chichan a mʌꞌ yerob a baꞌ cu betic a tsoy.
Tiꞌ yʌn 120,000 mac bayxucoꞌ tu cajar Níneva quet yejer u yʌrʌcꞌ xan.
***