Bʌjeꞌrer Jonás tu quibaj u tꞌʌn Cꞌuj
--Xen ich u yajaw cajar Níneva.
Joqꞌuen arej tiꞌob ich u cajar Níneva in tꞌʌn a tin waꞌaraj tech.
3 Jeroj Jonás tu quibaj u bin caj araꞌb ten Cꞌuj.
Caj quib u bin ich yajaw cajar Níneva.
Quireꞌ jach coch u yajaw cajar Níneva.
Mʌnʌꞌ u nup qꞌuin quir u chꞌʌctic u cajar mʌ mac u ximbatic tu yoc cu bin.
4 Jonás caj u yʌnxchun u chꞌʌctic u cajar Níneva.
Caj ximanij turiꞌ qꞌuin.
Tiꞌ xurij.
Cꞌam tan yaꞌaric tiꞌob quir yubicob.
Tan yaꞌaric Jonás:
--Cu cꞌuchur a cuarenta qꞌuineꞌ,
cu chꞌejar a techexoꞌ ich a yajaw cajarex Níneva.
5 U winicob Níneva caj u cꞌʌmob,
caj u yacsajob u yor tiꞌ Cꞌuj.
Robob caj u tucrob u pꞌʌticob u jananob u winicob Níneva cax a noꞌjobeꞌ quet yejer a mʌꞌ noꞌjobeꞌ.
Caj u buquintajob sasaꞌp nocꞌ quir yesicob tu cꞌaxajob tu yorob tiꞌ Cꞌuj.
6 Bej caj yub u jumintaꞌ a reyoꞌ a baꞌ u ber tu cajar.
U rey u cajar Níneva,
caj ricꞌ ich u cutan,
a u cutan a reyoꞌ,
caj u pitaj u nocꞌ rey caj u buquintaj sasaꞌp nocꞌ.
Caj curajij rey ich a tanicꞌacꞌ.
Quir yesic tu cꞌaxaj yor tiꞌ Cꞌuj.
7 A rey caj u ricꞌsaj u tꞌʌnin tiꞌ u winic a cʌjaꞌan ich Níneva,
caj u yaꞌaraj:
--A jeꞌ in tꞌʌn a ten quin bin in wac techexoꞌ,
bayiriꞌ in wet jach tsꞌurir.
A techexoꞌ,
tsirej,
mʌꞌ a jananex mix chichin.
Cax a wʌrʌcꞌ wacaxex,
mʌꞌ u jananob xan.
Bayxuc a wʌrʌcꞌ meꞌ,
mʌꞌ u jananob mix yucꞌurob.
8 Ta cotorex yʌn a buquintex sasaꞌp nocꞌ.
Bayxuc a wʌrʌqꞌuex yʌn a tʌquiquex u buquinticob sasaꞌp nocꞌ a wʌrʌqꞌuex --tan yaꞌaric tiꞌ u winicob--.
Caꞌ a pꞌisex a bʌj a tꞌʌniquex Cꞌuj.
Tsirej mʌꞌ a quinsiquex mac.
Tsirej mʌꞌ a coꞌquintiquex mac.
9 Tan yaꞌaric a reyoꞌ:
--Jaj ix tʌcoj,
jeꞌ u xusic u tsꞌiquinticoꞌonex Cꞌuj soc ij cuxtarex soc mʌꞌ u quinsicoꞌonex.
A baywoꞌ tan u cꞌaxic u tucur.
10 Cꞌuj caj u yiraj baꞌ tu betob u winicob Níneva,
caj u yiraj Cꞌuj caj cꞌaxob tu yor.
Mʌꞌ ja wirej,
caj u pꞌʌtob u jananob.
Tu yiraj tu buquintajob sasaꞌp nocꞌ.
Tu yiraj tu pꞌisob u bʌj u tꞌʌnicob Cꞌuj.
Cꞌuj tu yiraj tu pꞌʌtob u manob tu cꞌasir.
Rajen Cꞌuj caj u cꞌaxaj u tucur caj u suꞌsa u tsꞌiquir Cꞌuj a ten bic caj u yaꞌaraj tiꞌ Jonás uch.