A mac u neꞌer baꞌ tar yiricob chan Jesús
2
Jesús,
quij Mateo,
caj rochaꞌb ich u cajar Belén.
A Belénoꞌ tiꞌ yʌn ich u ruꞌumin Judea.
Cu reyintic Herodes ich u ruꞌumin Judea caj rochaꞌb Jesús.
Tar u tar ich u cajar Jerusalén.
Caj cꞌuchob ich u cajar Jerusalén tar u tarob tu cu tar ic yum.
Robob u neꞌer baꞌ caj cꞌuchob.
Jun yarob caj cꞌuchob ich u cajar Jerusalén.
2 A mac u neꞌer baꞌ caj u cꞌatajob ich u winiquirob judío tu cajar Jerusalén:
―Tu rochaꞌb u rey u winiquirob judío?
Mʌꞌ ja wirej,
tij quiraj u sab,
jach carem,
a cu yesic toc rochaꞌb ten u nʌꞌ.
Tij quiraj tu cu tar ic yum.
Rajen caj taroꞌon caꞌ ij cꞌujintej ich u cajar Jerusalén.
3 Caj yubaj u rey Herodes baꞌ cu manob u cꞌaticob caj jaqꞌuij yor,
Herodes.
Baxuc tu cotor mac cʌjaꞌan ich u cajar Jerusalén,
caj jaqꞌuij yorob a baꞌ caj u yubob u cꞌatobiꞌ.
4 Rajen u rey Herodes,
caj u pʌyaj u cꞌatej tiꞌob,
tu cu bin rochbir a mac a cu bin tuchiꞌbir ten Cꞌuj quir u taquic mac tu cotor.
Caj u cꞌataj tiꞌ u jach tsꞌurirob sacerdote u winiquirob judío.
Baxuc,
caj u cꞌataj Herodes tiꞌ a cu camsicob u tꞌʌn Moisés tiꞌ u winiquirob judío:
―Tu cu bin rochbir Cristo?
―quij Herodes.
5 Robob caj u yaꞌarajob tiꞌ Herodes:
―Yʌn u rochaꞌr Cristo ich u cajar Belén quireꞌ tiꞌ yʌn tu ruꞌumin Judea.
Mʌꞌ ja wirej,
baxuc caj u tsꞌibtaj yʌjtseqꞌuir u tꞌʌn Cꞌuj uch:
6 Caj yaꞌaraj yʌjtseqꞌuir u tꞌʌn Cꞌuj uch:
Tar yʌn ich u cajar Belén tu ruꞌumin Judea,
quij.
Jach manan coꞌoj u cajar Belén ich tu cotor u cajar tu ruꞌumin,
quij Cꞌuj.
Quireꞌ tiꞌ cu tar tub yʌnech,
quij,
a mac cu bin u reyinticob u winiquirob israel,
quij Cꞌuj.
Tiꞌ cu bin rochaꞌr ten u nʌꞌ,
a mac a cu bin u cʌnantic u winiquirob israel.
Baxuc caj u yaꞌaraj Cꞌuj tiꞌ yʌjtseqꞌuir u tꞌʌn Cꞌuj uch.
7 Rajen caj u muc u pʌyaj Herodes caj u cꞌataj tiꞌ a u neꞌer baꞌ:
―Pꞌiseten ―quij Herodes― mun u qꞌuinin caj a yʌn irex u jocꞌar sab u rey u winiquirob judío?
8 Caj u tus aꞌaraj Herodes tiꞌ a ju neꞌer baꞌ:
―Caꞌ xiquechex ich u cajar Belén caꞌ a quiꞌ cʌxtex a wirej tu yʌn Cristo tu rochaꞌb.
Wa ca wiriqueꞌ,
purex a tꞌʌn ten soc in tar in cꞌujintic xan.
9 Caj tsꞌoc yubic yaꞌaraꞌ ten u rey Herodes caj binob a ju neꞌer baꞌ.
Caj jocꞌob ich u cajar Jerusalén caj yirob sab quet cu binob yejer,
sab tu cu tar ic yum,
hasta cꞌuchij tu yʌn chan Cristo.
Tiꞌ xurij sab ich chan Cristo.
10 Caj yirob xurij sab jach manan quiꞌ yorob a ju neꞌer baꞌ.
11 Caj ocob ich yatoch tu yʌn chan Cristo.
Caj yirob rochaꞌan chan Cristo ten u nʌꞌ María.
Caj yirob chan Cristo caj xonrajob ich Cristo quir u cꞌujinticob.
Sansan caj u jarob u chan coprej quir u sijajob baꞌ tiꞌ chan Cristo.
Caj u sijajob oro.
Caj u sijajob tiꞌ u tsꞌac pom.
Caj u sijajob u tsꞌac mirra.
A jeꞌ tsꞌacaꞌ quir u choꞌwic tu baquer mac a cu quimineꞌ quireꞌ quiꞌ u boc.
12 Caj tsꞌoc yiricob chan Cristo a ju neꞌer baꞌ,
caj araꞌb tiꞌob ten Cꞌuj tu cu wʌyʌcꞌob:
―Mʌꞌ ja binex ich u rey Herodes ―quij Cꞌuj.
Rajen caj sutnʌjob tu cajarob chen u jer u berir tiꞌ binobiꞌ.
Caj putsꞌ José yejer María ich u ruꞌumin Egipto yejer chan Cristo
13 Caj tsꞌoc u binob a ju neꞌer baꞌ.
A Joséjoꞌ caj u wʌyʌcꞌtaj yʌjmasir u tꞌʌn Cꞌuj.
Caj araꞌb tiꞌ ten yʌjmasir u tꞌʌn Cꞌuj:
―Riqꞌuen caꞌ xiquech yejer chan Cristo yejer u nʌꞌ.
Tar a bin ich u ruꞌumin Egipto,
tiꞌ ca pꞌatʌr ich u ruꞌumin Egipto hasta quin waꞌaric tech caꞌ suꞌnʌquech teraꞌ.
Quireꞌ u rey Herodes u cꞌat u cʌxtic u quinsej chan Cristo ―baxuc caj araꞌb tiꞌ ten yʌjmasir u tꞌʌn Cꞌuj tu cu wʌyʌcꞌ José.
14 Caj tsꞌoc u wʌyʌcꞌ José caj ajij,
caj riqꞌuij caj binij yejer María yejer chan Cristo.
Binob ich u ruꞌumin Egipto,
cax acꞌbir caj binob.
15 Tiꞌ pꞌatobiꞌ ich u ruꞌumin Egipto hasta quimij u rey Herodes.
Soc u nupꞌur u tꞌʌn Cꞌuj,
rajen binob ich u ruꞌumin Egipto.
Quireꞌ caj u yaꞌaraj yʌjtseqꞌuir u tꞌʌn Cꞌuj uch:
“Tiꞌ quin payic in parar,
quij Cꞌuj,
ich u ruꞌumin Egipto.”
Baxuc caj u yaꞌaraj yʌjtseqꞌuir u tꞌʌn Cꞌuj uch.
Herodes caj u yaꞌaraj: Xen quinsex a chan ochir ich u cajar Belén
16 Caj yubaj Herodes caj u tusarob tiꞌ Herodes a ju neꞌer baꞌ.
Caj tsꞌiquij u rey Herodes.
Rajen caj u yaꞌaraj Herodes tiꞌ u soldadojob:
―Caꞌ xiquex a quinsex a chan ochir xib ich u cajar Belén.
Caꞌ a rʌc quinsex chan ochir,
a caꞌtur yaxqꞌuin caj rochaꞌb ten u nʌꞌ.
Cax tep u caꞌob,
rʌc quinsex ich u cajar Belén.
Baxuc caj u yubaj yacob a ju neꞌer baꞌ.
Caꞌtur yaxqꞌuin caj irob a saboꞌ.
Rajen caj u toc quinsajob chan ochir soldadojob:
―Cʌxtex u chan ochir a nʌtsꞌaꞌan ich u cajar Belén caꞌ a quinsex.
17 Baxuc caj u chꞌic araj yʌjtseqꞌuir u tꞌʌn Cꞌuj Jeremías uch.
Quireꞌ caj u yaꞌaraj Jeremías uch:
18 Caj yubob u tꞌʌnob ich u cajar Ramá,
Jeremías tu chꞌic tsecꞌtaj.
Mʌꞌ toy quinsac chan ochir caj u tsecꞌtaj:
Tan yocꞌarob tan yacꞌticob quireꞌ mʌnaꞌ u chan ochir.
Jach yaꞌab cu yacꞌticob u chan ochir an ten bic Raquel caj u yacꞌtaj uch.
Mʌnaꞌ mac cu quiꞌquintic yorob quir u chꞌenʌn yocꞌarob quireꞌ yiric mʌnaꞌ u chan ochir.
Baxuc caj u tsecꞌtaj Jeremías uch.
19 Barej caj quimij u rey Herodes.
José caj u wʌyʌcꞌtaj yʌjmasir u tꞌʌn Cꞌuj ich u ruꞌumin.
Caj araꞌb tiꞌ:
20 ―Xen ―quij yaꞌaraj tiꞌ―.
Mʌnaꞌ Herodes,
quimij.
Mʌnaꞌ mac cu quinsic chan Cristo.
Riqꞌuen caꞌ xiquech yejer chan Cristo.
Caꞌ sutnʌquech ta pach ich u ruꞌumin Israel ―baxuc araꞌb tiꞌ José ten yʌjmasir u tꞌʌn Cꞌuj.
21 Caj tsꞌoc u wʌyʌcꞌ José.
Caj ajij José caj riqꞌuij,
caj bin ich u ruꞌumin Israel.
Caj bin yejer u nʌꞌ chan Cristo,
bayiriꞌ yejer chan Cristo.
22 Caj yubaj yaꞌaraꞌ José cu reyintic u parar Herodes ich u ruꞌumin Judea.
Caj yuba yaꞌaraꞌ oc u reyintic caj quim u tet.
U cꞌabaꞌ u parar Herodes,
Arquelao.
Rajen caj u chꞌaj sajaquir José quir u sut tu pach ich u ruꞌumin Judea.
Caj u wʌyʌcꞌtaj yʌjmasir u tꞌʌn Cꞌuj José.
Caj araꞌb tiꞌ:
―Xen ich u ruꞌumin Galilea.
Rajen binij José ich u ruꞌumin Galilea.
23 Baxuc caj cꞌuchij José yejer u nʌꞌ Jesús ich u ruꞌumin Galilea.
Caj bin u cʌjtarob ich u cajar Nazaret.
Tiꞌ cajij quir u nupꞌur u tꞌʌn Cꞌuj.
Baxuc araꞌb tiꞌ ten yʌjtseqꞌuir u tꞌʌn Cꞌuj uch:
―Rajiꞌ tiꞌ cu tar ich u cajar Nazaret.
Rajen araꞌan u winiquir nazaret.