JONÁS
JONÁS TU TSꞌIBTAJ JUꞌUN UCH
Mʌꞌ yubic Jonás u tꞌʌn Cꞌuj
--Caꞌ xiquech tu yajaw cajar Níneva,
a tseꞌctic quir yubicob quireꞌ yerob yʌn u siꞌpirob.
Arej tiꞌoboꞌ,
in wer --quij Cꞌuj--,
jach cꞌas u winiquirob u cajar Níneva.
3 Mʌꞌ tiꞌ bin Jonás ich u yajaw cajar Níneva.
Tiꞌ cu bin ich u jer ruꞌum tu mʌꞌ araꞌan ten Cꞌuj soc u putsꞌur tiꞌ Jaj Tsꞌur.
Tiꞌ binij Jonás ich u cajar Joppa,
u joꞌr chem ich cꞌacꞌnab.
Tiꞌ tu yiraj chem ich cꞌacꞌnab,
orac u bin ich u ruꞌumin España.
Jonás tu boꞌotaj u chemir quir u bin ich España caj oc ich chem yejerob a cu baꞌpticob chem quir u bin.
Chen yʌn u noqꞌuir a chemoꞌ quir u bin xan.
Caj bin chem cu tucric u putsꞌur Jonás ich España.
4 Chen a Jaj Tsꞌuroꞌ caj u tuchiꞌtaj chꞌic yum icꞌ ich cꞌacꞌnab.
Rajen tabar u bujur u chemir quireꞌ jach manan cꞌam yicꞌar.
5 Rajen bayʌnen jach manan jacaꞌan yorob a mac a cu baꞌpticob chem.
Chen u bʌjiriꞌ u cꞌuj caj u chich tꞌʌnajob soc u yamtaꞌrob caꞌ chꞌenac yicꞌar.
Jeroj tuneꞌ,
tan u yʌnxchun rvc puricob a baꞌ cuch a tiꞌ yʌn ich chem yerob caꞌ sarac u chemir soc mʌꞌ ar u chem.
A Jonásoꞌ caꞌcheꞌ caj bin chaꞌtar ich jaꞌpnin chem caj wenij.
Jach quiꞌ wenen a Jonás.
6 U jach tsꞌurir cu baꞌpticob a chemoꞌ mʌꞌ yer wʌ tiꞌ yʌn Jonás wenen u caꞌ.
Caj irir ten u jach tsꞌurir chem caj as Jonás.
Tan u cꞌataꞌ tiꞌ:
--¿Baꞌwir wenen a caꞌ bʌjeꞌrer?
Riqꞌuen,
tꞌʌnej a cꞌuj caꞌ yamtacoꞌon soc u chꞌenan yicꞌar.
Jaj ix tʌcoj,
a Cꞌuj tech caꞌ u chꞌa otsir toꞌonex soc mʌꞌ ic bint jaꞌ --raꞌ aric u jach tsꞌurir.
7 Pachir a Jonásoꞌ caj bin tu yʌn a cu baꞌpticob chem,
pꞌeriꞌob bʌjeꞌ.
Mʌꞌ wʌ rajiꞌob a cu pecsicob a chemob caj u pacraj arajob ich u bʌjiriꞌob:
--Iric caꞌ ij cʌxtej baꞌ u siꞌpir mac ich a toꞌonexoꞌ a teꞌraꞌ ich chem quireꞌ tan u tar u chꞌic yum icꞌ u quinsicoꞌonex.
Jeroj,
caj u tucrajob u qꞌuinyajob tu chen qꞌuinyajob quir yiricob mac yʌn u siꞌpir.
Caj yirob yʌn mac yʌn u siꞌpir,
raꞌ u cꞌabaꞌ Jonás.
8 Bayʌnen a cu baꞌpticob a chemoꞌ caj u cꞌatajob tiꞌ Jonás:
--¿Arej a tenobob biquin cu tar a jeꞌ icꞌaꞌ a cu quinsicoꞌonex?
¿Baꞌ tarech a wirej ich chem a teꞌraꞌ?
¿Baꞌ u ruꞌumin tub a tar?
¿Baꞌ quireiꞌ a tꞌvn a techoꞌ xan?
9 Tu nuncaj Jonás tiꞌ a cu baꞌpticob a chem:
--A tenoꞌ Hebreojen.
A tenoꞌ quin cꞌujitic ic Jaj Tsꞌur,
a Cꞌuj a tiꞌ vʌn caꞌanan.
Raꞌ tu waysaj cꞌacꞌnab yejer tu cotor ruꞌum caj u waysaj Cꞌuj tu cotor.
10 Mʌꞌ tsꞌoc u tsicbaar Jonás caj u yaꞌaraj bic tan u putsꞌur tiꞌ Cꞌuj.
A caj yubob yaꞌaric Jonás aroꞌ a cu baꞌpticob a chem,
jach manan jacaꞌan yorob.
Caj yaꞌarajob tiꞌ Jonás:
--¿Biquinin jach manan cꞌas caj a betaj?
Quireꞌ yerob bʌjeꞌrer tan u putsꞌur tiꞌ Cꞌuj.
11 Tiꞌ toj cu tsicbarob a cu baꞌpticob a chem,
a ray qꞌuinoꞌ tan u mas cꞌamtar yicꞌar.
Yʌjbaꞌpichem caj u cꞌatajob tiꞌ Jonás:
--Arej a tenoboꞌ baꞌ yʌn ic beticob soc u xur u tar yicꞌar.
12 Caj u nuncaj Jonás:
--Toc pura ten ich cꞌacꞌnab quir u chꞌena yicꞌar.
Mʌꞌ wʌ in wer ten in siꞌpir --quij Jonás--.
Rajen a techexoꞌ ti yʌnechex tu cꞌam yicar.
13 Chen mʌꞌ tu quibob tiꞌ u tꞌʌn Jonás.
Rajen a yʌjbaꞌpirob chemoꞌ caj u chich baꞌptejob a chem caꞌ cꞌuchuc tu ruꞌumin.
Jach yaj cu baꞌpticob a chemoꞌ.
U beriꞌ cꞌʌmric ich yocꞌo cꞌacꞌnab,
mʌꞌ ju bin quireꞌ tan u mas cꞌamtar yicꞌar.
14 Bareꞌ rajiꞌob caj u tꞌʌnajob u Jaj Tsꞌurir Jonás.
Cꞌam caj u tꞌʌnajob u Jaj Tsꞌurir Jonás:
--Mʌꞌ a tsꞌic in mucꞌyajob soc in quiminob wʌ quin quinsicob Jonás ich jaꞌ.
Quireꞌ a baꞌ u ber bʌjeꞌrer tech ta tuchiꞌtaj.
15 Jeroj,
caj tsꞌoc u tꞌʌnicob u Jaj Tsꞌurir Jonás caj u chucob Jonás caj u purob ich cꞌacꞌnab.
Seb caj chꞌenij u yaꞌamir.
16 Quireꞌ caj u yirob baꞌ tu betaj Cꞌuj,
rajen tu jach sʌjtajob Cꞌuj.
Bayʌnen pachir quir u yesicob u cꞌujinticob Cꞌuj caj u quinsajob yʌrʌcꞌ.
Bayiriꞌ xan tu yaꞌarajob:
--Jeꞌ in toc tsꞌic tech u boꞌorir a tin toc arajob tech --bayxuc caj u yaꞌarajob yʌjbaꞌpir chem.
17 Ber caj purob Jonás ich cꞌacꞌnab ten yʌjbaꞌpir chem toc yʌn u yajaw cʌyir ten Cꞌuj quir u rucur a Jonás.
Jeroj,
tu rucaj Jonás tiꞌ yʌn tu nʌcꞌ yajaw cʌy.
Tres qꞌuin tiꞌ yʌn Jonás tu nʌcꞌ yajaw cʌy.