Caj rochaꞌb Jesús ten u nʌꞌ
2
Ray u qꞌuinin Augusto caj u reyintaj u ruꞌumin u winiquirob romano caj yaꞌaraj rey tiꞌ u winiquirob:
―Caꞌ xiquechex a tsꞌibtex a cꞌabaꞌ quir in wiric mun u winiquirob yʌn teraꞌ.
Tu cotor mac yʌn u bin u tsꞌibtic u cꞌabaꞌ.
Baxuc caj yaꞌaraj César Augusto.
Lucas 2.1-20
2 A jeꞌ beyajaꞌ caj u tsꞌibtajob u cꞌabaꞌ.
Raꞌ tu yʌn batꞌan tsꞌibtaj u cꞌabaꞌ caj oc u gobernador u ruꞌumin Siria,
Cirenio,
u cꞌabaꞌ gobernador.
3 Tu cotor ich u cajariririꞌej yʌn u tsꞌibtic u cꞌabaꞌ xan.
Jujuntur cu bin u tsꞌibtic u cꞌabaꞌ ich u jach cajar.
4 Caj bin José,
caj ruqꞌuij tiꞌ u cajar Nazaret caj bin ich u ruꞌumin Judea quir u cꞌuchur tu cajar Belén.
Caj bin u tsꞌibtej José u cꞌabaꞌ ich Belén quireꞌ raꞌ u cajar u nunquir David tu rochaꞌb ten u nʌꞌ.
Rajen caj u jʌmʌch pꞌʌtaj u cajar Nazaret quir u bin.
5 Caj binob José yejer María ich Belén quir u tsꞌibticob u cꞌabaꞌ.
José mʌꞌ toy u jach raqꞌuintej María chen tabar u rochic u parar.
6 Tiꞌ yʌn José yejer María ich u cajar Belén caj cꞌuchij tu qꞌuinin u rochic u parar.
7 María caj u rochaj u chan och xib.
Rajiꞌ tu yʌnx rochaj María.
Caj u tapa María yejer u tepꞌ caj u chaquintaj tu cu bin u jansej yʌrʌcꞌ wacʌx quireꞌ mʌꞌ tu cu mʌjʌnticob naj quir u wenʌnob quireꞌ jach pimob caj u rʌc tsꞌibtajob u cꞌabaꞌ.
Caj tarob yʌjmasirob u tꞌʌn Cꞌuj ich tu cu cʌnanticob yʌrʌcꞌ tʌmʌn yuc
8 Bʌytʌc ich u cajar Belén tiꞌ yʌn yʌjcʌnanyʌjirob yʌrʌcꞌ tʌmʌn yuc.
Cax acꞌbir caj u cʌnantajob yʌrʌcꞌ tʌmʌn yuc.
Tiꞌ yʌnob tu mʌnaꞌ u cheꞌer chen suc yʌn.
9 Seb caj tar chꞌictar yʌjmasir u tꞌʌn Cꞌuj tu yʌn yʌjcʌnanyʌjirob tʌmʌn yuc caj tar u sasir Cꞌuj caj sasichʌjij tu yʌnob.
Rajen jach jaqꞌui yorob.
10 Caj yaꞌaraj yʌjmasir u tꞌʌn Cꞌuj:
―Mʌꞌ u jacꞌʌrex a worex ten quireꞌ caj taren in waꞌaric techex a jeꞌ tsoy tꞌʌnaꞌ.
Caj taren in waꞌaric tech soc u quiꞌtar yor tu cotor mac.
11 Bajeꞌrer rochaꞌb ten u nʌꞌ ich u cajar Belén.
Raꞌ a wʌjtaquirex a caj u yaꞌara yʌjtseqꞌuir u tꞌʌn Cꞌuj jeꞌ u tareꞌ.
Rajiꞌ Cristo Jaj Tsꞌur aꞌ tuchiꞌtaꞌb ten Cꞌuj.
12 Soc a werex a baꞌ quin waquextech jaj.
Jeꞌ a wiriquex charic tu cu jansic yʌrʌcꞌ wacʌx ich u najir yʌrʌcꞌ wacʌx.
13 Seb caj tar u jer yaꞌab yʌjmasirob u tꞌʌn Cꞌuj.
Jach pim caj tarob.
Tiꞌ u tar ich caꞌanan.
Caj u yʌnxchun u cꞌʌyicob Cꞌuj yʌjmasirob u tꞌʌn Cꞌuj.
Caj u cꞌʌyob Cꞌuj:
14 Jach caremech Cꞌuj a techoꞌ a tiꞌ yʌnech ich caꞌanan.
Jach quiꞌ yor a mac a tiꞌ yʌn ich yocꞌocab a tu quiꞌ quiquintajob a wor Cꞌuj.
Mʌꞌ ja wirej,
caj a yamtaj tiꞌob.
Baxuc caj cꞌʌyajob yʌjmasirob u tꞌʌn Cꞌuj.
15 Caj wʌcꞌʌs binob yʌjmasir u tꞌʌn Cꞌuj ich caꞌanan.
Caj yaꞌarob tiꞌ u racꞌob yʌjcʌnanyʌjirob:
―Caꞌ xicoꞌonex ich u cajar Belén caꞌ ij quirej a baꞌ caj u yaꞌaraj toꞌon yʌjmasirob u tꞌʌn Cꞌuj.
Caꞌ ij quirej baꞌ u ber tiꞌ.
16 Tsꞌajan yor binob caj u nupꞌajob María yejer José ich u najir tu cu jansicob yʌrʌcꞌ wacʌx.
Tiꞌ charaꞌan u chan ochir María tu cu jansic yʌrʌcꞌ wacʌx.
Caj tsꞌoc yiricob u chan ochir.
17 Yʌjcʌnanyʌjirob tʌmʌn yuc caj araꞌb tiꞌ José yejer María a baꞌ araꞌb tiꞌob ten yʌjmasir u tꞌʌn Cꞌuj.
Caj yaꞌarob baꞌ cu bin u betic u chan ochir ich u racꞌob u winiquirob judío.
18 Caj jacꞌob yor tu cotor a caj u yuba baꞌ caj u yaꞌarajob yʌjcʌnanyʌjirob tʌmʌn yuc.
Tu tsicbʌtob bic tabar u chan ochir María.
19 María caj u quiꞌ tucraj a baꞌ yuba yaꞌaraꞌr ten yʌjcʌnanyʌjirob tʌmʌn yuc.
Rajraꞌ cu tucric tiꞌ tu yor María.
20 Caj wʌcꞌʌs sutnʌjob yʌjcʌnanyʌjirob tʌmʌn yuc quir u beyaj.
Caj yaꞌarob tiꞌ Cꞌuj:
―Bayoꞌ Cꞌuj,
jach caremech Cꞌuj quireꞌ tij quiraj tij quich quireꞌ baxuc caj a waꞌara toꞌon.
Toc taj caj a waꞌaraj toꞌon ―baxuc caj yaꞌarob yʌjcʌnanyʌjirob tʌmʌn yuc tiꞌ Cꞌuj.
Jesús caj bin purbir ich carem naj tu cu naj cꞌujinticob Cꞌuj u winiquirob judío
21 Caj man tuririꞌ semana caj bin purbir Jesús quir u sesic u bʌqꞌuer chan xib an ten bic nanij u betic u winiquirob judío.
Caj pach u cꞌabaꞌ Jesús an ten bic caj araꞌb ten yʌjmasir u tꞌʌn Cꞌuj tiꞌ María.
Raꞌ u qꞌuinin mʌꞌ toy yʌnʌc u parar uch.
Lucas 2.21-52
22 Caj tsꞌoc u nupꞌur u qꞌuinin an ten bic caj u tsꞌibtaj Moisés uch.
Raꞌ u qꞌuinin caj bin María quir u yesic u bʌj ʌcʌtan Cꞌuj ich carem naj an ten bic nanij cu betic u winiquirob judío,
yet binac José.
Rajen binob purbir Jesús ich u cajar Jerusalén quir u yesicob tiꞌ Cꞌuj ich carem naj tu cu naj cꞌujinticob Cꞌuj u winiquirob judío soc Cꞌuj yʌnin tiꞌ.
23 Caj binob quir u nupꞌur u tꞌʌn a tu tsꞌibtaj Moisés uch.
Caj yaꞌaraj:
“A mac a yʌn batꞌan rochic u parar xib yʌn u bin u tsꞌic chan och tiꞌ Jaj Tsꞌurir soc rajiꞌ yʌnin.”
24 Caj binob José yejer María quir u tsꞌic tiꞌ Cꞌuj a baxuc caj u toc araj Moisés uch,
caj yaꞌaraj:
“Yʌn a tsꞌic caꞌtur susuy wa mʌnaꞌ,
yʌn a tsꞌic caꞌtur chan tuch.
Rajiꞌ yʌn u quinsic sacerdote quir u toquic tiꞌ Cꞌuj.”
Baxuc caj yaꞌaraj Moisés uch.
25 Raꞌ u qꞌuinin caj bin María yejer José tiꞌ cʌjaꞌan ich u cajar Jerusalén,
tuririꞌ xib Simeón u cꞌabaꞌ.
Rajiꞌ jach tsoy yor,
cu jach cꞌujintic Cꞌuj.
Caj u quiꞌ paj u qꞌuinin ber caꞌ bin tac a mac a cu bin tuchiꞌbir ten Cꞌuj quir u quiꞌquintaꞌ yor u winiquirob israel.
Quireꞌ u Tajꞌor u Pixam Cꞌuj caj u pay ber Simeón.
26 Rajen esaꞌb ten u Tajꞌor u Pixam Cꞌuj tiꞌ Simeón:
“Mʌꞌ a quimin hasta ca wiric ta wich Cristo a mac Jaj Tsꞌur,
a mac tuchiꞌtaꞌb ten Cꞌuj.”
27 Simeón caj bin ich carem naj tu cu naj cꞌujinticob Cꞌuj u winiquirob judío,
quireꞌ pay u ber ten u Tajꞌor u Pixam Cꞌuj.
Baꞌiriꞌ cꞌuch José yejer María yejer u chan ochir María,
Jesús u cꞌabaꞌ.
An ten bic nanij u yesicob u winiquirob judío tiꞌ Cꞌuj ich carem naj,
rajen binob.
28 Simeón caj u nupꞌaj José yejer María,
caj chuc u chan ochir María ten Simeón.
Caj u tꞌʌnaj Cꞌuj Simeón:
Bayoꞌ Cꞌuj,
quij.
29 Jaj Tsꞌurir,
quij Simeón,
bajeꞌrer cꞌuchaꞌan in wor in quimin.
30 Quiꞌ in wor quireꞌ caj in wiraj a mac a caj a toc araj cu bin tar.
Caj in wiraj in wʌjtaquir an ten bic caj a waꞌaraj tiꞌ ten a mac a cu beyaj tech.
31 A jeꞌ chan ochaꞌ a quin rochic rajiꞌ caj a tetaj quir u taquic mac tu cotor.
Tu cotor cu bin yiric.
32 A jeꞌ chan ochaꞌ,
jeꞌ u sasiquintic tiꞌ mac cax a mʌꞌ u winiquirob judío soc yerob bic tabar cu bin tacbir.
U winiquirob judío cu bin sʌjtaꞌbir ten tu cotor mac quireꞌ tiꞌ u tar tiꞌob a mac cu bin u taquic tiꞌob.
33 José yejer María u nʌꞌ Jesús caj jaqꞌuij yorob quireꞌ yubarob yaꞌaric Simeón tiꞌ chan ochir.
34 Simeón caj yaꞌaraj:
―Caꞌ u yamtej techex Cꞌuj.
Caj araꞌb tiꞌ María ten Simeón:
―Ca bin a mucꞌyaj María irej wa rambirech yejer chan mascab quireꞌ a baꞌ cu bin tar tiꞌ a parar.
Yaꞌab u winiquirob israel cu bin satʌrob quireꞌ mʌꞌ tu quibob a parar tech.
Chen yaꞌab cu bin u cuxtar munt qꞌuin quireꞌ caj u quibob tiꞌ.
Yaꞌab mac cu bin u nunquicob u tꞌʌn
35 soc u jocꞌar a baꞌ cu muc u tucricob tu yorob.
Baxuc tetaꞌb ten Cꞌuj uch ―baxuc caj araꞌb ten Simeón.
36 Tiꞌ yʌn u jer xquic ich carem naj tu cu naj cꞌujinticob Cꞌuj u winiquirob judío,
raꞌ u cꞌabaꞌ Ana,
rajiꞌ u cꞌabaꞌ u tet,
Fanuel.
Ana,
rajiꞌ u jach ʌj tseqꞌuir u tꞌʌn Cꞌuj.
Rajiꞌ yoꞌnen Aser.
Jach uch chꞌijic.
Tan tu xur u baquer Ana caj raqꞌuintaꞌb ten u mam caj tsꞌoc u man siete yaxqꞌuin caj quim u mam.
U beririꞌ mʌnaꞌ u mam,
quim u mam.
37 Bajeꞌrer yʌn ochenta y cuatro yaxqꞌuin,
mʌnaꞌ u mam.
Rajraꞌ tiꞌ yʌn Ana ich carem naj.
Rajraꞌ caj u cꞌujintaj Cꞌuj caj u tꞌʌnaj Cꞌuj tiꞌ u racꞌob.
Suꞌ suꞌ caj u jamach pꞌʌtaj u janʌn soc u quiꞌ cꞌujintic Cꞌuj.
38 Ana caj cꞌuchij ich carem naj raꞌ u qꞌuinin tiꞌ yʌn Simeón tan u tsicbarob yejer José yejer María.
Caj tsꞌoc yiric u chan ochir María caj u tꞌʌnaj Cꞌuj caj yaꞌaraj:
―Bayoꞌ Cꞌuj quireꞌ caj in wiraj chan ochir.
Ana caj tsicbanʌj yejer u racꞌob bic tabar u chan ochir María.
Caj yaꞌaraj tiꞌ a mac tan u pajicob u tar Cristo ich u cajar Jerusalén.
Ana caj u tsicbʌtaj tiꞌob tiꞌ Cristo.
Baxuc caj araꞌb ten Ana.
Caj wʌcꞌʌs sutnʌj ich u cajar Nazaret
39 Raꞌ tsꞌoc u nupꞌsicob a baꞌ yaꞌaraj ich u tꞌʌn Moisés.
Caj wʌcꞌʌs sutnʌjob José yejer María ich u cajar Nazaret quireꞌ raꞌ u jach cajar.
Tiꞌ yʌn tu ruꞌumin Galilea.
40 Tiꞌ yʌnob ich u cajar Nazaret caj chꞌijij u parar.
Caj u jach chichtar u mucꞌ.
U neꞌer yaꞌaric tu cotor baꞌ.
Cꞌuj caj u quiꞌ cʌnantaj chan Jesús xan.
Caj cꞌuchij chan Jesús ich carem naj tu cu naj cꞌujinticob Cꞌuj u winiquirob judío
41 An bic nanij u bin José yejer María cu yocar yaxqꞌuin cu bin ich u cajar Jerusalén,
cu cꞌuchur tu qꞌuinin u quiꞌquiꞌ janʌnob u winiquirob judío.
Raꞌ u qꞌuinin cu cꞌʌꞌoticob tu caj u potmastaj yʌjmasir u tꞌʌn Cꞌuj uch.
42 Rajen caj cꞌuchij tiꞌ doce u yaxqꞌuinin tiꞌ Jesús yet binacob u nʌꞌ yejer José ich u cajar Jerusalén an ten bic nanij cu binob José yejer María quir u binob.
43 Caj tsꞌoc u quiꞌquiꞌ janʌnob caj sutnʌjob José yejer María.
Tiriꞌ toc pꞌat Jesús ich u cajar Jerusalén.
Mʌꞌ yerob u nʌꞌ wa tar bin Jesús yejer u racꞌob pʌybej.
Mʌꞌ yerob pꞌat tu junan ich u cajar Jerusalén.
44 Cu tucricob tan u tar ich a pimoꞌ a yet binacob,
tu masajob tuririꞌ u qꞌuinin ich bej.
Caj binob cʌxtaꞌbir Jesús ich u racꞌob bayiriꞌ ich u bʌjob.
45 Mʌꞌ yirob rajen wʌcꞌʌs caꞌ sutnʌjob u cʌxtej ich u cajar Jerusalén.
46 Caj cꞌuchob ich Jerusalén caj u cʌxtajob,
tres u qꞌuinin tan u cʌxtaꞌ Jesús.
Tres u qꞌuinin caj ir Jesús.
Tiꞌ yʌn ich carem naj caj irir curucbar yejer yʌjcamsʌyʌjirob u tꞌʌn Moisés.
Caj yubaj u tsicbarob.
Caj u cꞌataj Jesús a baꞌ cu camsicob yʌjcamsʌyʌjirob.
47 Jacꞌaꞌan yorob yʌjcamsʌyʌjirob u tꞌʌn Moisés quireꞌ yubicob quet u nunquic Jesús a baꞌ cu cꞌataꞌ tiꞌ quireꞌ yer u nuncaꞌr Jesús.
48 Caj irir ten José tiꞌ yʌn Jesús ich u yʌjcamsʌyʌjirob u tꞌʌn Moisés caj jaqꞌuij yorob u nʌꞌ yejer José.
U nʌꞌ caj yaꞌaraj:
―In pararech,
biquinin caj a betaj toꞌon aroꞌ?
Mʌꞌ wa ja toc er jeꞌ in wacꞌtiquech yejer a tet?
49 Caj yaꞌaraj Jesús:
―Biquinin caj tarechex a cʌxtenex?
A werex a tenoꞌ yʌn in bin in betej a caj u yaꞌaraj ten in Tet Cꞌuj,
rajen teꞌ yʌnenaꞌ.
50 Robob mʌꞌ ju najticob baꞌ caj u yaꞌaraj Jesús tiꞌ u nʌꞌ yejer u tet.
51 Quet caj wʌcꞌʌs sutnʌjob ich u cajar Nazaret.
Caj u quibaj u tʌn u nʌꞌ Jesús quet u quibic u tꞌʌn José.
María caj u caj tucraj ich yor a baꞌ caj u yaꞌaraj Jesús tiꞌob.
52 A Jesúsoꞌ caj u jach ne quiꞌ cʌnaj quireꞌ tan u jach ne chꞌijir quireꞌ yajquintaꞌb ten Cꞌuj.
Bayiriꞌ u racꞌob yajquintaꞌb Jesús.