2 A Pilatojeꞌ caj u cꞌataj tiꞌ:

―Taj wa ju reyech u winiquirob judío?

Caj u nuncaj rajiꞌ,

cu yaꞌaric tiꞌ:

―Baxuc ca waꞌariquen,

a tenoꞌ u reyen u winiquirob judío.

3 U jach tsꞌurirob sacerdote,

yaꞌab caj u tocob u joꞌr Jesús.

4 A Pilatojeꞌ,

caj u wʌcꞌʌs cꞌataj tiꞌ,

cu yaꞌaric:

―Biquinin mʌꞌ a cꞌʌs nunquic u taquicob a joꞌr quireꞌ jach yaꞌab tan u taquicob a joꞌr?

5 Jesús mʌꞌ u cꞌʌs nuncaj chichin,

rajen jach jaqꞌuij yor Pilato.

6 Toc beriꞌ cu siptic mac tub mʌcaꞌan caꞌ bin cꞌuchuc tu qꞌuinin u quiꞌ quiꞌ janʌnob u winiquirob judío,

u qꞌuinin tu potmastaj yʌjmasir u tꞌʌn Cꞌuj uch.

Mʌꞌ ja wirej,

a gobernadoroꞌ cu bin u siptic a mac mʌcaꞌan a cu cꞌataꞌ tiꞌ ten u winiquirob judío.

7 A ray u qꞌuininoꞌ tiꞌ mʌcaꞌan mac jach cꞌas.

Raꞌ u cꞌabaꞌ Barrabás,

rajiꞌ cꞌʌraꞌan yejer u yet ricꞌs ʌjbaꞌteꞌob,

mac u quinsmʌnob winic tu tu ricꞌsajob baꞌteꞌ uch.

8 Raꞌ u quinin,

tiꞌ cu tarob a yaꞌab macob u winiquirob judío,

quir u muchꞌquinticob u bʌj ich Pilato,

caj u yʌnxchun u cꞌaticob caꞌ u betej an ten bic cu naj betaꞌr tiꞌobeꞌ.

9 Pilato tuneꞌ,

caj u nuncaj tiꞌob,

cu yaꞌaric:

―A mac a cꞌat in siptiquex techex?

Arex ten caꞌ in siptej tiꞌ techex u rey u winiquirob judío?

10 Mʌꞌ ja wirej,

Pilato yer qꞌuex yorob u jach tsꞌurirob sacerdote,

rajen cꞌubob Jesús ten u jach tsꞌurirob sacerdote u winiquirob judío.

11 Barej u jach tsꞌurirob sacerdote u winiquirob judío caj u pꞌusaj u yorob a yaꞌab macob quir u chaꞌbʌr tiꞌob Barrabás,

cax mʌꞌ u chaꞌbʌr Jesús.

12 Jeroj tuneꞌ,

caj u nuncaj Pilato,

caj u wʌcꞌʌs aꞌaraj tiꞌob:

―Baꞌ a cꞌatex caꞌ in betej tiꞌ a mac a ca waꞌariquex u rey u winiquirob judíojoꞌ?

13 Robob a pim macob,

caj u cꞌamquintajob tꞌʌnob tiꞌ tu caꞌten:

―Arej tiꞌ caꞌ xic sinbir ich cruz.

14 Barej Pilato caj u yaꞌaraj tiꞌob:

―Biquinin cu bin sinbir ich cruz quireꞌ mʌnaꞌ cꞌas caj u betaj?

Caj chen cꞌamquintaj u tꞌʌnob a pimoꞌ:

―Arej caꞌ sinic ich cruz.

15 A Pilatojeꞌ,

quireꞌ u cꞌat u quiꞌquintic u yorob a pimoꞌ,

rajen caj u chaꞌj u bin Barrabás.

Caj tsꞌoc u jʌtsꞌicob u pach Jesúseꞌ,

caj u cꞌuꞌsaj caꞌ quinsac tu cruz.

16 A soldadojoꞌ tuneꞌ,

caj acsaꞌb Jesús ich palacio gobernador,

tu reꞌaꞌan naj.

Caj u tꞌʌnajob u muchꞌquinticob u bʌj tu cotor u yet soldadojob gobernador.

17 Caj pit u nocꞌ Jesús ten soldadojoꞌ,

caj tsꞌaꞌb u buquintej chʌc nocꞌ Jesús.

Caj jitꞌob a qꞌuiꞌixer u caꞌoꞌ quir u tsꞌaꞌbʌr u pꞌoquintej Jesús qꞌuiꞌix.

18 Jeroj tuneꞌ,

caj chinrajob ʌcʌtan tiꞌ Jesús ten a soldadojoꞌ,

caj u tus tꞌʌnajob an ten bic cu naj tꞌʌnicob rey cu yaꞌaricob:

―In cꞌatob caꞌ cuxraquech munt qꞌuin u reyech u winiquirob judío.

19 Caj u cꞌocꞌojʌtsꞌtajob tu joꞌr Jesús yejer jʌrʌr,

caj u tubob u wich.

Tiꞌ rʌc xonrʌjob ich ʌcʌtan Jesús an ten bic cu xontarob ich rey cu tus esicob u sʌjticob tiꞌ.

20 Barej caj tsꞌoc u pꞌasticobeꞌ,

caj u pitajob a chʌc noqꞌueꞌ,

a tu tus tsꞌajob sam tiꞌeꞌ caj u buquintajob u wʌcꞌʌs nocꞌ caj u jocꞌsajob quir u quinsaꞌr tu cruz.

21 A ucheꞌ caj u man taroꞌ tuririꞌ xib,

u cꞌabaꞌ Simón,

u tet Alejandro yejer Rufo.

A Simónoꞌ caj tar tu ruꞌumin Cirene uch.

Cu yuꞌur tu cor caj tsꞌar u pach quir u cꞌoꞌochic u cruz Jesús tu cu bin bʌjbir.

22 Caj u pʌyajob Jesús tu chan witsir u cꞌabaꞌ Gólgota,

u cꞌat yaꞌaric:

U Cuchir U Baquer U Joꞌr.

23 Caj u tumtaj caꞌ tsꞌabʌc u cꞌab u wich uva u yuqꞌuej,

aroꞌ xacaꞌan u tsꞌac mirra,

barej rajiꞌeꞌ mʌꞌ tu yucꞌajiꞌ.

24 Jeroj tuneꞌ,

caj tsꞌoc u bajʌr Jesús ten soldadojob caj u jʌsajob u nocꞌ Jesús caj u chictajob chan tunich quir yiric mac cu bin u chꞌic u nocꞌ Jesús.

Soc yerob baꞌ cu bin chꞌic jujunturob.

25 Caꞌanan u qꞌuinin,

jach jatsꞌcab caj u sinajob tu cruz.

26 Tsꞌibtaꞌb ich cꞌʌs chumuc u joꞌr u cruz Jesús,

irej wa ju cuchir tsꞌib quir yiric baꞌ u siꞌpir.

Caj u tsꞌibtaj:

“A jeꞌ xibaꞌ Jesús,

u rey u winiquirob judío.”

27 Caj u sinajob tu cruz yejer rajiꞌ caꞌtur xib,

a cu yaꞌcricob baꞌ.

Caj baj ten soldado.

Tuririꞌ tu noj Jesús,

tuririꞌ tu tsꞌic xan Jesús.

28 Rajen toc nupꞌaꞌan a baꞌ tsꞌibaꞌan ich u tꞌʌn Cꞌuj a cu yaꞌaric:

“Caj u tucrajob wa rajiꞌ pꞌeriꞌ yejer a mac a yʌn u siꞌpirobeꞌ.”

29 A macob a cu manob ucheꞌ taroꞌ,

caj u pꞌastajob,

caj u chictob u joꞌr an bic cu naj pꞌasticob mac,

tan yaꞌaricob:

―A techoꞌ ca waꞌaric jeꞌ a jubsic carem naj,

ca waꞌaric mʌnaꞌ u nup u qꞌuinin a wʌcꞌʌs tsꞌʌpquintej u jer carem naj.

30 Tac a bʌj ich a cruz,

wʌcꞌʌs emen ta cruz.

31 Tiꞌ yʌnob xan,

caj u pꞌastob Jesús u jach tsꞌurirob,

cu pacran yaꞌaricob,

quet yejer yʌjcamsʌyʌjirob u tꞌʌn Moisés:

―A ray xiboꞌ,

chen u jer cu taquic,

u bʌjiriꞌ mʌꞌ cꞌuchaꞌan u mucꞌ u wʌcꞌʌs taquic u bʌjiꞌ.

32 Caꞌ ij quirex wa rajiꞌ Cristo,

a mac tuchiꞌtaꞌb ten Cꞌuj,

u rey u winiquirob Israel.

Caꞌ emac tu cruz bajeꞌrer,

caꞌ in wirejob soc caꞌ in wacsejob tin worob tiꞌ.

Baxuc xan,

u yet bʌjaꞌan winiquirob caj u pꞌastajob tiꞌ.

33 Caj cꞌuchij cꞌacꞌchun qꞌuin caj acꞌbirchʌjij ich yocꞌocab tac u man mʌnaꞌ u nup horas.

34 Tabar u cꞌuchur a mʌnaꞌ u nup horasoꞌ caj cꞌam tꞌʌnʌj Jesús caj awʌtnʌjij,

caj yaꞌaraj:

―Eloi,

Eloi,

lama sabactani?

―u cꞌat yaꞌaric:

In Cꞌujech,

in Cꞌujech,

biquinin ca pꞌʌtiquen tin junan?

35 Barej caj uꞌyab ten jun yarob a mac a tiꞌ yʌnob tiꞌ taroꞌ,

caj u yaꞌarob:

―Uꞌyex baꞌ cu yaꞌaric.

Cu tꞌʌnic Elías,

yʌjtsequir u tꞌʌn Cꞌuj.

36 Caj u cꞌʌnaj yacab tuririꞌ tu yʌn yaꞌarir a pʌj u cꞌab u wich uva,

caj u tsꞌʌmaj u noqꞌuir quir u tsꞌutsꞌic yaꞌarir a pʌj u cꞌab u wich uvajoꞌ.

Caj u chucaj caj u tʌcaj tu cheꞌer jʌrʌr quir u nacsic u tsꞌa tiꞌ yuqꞌuej.

Caj u tsꞌaj u yuqꞌuej caj yaꞌaraj:

―Pajoꞌonex,

caꞌ ij quirex wa cu bin tar Elías,

caꞌ u yensej tu cruz Jesús.

37 Barej Jesús caj cꞌam tꞌʌnaj,

caj u putaj yicꞌ,

caj quimij.

38 U nocꞌ a tꞌinaꞌanoꞌ ich carem naj tu cu naj cꞌujinticob Cꞌuj u winiquirob judío,

a cu jʌsic jun xotꞌ naj tu cu bin u waꞌquic u qꞌuiqꞌuer yʌrʌcꞌ soc u rucꞌsic u siꞌpirob mac.

Raꞌ u noqꞌuir seb caj jat chumuc.

Caj u yʌnxchun u jatʌr caꞌanan tac u cꞌuchur u jatʌr ich u xax u noqꞌuir.

39 U jach tsꞌurir cien soldadojob u winiquirob romano,

a tiꞌ yʌn uch ʌcʌtan ich Jesús,

caj u yiraj tsꞌoc u quimin an ten bic a jeraꞌ,

caj u yaꞌaraj:

―A jeꞌ xibaꞌ jach taj u parar Cꞌuj.

40 Baxuc xan,

tiꞌ yʌnob jun yarob xquicob,

cꞌʌs nach cu pʌcticob Jesús a ray xquicob.

Tiꞌ yʌnob María,

raꞌ cʌjaꞌan tu cajar Magadalena,

tiꞌ yʌn María u nʌꞌ Jacobo a chichanoꞌ,

yejer José,

tiꞌ yʌn xan Salomé.

41 Raꞌ yet manacob yejer Jesús caj tarob tu pach Jesús.

Caj tarob tu pach Jesús caj u pꞌʌtaj u ruꞌumin Galilea.

Quireꞌ tiꞌ yʌn ich u ruꞌumin Galilea.

Robob caj u yamtajob Jesús,

tiꞌ yʌn u jer yaꞌab xquicob caj binob uch tu cajar Jerusalén yejer Jesús.

42 Barej caj acꞌbirchʌjij,

rajiꞌ u qꞌuinin cu pac muchꞌquinticob yoꞌoch quir u quiꞌ quiꞌ janʌnob.

Mʌꞌ ja wirej,

saman u qꞌuinin u jesicob u bʌj u winiquirob judío.

43 Caj tarij José,

tiꞌ cu tar ich u cajar Arimatea,

rajiꞌ tuririꞌ ich tu cotor u jach tsꞌurirob u winiquirob judío,

a mac tsoy yor,

ich u jach tsꞌurirob u winiquirob judío.

Rajiꞌ xan,

cu pajic u qꞌuinin tu cu bin u reyinticob Cꞌuj.

Caj u chichquintaj u yor quir u bin ich ʌcʌtan Pilato quir u cꞌatic u baquer Jesús quir u butꞌic tu japnin tunich José.

44 Jacꞌ yor Pilato,

quireꞌ toc quimij Jesús,

caj u tuchiꞌtaj tꞌʌnbir u jach tsꞌurir cien soldadojob u winiquirob romano,

caj u cꞌataj tiꞌ wa taj toc quimij Jesús.

45 Barej caj u yubaj tu chiꞌ tu jach tsꞌurir cien soldadojob u winiquirob romano,

caj yubaj yaꞌaric wa quimij Jesús tu tsꞌaj u baquer tiꞌ José.

46 Rajiꞌeꞌ caj u mʌnaj tuririꞌ sʌc nocꞌ,

lino u cꞌabaꞌ a sʌc noqꞌueꞌ,

caj tsꞌoc u yensic u baquer caj u tapaj yejer a sʌc noqꞌueꞌ,

caj bin u butꞌej ich japnin tunich,

raꞌ toc betaꞌb u japnin uch tiꞌ tunich.

Jeroj tuneꞌ,

caj u bʌcꞌʌstaj tuririꞌ tunich tu jor u japnin tunich quir u quiꞌ peꞌcheꞌtic.

47 María a cu tar tu cajar Magdalena yejer María u nʌꞌ José ucheꞌ,

caj u pʌctob tu bin tꞌajbir u baquer Jesús.