Jesús caj cꞌub tiꞌ Pilato
27
Caj sasij.
Tu cotor u jach tsꞌurirob sacerdote yejer u jach tsꞌurirob u cajar u winiquirob judío a cu yaꞌaric a Nuxiboꞌ,
caj u tucrob bic tabar cu bin u quinsic Jesús.
2 Caj cꞌax u cꞌʌb Jesús caj tar purbir ich Poncio Pilato rajiꞌ gobernador.
Caj quim Judas
3 Judas caj yiraj bin u caꞌ quinsbir Jesús,
yer rajiꞌ caj u cꞌubaj,
caj u tucraj ich yor:
“Jach cꞌasen.”
Caj bin u wʌcꞌʌs sutbir u taqꞌuin,
treinta sʌc taqꞌuin.
Caj u tsꞌaj tiꞌ u jach tsꞌurirob sacerdote yejer u tsꞌurirob u cajar u winiquirob judío a cu yaꞌaric a Nuxiboꞌ.
4 Judas caj yaꞌaraj tiꞌob:
―A tenoꞌ,
yʌn in siꞌpir ―quij―.
Mʌꞌ ja wirej,
caj in cꞌubaj Jesús caꞌ quinsac,
cax mʌnaꞌ baꞌ caj u betaj.
Caj u nuncajob u racꞌob:
―Baꞌwir toꞌon caꞌ ic tucrej,
quireꞌ raꞌ a beyaj tech.
5 Caj u pichꞌintaj taqꞌuin Judas ich carem naj ʌcʌtan tiꞌob.
Caj bin Judas caj u jichꞌ u cꞌoꞌoch.
6 U jach tsꞌurir sacerdote caj u chꞌichꞌaꞌb u taqꞌuin.
Caj yaꞌarajob:
―Mʌꞌ tsoy ic butꞌic a jeꞌ taqꞌuinaꞌ ich u copre taqꞌuin carem naj,
quireꞌ raꞌ u boꞌorir u quinsaꞌ.
7 Seb caj u tucrajob u mʌnicob u ruꞌumin quir u muquic u baquer a mac quimin,
a nach u tar.
Rajiꞌ u cay taqꞌuin Judas uch.
Caj bin u mʌnej u ruꞌumin u cꞌabaꞌ u ruꞌumin,
Tu Cu Pʌtic Pac.
8 Raꞌ u qꞌuininoꞌ,
caj u cꞌaxob u cꞌabaꞌ u ruꞌumin.
Caj u pʌchaj u cꞌabaꞌ,
U Ruꞌumin U Qꞌuiqꞌuer.
Quireꞌ u cay taqꞌuin Judas tu mʌnob u ruꞌumin.
9 A baywoꞌ,
caj nuꞌpsaj u tꞌʌn Jeremías yʌjtseqꞌuir u tꞌʌn Cꞌuj.
Caj yaꞌaraj uch:
“U winiquirob israel,
caj u toc araj baxuc cu bin u boꞌotic quir u cꞌubur tiꞌ,
treinta sʌc taqꞌuin
10 cu bin u boꞌotej.
Yejer u sʌc taqꞌuin caj u mʌnob u ruꞌumin a mac cu pʌtic pac.
An ten bic caj u toc araj Jaj Tsꞌur uch.”
Jesús ʌcʌtan tiꞌ gobernador Pilato
11 Jesús caj bin chꞌictar ʌcʌtan gobernador.
Caj cꞌataꞌb tiꞌ:
―Taj wa u reyech u winiquirob judío?
Jesús caj u nuncaj:
―Baxuc ca waꞌariquen,
a tenoꞌ,
u reyen u winiquirob judío?
12 U jach tsꞌurir sacerdote yejer u jach tsꞌurirob u cajar u winiquirob judío a cu yaꞌaric a Nuxiboꞌ,
caj tocob u joꞌr Jesús,
chen mʌꞌ u cꞌʌs nunquic.
13 Pilato caj yaꞌaraj tiꞌ Jesús:
―Biquinin mʌꞌ a cꞌʌs nunquic u taꞌquicob a joꞌr?
14 Jesús mʌꞌ ju cꞌʌs nuncaj chichin.
Rajen jach jaqꞌuij yor gobernador.
Pilato caj u tucraj tu yor caꞌ xic sinbir Jesús ich cruz
15 Toc beriꞌ cu siptic mac tu macaꞌan caꞌ bin cꞌuchur tu qꞌuinin u quiꞌquiꞌ janʌnob u winiquirob judío,
u qꞌuinin caj u potmastaj yʌjmasir u tꞌʌn Cꞌuj uch.
Gobernador cu bin u siptic a mac macaꞌan a cu cꞌataꞌ tiꞌ ten u winiquirob judío.
16 A raꞌ u qꞌuininoꞌ,
tiꞌ macaꞌan mac jach cꞌas.
Raꞌ u cꞌabaꞌ Barrabás.
17 Raꞌ u qꞌuinin tiꞌ muchꞌaꞌanob a pimob u winiquirob judío ich Pilato.
Pilato yer qꞌuex yorob u jach tsꞌurirob sacerdote.
Rajen caj u taꞌquob u joꞌr Jesús.
Caj u cꞌataj tiꞌ a pimoꞌ:
―A mac a cꞌat in siptic techex.
Arex ten wa Barrabás wa Jesús a ca waꞌariquex Cristo?
18 Tiꞌ toy yʌn Pilato tu cu taꞌquicob u joꞌr Jesús u tsꞌurirob sacerdote.
Caj tuchiꞌtaꞌb ten u racꞌ Pilato tiꞌ u mam.
Caj yaꞌaraj tiꞌ:
19 ―A ray xiboꞌ mʌꞌ tsoy a sinic ich cruz quireꞌ mʌnaꞌ u siꞌpir.
Baxuc caj in wʌyʌcꞌtaj acꞌbir caj u jacꞌsaj in wor.
Rajen wa ca sinic jach yaj cu bin u tar toꞌon.
20 Chen u jach tsꞌurirob sacerdote yejer u jach tsꞌurirob u cajar u winiquirob judío a cu yaꞌaric a Nuxiboꞌ,
cu cay cꞌaticob tiꞌ u racꞌob:
―Biquinin mʌꞌ a cꞌatex tiꞌ Pilato caꞌ u sinej Jesús ich cruz caꞌ siptac a Barrabásoꞌ?
Rajen u racꞌob caj u quibajob u tꞌʌn u jach tsꞌurirob yejer u jach tsꞌurirob u cajar u winiquirob judío a cu yaꞌaric a Nuxiboꞌ soc u sinic ich cruz Jesús.
Chen cu siptaꞌ Barrabás ten Pilato.
21 Pilato caj u wʌcꞌʌs cꞌataj tiꞌ a pimoꞌ:
―Mac a cꞌat in siptic techex.
Caj u rʌc nuncajob,
caj yaꞌaraj:
―Siptej Barrabás.
22 Pilato caj u cꞌataj:
―Bic in bin in betic tiꞌ Jesús a ca waꞌariquex Cristo?
Caj u rʌc nuncajob tiꞌ:
―Arej tiꞌ caꞌ xic sinbir ich cruz.
23 Pilato caj yaꞌaraj:
―Biquinin cu bin sinbir ich cruz quireꞌ mʌnaꞌ cꞌas caj u betaj?
Robob a jach pimoꞌ caj u purob yawʌt:
―Arej caꞌ sinic ich cruz.
24 Caj yiraj Pilato mʌꞌ ju cꞌuchur yor tiꞌ a pimoꞌ soc mʌꞌ u sinin Jesús ich cruz.
Chen a pimoꞌ cu jach cꞌamtar u tꞌʌn.
Rajen caj u tuchiꞌtaj mac caꞌ tac purbir jaꞌ quir u pꞌoꞌic u cꞌʌb Pilato ʌcʌtan pim soc yiricob mʌnaꞌ u siꞌpir Pilato.
Pilato caj yaꞌaraj tiꞌob:
―A jeꞌ xibaꞌ mʌnaꞌ u siꞌpir.
Rajen mʌꞌ in cꞌat u quimin.
Chen quin betic a baꞌ a cꞌatex ten.
25 Tu cotor a pimoꞌ caj u rʌc nuncaj:
―Arej caꞌ sinic ich cruz.
Tenob in siꞌpirob caꞌ xic sinbir Jesús.
Baxuc yʌn u siꞌpir in tiꞌarob.
26 Pilato caj u siptaj Barrabás caꞌ xic.
Caj yaꞌaraj tiꞌ soldado caꞌ jatsꞌʌc u pach Jesús.
Caꞌ bin tsꞌocac u jatsꞌʌr cu bin sinbir ich cruz.
27 U soldado gobernador caj acsaꞌb Jesús ich palacio gobernador.
Caj u rʌc muchꞌquintajob u bʌj u yet soldadojirob ich ʌcʌtan Jesús.
28 Caj pit u nocꞌ Jesús ten soldado.
Caj tsꞌaꞌb u buquintej chʌc nocꞌ Jesús.
29 Caj u jitꞌob a qꞌuixer u caꞌ quir u tsꞌaꞌb u pꞌoquintej Jesús qꞌuiꞌix.
Caj u chucajob oj caj tsꞌaꞌb u mʌchej tu noj Jesús.
Caj xonrʌjob ʌcʌtan ich Jesús ʌcʌtan ich Jesús quir u cheꞌtic Jesús.
Caj yaꞌarob:
―Caꞌ cuxraquech munt qꞌuin,
quireꞌ u reyech u winiquirob judío.
30 Caj tubaꞌb Jesús caj u chucaj cheꞌ aꞌ ju mʌchmʌn Jesús quir u jatsꞌʌr u joꞌr Jesús.
31 Caj tsꞌoc u pꞌastar Jesús ten soldado.
Caj pit u chʌc nocꞌ caꞌ wʌcꞌʌs tsꞌaꞌb u buquintej u noqꞌuirir Jesús.
Caj pay caꞌ xic bʌjbir ich cruz Jesús.
Caj sinij ich cruz Jesús
32 Caj binob Jesús ich bej,
caj u nupꞌajob xib tiꞌ u tar ich u cajar Cirene.
Raꞌ u cꞌabaꞌ Simón.
Caj tsꞌar u pach caꞌ cꞌochac u cruz Jesús tu cu bin bʌjbir.
33 Caj cꞌuchob tu chan witsir u cꞌabaꞌ Gólgota.
U cꞌat yaꞌaric u witsir u baquer u joꞌr,
quireꞌ bajen u baquer u joꞌr.
34 Tiꞌ tsꞌaꞌb yuqꞌuej Jesús u cꞌab uva xacaꞌan u cꞌaj bʌcꞌ.
Jesús caj u cay tumtaj,
chen mʌꞌ tu yucꞌaj.
35 Caj tsꞌoc u bajʌr Jesús ten soldado.
Caj u chictajob chan tunich quir yiric mac cu bin chꞌic u nocꞌ Jesús.
A baywoꞌ caj u chictajob chan tunich quir u nupꞌ u tꞌʌn yʌjtseqꞌuir u tꞌʌn Cꞌuj tu cu yaꞌaric:
―Rajiꞌob cu bin chicticob chan tunich quir yiric mac cu bin u chꞌic in nocꞌ.
36 Caj tsꞌoc u chꞌabʌr u nocꞌ Jesús tiꞌ toy curucbarob cʌnʌbir Jesús.
37 Tsꞌibtaꞌb ich u xur u joꞌr u cruz Jesús quir yirir baꞌ u siꞌpir.
Tu tsꞌibtaj:
“A jeꞌ xibaꞌ Jesús,
u rey u winiquirob judío.”
38 Bayiriꞌ xan,
a cu yaꞌcricob baꞌ caꞌtur caj baj ten soldado.
Tuririꞌ tu noj Jesús.
Tuririꞌ tu tsꞌic xan,
Jesús.
39 Quet yejer a cu manob ich Jesús tu bʌjaꞌan.
Cu chicticob u joꞌr quireꞌ cu pꞌasticob Jesús.
Caj u cheꞌjtajob.
40 Caj yaꞌarajob tiꞌ Jesús tu bʌjaꞌan:
―A techoꞌ,
ca waꞌaric jeꞌ a jubsic carem naj ca waꞌaric mʌnaꞌ u nup u qꞌuinin tsꞌoc a wʌcꞌʌs tsꞌʌpquintej u jer carem naj.
Tac a bʌj ich cruz caꞌ wʌcꞌʌs emaquech wa ju pararech Cꞌuj.
41 Ti yʌnob xan,
cu pꞌasticob Jesús u jach tsꞌurirob sacerdote,
bayiriꞌ u yʌjcamsʌyʌjirob u tꞌʌn Moisés,
yejer u winiquirob judío a fariseojoꞌ,
yejer u jach tsꞌurirob u cajar u winiquirob judío a cu yaꞌaric a Nuxiboꞌ.
42 Caj yaꞌarajob ich u racꞌob:
―A ray xiboꞌ,
chen u jer cu taquic.
U bʌjiriꞌ mʌꞌ cꞌuchaꞌan u mucꞌ u wʌcꞌʌs taquic u bʌj.
Wa taj u rey u winiquirob Israel biquinin mʌꞌ ju yemʌn ich cruz ij quirej soc ij cacsic tij cor u tꞌʌn.
43 U bʌjiriꞌ caj yaꞌaraj:
A tenoꞌ quin wacsic tin wor tiꞌ Cꞌuj.
Caꞌ ij quirej wa Cꞌuj cu tar u taquic wa cu yajquintaꞌr ten Cꞌuj,
quireꞌ caj u yaꞌaraj uch:
“U pararen Cꞌuj.”
44 Bayiriꞌ jujunturob u yʌjaꞌcrʌjyʌjirob baꞌ a bʌjaꞌan ich cruz xan.
Caj u pꞌastob Jesús.
Caj quimij Jesús
45 A ray u qꞌuininoꞌ,
caj toc rʌc acꞌbirchʌjij tu cotor u ruꞌumin.
Cꞌacꞌchunqꞌuin caj acꞌbirchʌjij,
hasta las tres caj sasichʌjij.
46 A ray u qꞌuininoꞌ,
a las tres,
caj cꞌam awʌtnʌjij Jesús,
caj yaꞌaraj:
―Elí,
Elí,
lama sabactani?
―u cꞌat yaꞌaric:
In Cꞌujech,
in Cꞌujech,
biquinin caj a toc pꞌʌtajen?
47 A mac tiꞌ yʌnob ich Jesús caj yubob yawʌt Jesús:
―Ta wuꞌyex baꞌ caj u yaꞌaraj a jeꞌ xibaꞌ?
Caj u tꞌʌnaj Elías yʌjtseqꞌuir u tꞌʌn Cꞌuj.
48 Tuririꞌ caj u cꞌʌnaj yacꞌab quir u chꞌic a irej nocꞌ,
chen irej tʌmʌn.
Caj u tꞌʌjaj ich u cꞌab uva a pʌjoꞌ.
Caj u ricꞌcheꞌtaj quir u tsꞌabʌr yuqꞌuej Jesús.
49 Chen u racꞌob a tiꞌ yʌnob caj yaꞌaraj:
―Tsireꞌej,
caꞌ ij quirej wa ju tar Elías ensbir Jesús.
50 A ray u qꞌuininoꞌ,
caj wʌcꞌʌs caꞌ awʌtnʌjij Jesús.
Jach cꞌam caj awʌtnʌjij,
caj quimij Jesús.
51 U nocꞌ a tꞌinaꞌan ich carem naj tu cu naj cꞌujinticob Cꞌuj u winiquirob judío.
A cu jʌsic junxotꞌ naj tu cu bin u waꞌquicob u qꞌuiqꞌuer yʌrʌcꞌ soc u rucꞌsic u siꞌpir mac.
Raꞌ u nocꞌ,
seb caj jat tu chumuquin.
Caj u yʌnxchun u jatʌr caꞌanan hasta cꞌuchij u jatʌr ich u xax u nocꞌ.
Baxuc xan,
caj pecnʌj u chꞌic yum ruꞌum caj wacꞌ u tunichir.
52 Caj rʌc wacꞌ tunich tu mucaꞌan u baquer a quimen,
a yacsmʌnob tu yorob.
Yaꞌab caj ricꞌsaꞌb quir u wʌcꞌʌs caꞌ cuxtar.
53 Caj tsꞌoc u riqꞌuir Jesús tiꞌ quimen caj jocꞌ a yacsmʌnob tu yorob tu mucaꞌan,
caj binob ich u cajar Jerusalén.
Raꞌ u cajar Cꞌuj.
Tiꞌ irir a cu wʌcꞌʌs riqꞌuir a yacsmʌnob tu yorob.
Tiꞌ irir ten u racꞌob a jach pimoꞌ.
54 Yʌjtꞌʌnir cien soldados yejer u winiquirob soldado romano a cu cʌnanticob Jaj Tsꞌur.
Caj jaqꞌuij yorob caj yubob u pec ruꞌum,
yejer a baꞌ u ber tiꞌ a quimenob.
Caj yaꞌarajob:
―A jeꞌ xibaꞌ u jach parar Cꞌuj.
55 A ti taroꞌ,
tiꞌ yʌn xquic yaꞌab,
nanach chꞌicaꞌanob.
Tan yiricob Jesús.
Raꞌ yet manob yejer Jesús,
caj tarob tu pach Jesús,
caj u pꞌʌtaj u ruꞌumin Galilea.
Robob caj u yamtajob Jesús.
56 A tu yʌn a xquicoꞌ,
tiꞌ yʌn María a cu tar ich u cajar Magdalena.
Tiꞌ yʌn u jer xquic u racꞌ Zebedeo.
Rajiꞌ a caꞌtur u parar.
Caj butꞌ u baquer Jesús ich u japnin tunich
57 Caj acꞌbirchʌjij caj tarij José.
Tiꞌ cu tar ich u cajar Arimatea.
Rajiꞌ jach yʌn u taqꞌuin.
Bayiriꞌ caj u yacsaj tu yor u tꞌʌn Jesús.
58 Caj bin ich Pilato José quir u cꞌataꞌr u baquer Jesús soc u butꞌic u baquer.
Pilato caj yaꞌaraj tiꞌ u winiquirob soldado caꞌ tsꞌaꞌbʌc tiꞌ José u baquer Jesús.
59 José caj bin chꞌabir u baquer Jesús.
Caj emsaꞌb ich cruz.
Caj u tapꞌaj u baquer Jesús yejer carem sʌc nocꞌ.
60 A Joséjoꞌ caj u butꞌaj u baquer Jesús tu japnin tunich,
a ricꞌbenoꞌ.
Mʌꞌ ja wirej,
José caj u betaj tiꞌ u bʌjiriꞌ uch.
Caj tsꞌoc u butꞌur u baquer Jesús caj u petsꞌtaꞌr u jor tunich tu butꞌ u baquer Jesús,
caj binij.
61 Tiꞌ toy yʌn María,
tiꞌ cu tar ich u cajar Magdalena.
U jer tiꞌ yʌn juntur María tiꞌ curaꞌan ʌcʌtan u jor tu butꞌaꞌan u baquer Jesús.
U winiquirob soldado romano a cu cʌnanticob tu butꞌaꞌn u baquer Jesús
62 Caj sasij raꞌ u qꞌuinin caj tsꞌoc u man viernes.
Raꞌ u qꞌuinin quir u jesicob u bʌj u winiquirob judío.
Caj cꞌuchij u jach tsꞌurirob sacerdote yejer u winiquirob judío a fariseojoꞌ,
caj binob irbir Pilato.
63 Caj cꞌuchob ich Pilato caj yaꞌarob tiꞌ:
―Ic gobernadorech,
caꞌ ij cꞌʌꞌotej a cu tusic mac.
A cu yaꞌaric:
“A caꞌ bin tsꞌocac u man mʌnaꞌ u nup u qꞌuinin jeꞌ in riqꞌuir tiꞌ in quimirir.”
64 Rajen quic tar ij quirej tech,
caꞌ a waꞌarej tiꞌ a winiquirob soldado romano,
caꞌ u quiꞌ cʌnantacob u baquer Jesús tu butꞌaꞌan.
Soc mʌꞌ u tar chꞌabir u baquer ten u camsʌwinicob acꞌbir.
Caꞌ bin u tus arob:
“Riqꞌuij tu quimirir.”
Aroꞌ jach manan cu bin u tusaricob tiꞌ mac,
a tu yʌn tusarob mʌꞌ jach cꞌasiꞌ.
65 Pilato caj yaꞌaraj tiꞌob:
―Tar yʌnoꞌ in winiquirob soldado romano.
Pʌyex caꞌ xicob cʌnanbir u baquer soc robob cu bin u cʌnantejob an ten bic a cꞌat techex.
66 Caj rʌc binob cʌnanbirob u baquer.
Caj cꞌuchob caj u pʌcꞌajob u jor soc mʌnaꞌ mac cꞌuchaꞌan yor u rʌquic u jor.
Caj pꞌat u winiquirob soldado romano quir u cʌnaticob.