Jesús cu camsic an bic xquic cu binob u quiꞌ quiꞌ janʌnob, a diez xquiqueꞌ
25
Jesús caj yaꞌaraj tiꞌ u camsʌwinicob:
―Raꞌ u qꞌuinin caꞌ bin tac u reyinticob Cꞌuj.
Cu bin tar tiꞌ u winiquirob an ten bic caj tuchiꞌtaj xquic quir u nupic a mac a cu bin u chꞌic u racꞌ.
Tuchiꞌtaꞌ xquic diez,
raꞌ u nupꞌ a cu bin u chꞌic u mam.
Caj u rʌc chꞌaꞌob u quibob.
2 Cinco xquic caj u chꞌajob u quib.
Mʌꞌ tu quiꞌ cʌnantajob u quib.
U jer cinco caj u quiꞌ cʌnantajob u quib.
3 A mac a tu quiꞌ cʌnantajob u quib,
caj u chꞌajob u chujir yaꞌarir u quib quir u tꞌajicob u jer yaꞌarir.
Toc chup yaꞌarir u quib caj u chꞌajob.
4 A mac a mʌꞌ tu quiꞌ cʌnantajob u quib a tu chꞌajob.
Mʌꞌ yaꞌab caj u chꞌajob yaꞌarir u quib.
Chen u quib caj u chꞌajob.
5 Quireꞌ omaꞌan caj cꞌuchij a cu bin u chꞌic u racꞌ,
rajen a xquicoꞌ,
caj tar u wenʌnob.
Caj cꞌʌs wenʌneb.
6 Caj yubob u tar chumuc acꞌbir.
Caj yubob yawʌt:
“Tan u tar a mac a cu bin u chꞌic u racꞌ.
Xenex caꞌ a nupex ich chumuc bej.”
7 Caj ricꞌob,
a xquicoꞌ,
caj u pustaj u tanin u joꞌr u quib caj u tꞌʌbajob.
8 A xquicoꞌ,
a cinco a mʌꞌ u quiꞌ cʌnanticob u quib,
caj yaꞌaraj tiꞌ u yet tꞌʌn:
“Jamach chuquej tenob yaꞌarir quib,
quireꞌ tan u tupꞌur tenob in quibob,
quireꞌ tan xupur yaꞌarir.”
9 A xquicoꞌ a caj u quiꞌ cʌnantajob yaꞌarir u quib.
Caj u nuncajob:
“Mʌꞌ jin tsꞌajob techex cʌrʌx xupuc tenob yaꞌarir.
Joqꞌuenex mʌnex yaꞌarir techex tu cu naj coꞌonan yaꞌarir.”
10 Caj binob u mʌnejob yaꞌarir u quib a cinco xquicoꞌ.
Caj cꞌuchij a mac a cu bin u chꞌic u racꞌ.
Caj ocob a tu quiꞌ cʌnantajob yaꞌarir u quib.
Caj ocob yejer a cu bin u chꞌic u racꞌ.
Caj u mʌcob u jor.
11 Sansam u mʌcob u jor,
caj cꞌuch a xquic a bin u mʌnejob u yaꞌarir u quib.
Caj u purob u tꞌʌn:
“Jach tsꞌurir ―quij―.
Jeꞌej in jor quir in wocarob.”
12 A mac a cu bin u chꞌic u racꞌ caj u nuncaj:
“Taj quin waꞌaric techex.
Mʌꞌ in wirmʌnechex,
rajen mʌꞌ in wacsiquechex.”
13 Caj tsꞌoc u camsaꞌrob a xquicoꞌ caj yaꞌaraj Jesús tiꞌ u camsʌwinicob:
―Cꞌʌꞌotex a jeraꞌ a caj in camsajechex soc a pajiquex in tar,
quireꞌ mʌꞌ a werex wa ber u qꞌuinin caꞌ bin taquen quir in yamtic mac tu cotor.
Jesús cu camsic bic tabar caj u pꞌʌtaj u taqꞌuin u cꞌurew u jach tsꞌurir soc u jaric u jer
14 ’U winiquir cu bin u jach tsꞌurintic Cꞌuj irob u cꞌurew jach tsꞌurir.
U jach tsꞌurir bin u caꞌ ich u jer ruꞌum.
Caj u rʌc muchꞌquintaj u cꞌurewirob quir u pꞌʌtic u taqꞌuin tiꞌob quir u caꞌ jaricob u jer u taqꞌuin.
15 ’Caj tsꞌaꞌb u taqꞌuin cinco mil ten u jach tsꞌurir tiꞌ u cꞌurew tuririꞌ.
U jer caj u caꞌ tsꞌaꞌb tiꞌ u cꞌurew dos mil.
U jer caj u caꞌ tsꞌaꞌb tiꞌ mil.
Caj tsꞌaꞌb u taqꞌuin an ten bic cꞌuchaꞌan yorob u cꞌurewirob tu beyajob.
Caj bin u tsꞌurirob nach.
16 A mac a caj u cꞌʌmaj u taqꞌuin cinco mil caj u cꞌʌnaj quir u caꞌ jaric u jer.
Caj u caꞌ jaraj u jer cinco mil tu cu beyaj.
17 A mac a tsꞌaꞌb tiꞌ dos mil caj u cꞌʌnaj.
Caꞌ u caꞌ jaraj u jer dos mil tu cu beyaj.
18 A mac a tsꞌaꞌb tiꞌ mil caj u taꞌcaj u taqꞌuin.
Caj u pan u jor u ruꞌum quir u muquic u taqꞌuin.
Caj u mucaj u taqꞌuin ich ruꞌum.
19 ’Jach yaꞌab u qꞌuinin caj ur jach tsꞌurir.
Caj u caꞌ muchꞌquintaj u cꞌurewob.
Caj cꞌataꞌb tiꞌob:
“Mun u taqꞌuinob.”
Caj u jarajob u taqꞌuinob.
20 Raꞌ yʌn cꞌuchij a tsꞌaꞌb tiꞌ cinco mil,
caj yaꞌaraj tiꞌ u jach tsꞌurir:
“Caj binech caj a tsꞌaja ten cinco mil quir in cꞌʌnic.
A tenoꞌ caj in jaraj u jer cinco mil tech tu quin beyaj.
Jeꞌ a taqꞌuin cinco mil yejer u jer cinco mil caj in jaraj.”
21 Caj yaꞌaraj u jach tsꞌur:
“Tsoyech in cꞌurewech.
Taj ta waꞌaraj ten.
Quiꞌ beyanʌjech.
Caj a jaraj a taqꞌuin,
cax mʌꞌ yaꞌab taqꞌuin,
caj in tsꞌaj tech.
A bajeꞌrer jeꞌ in caꞌ tsꞌic tech u jer jach yaꞌab.
Pꞌaten tin wicnʌn soc u quiꞌtar ij cor.”
22 Caj cꞌuchij a tsꞌaꞌb tiꞌ dos mil.
Caj yaꞌaraj tiꞌ u jach tsꞌurir:
“Caj binech caj a tsꞌajaj ten dos mil quir in cꞌʌnic.
U jer caj in caꞌ jaraj tech.
Yʌn ten u jer dos mil.
A jeꞌ a dos mil a caj a tsꞌajaj ten.
Caj bin yejer u jer a caj in jaraj tech.”
23 Caj yaꞌaraj u jach tsꞌurir:
“Tsoyech in cꞌurewech.
Jach taj ca waꞌaric ten.
Quiꞌ beyanʌjech caj a jaraj in taqꞌuin,
cax mʌꞌ yaꞌab taqꞌuin,
caj in tsꞌa tech.
A bajeꞌrer jeꞌ in caꞌ tsꞌic tech a taqꞌuin jach yaꞌab.
Pꞌaten tin wicnʌn soc u quiꞌtar ij cor.”
24 Caj cꞌuchij a tsꞌaꞌb tiꞌ turiꞌ mil caj yaꞌaraj tiꞌ u jach tsꞌurir:
“Jach tsꞌurir,
quij.
In wer jach tsꞌuꞌtech ca nejaric a taqꞌuin tu ca cꞌʌnic.
Rajen jach manan ca jaric a taqꞌuin.
25 Rajen mʌꞌ jin cꞌʌnaj a taqꞌuin quireꞌ caj in chꞌaj sajquir.
Rajen caj in chen panaj u jor u ruꞌumin quir in muquic a taqꞌuin.
Jeraꞌ tech a taqꞌuin.”
26 U jach tsꞌurir caj u nuncaj tiꞌ u cꞌurew:
“Jach cꞌasech mʌꞌ jach cꞌorech.
A wer jach tsꞌuꞌten caꞌ in nejaric in taqꞌuin tu quin cꞌʌnic.
Rajen jach manan yaꞌab quin jaric in taqꞌuin.
27 Biquinin mʌꞌ binech a butꞌej in taqꞌuin ich u najitaqꞌuin soc in chʌc jaric u jer in taqꞌuin.
Caꞌ bin uruquen ca chʌc tsꞌic ten in taqꞌuin yejer u jer caj a jaraj ich u najitaqꞌuin?”
28 U jach tsꞌurir caj yaꞌaraj tiꞌ mac tiꞌ yʌnob:
“A mun yʌn tiꞌ,
chꞌa,
a tsꞌa u taqꞌuin a mac yʌn tiꞌ diez mil.
29 A baxucoꞌ cu tar tiꞌ winic xan.
A mac yʌn tiꞌ jach yaꞌab u taqꞌuin.
Jeꞌ u tꞌajʌr u baꞌtac hasta jach yaꞌab u baꞌtac.
Chen a mac mʌꞌ yaꞌab u taqꞌuin jeꞌ u tocar tiꞌ,
cax mʌꞌ yaꞌab yʌn tiꞌ.”
30 Caj yaꞌaraj u jach tsꞌurir tiꞌ u cꞌurew:
“Chuquex a purex a jeꞌ in cꞌurewaꞌ.
Jocꞌsex a pichꞌintex ich tancab tu acꞌbir.”
Baxuc cu bin u betic tiꞌ a mac jach cꞌas,
tiꞌ cu bin ocarob tu cu bin mucꞌyajob ich cꞌacꞌ.
Tiꞌ cu bin u yacꞌticob u bʌj.
Tiꞌ cu bin u chiꞌic u yacꞌob ich cꞌacꞌ quireꞌ mucꞌyaj u caꞌob.
Jeꞌ u cꞌuchur tu qꞌuinin cu rʌc bin ʌcʌtan ich Cꞌuj
31 Caj yaꞌaraj Jesús tiꞌ u camsʌwinicob:
―Caꞌ bin taquen a tenoꞌ a mac tar quir in yamtic mac tu cotor.
Quin tar in reyintic tu cotor mac.
In wet tar yʌjmasirob u tꞌʌn Cꞌuj yejer u sasirir Cꞌuj xan.
Tiꞌ quin bin in cutar tu cu naj cutar rey quir in wiric a mac tsoy wa mʌꞌ tsoyiꞌ.
32 Tiꞌ cu bin u muchꞌquinticob u bʌj tu cotor mac wa tiꞌ cu tar ich u jer ruꞌum.
Tiꞌ cu bin u rʌc muchꞌquinticob u bʌj ʌcʌtan ten ―quij Jesús―.
U tiriꞌ quin bin in jʌsic irij a mac yʌn yʌrʌcꞌ tʌmʌn yuc cu jʌsic yejer yʌrʌcꞌ chivo.
Jujuntur tiꞌ quin bin in jʌsic hasta caj in rʌc jʌsaj tu cotor mac.
33 A mac cu jach man tu tsoyir tiꞌ quin bin in jʌsej ich in noꞌj.
Wa mac cu man tu cꞌasir tiꞌ quin bin in jʌsic tin tsꞌic.
34 A tenoꞌ ―quij Jesús―,
quin bin in waꞌaric a mac tiꞌ yʌnob tin noꞌj:
“Jeꞌ in quiꞌ acsiquechex tu cu bin u reyintic Cꞌuj,
quireꞌ Cꞌuj caj u betaj tsoy tiꞌ techex.
Cax mʌꞌ toy betaj teꞌ ich yocꞌocab Cꞌuj caj u toc betaj u cuchir quir u yacsiquechex ich caꞌanan a mac a caj u yacsajob tu yorob tiꞌ.
35 Mʌꞌ ja wirej,
tsoy in wacsiquechex.
Mʌꞌ ja wirej,
caj wichʌjen uch caj a tsꞌaj in woꞌoch.
Caj ucꞌchʌjen caj a tsꞌaj in wucꞌur.
Caj a wacsajenex quireꞌ mʌnaꞌ in way tu quin wenen.
36 Caj a wirajex mʌnaꞌ in nocꞌ caj a sijex ten in buquintej.
Caj a wirex yajen caj tarechex a wirenex.
Caj a wirenex mʌcaꞌanen caj tarechex a wirenex.”
37 Robob cu bin yaꞌaric:
“Jaj ix tʌcoj ic Jaj Tsꞌurirex.
A tenob quireꞌ mʌꞌ tin jansajob tech.
Mʌꞌ tin tsꞌajob quir a wucꞌur.
Mʌꞌ tin wacsajob tech quireꞌ mʌnaꞌ a way.
Mʌꞌ tin yamtajob tech a baywoꞌ.
38 A tenob mʌꞌ tin wacsajob tech mʌꞌ tin tsꞌajob tech a nocꞌ quir a buquintic.
39 Caj yajijech mʌꞌ tarenob in wirechob.
Tiꞌ mʌcaꞌanech xan mʌꞌ tarenob in wirechob.”
40 A tenoꞌ quin bin in nunquic techex:
“Jach taj quin waꞌaric techex quireꞌ caj a yamtajex a mac a caj u yacsajob tu yorob in tꞌʌn cax ca wiric irej moso quet tan a yamtiquenex.”
41 ’A tenoꞌ quin bin in waꞌaric tiꞌ a mac a tiꞌ yʌnob tin tsꞌic:
A techex satʌrechex.
Joqꞌuenex,
xenex ich cꞌacꞌ soc munt qꞌuin ca werarex a toc betaꞌan ten Cꞌuj tiꞌ quisin yejer yʌjmasirob u tꞌʌn quisin.
42 Mʌꞌ jin wacsajechex,
quireꞌ mʌꞌ ta jansajenex,
cax wiꞌijen.
Caj ucꞌchʌjen mʌꞌ ta cꞌʌs tsꞌajex in wucꞌur.
43 Caj manen tu yʌnechex,
cax caj a wirajenex mʌnaꞌ in nocꞌ,
mʌꞌ ta cꞌʌs tsꞌajex ten in buquintej.
Cax caj a wirex mʌnaꞌ in way,
mʌꞌ ta wacsajenex.
Caj yajijen mʌꞌ tarechex a cꞌʌs irenex.
Bayiriꞌ tiꞌ mʌcaꞌanen,
mʌꞌ tarechex a cꞌʌs irenex.
44 A mac tiꞌ yʌnob tin tsꞌic cu bin u yacob ten:
“Jaj Tsꞌurir,
wa ber caj in wirob wiꞌijech cax ucꞌchʌjech.
Cax mʌnaꞌ a way mʌꞌ in tsꞌajob tech.
Caj in wirob tiꞌ mʌcaꞌanechob mʌꞌ tarenob in wiriquechob.
Caj in wirob yajech mʌꞌ tarenob in wirechob mʌꞌ tin yamtechob?”
45 A tenoꞌ quin bin in nunquic a mac tiꞌ yʌn ich in tsꞌic:
“Taj quin waꞌaric techex quireꞌ caj a pꞌuspachtaj a caj u yacsaj tu yorob in tꞌʌn.
Quireꞌ mʌꞌ a tucriquex wa tsoyob a yacsmʌnob tu yorob in tꞌʌn.
Bayiriꞌ caj u pꞌuspachtajenex.”
46 Rajen quin bin in waꞌaric tiꞌ a mac tiꞌ yʌn ich in tsꞌic:
“Xenex ta werarex ich cꞌacꞌ munt qꞌuin ca werarex.”
Chen a mac tiꞌ yʌn tin noꞌj quin bin in waꞌaric tiꞌob:
“Jeꞌ in quiꞌ acsiquechex quir a cuxtar munt qꞌuin ich caꞌanan.”