Jesús cu camsic tiꞌ a mac a taj u yʌjcʌnanyʌjirob tʌmʌn yuc
10
Jesús caj yaꞌaraj tiꞌ a pimob:
―Taj a baꞌ quin wac techex.
Rajen uꞌyex,
a mac a cu tar yaꞌcric tʌmʌn yuc,
mʌꞌ ju yocar tu jor u paꞌteꞌ tu japꞌnin quir u yaꞌcric.
Cu chen nacatic u paꞌteꞌir quir u yaꞌcric.
2 Chen a mac rajiꞌ u jach winquirir u tʌmʌn yuc cu jach ocar tu jor u paꞌteꞌir tuꞌ yʌn yʌrʌcꞌ tʌmʌn yuc.
Jesús el buen pastor (Juan 10.1-21)
3 A mac a cu cʌnantic u jor u paꞌteꞌir tuꞌ yʌn yʌrʌcꞌ tʌmʌn yuc cu qꞌueꞌic u jor u paꞌteꞌir soc u yocar a taj yʌjcʌnanyʌjir tʌmʌn yuc.
A tʌmʌn yucoꞌ cu cꞌʌꞌotic u tꞌʌn u winquirir.
Cu tꞌʌnic u yʌrʌcꞌ tʌmʌn yuc quireꞌ jujuntur yʌrʌcꞌ tʌmʌn yuc cu tꞌʌnic u cꞌabaꞌ soc u pʌyic ich tancab caꞌ jocꞌacob ich u paꞌteꞌir.
4 Caj tsꞌoc u jocꞌsic tu cotor u yʌrʌcꞌ tʌmʌn yuc cu pʌyic u berob.
U yʌrʌcꞌ tʌmʌn yuc cu sayʌrob tu pach quireꞌ cu cꞌʌꞌoticob u tꞌʌn,
rajen cu binob tu pach.
5 U tʌmʌn yuc mʌꞌ u sayʌrob tu pach a mac a mʌꞌ u yocar tu jor u paꞌteꞌir quireꞌ mʌꞌ raꞌ u winquirir.
Cu putsꞌurob u tʌmʌn yuc quireꞌ mʌꞌ u cꞌʌꞌoticob u tꞌʌn.
6 Jesús caj u yaꞌaraj a jeꞌ tꞌʌnaꞌ quir u camsic tiꞌ a mac a muchaꞌan tiꞌoꞌ.
Chen mʌꞌ tu najtob a baꞌ u cꞌat yaꞌaric.
“Quin quiꞌ cʌnantic a mac cu yacsic tu yor tenoꞌ”
7 Jesús caj yaꞌaraj tiꞌ a pimob:
―Taj quin waꞌaric techex,
a tenoꞌ yʌjcʌnanyʌjiren u jor u paꞌteꞌir tuꞌ yʌn yʌrʌcꞌ tʌmʌn yuc Cꞌuj.
8 A mac a ca tucriquex yʌjcʌnanyʌjirob,
robob irob a mac a cu yaꞌcric tʌmʌn yuc quireꞌ u cꞌat u taquic tiꞌ ten a mac a cu sayʌrob tin pach.
Mʌꞌ ju yubicob u tꞌʌn u tus ʌjcʌnanyʌjirob tʌmʌn yuc.
9 A tenoꞌ ―quij Jesús―,
quin cʌnantic u jor u paꞌteꞌir tuꞌ yʌn yʌrʌcꞌ tʌmʌn yuc Cꞌuj.
A mac a cu yacsic tu yor ten quireꞌ yerob quin bin in taquej.
Robob waysaꞌb irob yʌrʌcꞌ tʌmʌn yuc Cꞌuj.
Cu bin cʌnanbirob ten Cꞌuj,
cu bin jach quiꞌquinbir yorob ten Cꞌuj.
10 ’A mac a cu tar yaꞌcric tʌmʌn yuc,
raꞌ u beyaj quir u yaꞌcric.
Baxuc quir u quinsic.
Baxuc quir u chꞌesic xan.
Chen a tenoꞌ taren in tsꞌic tiꞌob u cuxtarob munt qꞌuin soc jach manan u quiꞌ tar yorob.
11 An ten bic a mac yʌjcʌnanyijir tʌmʌn yuc a jach tsoyoꞌ cu quiꞌ cʌnantic u yʌrʌcꞌ tʌmʌn yuc cax quinsbir tiꞌ u yʌrʌcꞌ tʌmʌn yuc.
Baxuc a tenoꞌ quin quiꞌ cʌnantic mac a cu yacsic tu yor ten cax quinsbiren quir in taquic tiꞌob.
12 Chen a mac u chen cꞌat u cʌnantic tʌmʌn yuc caꞌ bin yirej u tar bʌcꞌ chiꞌbir u yʌrʌcꞌ tʌmʌn yuc cu putsꞌur quireꞌ mʌꞌ rajiꞌ u winquirir.
Rajen chiꞌbir yʌrʌcꞌ tʌmʌn yuc ten bʌcꞌ rʌc waccheꞌ u binob yʌrʌcꞌ tʌmʌn yuc.
13 A mac a cu chen cꞌat u cʌnantic tʌmʌn yuc cu putsꞌur quireꞌ mʌꞌ u yajquintic tʌmʌn yuc.
14 An ten bic a mac yʌjcʌnanyʌjir tʌmʌn yuc a jach tsoyoꞌ.
Cu quiꞌ cʌnantic u tʌmʌn yuc.
Baxuc a tenoꞌ quin quiꞌ cʌnantic a mac a cu yacsic tu yor ten.
In wer mac tu yacsaj tu yor ten.
Baxuc xan robob yerob tu yacsajob tu yor ten.
15 In pacran erob in bʌjob an ten bic in Tet yeren in pacran erob in bʌjob.
In Tet yeren xan,
baxuc ten in wer in Tet xan.
Baxuc quin cꞌubic in bʌj soc in quinsaꞌ tiꞌ a mac a cu sayʌr tin pach.
16 Yʌn mac mʌꞌ u winiquirob judío cu bin u yacsicob tu yorob ten xan.
Bin in caꞌ in pʌyejob xan.
Robob cu bin u yubicob in tꞌʌn xan soc pꞌeriꞌob yejerechex u winiquirechex judío chen tuririꞌ yʌjcʌnanyʌjir,
rajiꞌen.
17 ’In Tetoꞌ cu yajquintiquen quireꞌ tin cꞌubaj in bʌj soc in quinsaꞌ tiꞌ a mac a cu sayʌrob tin pach.
Pachir in caꞌ riqꞌuir.
18 Mʌnaꞌ mac cꞌuchaꞌan yor u quinsiquen.
In wʌcꞌʌs bʌjiriꞌ in cꞌat in chaꞌic in quinsaꞌ.
Cꞌuchaꞌan in wor in chaꞌic in quinsaꞌ.
Cꞌuchaꞌan in wor in wʌcꞌʌs riqꞌuir quireꞌ baxuc caj u yaꞌaraj ten in Tet.
Baxuc tu tsꞌaj u tꞌʌnin tiꞌ in Tet xan.
―Acaꞌan tiꞌ cꞌacꞌas quisin.
U jerob cu yaꞌaricob:
―Chochoc tꞌʌn u caꞌ quireꞌ mʌnaꞌ yor.
Biquinin ca wuꞌyiquex u tꞌʌn?
21 U jerob u winiquirob judío caj yaꞌarob:
―Rajiꞌ mʌꞌ u tsicbar baxuc wa acaꞌan cꞌacꞌas quisin.
Mʌꞌ ja wirej,
a mac acaꞌan cꞌacꞌas quisin mʌꞌ cꞌuchaꞌan yor u jawsic a mac chꞌop u wichoꞌ ―baxuc yaꞌarob.
U winiquirob judío u cꞌat quinsicob Jesús
22 Cꞌuchij tu qꞌuinin u quiꞌquiꞌ janʌnob u winiquirob judío ich u cajar Jerusalén.
Raꞌ u qꞌuinin u winiquirob judío cu cꞌʌꞌoticob caj tsꞌoc u quiꞌ tsoyquinticob carem naj tu cu naj cꞌujinticob Cꞌuj uch soc tiꞌ cu wʌcꞌʌs cꞌujinticob Cꞌuj.
Jesús acusado de blasfemia (Juan 10.22-42)
23 Raꞌ u qꞌuinin queꞌer tan xetꞌir.
Tiꞌ yʌn Jesús caꞌch tan u man tu japꞌnin carem naj tu reꞌjaꞌan naj u cꞌabaꞌ Salomón.
24 U winiquirob judío caj u muchꞌquintob u bʌj caj u bʌꞌcristob Jesús caj yaꞌarob tiꞌ:
―Arej tenob ber caꞌ bin tsꞌocac a choquintic in worob.
Mʌꞌ a mucric,
toc arej tenob wa Cristojech a tuchiꞌtaꞌbech ten Cꞌuj.
25 Jesús caj u nuncaj tiꞌob tan yaꞌaric:
―Tin toc araj techex chen mʌꞌ ja quibiquex.
A wiramʌnex xan tin betaj carem beyajob quireꞌ tu yamtajen in Tet Cꞌuj.
Rajiꞌ cu yesic tar in tar ich Cꞌuj.
26 A techexoꞌ mʌꞌ ja quibiquex in tꞌʌn quireꞌ mʌꞌ ten yʌninechex baxuc caj in waꞌaraj techex uch.
27 Quireꞌ a mac ten yʌnin ―quij Jesús―,
a cu yubicob in tꞌʌn quireꞌ in wer maquiꞌ.
Robob cu sayʌrob tin pach.
28 Quin tsꞌic u cuxtarob munt qꞌuin mʌꞌ ju bin satʌrob mʌꞌ biqꞌuin.
Mʌnaꞌ mac cꞌuchaꞌan yor u taquic ten quireꞌ ten yʌnin.
29 In Tet Cꞌuj caj u tsꞌaj tiꞌob ten soc ten yʌninob.
In Tetoꞌ jach manan cꞌuchaꞌan yor tiꞌ tu cotor baꞌ.
Mʌnaꞌ mac cꞌuchaꞌan yor u taquic tiꞌ in Tet quireꞌ rajiꞌ yʌninob xan.
30 Jesús caj yaꞌaraj:
―A tenoꞌ yejer in Tet tuririꞌenob.
31 Rajen u winiquirob judío tu caꞌ chucob tunich u cꞌatob u chꞌinicob u joꞌr Jesús.
32 Jesús caj yaꞌaraj tiꞌob tan yaꞌaric:
―A techexoꞌ a wiramʌnex yaꞌab carem in beyaj caj in betaj quireꞌ tu yamtajen in Tet.
Arex ten baꞌ tsoyir beyaj ta wirex in betic.
Rajen a cꞌat a chꞌiniquex in joꞌr.
33 U winiquirob judío caj u nuncob tiꞌ tan yaꞌaricob:
―Mʌꞌ jin bin in chꞌinicob a joꞌr quireꞌ tsoy a beyaj.
Quin bin in chꞌinicob a joꞌr quireꞌ tan a pꞌastic Cꞌuj.
Mʌꞌ ja wirej,
chen xibech ca tucric Cꞌujech.
34 Jesús caj u nuncaj tiꞌob tan yaꞌaric:
―Tiꞌ tsꞌibaꞌan tu cu yaꞌaric Cꞌuj tiꞌ techex:
“Techex,
quij Cꞌuj,
ca wesiquenex tiꞌ mac Cꞌujen.”
Aroꞌ araꞌb tiꞌ u juez u winiquirob judío uch ten Cꞌuj.
35 Baxuc caj araꞌb tiꞌ a mac tsꞌab u beyajob ten Cꞌuj uch.
Rajen mʌꞌ ju bin rucꞌsaꞌbir ich u tꞌʌn Cꞌuj tu tsꞌibaꞌan.
36 A techexoꞌ u winiquirechex judío ca waquex jach tsoyoꞌ a mac araꞌb ten Cꞌuj ca wesiquenex tiꞌ mac Cꞌujen.
Rajen biquinin ca waꞌariquex quin pꞌastic Cꞌuj quireꞌ tin waꞌaraj u pararen Cꞌuj.
Mʌꞌ ja wirej,
tu tsꞌaj in beyaj Cꞌuj,
rajen taren ich yocꞌocab.
37 Wa ca tucriquex,
mʌꞌ u beyaj Cꞌuj quin betic mʌꞌ a yʌn acsiquex ta worex ten.
38 Wa ca wiriquex raꞌ u beyaj Cꞌuj quin betic,
quibex aroꞌ,
cax mʌꞌ a quibiquex in tꞌʌn.
Quireꞌ wa ca quibiquex raꞌ u beyaj Cꞌuj quin betic,
baxuc a werex xan turiꞌen yejer Cꞌuj.
39 Rajen u caꞌ cꞌatob u chuquicob Jesús chen mʌꞌ cꞌuchaꞌan yorob u chuquicob chen Jesús putsꞌij.
40 Tu caꞌten caꞌ bin Jesús pichir yaꞌarir Jordán tu cu tar ic yum,
tiꞌ pꞌatij tu cu yacsic jaꞌ tu joꞌr mac Juan uch.
41 Tiꞌ toy yʌn Jesús pʌchir yaꞌarir Jordán caj tarob yaꞌab mac quir u yirirob Jesús.
A pimob caj u pacran arob:
―Cax Juan mʌꞌ tu yesaj carem beyaj chen taj a baꞌ caj u yaꞌaraj Juan tiꞌ Jesús.
42 Rajen yaꞌab mac tu yacsob tu yorob tiꞌ Jesús.