A mac chꞌop u wichoꞌ caj toc rochaꞌb ten u nʌꞌ uch, jawsaꞌb ten Jesús
9
Tu cu man Jesús,
tiꞌ tu yiraj chꞌop u wich toc berer caj rochaꞌb ten u naꞌ.
2 U camsʌwinicob caj u cꞌatajob tiꞌ Jesús tan yaꞌaricob:
―A wʌjcamsʌyʌjirenob ―quij―.
Mac u siꞌpir quireꞌ toc chꞌop u wich caj rochaꞌb ten u naꞌ?
Wa ja jeꞌ xibaꞌ yʌn u siꞌpir wa ju tet yejer u naꞌ,
yʌn u siꞌpirob?
Jesús cura a un ciego (Juan 9.1-41)
3 Jesús caj u nuncaj tiꞌob tan yaꞌaric:
―Mʌꞌ u bʌjiriꞌ u siꞌpir,
mʌꞌ u siꞌpir u tet yejer u naꞌ xan.
Toc berer chꞌopir u wich caj rochaꞌb ten u naꞌ soc yesaꞌ ten Cꞌuj jach carem beyaj tiꞌ a jeꞌ xibaꞌ.
4 Tiꞌ toy cuxaꞌanen bajeꞌrer teꞌ ich yocꞌocabaꞌ.
Yʌn u qꞌuinin quir in beyaj tiꞌ in Tet Cꞌuj a mac tu tuchiꞌtajen.
Caꞌ bin quimiquen tsꞌoc in beyaj teraꞌ ich yocꞌocab.
5 Mun qꞌuin tiꞌ yʌnen ich yocꞌocab,
quireꞌ a tenoꞌ tuchiꞌtaben ten Cꞌuj,
iren quib quir in wesiquex tech u jach jajir u tꞌʌn Cꞌuj.
6 Caj tsꞌoc yaꞌaric aroꞌ Jesús caj u tubaj ich u noy ruꞌum caj u jachꞌquintaj u noy ruꞌum caj u chꞌaj u jachꞌir u ruꞌumin caj u jicꞌtaj tu boxer u wich a chꞌop u wichoꞌ.
7 Jesús caj yaꞌaraj tiꞌ:
―Caꞌ xiquech caꞌ a jaꞌxtej a wich tu cuch u yacʌr yaꞌarir pʌchaꞌan u cꞌabaꞌ Siloé ―u cꞌat yaꞌaric aroꞌ tu cuch u tar yaꞌarir.
A chꞌop u wichoꞌ caj binij u jaꞌxtej u wich ich u cuch yaꞌarir Siloé caj urij chʌcaꞌan yiric u bej.
8 Rajen u yet cajarob caj yirob.
Baxuc a mac tu yirob uch a chꞌop u wichoꞌ caj u pacran arob tan yaꞌaricob:
―Mʌꞌ wa rajiꞌ a cu cutar u cꞌatej u taqꞌuin ucheꞌ?
―baxuc u pacran aricob.
9 Yʌn mac tu yaꞌarob:
―Rajiꞌ.
Yʌn u jerob tu yaꞌarob:
―Mʌꞌ rajiꞌ.
Mʌꞌ ja wirej,
cu cꞌʌs cꞌʌꞌoticob.
Chen u bʌjiriꞌ tu yaꞌaraj:
―Jach jaj rajiꞌ ten ―quij―,
a chꞌop in wich ucheꞌ.
10 Rajen robob caj u cꞌatob tiꞌ,
tan yaꞌaric:
―Bic tabar caj jaw u chꞌopir a wich bajeꞌrer?
11 A chꞌop u wich uchoꞌ caj u nuncaj tiꞌob,
tan yaꞌaric:
―A ray xiboꞌ,
Jesús u cꞌabaꞌ,
caj u jachꞌquintaj u noy ruꞌum caj u jicꞌtaj tu boxer in wich.
Caj yaꞌaraj ten:
“Caꞌ xiquech,
quij,
ich tu cu yacʌr yaꞌarir u cꞌabaꞌ Siloé.”
Rajen binen in jax tin wich.
Rajen bajeꞌrer chʌcaꞌan in wiric in ber ―quij a chꞌop u wichoꞌ.
12 Robob caj u cꞌatob tiꞌ a chꞌop u wich uchoꞌ.
―Tuꞌ yʌn a mac a ta tsicbʌtaj uchoꞌ?
Caj u yaꞌaraj tiꞌob:
―Mʌꞌ in wer tuꞌ yʌniꞌ.
A fariseojoꞌ cu cꞌaticob tiꞌ bic jawsaꞌb u wich
13 Caj bin purbir a mac jawsaꞌb u wich ʌcʌtan ich a fariseojoꞌ.
14 Raꞌ u qꞌuinin cu jesicob u bʌj u winiquirob judío caj u jachꞌquintaj u noy ruꞌum Jesús caj u jawsaj a chꞌop u wich uchoꞌ.
15 A fariseojoꞌ xan caj u cꞌatob tiꞌ a xiboꞌ bic jawsaꞌb u wich.
Rajiꞌ caj u yaꞌaraj tiꞌob:
―Jesús ―quij―,
caj u jicꞌtaj tu boxer in wich a tu jachꞌquintaj u noy ruꞌum.
Pachir caj binen in jaꞌx tin wich,
rajen chʌcaꞌan in wiric in ber bajeꞌrer.
16 Rajen caj yaꞌarob a tiꞌ yʌn jun yarob a fariseojoꞌ:
―A xiboꞌ a ray ca tsicbar tiꞌ mʌꞌ rajiꞌ Cꞌuj yʌnin quireꞌ rajiꞌ mʌꞌ u cʌnantic u qꞌuinin ic jesiquex ic bʌjex.
Chen u jerob caj yaꞌarob:
―Bic tabar a mac a cu betic carem beyaj a mac yʌn u siꞌpir?
Rajen mʌꞌ pꞌeriꞌ yorob a fariseojoꞌ.
17 Rajen robob caj u caꞌ cꞌatob tiꞌ a chꞌop u wich uchoꞌ.
Tech,
baꞌ ca wac tech tiꞌ a mac a tu jawsaj a wich?
A xiboꞌ caj u nuncaj tiꞌob,
tan yaꞌaric:
―A tenoꞌ quin waꞌaric rajiꞌ yʌjtseqꞌuir u tꞌʌn Cꞌuj ―quij.
18 U winiquirob judío mʌꞌ u cꞌat u quibicob a baꞌ araꞌb tiꞌob ten a chꞌop u wich uchoꞌ.
Mʌꞌ ju quibob u tꞌʌn hasta caj tarob u naꞌ yejer u tet a mac jawsaꞌb u wich.
19 Caj cꞌuchob u tet yejer u naꞌ caj u cꞌatob tiꞌob:
―A jeꞌraꞌ a pararex toc chꞌop wa ju wich caj rochaꞌb ten u naꞌ uch?
Baxuc ca waꞌaric uch?
Bic tabar bajeꞌrer quireꞌ chʌcaꞌan yiric u ber?
20 U tet yejer u naꞌ caj u nuncob tiꞌob tan yaꞌaric:
―In werob a jeraꞌ quireꞌ in pararob toc berer tiꞌ chꞌop u wich caj rochaꞌb ten u naꞌ uch.
21 Chen a tenoboꞌ mʌꞌ in werob bic tabar caj jaw u wich.
Baxuc mʌꞌ in werob mac tu jawsaj u wich.
Cꞌatex a wuꞌyej tiꞌ quireꞌ chꞌijij,
u bʌjiriꞌ cu yac techex tu junan.
22 Baxuc caj u nuncob u tet yej u naꞌ quireꞌ tu chꞌajob sajquir tiꞌ u jach tsꞌurirob sacerdote.
Mʌꞌ ja wirej,
u jach tsꞌurirob sacerdote tu tsꞌajob u tꞌʌnin tan yaꞌaricob:
“Toc jumpuriꞌ mʌꞌ u yʌnyʌn ocar ich u chan najir tu cu naj cꞌujinticob Cꞌuj u winiquirob judío,
a mac tu yubaj yaꞌaric tiꞌ u racꞌob:
A Jesúsoꞌ,
rajiꞌ yʌjtaquiroꞌonex.”
23 Rajen u tet yejer u naꞌ caj yaꞌarob:
“Cꞌatex a wuꞌyex tiꞌ quireꞌ chꞌijij.
Jeꞌ yac techex bic caj jaw u wich.”
24 U jach tsꞌurirob sacerdote caj u wʌcꞌʌs pʌyob a chꞌop u wich uch,
caj yaꞌarob tiꞌ:
―Caꞌ a waꞌarej tiꞌ Cꞌuj:
“Bayoꞌ Cꞌuj tech ta jawsaj in wich.”
A mac a ca tsicbar tiꞌ,
a tenoboꞌ in werob yʌn u siꞌpir.
25 Rajiꞌ caj u yaꞌaraj tiꞌob:
―A tenoꞌ mʌꞌ in wer wa yʌn u siꞌpir.
In chen er bajeꞌrer quireꞌ chʌcaꞌan in wiric in ber.
A uchoꞌ mʌꞌ chʌcaꞌan in wiric in ber ―quij.
26 Robob caj u caꞌ cꞌatob tiꞌ:
―Baꞌ tu betaj tech?
Bic tabar caj u jawsaj a wich?
―quijob.
27 Rajiꞌ caj u nuncaj tiꞌob tan yaꞌaric:
―Biquinin tin toc araj techex caꞌch?
Chen techex mʌꞌ a cꞌatex a quibexiꞌ.
Biquinin a cꞌatex a caꞌ uꞌyiquex,
jeꞌ wa ja binex tu pach quir a cʌniquex u tꞌʌn?
28 Robob caj u yʌnxchun u pꞌasticob tiꞌ tan yaꞌaricob tiꞌ:
―A techoꞌ ca bin tu pach quir a cʌnic u tꞌʌn a mac a yʌn u siꞌpiroꞌ.
Chen a tenoboꞌ quin binob tu pach ic nunquir Moisés quir in cʌnicob u tꞌʌn Moisés uch.
29 A tenoboꞌ in werob Cꞌuj cu tsicbar tiꞌ Moisés uch.
A ray ca tsicba tiꞌ mʌꞌ in werob tub u tariꞌ ―quijob u winiquirob judío.
30 A xiboꞌ caj u nuncaj tiꞌob,
tan yaꞌaric:
―A techexoꞌ ca jacꞌsiquex in wor quireꞌ ca waquex mʌꞌ a werex tub u tariꞌ.
Tu jawsaj in wich mʌꞌ wa ca wiriquex jaw in wich.
31 Ij querex a Cꞌuj mʌꞌ ju yubic u tꞌʌn a mac a yʌn u siꞌpireꞌ.
A Cꞌujoꞌ cu chen uꞌyic u tꞌʌn a mac a cu sʌjtic Cꞌuj,
a mac a tan u betic a baꞌ u cꞌat Cꞌujoꞌ.
Raꞌ cu yubic Cꞌuj.
32 Mʌꞌ ja wirej,
caj yʌnxbetaꞌb yocꞌocab taquij bajeꞌrer,
mʌꞌ ij cuꞌyimʌnex mac jawsaꞌb u wich chꞌop a ju toc berer caj rochaꞌb ten u nʌꞌ ―rajiꞌ,
aric a chꞌop u wichoꞌ―.
33 A quin tsicbʌtic tiꞌ,
wa mʌꞌ tarij ich Cꞌuj,
mʌꞌ cꞌuchaꞌan yor u betic baxuc a jeraꞌ ―quij a chꞌop wich uchoꞌ.
34 Robob caj u nuncob tiꞌ tan yaꞌaric:
―Bic ca bin a camsic tenob?
Mʌꞌ toy u rochech a naꞌ,
uch toc yʌn a siꞌpir tech uch ―baxuc caj yaꞌarob tiꞌ.
Robob caj yaꞌarob tiꞌ jumpuriꞌ:
―Mʌꞌ a yʌnyʌn ocar ich chan naj tu cu naj cꞌujinticob Cꞌuj u winiquirob judío.
A mac a cu tus tucric yer Cꞌuj, u berer a mac chꞌop u wichob
35 Jesús caj yubaj a mac chꞌop u wich uchoꞌ,
toc jumpuriꞌ toc jocꞌsaꞌb ich chan naj tu cu naj cꞌujinticob Cꞌuj u winiquirob judío.
Rajen Jesús caj tar u tsicbar tiꞌ a xiboꞌ,
raꞌ jaw u wichoꞌ.
Caj u yiraj caj u cꞌataj tiꞌ:
―Ca wacsic wa ta wor tiꞌ u parar Cꞌuj a mac a yʌn tu cotor u mucꞌ Cꞌuj?
36 A xiboꞌ a jaw u wichoꞌ caj u nuncaj tiꞌ tan yaꞌaric:
―Maquiꞌ in Jaj Tsꞌurir?
In cꞌat in wacsic tin wor tiꞌ.
37 Jesús caj u nunca tiꞌ tan yaꞌaric:
―A techoꞌ ta wirajen bajeꞌrer.
Rajiꞌen a tan u tsicbar yejerech.
38 A xiboꞌ caj u nuncaj tiꞌ,
tan yaꞌaric:
―Quin wacsic tin wor tech,
Jaj Tsꞌurir.
―A tenoꞌ taren ich yocꞌocab soc u sasichʌjʌr u wich a mac chꞌop u wicheꞌ.
A mac a cu yaꞌaric:
“Sasij in wichoꞌ”,
cu bin tar tiꞌ,
irej wa chꞌop u wich.
40 Tiꞌ yʌn a fariseojoꞌ tuꞌ yʌn Jesús caj yubob a baꞌ caj u yaꞌaraj Jesús.
Rajen caj u cꞌatob tiꞌ:
―Ca tucric wa ja tenob chꞌopob in wichob ―baxuc caj yaꞌarob.
41 Jesús caj u nuncaj tiꞌob,
tan yaꞌaric:
―Wa chꞌop a wichex mʌnaꞌ a siꞌpirex techex.
Quireꞌ ca waquex:
“Sasir in wichob”,
rajen yʌn a siꞌpirex techex quireꞌ ca waquex sasir a wichex.