8
Chen a Jesúsoꞌ yejer u camsʌwinicob caj binob ich u joꞌr wits u cꞌabaꞌ Olivos.
2 Caj sasij caj sutnʌj Jesús caj oc ich carem naj tu cu naj cꞌujinticob Cꞌuj u winiquirob judío.
Caj u rʌc muchꞌquintajob u bʌj ich Jesús.
Caj curʌj Jesús caj u yʌnxchun u camsic a pimob.
Jesús perdona a mujer condenada (Juan 8.2-11)
3 Caj cꞌuchob yʌjcamsʌyʌjirob u tꞌʌn Moisés yejer a fariseojoꞌ.
Caj tarob u purej xquic a jach irir tan u man tu cꞌasir.
Caj cꞌuchob caj u purajob ʌcʌtan tu yʌn Jesús.
4 Robob caj yaꞌarob tiꞌ Jesús:
―In wʌjcamsʌyʌjirechob,
caj in wirob a jeꞌ xquicaꞌ caj in jach chucob tu cu man ich u cꞌasir.
5 Quireꞌ Moisés tu toc araj uch caꞌ ic chꞌinex u joꞌr a xquicoꞌ a quic jach iriquex cu man tu cꞌasir.
Are tenob baꞌ ca waꞌaric a techoꞌ?
6 Baxuc caj yaꞌarob quireꞌ u cꞌatob u tumticob yor Jesús soc u pʌyicob u siꞌpir soc yʌn baꞌwir quir u taquicob u joꞌr.
Jesús caj pꞌuxrʌj caj u tsꞌibtaj ich u noy ruꞌum yejer u yar u cꞌʌb.
7 Mʌꞌ ju tsꞌocor u cꞌaticob tiꞌ caj u tajquintaj u bʌj Jesús caj yaꞌaraj:
―Arej a mac a mʌnaꞌ u siꞌpir tu yʌnechex,
arej tiꞌ rajiꞌ cu yʌn batꞌan chꞌinic u joꞌr yejer tunich a ray pay sameꞌ.
8 Caj caꞌ pꞌuxrʌj Jesús u tsꞌibtej ich noy ruꞌum.
9 Caj tsꞌoc u yubicob baꞌ nuncaꞌb ten Jesús caj rʌc jocꞌob tan u binob.
Jujuntur caj rʌc binob quireꞌ caj u tucurajob u siꞌpirob.
Caj u yʌnxchun u binob a mac jach uch chꞌijic,
pachir caj rʌc binob a mʌꞌ uch chꞌijiquiꞌ.
Pꞌatij Jesús yejer xquic ich a pimob chen u tsꞌurirob u winiquirob judío binob.
10 Jesús caj u tajquintaj u bʌj a mac tarob u purob a xquicoꞌ rʌc binob chen xquic tiꞌ yʌn.
Rajen Jesús caj yaꞌaraj tiꞌ:
―Xquic ―quen―.
A mac a tu taꞌcajob a joꞌr sam mʌnaꞌ,
rʌc bin.
Mʌnaꞌ mac tu chꞌinaj a joꞌr quireꞌ yʌn a siꞌpir ―quij Jesús.
11 A xquicoꞌ caj u yaꞌaraj:
―Mʌnaꞌ mac tu chꞌinaj in joꞌr,
Jaj Tsꞌurir ―quij xquic.
Jesús caj yaꞌaraj tiꞌ:
―Baxuc a tenoꞌ,
mʌꞌ in tsꞌaj a mucꞌyaj cax yʌn a siꞌpir.
Xen ―quij―,
mʌꞌ a yʌnyʌn acsic a siꞌpir.
Jesús u sasirir ich yocꞌocab
12 Jesús cu caꞌ camsic a pimob ich carem naj tu cu naj cꞌujinticob Cꞌuj u winiquirob judío.
Caj u yaꞌaraj:
―A tenoꞌ a quin camsic mac a tiꞌ yʌnob ich yocꞌocab,
iren quin yercꞌacꞌtic mac.
Tu cotor mac a cu yacsic tu yor ten,
mʌꞌ u binob ich yacꞌbirir.
Jeꞌ u binob tu sasirir quireꞌ quin tsꞌic tiꞌob u cuxtar a ricꞌbenoꞌ.
Jesús es la luz del mundo (Juan 8.12-30)
13 A fariseojoꞌ caj yaꞌarob tiꞌ Jesús:
―A wʌcꞌʌs bʌjiriꞌ ca tsecꞌtic tech,
rajen mʌꞌ in quibicob.
Mʌnaꞌ yʌjꞌirirech soc yaꞌaric taj a baꞌ ca waꞌaric.
14 Jesús caj u nuncaj tiꞌob tan yaꞌaric:
―Cax wa ca tucriquex in wʌcꞌʌs bʌjiriꞌ tan in tsecꞌtic.
Taj a baꞌ quin wac techex.
In wer tub in tar,
baxuc in wer tuꞌ quin bin.
A techexoꞌ mʌꞌ a werex tub in tar,
mʌꞌ a werex tuꞌ quin bin.
15 A techexoꞌ seb ca quibiquex wa ju jer mac yʌn u siꞌpir.
Mʌꞌ a quiꞌ tucrex.
A tenoꞌ ―quij Jesús―,
mʌꞌ in tucric baꞌ tiꞌ u jer mac.
16 Wa yʌn baꞌ quin tucric,
taj a baꞌ quin tucric.
In wʌcꞌʌs bʌjiriꞌ mʌꞌ in tucric quireꞌ pꞌeriꞌ quin tucric yejer in Tet,
a mac tu tuchiꞌtajen.
17 Tiꞌ tsꞌibaꞌan ich u tꞌʌn Cꞌuj tiꞌ techex:
“Tsoy a quibiquex u tꞌʌn quireꞌ caꞌtur yʌjꞌirirob wa quet u tꞌʌnob.”
18 A tenoꞌ quin tsecꞌtic tiꞌ in wʌcꞌʌs bʌjiriꞌ.
In Tetoꞌ a mac tu tuchiꞌtajen,
cu tsecꞌtic tiꞌ ten xan.
19 Robob caj u cꞌatob tiꞌ tan yaꞌaricob:
―Tuꞌ yʌn a Tet a ca tsicbʌtic tenob?
Jesús caj u nuncaj tiꞌob tan yaꞌaric:
―A techexoꞌ mʌꞌ a werenexiꞌ.
Mʌꞌ a werex in Tet xan.
Wa baxuc a werenex baxuc a werex in Tet xan.
20 Jesús tan u camsic a jeꞌ tꞌʌnaꞌ ich carem naj tu cu naj cꞌujinticob Cꞌuj u winiquirob judío tu cu butꞌicob u taqꞌuin quir u sijic tiꞌ u beyaj Cꞌuj.
Mʌnaꞌ mac cꞌuchaꞌan yorob u chuquicob u mʌquejob quireꞌ mʌꞌ cꞌuchuc tu qꞌuinin u chuquicob u mʌquejob.
“A tuꞌ quin bin a tenoꞌ mʌꞌ cꞌuchaꞌan a worex a tarexiꞌ”
21 Jesús caj u caꞌ araj tiꞌob:
―Tuꞌ quin bin a tenoꞌ,
ca bin a cʌxtiquenex,
chen mʌꞌ ja bin a wiriquenex ca bin a quiminex tiꞌ a siꞌpirex quireꞌ tuꞌ quin bin a tenoꞌ mʌꞌ cꞌuchaꞌan a worexiꞌ a tarex.
22 Rajen u winiquirob judío caj u pacran arob,
tan yaꞌaricob:
―Bin u caꞌ quins u bʌj,
tin tꞌʌn quireꞌ cu yaꞌaric:
“Tuꞌ quin bin mʌꞌ cꞌuchaꞌan a worex a tarexiꞌ”,
―baxuc cu pacran aricob.
23 Jesús caj yaꞌaraj tiꞌob:
―Mʌꞌ pꞌeriꞌoꞌonex,
rajen mʌꞌ pꞌeriꞌ ic tucriquex baꞌ,
quireꞌ a tenoꞌ tar in tar ich caꞌanan,
quireꞌ a techexoꞌ toc tiꞌ yʌnechex ich yocꞌocab.
24 Rajen quin waꞌaric techex:
Bin a caꞌ quiminex tiꞌ a siꞌpirex,
quireꞌ mʌꞌ ja wacsex ta worex ten wa ten a mac cu bin u rucsic a siꞌpirex.
Rajen ca quiminex tiꞌ a siꞌpirex.
25 Robob caj u cꞌatob tiꞌ Jesús tan yaꞌaricob:
―Maquechiꞌ?
Jesús caj u nuncaj tiꞌob tan yaꞌaricob:
―A tenoꞌ tin toc araj techex uch maqueniꞌ.
26 Yʌn toy yaꞌab quir in waꞌaric techex baxuc quir in waꞌaric techex baꞌ siꞌpir yʌn techex.
A tenoꞌ quin chen aric techex a baꞌ caj u yaꞌaraj ten in Tet a mac tu tuchiꞌtajen.
In Tet a mac tu tuchiꞌtajen,
taj u tꞌʌn a tiꞌoꞌ.
27 Quireꞌ mʌꞌ ju yacsob tu yor tiꞌ Jesús quireꞌ rajiꞌ Cristo a tuchiꞌtaꞌb ten Cꞌuj,
rajen mʌꞌ ju najtob wa tan u tsicbar tiꞌ u Tet Cꞌuj.
28 Rajen Jesús caj yaꞌaraj tiꞌob:
―Caꞌ bin a sinenex ich cruz quireꞌ a tenoꞌ a mac tuchiꞌtaꞌben ten Cꞌuj,
raꞌiriꞌ u qꞌuinin caꞌ bin a najtex a wʌjtaquirenex.
Raꞌiriꞌ u qꞌuinin xan caꞌ bin a wetiquex,
jariꞌ tin waꞌaraj techex an ten bic tu yaꞌaraj in Tet,
a mac a tu tuchiꞌtajen.
29 In Tetoꞌ mʌꞌ u pꞌʌten quireꞌ rajraꞌ quin betic a baꞌ u cꞌat ―quij Jesús.
30 Tiꞌ toy cu camsic tiꞌob,
yaꞌab mac caj u yacsajob tu yorob tiꞌ,
quireꞌ yerob yʌjtaquirob.
A mac a tu yacsaj tu yor tiꞌ u tꞌʌn Cꞌuj yejer a mac a mʌꞌ tu yacsaj tu yor
31 Rajen Jesús caj yaꞌaraj tiꞌ u winiquirob judío a tu yacsajob tu yorob tiꞌ:
―Wa ja techexoꞌ teniꞌ ta toc acsex ta worex a baꞌ tin waꞌaraj techex a baxuc aroꞌ in jach camsʌwiniquechex.
Jesús se enfrenta a falsos discípulos (Juan 8.31-59)
32 A tenoꞌ tan in camsic techex a baꞌ taj,
a jeꞌ tꞌʌnaꞌ a baꞌ tajiꞌ cu bin u chaꞌbʌr techex tiꞌ a ca tsꞌurintiquex.
33 U winiquirob judío caj u nuncajob tiꞌ tan yaꞌaricob:
―A tenobob u pararenob in nunquir Abraham,
mʌꞌ in tsꞌurinticob baꞌ.
Bic tabar ca waꞌaric a siptiquenex tiꞌ baꞌ.
34 Jesús caj yaꞌaraj tiꞌob:
―Taj a baꞌ quin wac techex.
Tu cotor a mac a cu man tu cꞌasir rajiꞌ cu tsꞌurintic u siꞌpirob.
35 A mac a mʌnbir ten u tsꞌuriroꞌ quir u beyaj tiꞌ,
rajiꞌ mʌꞌ rajraꞌ cu pꞌatʌr tu yatoch u tsꞌurir quireꞌ cu bin caꞌ canbir ten u tsꞌurir.
Chen a mac a jach u parar u tsꞌuriroꞌ,
rajiꞌ u parar munt qꞌuin.
36 A techexoꞌ irechex a mac a mʌnbir ten tsꞌur chen a tenoꞌ a mac tuchiꞌtaꞌb ten Cꞌuj cꞌuchaꞌan in wor in chaꞌiquechex soc jach jaj chaꞌanechex.
37 Bʌꞌwir ca waquex u pararechex a nunquirex Abraham quireꞌ techex a cꞌatex a quinsiquenex quireꞌ cꞌas ca tucriquex ta pixamex.
Rajen mʌꞌ ju yocar in tꞌʌn ta pixamex.
38 A tenoꞌ tin tsecꞌtaj an ten bic in Tet tu chaꞌj in wiric.
A techexoꞌ ca betiquex an ten bic a tet quisin tu toc tsꞌaj u tꞌʌnintechex.
39 Robob caj u nuncob tiꞌ tan yaꞌaricob:
―Ic tetex rajiꞌ ic nunquir Abraham.
Caj araꞌb tiꞌob ten Jesús:
―Wa ju pararechex a nunquirex Abraham ta quibex u tꞌʌn Cꞌuj xan an ten bic a nunquirex Abraham caj u quibaj u tꞌʌn Cꞌuj uch.
40 Chen bajeꞌrer a cꞌat a quinsiquenex quireꞌ caj in waꞌaraj techex a baꞌ jach tajiꞌ a tin wuꞌyaj ich Cꞌuj.
A nunquirex Abraham mʌꞌ ju betaj baxuc aꞌrayoꞌ.
Jesús caj yaꞌaraj tiꞌob:
―Ca betiquex u beyaj a tetex quisin.
41 Robob caj u nuncob tiꞌ tan yaꞌaricob:
―A tenob mʌꞌ u pararenob a yʌn u siꞌpir ―quij yaꞌaric u winiquirob judío―.
Jariꞌ yʌn tenob tuririꞌ in tetob.
Rajiꞌ in Tetob Cꞌuj ―baxuc caj yaꞌaraj u winiquirob judío tiꞌ Jesús.
42 Jesús caj yaꞌaraj tiꞌob:
―Wa ja jach tetex Cꞌuj jeꞌ a yajquintiquenex quireꞌ a tenoꞌ taren ich Cꞌuj.
Mʌꞌ in bʌjiriꞌ taquen quireꞌ Cꞌuj tu tuchiꞌtajen.
43 Mʌꞌ ja najtiquex in tꞌʌn quireꞌ mʌꞌ a cꞌat a najtiquex in tꞌʌn.
44 A techexoꞌ a tetex quisin.
Mʌꞌ ja wirej,
ta pixamex ca betiquex a baꞌ u cꞌat a tetex.
Rajiꞌ yʌjquinsir mac uch tu yʌnxchun a winicoꞌ ich yocꞌocab uch.
Mʌꞌ u cꞌat a baꞌ jach tajiꞌ quireꞌ mʌnaꞌ u tajir tu pixam.
Wa cu tus xan,
cu tus quireꞌ a cu tusoꞌ u tet quisin,
rajen cu camsic tus.
45 Quireꞌ taj a baꞌ quin wac techex,
rajen mʌꞌ a cꞌatex a quibiquex in tꞌʌn.
46 Mʌꞌ cꞌuchaꞌan a worex a wiriquex wa yʌn in siꞌpir.
In tꞌʌn a tin waꞌaraj techex taj,
rajen biquinin mʌꞌ ja quibiquex in tꞌʌn?
47 A maqueꞌ,
rajiꞌ Cꞌuj yʌnin cu yubic u tꞌʌn Cꞌuj.
Rajen a techexoꞌ mʌꞌ Cꞌuj yʌninechex.
Rajen mʌꞌ a cꞌatex a wuꞌyiquex u tꞌʌn.
U berer tiꞌ yʌn Cristo uch mʌꞌ rochac Abraham ten u nʌꞌ
48 Caj yaꞌarob u winiquirob judío tiꞌ Jesús.
―Taj a baꞌ quic tucriquex uch.
U winiquirech samaria acaꞌan tech cꞌacꞌas quisin ―baxuc tan u tus pacꞌʌr u pach Jesús ten u winiquirob judío.
49 Jesús caj u nuncaj tiꞌob,
tan yaꞌaric;
―A tenoꞌ mʌꞌ acaꞌan ten cꞌacꞌas quisiniꞌ.
A tenoꞌ quin sʌjtic in Tet chen a techexoꞌ mʌꞌ ja sʌjtiquenex.
50 A tenoꞌ mʌꞌ jin cʌxtic soc u sʌjtiquen mac quireꞌ in Tet u cꞌat yiric u sʌjtiquen tu cotor mac.
A mac mʌꞌ u sʌjtiquen caꞌ bin cꞌuchuc tu qꞌuinin.
Jeꞌ u yaꞌaraꞌ ten Cꞌuj:
Biquinin mʌꞌ ja sʌjtaj Jesús uch?
51 Taj a baꞌ quin wac techex a mac a cu quibic in tꞌʌn mʌꞌ ju bin quimin ―quij Jesús.
52 U winiquirob judío caj yaꞌarob:
―Bajeꞌrer ij quer acaꞌan quisin tech.
Quireꞌ ic nunquir Abraham quimij uch.
Baxuc yʌjtseqꞌuirob u tꞌʌn quimob uch.
Chen tech ca waꞌaric:
“A mac a cu quibic a baꞌ quin waꞌaric tiꞌ mʌꞌ ju bin quimin.”
53 Biquinin a techoꞌ ca tucric jach noꞌjech a beyaj?
Ic nunquir Abraham a mac quimij uch,
jach noꞌj beyaj.
Baxuc yʌjtseqꞌuirob u tꞌʌn Cꞌuj caj quimob jach noꞌj beyajob uch.
Mac ca tucric jach manan noꞌj a beyaj,
tech wa?
54 Jesús caj u nuncaj tiꞌob,
tan yaꞌaric:
―Wa quin cʌxtic soc u sʌjtiquen mac jot aroꞌ.
Wa quin cʌxtic soc u sʌjtiquen mac,
in Tet a mac ca tucriquex a Cꞌuj techex,
rajiꞌ cu yaꞌaric:
“Jach caremech in pararech Jesús.”
55 A techexoꞌ mʌꞌ a werex Cꞌuj.
Chen a tenoꞌ in wer Cꞌuj.
Wa quin waꞌaric mʌꞌ in wer Cꞌuj,
baxuc aroꞌ tus in caꞌ an ten bic techex ca tusex.
Chen a tenoꞌ in jach er Cꞌuj quin wuꞌyic u tꞌʌn.
56 A tetex a nunquirex Abraham a ca tsicbʌtiquex quiꞌji yor uch quireꞌ yuba tabar in tar.
Tu quibaj jeꞌ in tareꞌ rajen tu jach quiꞌquintaj yor uch.
57 Rajen u winiquirob judío caj yaꞌarob tiꞌ Jesús:
―A techoꞌ mʌꞌ cꞌuchuc cincuenta yaxqꞌuinechiꞌ.
Tuꞌ ta wiraj ic nunquir Abraham quireꞌ mʌꞌ uch chꞌijiquechiꞌ?
58 Jesús caj u nuncaj tiꞌob tan yaꞌaric:
―Taj quin wac techex.
Mʌꞌ toy rochac Abraham ten u nʌꞌ uch in toc berer uch ―quij Jesús.
59 Rajen u winiquirob judío caj u chucob tunich quir u chꞌinicob u joꞌr Jesús.
Jesús caj u taꞌc u bʌj ich u racꞌob.
A baywoꞌ caꞌ jocꞌ tancab tiꞌ manij chumuc tuꞌ yʌnob,
caj bin.