U yitsꞌinob Jesús mʌꞌ ju yacsob tu yorob tiꞌ
7
Pachir caj bin Jesús ich u ruꞌumin Galilea quireꞌ mʌꞌ u cꞌat u bin ich u ruꞌumin Judea quireꞌ u tsꞌurirob u winiquirob judío u cꞌat u quinsicob Jesús.
2 Tabar u cꞌuchur tu qꞌuinin u quiꞌ janʌnob u winiquirob judío raꞌ u qꞌuinin cu cꞌʌxicob paser an ten bic araꞌb ten Cꞌuj uch.
Los líderes judíos quieren matar a Jesús (Juan 7.1-24)
―Mʌꞌ a pꞌatʌr teraꞌ caꞌ xicoꞌon ich u ruꞌumin Judea.
Soc a camsʌwinicob caꞌ bin u yirob a carem beyaj tu qꞌuinin u quiꞌquiꞌ janʌnob u winiquirob judío soc yerob Cꞌuj tu tsꞌaj a beyaj tech.
4 Quireꞌ mʌnaꞌ mac cu muc u beyaj wa ju cꞌat u yeticob tu cotor mac u beyaj.
Joqꞌuen es a bʌj tiꞌ a pimob wa ca beyaj tiꞌ Cꞌuj.
5 Cax rajiꞌ yʌjtaquirob mʌꞌ ju yacsob tu yorob u yitsꞌinob Jesús.
6 Jesús caj yaꞌaraj tiꞌ u yitsꞌinob:
―Mʌꞌ cꞌuchuc tu qꞌuinin ten quir in bin ich u cajar Jerusalén quir in quiꞌquiꞌjanʌn.
Chen techex xenex wa ja cꞌat a binex.
7 Rajen,
mʌꞌ ja wirej,
a mac tiꞌ yʌn ich yocꞌocab mʌꞌ ju pꞌactiquechex a techexoꞌ,
chen a tenoꞌ cu pꞌactiquenob quireꞌ quin waꞌaric tiꞌob cꞌas cu beticob.
8 Xenex ta quiꞌquiꞌ janʌnex ich u cajar Jerusalén.
Quireꞌ a tenoꞌ mʌꞌ cꞌuchuc tu qꞌuinin in bin hasta cu cꞌuchur tu qꞌuinin jeroj quin bin.
9 Caj tsꞌoc yaꞌaric mʌꞌ ju bin,
tiꞌ pꞌat Jesús ich Galilea yejer u camsʌwinicob.
Jesús cu bin ich u cajar Jerusalén u qꞌuinin cu cꞌʌxicob paser quir u quiꞌquiꞌ janʌnob
10 Caj tsꞌoc u binob u yitsꞌinob Jesús ich u cajar Jerusalén quir u quiꞌquiꞌ janʌnob caj bin Jesús yejer u camsʌwinicob.
Mʌꞌ bin yejer u racꞌob chen tu junan yejer u camsʌwinicob caj bin,
quireꞌ mʌꞌ u cꞌat u yesic u bʌj tiꞌ a pimob.
11 U tsꞌurirob sacerdote tan u cʌxticob Jesús u qꞌuinin cu quiꞌquiꞌ janʌnob u winiquirob judío.
Tan u cꞌaticob:
―Tuꞌ yʌn?
―quijob.
12 Mʌꞌ ja wirej,
a pimob rajraꞌ cu tsicbarob tiꞌ Jesús.
Yʌn mac tan yaꞌaricob:
“Jach tsoy a Jesúsoꞌ.”
Chen yʌn u jerob cu yaꞌaricob:
“Bic tabar jach tsoy.
Quireꞌ cu tusaric tiꞌ mac.”
13 Quireꞌ cu sʌjticob u tsꞌurirob sacerdote.
Rajen cu manob u muc u aricob Jesús.
14 Caj cꞌuchij chumuc u qꞌuinin u quiꞌquiꞌ janʌnob Jesús caj bin ich carem naj tu cu naj cꞌujinticob Cꞌuj u winiquirob judío caj u yʌnxchun u camsic.
15 Caj jaqꞌuij yorob a pimob,
rajen tu yaꞌarob:
―Bic tabar ij quet winquirir caj u cʌnaj quireꞌ mʌnaꞌ mac tu camsaj chen u neꞌer u camsaꞌ?
16 Jesús caj u nuncaj tiꞌob tan yaꞌaric:
―Mʌꞌ raꞌ in tꞌʌn a quin camsic techex.
Rajiꞌ u tꞌʌn in Tet a mac tu tuchiꞌten.
17 Wa mac u cꞌat caꞌ u betej a baꞌ Cꞌuj u cꞌat.
Cu bin tsꞌabir u najtic ich u tꞌʌn Cꞌuj tuꞌ quin camsic wa rajiꞌ cu tar ich Cꞌuj wa chen in bʌjiriꞌ in tꞌʌn quin camsic.
18 A mac a cu camsic u bʌjiriꞌ u tꞌʌn tan u cʌxtic soc sʌjtaꞌ ten mac.
A tenoꞌ tan in cʌxtic caꞌ a sʌjtex a mac a tu tuchiꞌtajen.
Rajen mʌꞌ tan in tusariquex,
taj a baꞌ quin wac techex.
19 ’Moisés caj u tsecꞌtaj techex uch a baꞌ tu toc araj Cꞌuj uch.
Chen techex mʌꞌ tuririꞌ tan a quibiquex a baꞌ caj u yaꞌaraj Moisés uch quireꞌ wa ta quibajex,
mʌꞌ ja tsicbʌtiquex a cꞌatex a quinsiquenex.
20 A pimob caj u nuncob tan yaꞌaric:
―Acaꞌan quisin tech,
mac u cꞌat u quinsiquech?
21 Jesús caj yaꞌaraj:
―A tenoꞌ tin jawsa mac tuririꞌ,
u qꞌuinin ca jesiquex a bʌjex,
rajiꞌ tu jacꞌsaj a worex.
22 Moisés caj u tsꞌaj u tꞌʌnin quir a tsꞌiriquex a pararex xib tu cu wix.
Mʌꞌ Moisés tu yʌn aꞌrajiꞌ,
chen a nunquirex,
rajiꞌ tu yʌn aꞌraj.
Rajen cax u qꞌuinin ca jesiquex a bʌjex ca tsꞌiriquex a chan pararex xib.
23 Tsoy caꞌ quibiquex u tꞌʌn Moisés tu cu yaꞌaric:
“Tsꞌirej a chan pararex xib.”
Cax tu qꞌuinin ca jesiquex a bʌjex caꞌ tsꞌiric.
Rajen biquinin ca pꞌactiquenex ca wiric in jawsic mac u qꞌuinin ca jesiquex a bʌjex.
24 Mʌꞌ tsoy wa sep ca taꞌquiquex u joꞌr mac.
Caꞌ a quiꞌ tucrex wa taj tan u betic cꞌas mac.
Jesús cu tsicbar tu cu tar
25 A mac a tiꞌ cʌjaꞌanob ich u cajar Jerusalén caj yaꞌarob:
―A jeꞌ xibaꞌ mʌꞌ wa rajiꞌ tu cʌxticob u quinsej.
Los líderes tratan de arrestar a Jesús (Juan 7.25-53)
26 Iric tiꞌ yʌn.
Mʌꞌ tu mucraꞌr tu yaꞌaraj ich tu cotor mac.
U jach tsꞌurirob sacerdote mʌnaꞌ baꞌ caj u yaꞌarob tiꞌ.
Jaj ix tʌcoꞌ tan u quibicob rajiꞌ Cristo a cu taroꞌ.
27 A toꞌonexoꞌ ij querex tub u tar a ra xiboꞌ.
Chen caꞌ bin tac a Cristojoꞌ ij cʌjtaquirex mʌnaꞌ mac yer tub u tar ―baxuc caj yaꞌaraj a mac cʌjaꞌanob ich u cajar Jerusalén.
28 Rajen Jesús caj u cꞌam araj tu cu camsic ich carem naj tu cu naj cꞌujinticob Cꞌuj u winiquirob judío.
Caj u yaꞌaraj tiꞌ a pimob:
―Ca tucriquex a werenex.
Ca tucriquex a werex tub in tar.
In wʌcꞌʌs bʌjiriꞌ mʌꞌ taren chen a mac jach tajoꞌ,
rajiꞌ tu tuchiꞌtajen.
Chen a techexoꞌ,
mʌꞌ a werex maquiꞌ a tu tuchiꞌtajen.
29 A tenoꞌ ―quij Jesús―,
in wer quireꞌ tiꞌ in tar tub yʌniꞌ.
Quireꞌ rajiꞌ tu tuchiꞌtajen.
30 Rajen u cꞌatob u chuquicob Jesús quir u bin u mʌquicob tu cu maꞌcʌr winic.
Mʌꞌ cꞌuchaꞌan yorob u chuquejob Jesús quireꞌ mʌꞌ cꞌuchuc tu qꞌuinin cu chuquicob quir u mʌquicob.
31 Yʌn yaꞌab mac tu yacsob tu yorob tiꞌ quireꞌ yerob yʌjtaquirob.
Caj yaꞌarob:
―A jeꞌ xiboꞌ jach manan carem u beyaj caj u yesaj toꞌonex an ten bic cu yaꞌaric cu bin u betej Cristo caꞌ bin tac.
Rajen ij querex rajiꞌ Cristo.
A fariseosjoꞌ caj u tuchiꞌtajob policía quir u chuquicob Jesús
32 A fariseojoꞌ caj yubob yaꞌaric a mac tu yacsob tu yor tiꞌ Jesús.
Tu yubob yaꞌaricob a Jesúsoꞌ:
―Rajiꞌ Cristo a cu bin tar.
Rajen a fariseojoꞌ yejer u jach tsꞌurirob sacerdote caj u tuchiꞌtajob u policía a cu beyajob ich carem naj tu cu naj cꞌujinticob Cꞌuj u winiquirob judío quir u chuquicob Jesús quir u mʌquicob.
33 Jesús caj yaꞌaraj tiꞌ a pimob:
―Mʌꞌ yaꞌab u qꞌuinin quin pꞌatʌr tub yʌnechex quireꞌ bin in caꞌ tub yʌn a mac a tu tuchiꞌtajen.
34 Quireꞌ a techexoꞌ ca bin a cʌxtiquenex chen mʌꞌ ja bin a wirenexiꞌ.
Quireꞌ a tu quin binoꞌ mʌꞌ cꞌuchaꞌan a worex a tarex.
35 U winiquirob judío tan u pacran tsicbarob tan yaꞌaricob:
―Tub u wich u bin cu yaꞌaric mʌꞌ ic yʌnyʌn iric?
Tiꞌ wa cu bin ich ij quet winquirirob judío a tar yʌnob tantanxer ich u ruꞌumin u winiquirob griego?
U tiriꞌ cu bin u camsic u winiquirob griego.
36 Caj yaꞌarob:
―Baꞌ u cꞌat yaꞌaric toꞌonex a tu yaꞌaraj toꞌonex:
“Ca bin a cʌxtenex chen mʌꞌ ja bin a wiriquenex quireꞌ a tu quin binoꞌ mʌꞌ cꞌuchaꞌan a worex a tarex”?
―baxuc cu pacran tsicbarob u winiquirob judío.
A cu yacsic tu yor u tꞌʌn Cꞌuj rajraꞌ cu bin jocꞌar tsoy tu pixam
37 U qꞌuinin a jach noꞌjoꞌ raꞌ u qꞌuinin quir u tsꞌocsic u quiꞌquiꞌ janʌnob u winiquirob judío.
Raꞌiriꞌ u qꞌuinin caj riqꞌuij caj chꞌicrʌj Jesús caj u cꞌam araj tiꞌ a pimob,
tan yaꞌaric:
―Wa mac cu yucꞌchʌjʌr,
arej caꞌ tac ten quir u yucꞌur.
38 Mʌꞌ ja wirej,
a mac a cu yacsic tu yor ten,
jeꞌ u yʌn tar tu pixam an ten bic yicꞌ jaꞌ cu bosirancʌr a cu tsꞌic u cuxtar a ricbenoꞌ quireꞌ baxuc cu yaꞌaric ich u tꞌʌn Cꞌuj ―baxuc cu tsicbar Jesús.
39 Mʌꞌ ja wirej,
cu tsicbar tiꞌ u Tajꞌor u Pixam Cꞌuj a cu bin tsꞌabir tiꞌ a mac a cu yacsic tu yor tiꞌ.
U Tajꞌor u Pixam Cꞌuj mʌꞌ taquiꞌ quireꞌ mʌꞌ toy xic Jesús ich caꞌanan.
Mʌꞌ quet yorob u winiquirob judío
40 Tiꞌ yʌn mac tuꞌ yʌn Jesús caj yubob yaꞌaric baxuc aroꞌ caj u yaꞌarajob:
―Aroꞌ jach jaj yʌjtseqꞌuir u tꞌʌn Cꞌuj a tij cuꞌyajex yaꞌaraꞌ yʌn u tar.
41 Chen yʌn mac jujuntur tan yaꞌaricob:
―Rajiꞌ a jeraꞌ Cristo yʌjtaquir mac tu cotor.
Tiꞌ yʌn mac jujuntur tan yaꞌaricob:
―A Cristojoꞌ,
mʌꞌ u bin tar ich u ruꞌumin Galilea.
42 Quireꞌ cu yaꞌaric ich u tꞌʌn Cꞌuj tuꞌ tsꞌibaꞌan:
“A Cristojoꞌ a caꞌ bin tacoꞌ tiꞌ cu bin rochbir ten u nʌꞌ ich u cajar Belén quireꞌ David,
rajiꞌ u chꞌic sucuꞌun Cristo.
Tiꞌ cu bin rochbir ten u naꞌ Cristo quireꞌ tiꞌ rochaꞌb u chꞌic sucuꞌun ten u naꞌ.”
43 Rajen mʌꞌ quet yorob a pimob tiꞌ Jesús.
44 Yʌn mac u cꞌatob u chuquicob quir u mʌquicob.
Chen mʌnaꞌ mac tu chucajob.
U jach tsꞌurirob u winiquirob judío mʌꞌ ju yacsicob tu yorob tiꞌ Jesús
45 Caj urob a policíajoꞌ a cu beyajob ich carem naj tu cu naj cꞌujinticob Cꞌuj u winiquirob judío.
Caj cꞌuchob tiꞌ yʌnob u jach tsꞌurirob sacerdote yejer a fariseojoꞌ.
Caj cꞌataꞌb tiꞌob ten u jach tsꞌurirob:
―Biquinin mʌꞌ ta chuquexiꞌ?
46 Caj u nuncob a policíajoꞌ tan yaꞌaricob:
―Mʌnaꞌ mac cu tsicbar baxuc a tar yʌn xiboꞌ.
47 A fariseojoꞌ caj yaꞌarob:
―U tus aꞌbar techex xan?
48 Mʌꞌ ja wirej,
mʌnaꞌ u tsꞌurirob u winiquirob judío tu yacsaj tu yor tiꞌ.
Baxuc a tenoboꞌ u winiquirenob fariseo,
mʌꞌ tin wacsajob tin worob tiꞌ.
49 Chen a pimob tu yacsob tu yorob tub muchꞌaꞌanob.
Robob jach chichob u joꞌr.
Mʌꞌ yerob a baꞌ tsꞌibaꞌan ich u tꞌʌn Cꞌuj,
toc rʌc satob.
50 Tiꞌ yʌn Nicodemo a cu bin tsicbar yejer Jesús uch.
Acꞌbir caj binij.
Rajiꞌ tuririꞌ u tsꞌurir u winiquirob judío.
Caj u yaꞌarajob tiꞌ u yet winiquirob fariseo:
51 ―Mʌꞌ cꞌuchaꞌan ij corex ic tsꞌiquex u mucꞌyaj mac wa mʌꞌ toy ij cuꞌyex u tꞌʌn wa mʌꞌ tij quirex baꞌ u siꞌpir yʌn tiꞌ,
quireꞌ baxuc cu yaꞌaric u tꞌʌn Moisés.
52 Robob caj u nuncajob tiꞌ tan yaꞌaricob;
―A techoꞌ irech a mac a cu tar ich u ruꞌumin Galilea.
Xaquej a wirej tuꞌ tsꞌibaꞌan ich u tꞌʌn Cꞌuj.
Mʌꞌ ja bin a wirej,
cu yaꞌaric u tar tuririꞌ yʌjtseqꞌuir u tꞌʌn Cꞌuj ich u ruꞌumin Galilea.
A xquicoꞌ a nanij cu man tu cꞌasir
53 Jujuntur u tsꞌurirob u winiquirob judío caj rʌc binob tu yatoch.