Jesús cu jansic cinco mil xib
6
Pachir Jesús caj binij pichij cꞌacꞌnab Galilea.
U jer u cꞌabaꞌ u cꞌacꞌnabir Tiberias.
2 Yaꞌab mac tan u binob tu pach Jesús quireꞌ tu yirob carem u beyaj.
Baxuc caj yirob u jawsaꞌrob a mac yʌn u yajirir.
Jesús alimenta una multitud (Juan 6.1-15)
3 Rajen Jesús naquij ich u joꞌr chan pꞌuc wits yejer u camsʌwinicob Jesús caj curʌj quir u camsic tiꞌob.
4 Tabar u cꞌuchur tu qꞌuinin u quiꞌquiꞌ janʌnob u winiquirob judío raꞌ u qꞌuinin pascua.
5 Jesús caj u yiraj a pimoꞌ tan u tarob cʌxtaꞌbir.
Rajen caj u yaꞌaraj tiꞌ Felipe:
―Tu quic bin ic mʌnic yoch pan quir ic jansic a pimoꞌ a cu tarob.
6 Baxuc caj u yaꞌaraj Jesús quireꞌ cu tumtic Felipe yubej baꞌ cu yaꞌaric quireꞌ a Jesúsoꞌ yer baꞌ cu bin u betej.
7 Felipe caj u nuncaj tiꞌ tan yaꞌaric:
―Cax wa yʌn u taqꞌuin a mun cu jaric mac tuririꞌ yaxqꞌuin,
quir a mʌnic yoch pan tiꞌ a pimoꞌ,
mʌꞌ ju bin nupꞌur cax caꞌcaꞌ xetꞌ.
8 Andrés,
raꞌiriꞌ u camsʌwinic Jesús xan.
Andrés,
u yitsꞌin Simón Pedro,
caj yaꞌaraj tiꞌ:
9 ―Tiꞌ yʌn chan chichan teraꞌ yʌn tiꞌ cinco yoꞌoch pan betaꞌb tiꞌ u pʌcꞌar cebada raꞌ yoch u winiquirob judío.
Yejer caꞌtur cʌy.
Jeꞌ wa ju rʌc nupꞌur tiꞌ a pimoꞌ quireꞌ jach pim?
10 Jesús caj yaꞌaraj tiꞌ u camsʌwinicob:
―Arex tiꞌob caꞌ curacob ich suꞌuc.
Quireꞌ tiꞌ yʌn yaꞌab suꞌuc tub yʌnob.
Caj curʌjob,
yʌn cinco mil xib.
Mʌꞌ tu xacajob mun xquic yejer chichan.
11 Jesús caj u chucaj pan a cincojoꞌ caj u yaꞌaraj tiꞌ:
―Bayoꞌ Cꞌuj.
Caj tsꞌoquiꞌ caj u tsꞌaja tiꞌ u camsʌwinicob quir u jʌsicob tiꞌ a pimoꞌ,
a tiꞌ curaꞌanob.
Baxuc caj u betaj xan yejer yoch cʌy,
tan u rʌc jʌsic tiꞌob a mun u cꞌat.
12 Caj nachʌjob.
Jesús caj yaꞌaraj tiꞌ u camsʌwinicob:
―Marex u xetꞌer tuꞌ mʌꞌ ju rʌc jantob soc mʌꞌ u saꞌatʌr.
13 Rajen tu rʌc marob u xetꞌer.
Caj u butꞌob ich xac,
rʌc chupij doce xac a mun yʌn samoꞌ cinco yoch pan a betaꞌb tiꞌ yoch cebada.
14 A pimoꞌ caj u yirob baꞌ caj u betaj Jesús quireꞌ yerob carem u beyaj.
A pimoꞌ cu pacran aricob:
―Mʌꞌ wa rajiꞌ jach jaj yʌjtseqꞌuir u tꞌʌn Cꞌuj a araꞌb bin u caꞌ tar teraꞌ ich yocꞌocab?
15 Chen Jesús caj u najtaj a pimoꞌ u cꞌat u tsꞌʌricob u pach u yocar rey ten u piman.
Rajen Jesús caj bin tu junan ich u joꞌr pꞌuc wits.
Jesús cu ximbar ich yocꞌo jaꞌ
16 U camsʌwinicob Jesús tan yiricob tan yacꞌbirchʌjʌr caj bin ich chiꞌ cꞌacꞌnab.
Jesús camina sobre el agua (Juan 6.16-22)
17 Caj rucꞌocob ich chem quir u chꞌʌcticob cꞌacꞌnab quir u cꞌuchurob ich u cajar Capernaum.
Jach acꞌbirchʌjij tan u binob ich chem.
A Jesúsoꞌ,
mʌꞌ toy uruquiꞌ.
18 Caj u yʌnxchun u tar yicꞌar.
Jach cꞌam caj jach nuquij u tar u yamin xan.
19 Caj nachijob tan u binob yejer chem.
Yʌn cinco kilómetros caj yirob Jesús.
Tan u ximbar ich yocꞌo jaꞌ,
tan u cꞌʌs natsꞌʌr ich chem caj u chꞌaj sajquirob u camsʌwinicob caj yirob u tar Jesús.
20 Chen Jesús caj yaꞌaraj tiꞌob:
―Ten ca wiriquenex ―quij―,
mʌꞌ a chꞌiquex sajquir.
21 Caj quiꞌjij yorob caj acsaꞌb Jesús ich chem.
Rajen seb caj cꞌuchob pichij cꞌacꞌnab tu cu binob caꞌch.
A pimoꞌ tan u cʌxticob Jesús
22 Caj sasij a pimoꞌ a pꞌatob pichir cꞌacꞌnab caj u najtob binob u camsʌwinicob tu junanob ich chem.
Quireꞌ tiꞌ yʌn tuririꞌ u chem ich chiꞌ cꞌacꞌnab caꞌch.
Caj u najtob xan mʌꞌ binij Jesús yejer u camsʌwinicob.
El pan de vida (Juan 6.22-71)
23 Tarob u jer chemob tiꞌ u tar ich u cajar Tiberias tiꞌ manob tuꞌ jansaꞌb a pimoꞌ ten u Jaj Tsꞌurir caj tsꞌoc yaꞌaric:
―Bayoꞌ Cꞌuj ―quij.
24 Quireꞌ tu yirob mʌꞌ tiꞌ yʌn Jesús mʌꞌ tiꞌ yʌn u camsʌwinicob xan.
Caj ocob ich chem.
Caj binob ich u cajar Capernaum quir u cʌxtaꞌob Jesús.
A Jesúsoꞌ rajiꞌ irej yoch waj soc u tsꞌic u cuxtar munt qꞌuin tiꞌ mac
25 Caj cꞌuchob a pimob ich pichi cꞌacꞌnab caj u nupꞌob Jesús caj u cꞌatob tiꞌ,
tan yaꞌaricob:
―In wʌjcamsʌyʌjirech,
tuꞌ qꞌuin cꞌuchuquech teraꞌ?
26 Jesús caj yaꞌaraj tiꞌob:
―Taj quin waꞌaric techex.
Tarechex a cʌxtiquenex quireꞌ ta wuꞌyajex najchʌjechex tiꞌ a woch pan.
Mʌꞌ tarechex a cʌxtiquenex quireꞌ ta wacsajex ta wor ten a carem beyaj tin betaj.
27 Mʌꞌ rajraꞌ ca tucriquex a wochex quireꞌ cu xupur aroꞌ.
Caꞌ a cʌxtex a wochex tiꞌ a pixamex quireꞌ munt qꞌuin tiꞌ yʌn a pixamex.
Jeꞌ in tsꞌic techex a tenoꞌ a mac tuchiꞌtaꞌb ten Cꞌuj.
Quireꞌ baxuc caj u tsꞌaj in beyaj in Tet Cꞌuj.
28 A pimob caj u nuncob tan yaꞌaricob:
―Bic tabar ic betic u beyaj Cꞌuj?
29 Jesús caj u nuncaj tiꞌob tan yaꞌaric:
―Raꞌ u beyaj Cꞌuj quir a wacsiquex ta worex ten quireꞌ tu tuchiꞌten Cꞌuj.
30 A pimob caj yaꞌarob:
―Baꞌ carem beyaj ca wesic tenob soc cꞌuchaꞌan in worob in wacsicob tin worob tiꞌ a tꞌʌn?
Baꞌ beyaj ca wesic tenob?
31 Ic nunquir caj u jantob yoch mana a irej waj uch ich tacay ruꞌum.
Baxuc cu yaꞌaric tu tsꞌibaꞌan u tꞌʌn Cꞌuj:
“A tu tsꞌaj tiꞌob yoch waj a manajoꞌ a cu tar ich caꞌanan.
Baxuc tech yʌn a tsꞌic tenob.”
32 Jesús caj yaꞌaraj tiꞌob:
―Taj quin wac techex.
Mʌꞌ Moisés caj u tsꞌaja tiꞌ a nunquirex yoch pan a manajoꞌ ich tacay ruꞌum.
Cꞌub u beyaj Moisés ten Cꞌuj.
Chen Cꞌuj tu tsꞌaj tiꞌob quir u janticob.
A tu jantajob a nunquirex uch chen quir u cuxtar a teraꞌ ich yocꞌocab.
Chen bajeꞌrer in Tet cu bin u tsꞌic techex a wochex quir a cuxtar munt qꞌuin.
33 A Cꞌujoꞌ cu tsꞌic yoꞌoch a jach jaj cu tar tiꞌ caꞌanan.
A jeꞌ ochaꞌ quir a cuxtarex munt qꞌuin a mac a tiꞌ yʌnob ich yocꞌocab.
34 A pimob caj u yaꞌaraj tiꞌ Jesús:
―In Jaj Tsꞌurob rajraꞌ ca tsꞌic tenob in woch panob a ca tsicbʌtic tenob bajeꞌrer.
35 Jesús caj yaꞌaraj tiꞌob:
―An ten bic cu cuxriquechex tiꞌ a woꞌoch wajex.
Baxuc a tenoꞌ iren waj quir a cuxtarex munt qꞌuin.
A mac a cu tar tin wicnʌn tan yacsic tu yor ten.
Aroꞌ irej wa mʌꞌ u yucꞌchʌjʌr baxuc irej wa mʌꞌ ju wiꞌchʌjʌr xan.
36 Chen a tenoꞌ caj in waꞌaraj techex cax ta wirenex mʌꞌ a cꞌatex a wacsex ta worex ten.
37 Tu cotor mac a cu tsꞌabʌr tiꞌ ten Cꞌuj.
Jeꞌ u tar tin wicnʌn.
A mac a cu tar tin wicnʌn ten quiꞌ in wor in tsꞌic tiꞌob u cuxtar munt qꞌuin.
Mʌꞌ biqꞌuin quin bin in jocꞌsic.
38 In Tet caj u tuchiꞌtajen mʌꞌ quir in betic a baꞌ in cꞌat a tenoꞌ.
A tenoꞌ taren quir in betic a baꞌ u cꞌat in Tet quireꞌ rajiꞌ tu tuchiꞌten.
39 In Tet a mac a tu tuchiꞌten,
u cꞌat u yiric tu cotor mac a tu tsꞌajten mʌꞌ u saꞌtʌr mʌꞌ tuririꞌ.
Wa cu quimin jeꞌ in ricꞌsic caꞌ bin cꞌuchuc tu qꞌuinin u xur tꞌʌneꞌ.
40 Baxuc u cꞌat in Tet xan tu cotor mac a cu yaꞌaric:
“U pararech Cꞌuj” tiꞌ ten.
A mac a cu quibic in tꞌʌn jeꞌ in taquic soc u cuxtar munt qꞌuin.
Wa cu quimin jeꞌ in ricꞌsic caꞌ bin cꞌuchuc tu qꞌuinin u xur tꞌʌneꞌ.
41 U winiquirob judío caj u yʌnxchun u choctar yorob tiꞌ Jesús quireꞌ a baꞌ caj u yubob yaꞌaric quireꞌ Jesús caj u yaꞌaraj:
“A tenoꞌ iren a woch wajex a cu tar ich caꞌanan quir a cuxtarex munt qꞌuin.”
42 U winiquirob judío caj yaꞌarob;
tan u pacran aricob:
―Mʌꞌ wa rajiꞌ Jesús,
u parar José?
Ij quiramʌn u tet yejer u nʌꞌ.
Chen cu yaꞌaric tiꞌ u tar ich caꞌanan.
Bic tabar aroꞌ?
43 Jesús caj u nuncaj tiꞌob tan yaꞌaric:
―Mʌꞌ u choctar a worex ten.
44 Mʌnaꞌ mac cu bin tar tin wicnʌn quir u yacsic tu yor wa mʌꞌ tetaꞌb ten Cꞌuj a mac tu tuchiꞌtajen.
A mac cu tar tin wicnʌn quir u yacsic tu yor wa cu quimin jeꞌ in caꞌ ricꞌsiqueꞌ caꞌ binin cꞌuchuc u qꞌuinin cu xur tꞌʌneꞌ.
45 Mʌꞌ ja wirej,
baxuc tu tsꞌibtajob yʌjtseqꞌuirob u tꞌʌn Cꞌuj uch,
tan yaꞌaricob:
“Tu cotor mac cu bin camsabir ten Cꞌuj.”
Baxuc caj u yaꞌarajob yʌjtseqꞌuirob u tꞌʌn Cꞌuj.
Rajen tu cotor mac tu yubob a baꞌ caj u yaꞌaraj Juan a mac Jesúsoꞌ,
quij Juan.
Rajiꞌob camsaꞌb ten Cꞌuj,
rajen cu tar tin wicnʌn quir u cʌnicob in tꞌʌn.
46 ’Mʌnaꞌ mac yiramʌn u wich Cꞌuj.
Caj yaꞌaraj Jesús.
Chen ten tin junan caj in wiraj u wich Cꞌuj quireꞌ tiꞌ in tar a tenoꞌ ―quij Jesús―.
47 Taj a baꞌ quin wac techex ―quij Jesús―,
a mac a cu yacsic tu yor teneꞌ yʌn u cuxtar munt qꞌuin.
48 A tenoꞌ iren a woch wajenex ―quij Jesús―,
quir in tsꞌic a cuxtarex munt qꞌuin.
49 A nunquirex a uchoꞌ caj u jantob yoch mana irej a woch panex ich tacay ruꞌum.
Chen mʌꞌ ju yirob u cuxtar munt qꞌuin cax tu jantajob a manajoꞌ,
chen quimob.
50 A woch panex a quin tsicbar techex,
toc tarij tiꞌ caꞌananoꞌ soc a mac a cu jantic tiꞌ jeꞌ u cuxtar munt qꞌuineꞌ.
51 A tenoꞌ taren ich caꞌanan,
iren a woch wajenex quir a cutarex munt qꞌuin.
Tu cotor mac a cu jantic yoch waj a quin tsicbar tiꞌ techex,
jeꞌ u cuxtar munt qꞌuineꞌ.
A woch wajex a quin tsꞌic techex rajiꞌ in winquirir.
Jeꞌ in tsꞌic tiꞌ soc tu cotor mac cu bin u cuxtar munt qꞌuin.
52 Rajen u winiquirob judío caj u chich arob tan yaꞌaricob:
―Bic tabar cu bin u tsꞌic toꞌon u winquirir quir ic chiꞌic?
53 Jesús caj yaꞌarj tiꞌob:
―Taj quin waꞌaric techex wa mʌꞌ a jantiquex in winquirir a tenoꞌ iren techex mʌꞌ ja bin a cuxtarex munt qꞌuin.
Wa mʌꞌ ja wuqꞌuiquex in qꞌuiqꞌuer mʌꞌ ja bin a cuxtarex munt qꞌuin.
54 A mac a cu jantic in winquirir yejer in qꞌuiqꞌuer cu yuqꞌuic,
munt qꞌuin cu bin cuxtar wa cu quimin.
A tenoꞌ jeꞌ in ricꞌsic caꞌ bin cꞌuchuc tu qꞌuinin u xur tꞌʌneꞌ.
55 Mʌꞌ ja wirej,
in winquirir irej a jach ochex a ca jantiquex.
In qꞌuiqꞌuer xanoꞌ irej a jach ucꞌurex a ca wuqꞌuiquex.
Rajen a mac a cu jantic jeꞌ u cuxtar munt qꞌuineꞌ.
Baxuc a mac a cu yuqꞌuic in qꞌuiqꞌuer jeꞌ u cuxtar munt qꞌuineꞌ.
56 A mac a cu jantic in winquirir baxuc cu yuqꞌuic in qꞌuiqꞌuer pꞌeriꞌen yejer quireꞌ tiꞌ yʌnen tu pixam.
57 In Tetoꞌ a mac tu tuchiꞌtajen rajiꞌ yʌn u cuxtar munt qꞌuin quireꞌ a Cꞌujoꞌ toc berer uch.
Rajen yʌn in cuxtar a tenoꞌ quireꞌ in Tet Cꞌuj.
Baxucoꞌ a mac a cu jantic in winquirir cu bin u cuxtar munt qꞌuin quireꞌ ten quin tsꞌic u cuxtar.
58 A woch wajex a quin tsicbʌtechex tsꞌoc u tar ich caꞌanan.
Rajiꞌ mʌꞌ quet yejer yoch mana a tu jantob a nunquirex uch.
Quireꞌ mʌꞌ tu yirob u cuxtarob munt qꞌuiniꞌ cax tu jantob a manajoꞌ toc rʌc quimob uch.
Chen a mac cu jantic a wajoꞌ a quin tsicbʌtechex bajeꞌrer munt qꞌuin cu bin cuxtar.
59 Jesús tiꞌ tu camsajob a jeraꞌ ich u chan najir tu cu naj cꞌujinticob Cꞌuj u winiquirob judío ich u cajar Capernaum.
Jesús cu camsic bic u cuxtarob munt qꞌuin
60 Yaꞌab u qꞌuinin tan u tar yaꞌab mac tu pach Jesús quir u cʌnicob u tꞌʌn.
Caj u yubob a baꞌ caj u yaꞌaraj Jesús caj yaꞌarob:
―Jach yaj ij cʌnic aroꞌ mʌꞌ ij cꞌat ij cuꞌyic aroꞌ.
61 Chen Jesús tu najtaj tu yor tan u choctar yorob u camsʌwinicob.
Rajen tu cꞌataj tiꞌob:
―Cu jocꞌsiquex wa ja worex a tin waꞌaraj techex?
62 Baꞌ ca bin a waꞌariquex wa caꞌ bin a wirex in bin tub in wʌcꞌʌs tar uch a tenoꞌ a mac tuchiꞌtaꞌben ten Cꞌuj?
63 Quireꞌ a pixamex jeꞌ u cuxtarex munt qꞌuin quireꞌ a winquirirex mʌꞌ nenoꞌjiꞌ.
Mʌꞌ ja wirej,
in tꞌʌn a tin waꞌaraj techex,
rajiꞌ tiꞌ a pixamex quir u cuxtarex munt qꞌuin.
64 Tiꞌ toj yʌnechex jun yarechex,
mʌꞌ toy a wacsex a worex.
Quireꞌ Jesús u toc er tu yʌnxchun u beyaj mac cu quibic u tꞌʌn,
baxuc a mac a cu bin u cꞌubur Jesús.
65 Caj araꞌb tiꞌob ten Jesús:
―Rajen caj in waꞌaraj techex uch mʌnaꞌ mac cu tar tu yʌnen quir u cʌnic in tꞌʌn wa mʌꞌ tetaꞌb ten Cꞌuj.
66 Rajen yaꞌab mac a cu sayʌr tu pach Jesús caj u pꞌʌtob u binob tu pach Jesús caj wʌcꞌʌs binob tu yatoch.
67 Jesús caj u cꞌataj tiꞌ u camsʌwinicob a docejoꞌ:
―Baꞌ ca tucriquex?
Jeꞌ wa ja wʌcꞌʌs binex ta watochex?
68 Simón Pedro caj u nuncaj tiꞌ Jesús tan yaꞌaric:
―Mʌnaꞌ mac quir ic bin ic tsicbar tiꞌ u tꞌʌn Cꞌuj.
Chen a techoꞌ yʌn a tꞌʌn quir ij cuxtarex munt qꞌuin.
69 Quireꞌ a tenoboꞌ tin toc wacsob tin worob tech.
Quireꞌ a techoꞌ in werob Cristojech rajiꞌ tu tsꞌaj a beyaj Cꞌuj quir a yamtiquenob quireꞌ u pararech Cꞌuj a cuxaꞌanoꞌ.
70 Jesús caj u nuncaj tiꞌob tan yaꞌaric:
―A tenoꞌ tin tetajechex doce chen tiꞌ yʌn tuririꞌ ich techex a mac acaꞌan quisin tiꞌ.
71 Jesús tan u tsicbar,
tiꞌ Judas u parar Simón Iscariote quireꞌ rajiꞌ cu bin u cꞌubic Jesús.
Quireꞌ rajiꞌ tuririꞌ ich a doce u camsʌwinicob.