Caj quinsaꞌb Juan a cu yacsic jaꞌ tu joꞌr mac
14
Raꞌ u qꞌuinin tiꞌ yʌn Jesús ich u cajar Nazaret.
Caj yub u rey Herodes tiꞌ yʌn Jesús.
Caj yubaj u jumbintaꞌ jach carem u beyaj Jesús.
Raꞌ Herodes gobernador u ruꞌumin Galilea.
2 Caj araꞌb ten Herodes tiꞌ a mac a cu yamticob u reyinticob Herodes:
―In wer rajiꞌ Juan ―quij Herodes―,
a cu yacsic jaꞌ tu joꞌr mac.
Riqꞌuij caj quimij rajen jach carem u beyaj Juan ―quij Herodes.
3-4 Uch chuc Juan ten Herodes.
Caj mac tu cu maꞌcʌr u winiquir.
Caj cꞌarar Juan.
Caj cꞌarij yoc Juan ten Herodes.
Caj araꞌb ten Juan tiꞌ Herodes:
―Mʌꞌ tsoy a chꞌic a muꞌ.
Herodías u cꞌabaꞌ u racꞌ u yitsꞌin Felipe.
Rajen chuc Juan.
5 Cax Herodes u cꞌat u quinsic Juan,
cu chꞌic sajquir tiꞌ a pimoꞌ.
Herodes yer jeꞌ u pꞌujur a pimoꞌ,
quireꞌ yerob a Juanoꞌ cu tsecꞌtic u tꞌʌn Cꞌuj.
6 Caj cꞌuchij tu qꞌuinin quir u cꞌʌꞌotic tuj rochaꞌb Herodes ten u nʌꞌ uch.
Caj u pʌyaj u racꞌob Herodes quir u quiꞌquiꞌ janʌnob.
Caj jocꞌ u tsꞌenʌꞌ Herodes.
Caj ocꞌatnʌjij tu pim a mac.
Jach tsoy yirir yocꞌat ten Herodes.
7 Tsꞌoc yocꞌat u tsꞌenʌꞌ,
caj yaꞌaraj tiꞌ u tsꞌenʌꞌ:
―Ʌcʌtan tu wich Cꞌuj wa baꞌ a cꞌat jeꞌ in tsꞌic tech.
Wa mʌꞌ in tsꞌa tech cax u quinsen Cꞌuj.
8 U tsꞌenʌꞌ Herodes caj bin tu yʌn u nʌꞌ.
Caj araꞌb tiꞌ ten u nʌꞌ:
―Xen cꞌatej caꞌ u xonchꞌʌctej u car Juan a cu yacsic jaꞌ tu joꞌr mac caꞌ u tsꞌaj tech u joꞌr Juan.
Caꞌ u butꞌej tech ich u rʌquir quir a peꞌjic u joꞌr Juan.
9 Caj yubaj u cꞌataꞌr ten u tsꞌenʌꞌ:
―Chuquej ten u joꞌr Juan.
Tu pachir tucraj quireꞌ mʌꞌ u cꞌat u quinsaꞌr Juan ten Herodes.
Quireꞌ tu rʌc uꞌyajob mac curaꞌan tu cu quiꞌquiꞌ janʌnob,
quireꞌ caj u toc araj:
“Jeꞌ in tsꞌic tech a baꞌ a cꞌat.”
Rajen caj tuchiꞌtaꞌb ten Herodes caꞌ xonchꞌʌctac u car Juan.
10 Caj yaꞌaraj Herodes:
―Xen xonchꞌʌctej u car Juan tu mʌcaꞌan.
11 Seb caj u chꞌaj u joꞌr Juan ich u rʌquir.
Caj tsꞌaꞌb tiꞌ xquic caj bin u tsꞌaj tiꞌ u nʌꞌ.
12 Caj tarob u camsʌwinicob Juan.
Caj tar chꞌaꞌbir u baquer Juan,
caj u mucob u baquer.
Tsꞌoc u muquicob u baquereꞌ,
caj bin arbir tiꞌ Jesús:
“Mʌnaꞌ Juan.”
Jesús caj u tsꞌaj yoꞌoch a cinco mil xiboꞌ
13 Jesús caj yubaj bic tabar caj quinsaꞌb Juan caj bin Jesús.
Tu junan caj binij.
Caj binij yejer chem tu mʌnaꞌ mac.
Caj yubob caj bin Jesús tu junan,
caj rʌc tar a pimoꞌ.
Caj rʌc cꞌuchob ich Jesús.
A pimoꞌ,
caj jocꞌob tu cajar caj binob ich yoc tu yʌn Jesús.
14 Caj oc Jesús ich chem caj yiraj jach pim mac caj u muchꞌquintob u bʌj ich Jesús.
Caj yiraj a pimoꞌ,
caj u yajquintaj quireꞌ otsir caj irir ten Jesús rajen.
Caj jawsaꞌb u yajirir a mac tar purbir.
15 Oqꞌuin caj cꞌuchij u camsʌwinicob ich Jesús.
Caj cꞌuchob u camsʌwinicob Jesús caj yaꞌarob:
―Cu bin ic yum.
Mʌnaꞌ mac a teraꞌ.
Arej u binob u mʌnejob yoꞌoch quir u janticob a pimoꞌ.
Arej tiꞌob caꞌ xicob u mʌnejob yoꞌoch ich u chan cajarob.
16 Jesús caj yaꞌaraj tiꞌob:
―Cax mʌꞌ ju binob ―quij Jesús―.
Tsꞌajex yoꞌoch pan.
17 Caj u nuncajob u camsʌwinicob:
―Mʌꞌ yaꞌab in woꞌoch panobiꞌ.
Yʌn cinco pan tenob.
Caꞌtur cʌy yʌn tenobiꞌ.
18 Jesús caj yaꞌaraj:
―Chuquej teraꞌ ―quij Jesús.
19 Jesús caj yaꞌaraj tiꞌ a pimoꞌ:
―Rʌc muchꞌquintex a bʌj.
Curenex ich suꞌuc.
Caj rʌc curʌjob.
Caj u ratꞌaj yoꞌoch pan a cinco panoꞌ.
Caj u ratꞌaj yoꞌoch cʌy xan,
caꞌtur cʌy.
Caj u pʌctaj caꞌanan caj u tꞌʌnaj Cꞌuj Jesús:
―Bayoꞌ Cꞌuj ―quij Jesús―.
Ta tsꞌaj ij coꞌochex pan.
Caj tsꞌoc u tꞌʌnic Cꞌuj Jesús,
caj u rʌc jʌsaj tiꞌ u camsʌwinicob.
Robob caꞌ u rʌc tꞌaxaj yoꞌoch tiꞌ a pim.
20-21 Caj u jantob a pimoꞌ,
cinco mil xib caj rʌc naꞌachʌjob.
Mʌꞌ u xacaj a xquic,
mʌꞌ u xacaj u chan tiꞌar.
Pachir caj u marajob doce xac,
chup u xetꞌer.
Caj u rʌc marob u xetꞌer quireꞌ mʌꞌ ju rʌc jantaj.
Jesús tan u bin ich yocꞌo jaꞌ
22 Seb caj yaꞌaraj Jesús yocarob u camsʌwinicob ich chem quir u chꞌʌctic cꞌacꞌnab.
Raꞌ yʌn u cꞌuchurob camsʌwinicob pach cꞌacꞌnab.
Pachir caꞌ bin cꞌuchuc Jesús.
Caj bin u tꞌʌnej caꞌ xicob a pimoꞌ.
23 Caj tsꞌoc u tuchiꞌtic a pimoꞌ,
caj rʌc binob.
Caj bineꞌ,
caj bin Jesús u tꞌʌnej Cꞌuj ich u joꞌr pꞌuc wits.
Tu junan caj bin.
Caj bin ic yum tiꞌ yʌn Jesús tu junan.
24 A chemoꞌ,
tiꞌ yʌn chumuc cꞌacꞌnab.
Caj cꞌuchij chumuc cꞌacꞌnab caj tar yicꞌar.
Caj nupꞌoꞌ yicꞌar ich chumuc cꞌacꞌnab.
Cu tsꞌicchꞌintaꞌr u chemin ten u yamin.
25 Cu sastar caj cꞌuchij Jesús tu yʌnob u camsʌwinicob.
Caj tar Jesús ich yocꞌo jaꞌ.
26 Caj yiraj u camsʌwinicob cu tar Jesús ich yocꞌo jaꞌ caj jaqꞌuij yorob.
Caj awʌtnʌjob quireꞌ sajʌcob.
Caj yaꞌarob:
―Quisin cu tar.
27 Seb caj u puraj u tꞌʌn,
Jesús caj yaꞌaraj:
―Chichquintej a worex,
ten ―quij Jesús―.
Mʌꞌ ja chꞌiquex sajquireꞌ ten.
28 Caj yaꞌaraj Pedro:
―Jaj Tsꞌur,
ar in tar tu yʌnech ich yocꞌo jaꞌ wa tech ca tar ich yocꞌo jaꞌ.
29 Caj yaꞌaraj Jesús:
―Cojen.
Caj jocꞌ ich chem Pedro.
Caj bin yocꞌo jaꞌ caj cꞌuchuc tu yʌn Jesús.
30 Caj yubaj u tar cꞌam yicꞌar Pedro caj jaqꞌuij yor.
Caj jaqꞌuij yoreꞌ caj u yʌnxchun u jurur.
Caj awʌtnʌjij:
―Taquen,
Jaj Tsꞌur.
31 Tabar u cꞌuchur ich Jesús caj jur.
Caj chuc u cꞌʌb ten Jesús,
caj jocꞌsaꞌb ten Jesús.
Caj araꞌb ten Jesús:
―Chichin ca wacsic ta wor ten Pedro.
Mʌꞌ ju yʌn jacꞌʌr a wor.
32 Caj wʌcꞌʌs oc Pedro ich chem yejer Jesús caj chꞌenij yicꞌar.
33 A mac a tiꞌ yʌnob ich chem,
caj rʌc xonrʌj tu yʌn Jesús quir u cꞌujintaꞌr Jesús.
Caj yaꞌarob:
―U pararech Cꞌuj.
Jesús caj u jawsaj u yajir ich u cajar Genesaret
34 Caj cꞌuchob ich chiꞌcꞌacꞌnab tu cajar Genesaret quireꞌ caj u chꞌʌctob cꞌacꞌnab.
35 A mac a tiꞌ yʌn ich u cajar Genesaret u cꞌʌꞌomʌnob Jesús.
Caj rʌc manob u jumbintejob tiꞌ yʌn Jesús.
Rajen rʌc tarob purbir u yajirir ich Jesús.
Cax u cajar nʌtsꞌaꞌan,
tiꞌ cu tarob purbir u yajirir.
36 Caj chich cꞌataꞌb tiꞌ Jesús ten a mac a yajeꞌ:
―Cax in tʌrejob yoquirir a nocꞌ wa ja cꞌat in tʌricob yoquir a nocꞌ ―quij yaꞌaraj tiꞌ Jesús.
Caj rʌc tarij yoquirir u nocꞌ Jesús caj rʌc jaw.