Jesús cu jawsic a mechoꞌ, a mac a characbar tu cuch yacʌr yaꞌarir, u cꞌabaꞌ yaꞌarir Betesda
5
Pachir caj cꞌuchij tu qꞌuinin u quiꞌquiꞌ janʌn u winiquirob judío.
Raꞌ u qꞌuinin pascua,
caꞌten binob Jesús yejer u camsʌwinicob ich u cajar Jerusalén.
2 Tiꞌ yʌn ich u cajar Jerusalén tu cuch yacʌr yaꞌarir.
Tiꞌ yʌn tu cu yocar yʌrʌcꞌ tʌmʌn yuc ich u jor u paꞌteꞌir tunich.
Tar cu binob ich carem naj a tʌmʌn yucoꞌ.
Yʌn u cꞌabaꞌ tu cu yacʌr yaꞌarir u cꞌabaꞌ Betesda.
Baxuc cu yaꞌaric ich u tꞌʌn hebreo Betesda.
Tiꞌ cꞌʌxaꞌan cinco yatoch tu nʌcꞌ tu cuch u yacʌr yaꞌarir.
Chen yatochob mʌꞌ paꞌteꞌtaꞌan.
Jesús cura en Sábado (Juan 5.1-15)
3 Tiꞌ muchꞌaꞌanob yaꞌab u yajirir yejer chꞌop u wich yejer a mac mech yoc yejer a mac a mʌꞌ ju riqꞌuir.
Rʌc tiꞌ yʌnob ich yatochob tu cuch yacʌr yaꞌarir characbarob ich ruꞌum.
Quireꞌ tan u pajicob u pecsaꞌr yaꞌarir.
4 Mʌꞌ ja wirej,
tar cu yeman yʌjmasir u tꞌʌn Cꞌuj tu cuch yacʌr yaꞌarir.
Tenten cu yeman yʌjmasir u tꞌʌn Cꞌuj quir u pecsic yaꞌarir.
Caj tsꞌoc u pecsaꞌ yaꞌarir,
a mac yʌn pʌybej em ich yaꞌarir caj jawij u yajir cax baꞌ yajirir.
5 Tiꞌ yʌn turiꞌ u winiquir judío jach uch tu cʌnaj u yajir.
Yʌn treinta y ocho yaxqꞌuin tiꞌ.
6 Jesús caj u yiraj tiꞌ charaꞌan.
Yer uch yajac rajen caj u yaꞌaraj tiꞌ:
―A cꞌat wa ja jawʌr?
7 A yajoꞌ caj u nunca tan yaꞌaric:
―In Jaj Tsꞌurir ―quij―,
mʌnaꞌ mac cu bin u yacsiquen tu cuch u yacʌr yaꞌarir,
cu tsꞌocar u pecsaꞌr yaꞌarir.
Cax in cꞌat in wocar,
u jer cu tar,
rajiꞌ cu batꞌan ocar.
8 Jesús caj yaꞌaraj tiꞌ:
―Riqꞌuen catsꞌe yor xaꞌan caꞌ ximbanʌquech.
9 Seb caj jawij caj u catsꞌa yor xaꞌan caj u yʌnxchun u ximbar.
Chen raꞌ u qꞌuinin cu jesic u bʌj u winiquirob judío caj jawsaꞌb ten Jesús.
10 Rajen u winiquirob judío caj yaꞌarob tiꞌ a mac jawsaꞌb:
―Tiꞌ toy u qꞌuinin quir ic jesic ic bʌjex,
tech tan a cʌrʌxbetic u tꞌʌn Moisés quireꞌ tan a cuchic yor xaꞌan.
11 A xiboꞌ caj u nuncaj tan yaꞌaric tiꞌob:
―A mac a tu jawsajen.
Rajiꞌ caj u yaꞌaraj ten:
“Catsꞌej yor xaꞌan caꞌ ximbanʌquech” ―quij.
12 Robob caj u cꞌatob tiꞌ:
―Mac caj u yaꞌaraj tech catsꞌej yor xaꞌan caꞌ ximbanʌquech?
13 A jawsaꞌb u yajirir mʌꞌ yer mac jawsej quireꞌ seb caj binij Jesús quireꞌ pim winicob caj u muchꞌquintajob u bʌj.
14 Pachir Jesús caj u nupꞌaj tu japꞌnin carem naj.
Jesús caj yaꞌaraj tiꞌ:
―Jawech bajeꞌrer.
Mʌꞌ toy jawac a siꞌpir wa ca pꞌatʌr ich a siꞌpir,
jach manan ca bin a mucꞌyaj.
15 A xiboꞌ caj bin ich u jach tsꞌurirob sacerdote caj yaꞌaraj tiꞌob:
―A mac a tu jawseniꞌ,
rajiꞌ Jesús.
16 Quireꞌ Jesús caj u jawsaj a xiboꞌ u qꞌuinin u jesic u bʌj u winiquirob judío rajen u jach tsꞌurirob sacerdote cu pꞌacticob Jesús.
U cꞌatob u quinsicob Jesús.
Jesús defiende su autoridad (Juan 5.16-47)
―In Tetoꞌ tiꞌ toy cu beyaj.
Baxuc aroꞌ tiꞌ toy quin beyaj xan.
18 Rajen u jach tsꞌurirob sacerdote u cꞌatob u jach quinsicob Jesús.
Cu tucricob mʌꞌ ju cʌnantaj u qꞌuinin tu cu jesicob u bʌj u winiquirob judío.
Bayiriꞌ quireꞌ caj yaꞌaraj:
“Rajiꞌ in Tet Cꞌuj.”
Baxuc tu pꞌeriꞌquintaj u bʌj yejer Cꞌuj.
U parar Cꞌuj, rajiꞌ tsꞌaꞌb u beyaj ten Cꞌuj
19 Jesús caj yaꞌaraj tiꞌob:
―Taj a baꞌ quin wac techex,
a tenoꞌ u pararen Cꞌuj.
In bʌjiriꞌ mʌꞌ cꞌuchaꞌan in wor tiꞌ baꞌ.
Quin chen betic a baꞌ quin wiric u betic in Tet.
A baꞌ cu betic in Tet,
baxuc a tenoꞌ quin betic quireꞌ u pararen.
20 In Tet cu yajquintiquen quireꞌ u pararen.
Cu yesic ten tu cotor baꞌ cu betic.
Techex bajeꞌrer ta wirex chichin a baꞌ caj in betaj.
Jeꞌ u chaꞌic in betic Cꞌuj jach manan carem in beyaj.
Caꞌ bin tsꞌocac in betic,
jach manan cu bin jacꞌʌr a worex.
21 An ten bic in Tet cu ricꞌsic a quimenoꞌ soc u tsꞌic u cuxtar.
Baxuc a tenoꞌ quin tsꞌic u caꞌ cuxtar a mac in cꞌat u caꞌ cuxtarob.
22 In Tetoꞌ mʌꞌ ju bin u jʌsic a mac yʌn u siꞌpirob.
Chen tu yaꞌaraj ten,
quireꞌ u pararen,
soc in jʌsic a mac yʌn u siꞌpirob.
23 Rajen tu cotor mac jeꞌ u sʌjtiquen an ten bic cu sʌjticob in Tet.
A mac a mʌꞌ ju sʌjtiquen cax u pararen Cꞌuj,
baxuc mʌꞌ ju sʌjtaꞌ in Tet a mac a tu tuchiꞌtajen.
24 Jesús caj yaꞌaraj tiꞌob:
―Taj quin waꞌaric techex:
Cꞌuchij tu qꞌuinin a mac a cu yubic in tꞌʌn a tenoꞌ u pararen Cꞌuj,
a mac a cu yubic in tꞌʌn wa cu yacsic tu yor tiꞌ a mac a tu tuchiꞌtajen,
jeꞌ u cuxtar munt qꞌuin.
Mʌꞌ ju bin tsꞌabir u mucꞌyaj.
Baxuc mʌꞌ ju bin satʌr chen cu bin tsꞌabir u cuxtar ricꞌben quir u cuxtar munt qꞌuin.
25 Taj quin waꞌaric techex.
Cꞌuchij tu qꞌuinin a mac a cu yubic in tꞌʌn a tenoꞌ u pararen Cꞌuj.
A techexoꞌ irechex wa quimrechex ʌcʌtan ten.
A mac a cu yacsic tu yor in tꞌʌn jeꞌ u cuxtar munt qꞌuineꞌ.
26 An ten bic in Tet Cꞌuj yʌn u mucꞌ quir u tsꞌic u cuxtar munt qꞌuin tiꞌ mac.
Baxuc caj u tsꞌaj ten u mucꞌ quir in tsꞌic u cuxtar munt qꞌuin tiꞌ mac,
quireꞌ u pararen.
27 Baxuc caj u tsꞌaj ten u mucꞌ quir in jʌsic mac a yʌn u siꞌpirob quireꞌ a tenoꞌ bajenenoꞌ winic ich yocꞌocab.
28 Mʌꞌ u jacꞌʌrex a worex quireꞌ caj in waꞌaraj techex aroꞌ.
Mʌꞌ ja wirej,
jeꞌ u cꞌuchur tu qꞌuinin tu cotor mac a quimenoꞌ cu bin u yubic in tꞌʌn quireꞌ u pararen Cꞌuj.
29 Tu cotor mac cu bin riqꞌuir tu mucnaj.
A mac a tu betaj tsoy cu bin cuxtar munt qꞌuin ich caꞌanan.
A mac a tu betaj cꞌasoꞌ cu bin tsꞌabir u mucꞌyaj quireꞌ raꞌ u boꞌorir u siꞌpirob.
A mac a cu yaꞌaricoꞌ taj tiꞌ Jesús
30 Jesús caj yaꞌaraj:
―A tenoꞌ ―quij―,
in bʌjiriꞌ mʌꞌ cꞌuchaꞌan in wor tiꞌ baꞌ.
An ten bic caj u yaꞌaraj in Tet baxuc quin bin in jʌsic a mac a yʌn u siꞌpirob.
Taj quin bin in jʌsic mac.
A tenoꞌ mʌꞌ in bin in jʌsej an ten bic in cꞌat.
A tenoꞌ quin betic an ten bic u cꞌat in Tet a tu tuchiꞌtajen.
31 Quireꞌ techex ca tucriquex in bʌjiriꞌ quin tsicbar tin junan.
Rajen ca tus tucriquex mʌꞌ cꞌuchaꞌan a worex a wacsiquex ta worex ten.
32 Yʌn ten mac cu tsicbar tiꞌ ten.
Taj a baꞌ cu tsicbar tiꞌ ten.
33 A techexoꞌ ta tuchiꞌtajex mac quir u cꞌataꞌ tiꞌ Juan a cu yacsic jaꞌ caj u joꞌr mac.
Taj a baꞌ tu yaꞌaraj techex Juan ten.
34 Mʌꞌ baꞌwir Juan quir u tsicbar ten.
Quin chen aric techex aroꞌ quir in cꞌasictechex soc cꞌuchaꞌan a worex a wacsiquex ta worex.
35 A Juanoꞌ irej quib,
cu yeꞌcꞌacꞌtic a berex soc chʌcaꞌan a berex tu ca binex.
Cax tabar u qꞌuinin,
Juan caj u camsaj techex soc a werex ten.
Quiꞌex a worex caj u tsecꞌtaj techex Juan.
36 A Juanoꞌ,
tu chen tsicbʌtajen.
Chen in beyaj cu chaꞌic Cꞌuj in betic jach carem.
Aroꞌ cu yesic techex Cꞌuj tu tuchiꞌtajen.
37 In Tet Cꞌuj a mac tu tuchiꞌtajen,
rajiꞌ cu tsicbʌtic ten.
A techexoꞌ mʌꞌ ja wuꞌyʌmʌnex chichin u tsicbar,
mʌꞌ ja wiramʌnex bicyʌraꞌ Cꞌuj.
38 Quireꞌ mʌꞌ tiꞌ yʌn u tꞌʌn ta pixamex.
Rajen mʌꞌ ja wacsiquex ta worex tiꞌ ten a mac tu tuchiꞌtajen Cꞌuj.
39 Mʌꞌ ja wirej,
rajraꞌ ca quiꞌ xaquiquex u tꞌʌn Cꞌuj tu tsꞌibaꞌan quireꞌ ca tus tucriquex baxucoꞌ ca bin a cuxtarex munt qꞌuin.
Chen u tꞌʌn Cꞌuj mʌꞌ ju yaꞌaric aroꞌ.
Cu tsicbar tiꞌ ten a tsꞌibaꞌan u tꞌʌn Cꞌuj quir in tsꞌic a cuxtarex munt qꞌuin.
40 Chen a techexoꞌ mʌꞌ ja cꞌat a wacsiquex ta wor tiꞌ ten quir in tsꞌic a cuxtarex munt qꞌuin.
41 ’Cax mʌꞌ a sʌjtiquenex mʌꞌ jin pʌqꞌuiquechex.
42 Quireꞌ in werechex,
mʌꞌ ja yajquintiquex Cꞌuj ta pixamex.
43 A techexoꞌ mʌꞌ a cꞌat a wacsiquex ta wor tiꞌ ten cax tiꞌ in tar ich in Tet.
Chen a mac mʌꞌ tuchiꞌtaꞌb ten in Tet ca sʌjtiquex.
44 Mʌꞌ cꞌuchaꞌan a worex a wacsiquex ta worex quireꞌ ca pachtiquex caꞌ u tus yirechex a racꞌob jach tsoyechex.
Mʌꞌ ja wirej,
mʌꞌ tan a cʌxtiquex soc chen Cꞌuj cu yiriquechex jach tsoyechex.
45 Mʌꞌ a chen tucriquex wa chen ten quin bin in taꞌquiquex a joꞌrex ʌcʌtan tiꞌ in Tet.
Quireꞌ ca tus tucriquex a quiꞌ cʌnantiquex tu cotor a baꞌ tsꞌibtaꞌb ich u tꞌʌn Moisés.
Ta pʌyex a siꞌpirex quireꞌ mʌꞌ ta quibex an ten bic caj u yaꞌaraj Moisés uch.
46 Wa ta quibex a baꞌ caj u tsꞌibtaj Moisés baxuc jeꞌ a quibiquex in tꞌʌn quireꞌ Moisés tu tsꞌibtaj ten uch.
47 Quireꞌ wa mʌꞌ a quibiquex a baꞌ caj u tsꞌibtaj Moisés uch,
baxuc xan mʌꞌ ja bin a quibex a baꞌ quin wac techex xan ―baxuc caj yaꞌaraj Jesús tiꞌ u jach tsꞌurirob sacerdote.