Yʌjcarirob u corir uva
12
Jesús caj u yʌnxchun u camsic a yaꞌab macob,
caj u camsaj baxuc a jeraꞌ soc yerob a mac a mʌꞌ u cꞌat yacsic u yor quireꞌ bin u caj ich cꞌacꞌ.
Rajen caj u camsaj a jeraꞌ:
―Tiꞌ yʌn mac cuch caj tsꞌoc u chꞌʌquic u cheꞌer u cor,
caj u rʌc tocaj u robirir,
caj u pʌcꞌaj u yaqꞌuir uva.
Caj tsꞌoc u pʌqꞌuic caj u paꞌteꞌtaj u cor,
caj u tsꞌʌpquintaj tunich quir u chꞌictar caꞌanan soc u cʌnantic u wich uva soc mʌꞌ u rʌc mʌqꞌuicob chꞌichꞌ.
’Caj yaꞌaraj u cʌnataꞌrob u cor ten u winiquirob,
quireꞌ bin u caj nachir.
San Marcos 12.1-17
2 Caj cꞌuchij tu qꞌuinin u tꞌaquicob u wich uva u jach tsꞌurir caj u tuchiꞌtaj u cꞌurew tuririꞌ quir u cꞌatic u boꞌorir tu tu tꞌacajob u wich uva tiꞌ u yʌjcarirob u corir uva.
Quireꞌ caꞌ u jʌsob ti u tsꞌurirob u boꞌorir u cor u tsꞌurir.
3 Caj chuc jʌtsꞌbir ten yʌjcarirob u corir uva caj wʌcꞌʌs tuchiꞌtaꞌb ich u tsꞌurir,
mʌnaꞌ baꞌ tsꞌaꞌb tiꞌ.
4 Tu wʌcꞌʌs tuchiꞌtaj u jer u cꞌurew,
barej caj u chꞌinajob u joꞌr,
caj u bujʌtstajob u yotꞌer u joꞌr,
toc chetaꞌb ten yʌjcarirob u corir uva caj wʌcꞌʌs tuchiꞌtaꞌb ten yʌjcarirob u corir uva ich u jach tsꞌurir.
5 Caj wʌcꞌʌs tuchiꞌtaj u jer rajiꞌ xan caj u quinsajob.
Bayiriꞌ xan yejer u jerob yaꞌab,
jun yarob caj u bʌbʌjʌtstajob,
jun yarob caj u quinsajob.
6 ’Tiꞌ toy yʌn uch tuririꞌ u parar ich yicnʌn u jach tsꞌurir,
u jach yaj u parar.
Jariꞌ mʌnaꞌ u jer mac quir u tuchiꞌtic,
rajen caj u tuchiꞌtaj u parar.
Yer u jach tsꞌurir jeꞌ u sʌjtaꞌ u parar ten yʌjcarirob u corir uva.
7 Caj cꞌuchij u parar caj irir ten yʌjcarirob u corir uva caj u pacran arajob ich u yet carirob u corir uva:
“Rajiꞌ u parar ic jach tsꞌurirex cu tar.
Rajiꞌ cu bin chꞌic u cor wa cu quimin u tet.
Caꞌ xicoꞌonex ij quinsex u parar soc toꞌonex quic bin ic chꞌiquex u cor.”
8 Caj u chucajob caꞌ xicob u quinsejob ich u nʌcꞌ cꞌaxir u cor.
Tiꞌ tu jach quinsajob ich u nʌcꞌ cꞌaxir u cor,
caj u pichꞌintajob u baquer.
9 Jesús caj u cꞌataj tiꞌob:
―Arex ten,
baꞌ cu bin u betic u jach tsꞌurir u cor tiꞌ yʌjcarirob u corir uva caꞌ bin tac?
Jeꞌ u tar u jach tsꞌurir quir u jocꞌsic u quinsej quir u tsꞌic tiꞌ u jerob mac.
10 Jesús caj u yaꞌaraj tiꞌ u jach tsꞌurirob u winiquirob judío:
―Mʌꞌ wa ja xacmʌnex a tsꞌibaꞌan u tꞌʌn Cꞌuj a jeraꞌ:
U yoc naj a caj u pichꞌintajob yʌjcꞌʌxirob naj quireꞌ mʌꞌ u cꞌatobiꞌ.
A jeraꞌ yoc naj a caj u purob mʌnaꞌ u jer jach chich u mucꞌ.
Chen caj u wʌcꞌʌs chucob quir u cꞌʌxicob naj soc u chichtar u mucꞌ.
11 A jeraꞌ caj betaꞌb ten Cꞌuj.
Mʌꞌ wa cu jacꞌar ij corex ij quiriquex?
12 Caj najtaꞌbir ten u jach tsꞌurirob tu cotor u winiquirob judío a baꞌ camsaꞌb tiꞌob sam raꞌ quir u najticob rajen caj u tumtajob u tuchiꞌticob chucbir Jesús.
Quireꞌ cu sʌjticob a pimob rajen pꞌat,
rajen binob.
Tar cꞌataꞌbir tiꞌ u boꞌorir gobierno
13 Caj u tuchiꞌtajob jun yarob u winiquirob judío a fariseojoꞌ yejer u camsʌwinicob Herodes tiꞌ Jesús quir u tus wayticob u tꞌʌn soc u tus taquicob u joꞌr ich gobernador.
14 Barej caj tarob caj u yaꞌarajob tiꞌ:
―In wʌjcamsʌyʌjirechob ―quij―,
in werob taj a baꞌ ca wac.
Baxuc taj a baꞌ ca camsic tiꞌ u tꞌʌn Cꞌuj.
Mʌꞌ a coyen ca chich aric tiꞌ mac,
quet ca waꞌaric tiꞌob.
Quireꞌ baxuc taj ca camsic tenob a baꞌ u cꞌat Cꞌuj tiꞌ a tenob.
Arej tenob quireꞌ in cꞌatob in werob wa tsoy in boꞌoticob in ruꞌumob tiꞌ rey?
Wa mʌꞌ tsoy in boꞌoticob in ruꞌumob tiꞌ rey?
15 Jesús yer a baꞌ cꞌas cu tucricob tu yorob caj u yaꞌarajob:
―Biquinin tarechex a tumtiquex in wor?
Esej ten tuririꞌ a taqꞌuinex caꞌ in wirej.
16 Caj u yesajob tiꞌ Jesús.
Rajiꞌ caj u yaꞌaraj tiꞌob:
―Mac jotꞌaꞌan u yoꞌochir?
Mac u cꞌabaꞌ tsꞌibaꞌan tiꞌ?
Caj u yaꞌarajob tiꞌ:
―Raꞌ u yoꞌochir u rey César,
jotꞌaꞌan ich sʌc taqꞌuin.
17 Caj u yaꞌaraj Jesús tiꞌob:
―Taj a baꞌ ca waꞌariquex.
Rajen caꞌ a quibex a baꞌ cu yaꞌaric techex u rey César,
baxuc xan,
caꞌ a quibex a baꞌ a cu yaꞌaric Cꞌuj tiꞌ techex.
Chan jacꞌaꞌan yorob a baꞌ yubajob yaꞌaric Jesús.
Tar cꞌataꞌbir bic tabar mac cu riqꞌuir tu quimirir
18 Baxuc xan,
tarob u winiquirob judío a saduceojoꞌ.
Aroꞌ cu yaꞌaric:
“Mʌꞌ u riqꞌuir mac tu quimirir.”
Caj tarob u cꞌatej baꞌ tiꞌ Jesús caj yaꞌarajob tiꞌ Jesús:
San Marcos 12.18-44
19 ―In wʌjcamsʌyʌjirechob ―quij―,
ic nunquirirex Moisés caj u tsꞌibtaj toꞌonex uch a baꞌ caꞌ ic betejex caj u yaꞌaraj wa ju mam cu quimin,
cu pꞌatʌr u racꞌ,
mʌnaꞌ u parar yejer,
caj quimij u mam tu junan.
Caj u yaꞌaraj Moisés,
raꞌ u yitsꞌin u mam,
rajiꞌ cu bin u chꞌic u raqꞌuintej u muꞌ.
Soc yiric wa jeꞌ u pararʌncʌr yejer soc u chꞌisic u parar,
irej wa ju tus parar u sucuꞌun uch.
20 A sucuꞌunbiroꞌ yʌn seis yitsꞌinob.
A sucuꞌunbiroꞌ,
rajiꞌ tu yʌn chꞌaj u racꞌ,
hasta u quimij mʌnaꞌ u parar.
21 A itsꞌinbiroꞌ,
rajiꞌ caj u tacaj u chuch u sucuꞌun.
Rajiꞌ caj u chꞌaj u racꞌ u sucuꞌun,
mʌnaꞌ u parar xan caj quimij,
a jach caꞌ itsꞌinbiroꞌ,
rajiꞌ caj u tacaj u chuch u caꞌ sucuꞌun.
Rajiꞌ caj u chꞌaj u racꞌ u caꞌ sucuꞌun.
Mʌnaꞌ u parar xan.
22 Hasta nup u rʌc chꞌic u yitsꞌin u mam,
hasta rʌc quiminob mʌnaꞌ u parar,
caj cꞌuchij tu qꞌuinin u quimin a xquicoꞌ,
caj quimij.
23 Caꞌ bin riqꞌuic tu quimirir,
mac cu bin u chꞌic u raqꞌuintej quireꞌ,
siete tu chꞌaj u mam?
24 Jesús tuneꞌ,
caj u nuncaj tiꞌ:
―Mʌꞌ wa ja wʌcꞌʌs bʌjiriꞌex ca tusariquex quireꞌ mʌꞌ ja najtex a baꞌ tsꞌibaꞌan ich u tꞌʌn Cꞌuj bayiriꞌ xan,
mʌꞌ a werex wa jach chich u mucꞌ Cꞌuj.
25 Quireꞌ caꞌ bin cꞌuchuc tu qꞌuinin u wʌcꞌʌs riqꞌuir mac tiꞌ u quimirir,
a xiboꞌ mʌꞌ u raqꞌuintej xquic.
Bayiriꞌ a xquicoꞌ mʌꞌ u mʌmintej xib quireꞌ u jer cu bin waysaꞌbir ten Cꞌuj robob irej yʌjtꞌʌnirob Cꞌuj caꞌanan.
26 Soc a cʌniquex baꞌ u cꞌat yaꞌaric,
jeꞌ u riqꞌuir mac tiꞌ quimirir.
Yʌn cꞌaj techex tub tsꞌibaꞌan u tꞌʌn Cꞌuj.
Caj yaꞌaraj Cꞌuj tiꞌ Moisés ich a ray chan cheꞌer a erar u caꞌ uch an bic Cꞌuj cu yaꞌaric:
“Tu cꞌujinten Abraham uch,
bayiriꞌ Isaac yejer Jacob.”
27 A Cꞌujoꞌ mʌꞌ quimen yiric a nunquirex,
cuxaꞌan yiric a Cꞌujoꞌ.
Mʌꞌ ja wirej,
cuxaꞌan yiric a Cꞌujoꞌ tu cotor mac.
Rajen mʌꞌ quiꞌjij a waquex.
Teꞌen u tꞌʌn ich u tꞌʌn Cꞌuj a jach noꞌojoꞌ
28 Caj u jutsꞌaj u bʌj tuririꞌ ich Jesús,
yʌjcamsʌyʌjir u tꞌʌn Moisés a mac caj u yubaj uch bic cu nunquicob u tꞌʌn Jesús a saduceojoꞌ.
Tsoy caj u yubaj u nunquic Jesús tiꞌ u pacran tꞌʌnob,
caj u cꞌataj tiꞌ:
―Arej ten a jach manan tsoyir u tꞌʌn Cꞌuj ich tu cotor caꞌ in quibejob.
29 Jesús tuneꞌ caj u nuncaj tiꞌ:
―A jeraꞌ a jach manan tsoyir u tꞌʌn Cꞌuj ich tu cotor:
“Uꞌyex tu cotor u winiquirechex israel a Jaj Tsꞌuroꞌ,
rajiꞌ ij Cꞌujirex,
jariꞌ rajiꞌ ic Jaj Tsꞌurirex.
30 Yajquintej Cꞌuj,
quireꞌ rajiꞌ a Jaj Tsꞌurirex.
Quiꞌ yajquintej Cꞌuj yejer tu cotor a pixam,
yejer tu cotor a mucꞌ yejer tu cotor a wor xan”,
quireꞌ rajiꞌ pʌybej ich u tꞌʌn Cꞌuj.
Rajen caꞌ a quiꞌ quibex a jeraꞌ.
31 Quet bayiriꞌ tiꞌ yʌn u jer a cu yaꞌaric:
“Yajquintej a racꞌob an bic ca wʌcꞌʌs yajquintic a bʌjiriꞌreꞌ.”
Mʌnaꞌ u jer tu tsꞌibaꞌan ich u tꞌʌn a jach manan noj tiꞌ aroꞌ.
32 A yʌjcamsʌyʌjir u tꞌʌn Moisés tunoꞌ,
caj u yaꞌaraj tiꞌ:
―Jach taj caj a waꞌaraj ten,
in wʌjcamsʌyʌjirech,
caj a waꞌaraj jach taj,
tuririꞌ Cꞌuj yʌn,
mʌnaꞌ u jer,
jariroꞌ.
33 Taj caj a waꞌaraj caꞌ ic yajquintex Cꞌuj yejer tu cotor ic pixamex yejer tu cotor ic tucurex yejer tu cotor ic muqꞌuex,
bayiriꞌ xan,
caꞌ ic yajquintex ic racꞌobex an bic ic wʌcꞌʌs bʌjex ic yajquintiquex,
a jeraꞌ a caj a waꞌaraj jach manan tiꞌ tu cotor a baꞌ ʌrʌcꞌaꞌan a cu toquic quir u sijic tiꞌ Cꞌuj,
bayirꞌ tiꞌ tu cotor a baꞌ cax cu sijicob tiꞌ Cꞌuj.
34 Jesús caj u toc uꞌyaj tsoy an bic caj u nuncaj tiꞌ a yʌjcamsʌyʌjir u tꞌʌn Moisés quireꞌ caj u nuncaj an bic caj u najtaj a baꞌ araꞌb tiꞌ ten Jesús.
Rajen caj u yaꞌaraj tiꞌ:
―Tabar a wocar tu cu bin u reyinticob Cꞌuj.
Jeroj tuneꞌ,
caj pꞌatob u tar u cꞌaticob baꞌ tiꞌ Jesús,
sajʌcob u cꞌatej.
A Cristojoꞌ u chꞌic parar u nunquir David
35 Barej tiꞌ yʌn Jesús ich a carem naj tu cu naj cꞌujinticob Cꞌuj u winiquirob judío tu cu camsic caj u cꞌataj tiꞌob:
―Bic tabar cu yaꞌaric a yʌjcamsʌyʌjirob u tꞌʌn Moisés wa Cristo rajiꞌ u chꞌic caꞌ parar u nunquir David?
36 Arex ten biquinin David caj u tꞌʌnaj:
“In Jaj Tsꞌurir” ―quij David.
Mʌꞌ ja wirej caj yamtaꞌb ten u Tajꞌor u Pixam Cꞌuj caj u tsꞌibtaj a jeraꞌ:
A Cꞌujoꞌ caj u yaꞌaraj tiꞌ in Jaj Tsꞌurir,
quij yaꞌaric David:
“Curen tin noj,
quij Cꞌuj,
hasta quin rʌc chꞌesic a mac a cu pꞌatiquech.”
37 Bic tabar Cristo u chꞌic caꞌ parar a nunquirex David wa David u bʌj tꞌʌnej:
“In Jaj Tsꞌurir”?
Rajen ij querex a Cristojoꞌ rajiꞌ mʌꞌ chen u chꞌic caꞌ parar a nunquirex David.
A macob a tiꞌ yʌnob,
quireꞌ pꞌencʌch yaꞌab tiꞌ yʌnob,
jach tsoy tu xiquinob caj u yubajob tiꞌ.
Jesús cu taꞌquic u joꞌr a yʌjcamsʌyʌjir u tꞌʌn Moisés
38 Tu cu camsic Jesús caj u yaꞌaraj tiꞌob:
―Quiꞌ cʌnantechex a bʌjex soc mʌꞌ a cʌniquex a yʌjcamsʌyʌjirob u tꞌʌn Moiséseꞌ.
Mʌꞌ ja wirej,
u yʌjcamsʌyʌjirob u tꞌʌn Moisés jach cꞌʌrʌp u nocꞌ cu manob soc u tus tucricob u racꞌob jach noj aroꞌ.
Quiꞌ yorob yiricob baxucob.
Jach quiꞌ yorob yiricob u tꞌʌnʌn ten u racꞌob tu cu naj bin u mʌnicob yoꞌochob quireꞌ cu yiricob tus noj aroꞌ.
39 Baxuc cu teticob u cutanob tu cu cutarob a jach noꞌojoꞌ tu cu naj cꞌujinticob Cꞌuj tu chan najirob.
Baxuc tu cu quiꞌquiꞌ janʌnob soc u tus irir jach nojob.
40 Mʌꞌ ja wirej,
a yʌjcamsʌyʌjirob u tꞌʌn Moisés cu tus aricob tiꞌ a xquicoꞌ a quimenob u mamob soc u tus tsꞌic yatoch yejer u baꞌtac cax a baꞌ yʌn tu yatochob.
Robob jach amaꞌan cu tsꞌocar u tꞌʌnicob Cꞌuj soc u racꞌob cu tus tucricob cu quiꞌ cꞌujinticob Cꞌuj.
Jach manan cu bin tsꞌabir u mucꞌyajob ten Cꞌuj quireꞌ cu beticob aroꞌ,
cax yerob u tꞌʌn Cꞌuj.
Chen u jer mac a mʌꞌ yerob Cꞌuj mʌꞌ neyaj cu bin mucꞌyajob.
U cuchir tu cu naj butꞌicob u taqꞌuinob
41 Quireꞌ curucbar Jesús ʌcʌtan tiꞌ tu cuchir tu cu naj butꞌicob taqꞌuin tu cu naj cꞌujinticob Cꞌuj u winiquirob judío.
Raꞌ taqꞌuin tiꞌ carem naj tu cu naj cꞌujinticob Cꞌuj.
Jesús caj u yiraj cu butꞌicob yaꞌab u taqꞌuin yaꞌab mac,
a neyʌn u taqꞌuinob.
42 Caj u yiraj xan xquic,
a quimen u mameꞌ,
otsir,
caj u butꞌaj u majan taqꞌuin,
caꞌtur chʌc taqꞌuin,
a mʌꞌ cojiꞌ.
43 Jesús tuneꞌ,
caj u tꞌʌnaj caꞌ tacob u camsʌwinicob tu yicnʌn,
caj u yaꞌaraj tiꞌob:
―Taj quin waꞌaric techex,
a jeꞌ xquicaꞌ a quimen u mameꞌ cax otsir,
chen caj u butꞌaj caꞌtur chʌc taqꞌuin a mʌꞌ cojiꞌ,
chen ʌcʌtan tu wich Cꞌuj coj caj u butꞌaj.
Chen u racꞌob cax yaꞌab caj u butꞌajob,
chen ʌcʌtan tu wich Cꞌuj mʌꞌ cojiꞌ.
44 A mac a ne yan u taqꞌuinob caj u butꞌajob u taꞌquin tu cuchir tu cu naj butꞌicob u taqꞌuinob u winiquirob judío tu cu naj cꞌujinticob Cꞌuj.
Quireꞌ jach manan yaꞌab caj u butꞌajob quireꞌ jach manan tꞌaj u taqꞌuinob,
chen raꞌ caj u butꞌob quireꞌ mʌꞌ u rʌc cꞌʌnicobeꞌ u taqꞌuin.
Chen a xquicoꞌ a otsiroꞌ caj u toc rʌc butꞌaj tiꞌoꞌ u taꞌquin cax mʌnaꞌ tu cu mʌnic yoꞌoch.