Jesús caj u tacajob u joꞌrob u winiquirob judío a fariseojoꞌ yejer u yʌjcamsʌyʌjirob u tꞌʌn Moisés
23
Jesús caj yaꞌaraj tiꞌ a pimoꞌ yejer u camsʌwinicob:
2 ―Ocob tu beyajob yʌjcamsʌyʌjirob u tꞌʌn Moisés yejer u winiquirob judío a fariseojoꞌ.
Rajiꞌob u beyajob quir u camsicob u tꞌʌn Moisés.
3 Quireꞌ raꞌ u beyajob quir u camsiquechex u tꞌʌn Cꞌuj,
rajen caꞌ a yʌn quibex a cu yaꞌariquexob ich u tꞌʌn Moisés.
Chen a baꞌ cu man u beticob,
mʌꞌ a yʌn cʌniquex.
Cax cu chen aric baꞌ jach tsoy,
chen cu manob ich cꞌas.
4 U manob u tus camsicob u tꞌʌn Moisés,
baxuc cu jenmasticob u tꞌʌn Cꞌuj.
Rajen u winiquirob judío mʌꞌ cꞌuchaꞌan yorob u quibicob.
Cu chen tsꞌʌricob u pach u racꞌob caꞌ u quibejob a baꞌ cu tus camsicob.
Chen u wʌcꞌʌs bʌjiriꞌob mʌꞌ ju quibicob a baꞌ cu tus camsicob,
mʌꞌ ju quibicob chichin.
5 Cu tus quiꞌ beyajob tiꞌ Cꞌuj soc u tus irir ten u racꞌob cu quiꞌ cꞌʌmicob u tꞌʌn Cꞌuj.
Bayiriꞌ cu tus buquinticob u nocꞌob,
a jach tsoy yejer u baꞌyinquirir,
soc sʌjtaꞌr ten u racꞌob.
6 Caj yaꞌaraj Jesús:
―U winiquirob judío a fariseojoꞌ cu pachticob cu quiꞌ acsicob u racꞌob tu cu quiꞌquiꞌ janʌnob,
tu cu naj cutar jach tsꞌur,
soc u tus quiꞌ sʌjtaꞌ ten u racꞌob.
Cax ich u chan najir tu cu naj cꞌujinticob Cꞌuj u winiquirob judío,
u cꞌat u cutarob tu yʌn u cutan a nojoꞌ soc u tus sʌjtaꞌ ten u racꞌob.
7 ’U cꞌat yubicob u tus quiꞌquiꞌ tꞌʌnʌn ten u racꞌob tu nanij cu mʌnicob yoꞌoch.
U cꞌat yubicob u tus quiꞌquiꞌ tꞌʌnʌn ten u racꞌob:
“In wʌjcamsʌyʌjirech.”
8 Caj yaꞌaraj Jesús:
―Mʌꞌ a chaꞌiquex u tꞌʌniquex:
“In wʌjcamsʌyʌjirech” quireꞌ chen winiquechex.
Ca chen ariquex tiꞌ Cꞌuj:
“In wʌjcamsʌyʌjirech” quireꞌ tu cotorechex a wʌcꞌʌs bʌjex.
9 Mʌꞌ a chaꞌic u tꞌʌniquex:
“Tet” teꞌ ich yocꞌocab quireꞌ tuririꞌ ic Jach Tet a tiꞌ yʌnoꞌ caꞌanan.
10 Mʌꞌ a chaꞌic u tꞌʌniquex:
“Jaj Tsꞌurir” ―quij―,
quireꞌ yʌn techex tuririꞌ a Jach Tsꞌurirex,
rajiꞌ Cristo a tuchiꞌtaꞌb ten Cꞌuj quir u taquiquechex.
11 A mac a nenoꞌjiꞌ ich techex,
rajiꞌ jach manan cu bin sʌjtaꞌbir ten a wet camsawinic,
wa cu cʌnic a cꞌurewoꞌ.
12 A mac a cu yaꞌaric:
“Jach caremen a tenoꞌ” jeꞌ u jocꞌsaꞌr ten Cꞌuj tiꞌ u beyaj.
Chen a mac a mʌꞌ ju yaꞌarej:
“Jach caremen” rajiꞌ cu bin acsaꞌbir ten Cꞌuj tu beyaj.
13 Jesús caj yaꞌaraj tiꞌ u winiquirob judío a fariseojoꞌ yejer u yʌjcamsʌyʌjirob u tꞌʌn Moisés:
―Otsirechex,
quireꞌ caj a tusarex tiꞌ a racꞌob.
A techexoꞌ,
mʌꞌ a chaꞌiquex u cꞌʌmicob u tꞌʌn Cristo a racꞌob irechex ca maquiquex u jor soc mʌꞌ u yocarob u reyinticob Cꞌuj ich caꞌanan.
Baxuc techex,
mʌꞌ a cꞌʌmiquex u tꞌʌn Cristo soc a wocarex tu cu bin u reyinticob Cꞌuj ich caꞌanan.
14 Jesús tiꞌ toy cu tꞌʌnic u winiquirob judío a fariseojoꞌ yejer yʌjcamsʌyʌjirob u tꞌʌn Moisés:
―Otsirechex,
quireꞌ caj a tusarex tiꞌ a racꞌob.
Quireꞌ ca tus taquiquex yatoch a xquicoꞌ a quimen u mameꞌ.
Caj a tus tꞌʌniquex Cꞌuj,
omaꞌan u tsꞌocar a tus tꞌʌniquex Cꞌuj soc u tus iricobechex a racꞌob.
Rajen jach manan yaj ca bin a wuꞌyiquex a mucꞌyajex caꞌ bin xuruc tꞌʌn.
15 Caj yaꞌaraj Jesús:
―Otsirechex,
quireꞌ caj a tusariquex tiꞌ a racꞌob.
Techex,
ca manex ich tu cotor yocꞌocab quir a camsiquex mac quir u cꞌujinticob Cꞌuj an ten bic ca cꞌujintiquex.
Caj tsꞌoc u cʌnicob jach manan cꞌasoꞌ.
Jach manan cꞌas a tiꞌoboꞌ cax a techexoꞌ cꞌasechex,
chen a mac a tu cʌnajechexob jach manan cꞌas.
Jach yaj cu bin u mucꞌajob ich cꞌacꞌ,
mʌꞌ neyaj ca bin a mucꞌyajex ich cꞌacꞌ.
16 ’Techex,
irechex a chꞌop u wichob,
chen a cꞌatex a pʌyiquex u bej u jer chꞌop u wichob.
Otsirechex,
quireꞌ caj a camsex a racꞌob.
Mʌꞌ ja wirej,
wa ca toc aric tiꞌ a racꞌob,
ca waꞌariquex tiꞌob:
“Taj quin waꞌaric tech quireꞌ tiꞌ yʌn carem naj tu cu naj cꞌujinticob Cꞌuj u winiquirob judío.”
Cax mʌꞌ ja betej a baꞌ ta toc aꞌaraj quireꞌ caj a waꞌaraj tiꞌ carem naj tu cu naj cꞌujinticob Cꞌuj u winiquirob judío rajen mʌꞌ a betej xan.
Chen wa ca toc ariquex tiꞌ a racꞌob:
“Taj quin waꞌaric tech quireꞌ tiꞌ yʌn oro ich carem naj tu cu naj cꞌujinticob Cꞌuj u winiquirob judío.”
Jeroj taj caꞌ a betex aroꞌ,
quireꞌ caj a waꞌarex tiꞌ oro a tiꞌ yʌn ich carem naj tu cu naj cꞌujinticob Cꞌuj u winiquirob judío.
17 Jach chich a joꞌrex,
quireꞌ mʌꞌ ja najtiquex.
Mʌꞌ ja wirej,
jach manan coꞌoj a carem naj tu cu naj cꞌujinticob Cꞌuj u winiquirob judío quireꞌ tiꞌ ca bin a cꞌujintiquex Cꞌuj.
A orojoꞌ mʌꞌ nejach coꞌoj,
chen tsoy quireꞌ tiꞌ yʌn ich carem naj tu ca naj cꞌujintiquex Cꞌuj.
18 Baxuc techex caj a camsex a racꞌob:
Wa ca toc aric tiꞌ a racꞌob:
“Taj quin waꞌaric tech quireꞌ tiꞌ yʌn u baꞌyinquirir tu cu quinsic yʌrʌcꞌ quir u tsꞌic tiꞌ Cꞌuj.”
Cax mʌꞌ ju betej a baꞌ caj u toc araj.
Chen wa mac cu toc aric tiꞌ u racꞌob:
“Taj quin waꞌaric tech quireꞌ yʌrʌcꞌ a tabar u quinsic ich carem naj.
Jeroj caꞌ u toc betej a baꞌ caj u yaꞌaraj.”
19 Jach chich a joꞌrex,
quireꞌ mʌꞌ ja najtex.
Mʌꞌ ja wirej,
jach manan tsoy u baꞌyinquirir tu cu naj quinsic yʌrʌcꞌ wacax quir u boꞌoticob u boꞌorir u siꞌpir.
Ich yocꞌor u baꞌyinquirir cu naj quinsob yʌrʌcꞌ rajen jach manan tsoyir u baꞌyinquirir,
quireꞌ tiꞌ cu boꞌotic u boꞌorir u siꞌpir a racꞌob.
20 Mʌꞌ ja wirej ―quij Jesús―.
A mac a caj u toc arar u racꞌob quireꞌ u baꞌyinquirir tu cu naj quinsic yʌrʌcꞌ wacax.
Cu toc aric tiꞌ a baꞌ yʌn yocꞌor xan,
mʌꞌ chen tu junan yʌn.
21 Mʌꞌ ja wirej,
a mac a caj u toc arar u racꞌob quireꞌ tiꞌ yʌn carem naj tu cu naj cꞌujinticob Cꞌuj u winiquirob judío.
Bayiriꞌ caj u toc araj u racꞌob xan,
quireꞌ Cꞌuj tiꞌ yʌn tu cu naj cꞌujinticob Cꞌuj,
quireꞌ rajiꞌ yʌnin Cꞌuj.
22 Wa caj a toc arex a racꞌob quireꞌ a baꞌ yʌn caꞌanan,
caj a toc chuquex Cꞌuj quireꞌ tiꞌ yʌn Cꞌuj caꞌanan tu cu bin u reyintejob Cꞌuj tu cotor mac.
23 ’A techex u winiquirechex judío a fariseojoꞌ yejer yʌjcamsʌyʌjirex u tꞌʌn Moisés.
Otsirechex,
caj a chʌc jʌsex tiꞌ Cꞌuj u tsꞌac a woꞌochex a cu yaꞌaric u cꞌabaꞌ mienta,
yejer u tsꞌac a woꞌochex cu yaꞌaric u cꞌabaꞌ anis.
Yejer u tsꞌac a woꞌochex,
a cu yaꞌaric u cꞌabaꞌ comino,
quireꞌ baxuc cu yaꞌaric ich u tꞌʌn Moisés.
Chen mʌꞌ ja quibex a baꞌ tsꞌibaꞌan ich u tꞌʌn Cꞌuj,
a tu caj u chꞌic arex techex Cꞌuj caꞌ a quibex u tꞌʌn.
Quireꞌ mʌꞌ ja yajquintaex tiꞌ a racꞌob.
Mʌꞌ ca manex tu tsoyir.
Mʌꞌ ca wacsiquex ta worex u tꞌʌn Cꞌuj.
Caꞌ a toc rʌc quibex tu cotor u tꞌʌn Cꞌuj.
Mʌꞌ ja pꞌʌtex tuririꞌ u tꞌʌn Cꞌuj.
Quet a wuꞌyiquex.
24 Quireꞌ irechex chꞌop a wichex a ca pʌyiquex u berob a racꞌob a mac chꞌop u wich xan.
Chen jariꞌ ca chachtiquex a mijin tiꞌ a wucꞌurex.
Chen jariꞌ ca pꞌʌtiquex u sor,
an ten bic a quiꞌ cʌnantiquex a baꞌ mʌꞌ tsoy tu tꞌʌn Cꞌuj.
Chen a baꞌ jach tsoy tu tꞌʌn Cꞌuj,
mʌꞌ a quiꞌ cʌnantexiꞌ.
25 ’Jach otsirechex,
u winiquirechex judío a fariseojoꞌ yejer u yʌjcamsʌyʌjirechex u tꞌʌn Moisés.
Yʌjtusariquechex tiꞌ a racꞌob.
Mʌꞌ ja wirej,
ca chen pꞌoꞌiquex u pach a ruchex,
chen ich u japninoꞌ ecꞌ.
Baxuc u ruchirex a woꞌochex,
ca pꞌoꞌiquex,
ecꞌ ich u japnin.
An ten biquex a pixamex jach ecꞌ quireꞌ caj manex a waꞌcriquex u baꞌtac a racꞌob,
quireꞌ jach tsꞌuꞌ techex.
26 A techexoꞌ,
mʌꞌ ja najtex u tꞌʌn Cꞌuj u winiquirechex judío a fariseojoꞌ.
Biquinin mʌꞌ ja toc pꞌʌtex a wacꞌriquex u baꞌtac a racꞌob.
Caꞌ a pꞌʌtex a tsꞌuꞌtar.
Wa ca yʌn pꞌʌtiquex aroꞌ,
caj a rucꞌsajex u yeqꞌuir a pixamex.
27 ’A techexoꞌ,
u winiquirechex judío a fariseojoꞌ yejer yʌjcamsʌyirechex u tꞌʌn Moisés.
Yʌjtusarirex tiꞌ a racꞌob.
Jach otsirechex,
ca tus cꞌujintiquex Cꞌuj soc u tusaricob a racꞌob:
“Jach tsoyechex”,
chen jach cꞌasechex.
28 Baxuc yʌnechex quireꞌ a racꞌob cu tucric:
“Jach tsoyechex.”
Chen ca tusariquex tiꞌ mac ca jach cꞌujintiquex Cꞌuj,
rajen jach cꞌasechex.
29 ’Jach otsirechex,
u winiquirechex judío a fariseojoꞌ yejer u yʌjcamsʌyʌirechex u tꞌʌn Moisés quireꞌ yʌjtusarirechex tiꞌ mac.
Caj a toc tsꞌʌpquintajex tunich tu tꞌojaꞌan u baquer yʌjtseqꞌuir u tꞌʌn Cꞌuj uch.
Baxuc xan,
caj a quiꞌ banajex u pach tunich a mac quiꞌ manob tu tsoyir uch,
quir a cꞌʌꞌoticobex.
30 A techexoꞌ,
ca waquex tiꞌ a racꞌob:
“Wa cuxaꞌanechex uch tu qꞌuinin tiꞌ yʌn a nunquirex uch mʌꞌ ta yamtajex a mac a caj u quinsajob yʌjtseqꞌuirob u tꞌʌn Cꞌuj.”
31 Rajen quetechex yejer a nunquirex yʌjquinsirob yʌjtseqꞌuirob u tꞌʌn Cꞌuj,
quireꞌ pꞌeriꞌ a nunquirex.
32 Joqꞌuenex,
tsꞌocsex u beyajob a nunquirex.
Bin a caj toc cꞌubenex quinsbirenex yejer in camsʌwinicob.
33 ’Irechex can,
a yʌc u coj a cu quinsic mac.
Mʌꞌ ju cꞌuchur a worex a putsꞌurex ich cꞌacꞌ tu ca bin a jach mucꞌyajex.
34 Caj yaꞌaraj Jesús tiꞌob:
―Rajen caꞌ a quiꞌ sarex a xiquinex,
quireꞌ yʌn in toc tuchiꞌtic techex a mac a cu bin tsecꞌtic u tꞌʌn Cꞌuj techex.
Yʌn in toc tuchiꞌtic yʌjcamsʌyʌjirob u tꞌʌn Cꞌuj xan,
yejer a mac u neꞌer u tꞌʌn Cꞌuj.
A techexoꞌ,
bin a caj quinsiquex yaꞌab mac.
U jerob bin a caj cꞌubiquex quinsbir ich cruz.
A techexoꞌ,
bin a caj jʌtsꞌiquex u pachob u jerob tu cu naj cꞌujinticob Cꞌuj u winiquirob judío.
A techexoꞌ,
bin a caj chuquiquex u pachob u jerob tu cu bin ich u cajar,
cax tu cu putsꞌurob,
bin a caj chuquiquex u pachob.
35 Rajen ca bin a boꞌotiquex u boꞌorir a siꞌpirex,
quireꞌ a mac quinsaꞌb ten a nunquirex,
cax mʌnaꞌ cꞌas caj u betajob a mac quinsbir uch.
Rajen bin a caj boꞌotiquex u boꞌorir a siꞌpirex,
quireꞌ quinsaꞌb Abel uch a mac jach tsoyir yor hasta u qꞌuinin caj quinsaꞌb Zacarías xan.
Raꞌ u tet Berequías.
Rajiꞌ caj a quinsajex ich carem naj tu ca naj cꞌujintiquex Cꞌuj.
Chumuc u berir carem naj caj quinsaꞌb Zacarías.
36 Caj yaꞌaraj Jesús:
―Taj quin waꞌariquex tech.
A techexoꞌ,
bajeꞌrer a mac cuxaꞌan,
bin a caj boꞌotiquex a siꞌpirex.
Quireꞌ raꞌ u qꞌuinin caj a quinsajex Zacarías hasta u qꞌuinin caj quinsaꞌb Abel ten a nunquirex.
Jesús cu yocꞌar quireꞌ u yaj u winiquirob judío ich u cajar Jerusalén
37 Caj yaꞌaraj Jesús:
―A techexoꞌ,
u winiquirechex judío ich u cajar Jerusalén.
A techexoꞌ,
caj a quinsajex yʌjtseqꞌuirob u tꞌʌn Cꞌuj a caj in tuchiꞌtaj.
Baxuc xan,
caj a rʌc chꞌinajex u joꞌr a mac caj in tuchiꞌtaj caꞌ u tsecꞌtej techex u tꞌʌn Cꞌuj.
Yaꞌab u tenin in cꞌat in muchꞌquintic techex soc in cʌnantic techex irej u nʌꞌ cax cu pʌyic cu muchꞌquintic u yar yarʌn u xicꞌ.
Chen mʌꞌ ta chaꞌex in muchꞌquintiquechex soc in cʌnantiquechex.
38 Cꞌʌꞌotex caꞌ bin cꞌuchuc tu qꞌuinin,
jeꞌ a rʌc pꞌʌtiquex a cajarex soc chen saj naj,
quireꞌ mʌꞌ ja chaꞌex in muchꞌquintiquechex.
39 A tenoꞌ,
quin waꞌaric techex,
mʌꞌ a yʌn yʌn bin a wiren hasta caꞌ bin cꞌuchuc tu qꞌuinin ca bin a waꞌariquex:
“Caꞌ ic sʌjtej Jesús,
quireꞌ rajiꞌ a mac tuchiꞌtac ten Cꞌuj.”