Jesús caj u camsic soc mʌꞌ u cʌnicob caꞌtur yacꞌ
12
Tiꞌ toy cu tsicbar Jesús yejer u winiquirob judío a fariseojoꞌ yejer yʌjcamsʌyʌjirob u tꞌʌn Moisés.
Quireꞌ caj u muchꞌquintob u bʌj u winiquirob judío.
Jach tiꞌ yʌn miles quireꞌ tan u yachꞌʌticob u bʌj.
Jesús caj u yʌnxchun yaꞌaric tiꞌ u camsʌwinicob quireꞌ u cꞌat u yʌn tsicbar yejer u camsʌwinicob.
Rajen caj yaꞌaraj tiꞌob:
―Quiꞌ cʌnantej a bʌjex tiꞌ u winiquirob judío a fariseojoꞌ soc mʌꞌ u tusaricob techex baꞌ.
Soc mʌꞌ a cʌnicobex quireꞌ a baꞌ cu tus aric u winiquirob judío a fariseojoꞌ,
irej u tsꞌac yoꞌoch pan cu sip.
Lucas 12.1-59
2 Rajen,
mʌꞌ ja cʌnicobex quireꞌ tu cotor baꞌ cu mucricob mac jeꞌ u bin irbir ten mac.
Quireꞌ a baꞌ cu tucric mac,
mʌnaꞌ mac yer,
chen jeꞌ u yerticobeꞌ.
3 Rajen tu cotor baꞌ ca mucuꞌariquex yaꞌab mac cu bin yubic.
Quireꞌ a wa baꞌ ca chan ber ariquex ich a watochex ta junanex yaꞌab mac cu bin yertic.
A mac a yʌn ic jach sʌjtic
4 Caj yaꞌaraj Jesús:
―Quin wac techex a mac in jach yaj,
mʌꞌ a chꞌiquex sajaquir tiꞌ a mac a cu bin u quinsiquechex.
Quireꞌ caꞌ bin tsꞌocac u quinsiquechex quireꞌ mʌꞌ cꞌuchaꞌan yor baꞌ quir u betic techex.
5 A tenoꞌ ―quij Jesús―,
quin chen bin in waꞌaric techex mac yʌn a jach sʌjtiquex.
Caꞌ a chꞌiquex sajaquir tiꞌ Cꞌuj quireꞌ caꞌ bin tsꞌocac u taquic a cuxtarex cꞌuchaꞌan yor u puriquechex ich cꞌacꞌ.
Jach jaj raꞌ a jach sʌjtex.
6 Caj yaꞌaraj Jesús:
―Tu cotor mac yer cu conan cinco chan chꞌichꞌ tiꞌ caꞌtur chan majan taqꞌuin.
Quireꞌ cu yiric mʌꞌ cojiꞌ.
Chen a chan chꞌichꞌoꞌ mʌꞌ u tubur tiꞌ Cꞌuj,
cax tuririꞌ.
7 Rajen mʌꞌ a chꞌiquex sajaquir quireꞌ jach cojechex a techexoꞌ.
Mʌꞌ necoj,
jach yaꞌab a chan chꞌichꞌoꞌ.
Mʌꞌ ja wirej,
mun Cꞌuj cu jach yajquintic techex cax yer mun yʌn u tsotser a joꞌrex.
A mac a cu toc aric tiꞌ mac: A tenoꞌ caj in wacsaj tin wor tiꞌ Cristo
8 Caj yaꞌaraj Jesús:
―A tenoꞌ quin wac techex a wa mac caj u toc araj caj u yacsaj tu yor tiꞌ u racꞌob.
Baxuc a tenoꞌ baxuquenechexoꞌ.
Quin bin in waꞌaric tiꞌ yʌjmasirob u tꞌʌn Cꞌuj:
Aroꞌ caj u yacsaj tu yor ten.
9 A wa mac mʌꞌ u cꞌat yaꞌaric wa caj u yacsaj tu yor tiꞌ u racꞌob,
baxuc a tenoꞌ quin bin in wac tiꞌ yʌjmasirob u tꞌʌn Cꞌuj:
Aroꞌ mʌꞌ u cꞌat yaꞌaric wa caj u yacsaj tu yor uch.
10 ’A wa mac a cu pꞌastic ten a tu tuchiꞌten Cꞌuj wa cu cꞌaxic yor,
jeꞌ u jawsaꞌr ten Cꞌuj.
Chen a wa mac a cu pꞌastic u Tajꞌor u Pixam Cꞌuj,
mʌꞌ ju bin jawsaꞌbir u siꞌpir ten Cꞌuj.
11 ’Cax cu bin u puriquechex ʌcʌtan u tsꞌurir tu cu naj cꞌujinticob Cꞌuj u winiquirob judío.
Cax ich gobernador cax ich presidente quireꞌ caj a wacsex ta wor ten.
Mʌꞌ ja chen tucriquex bic tabar ca bin a nunquiquex tiꞌ.
Mʌꞌ ja tucriquex a baꞌ ca bin waquex tiꞌ.
12 A ray u qꞌuininoꞌ u Tajꞌor u Pixam Cꞌuj,
jeꞌ u yac techex baꞌ yʌn a waquex tiꞌ.
Quiꞌ irej mʌꞌ u jach tꞌajʌr a taqꞌuinex yejer a baꞌtaquex
13 Turiꞌ mac ich a pimoꞌ caj u puraj u tꞌʌn tiꞌ Jesús,
caj yaꞌaraj:
―In wʌjcamsʌyʌjirech,
chan arej tiꞌ in sucuꞌun caꞌ u chʌc jʌse ten u baꞌtac in tetob a caj u pꞌʌtʌtenob caj quimin in tetob.
14 Caj u nunca Jesús caj yaꞌaraj:
―Arej ten mac caj u tetajen caꞌ in waꞌarej bic tabar a jʌsiquex u baꞌtac a tetex?
Rajen mʌꞌ in wac techiꞌ.
15 Rajen Jesús caj u yaꞌaraj tiꞌ a pimoꞌ:
―Quiꞌ cʌnantex a bʌj soc mʌꞌ a yajquintiquex a taqꞌuinex,
bayiriꞌ tiꞌ a baꞌtaquex xan.
Mʌꞌ ja wirej,
cax a mac neyʌn u taqꞌuin yejer u baꞌtac,
aroꞌ mʌꞌ u yaꞌaric wa jeꞌ u cuxtar yaꞌab qꞌuin.
16 Soc u cʌnicob a baꞌ caj u camsaj sam,
rajen caj u yaꞌaraj a jeꞌraꞌ:
―A uchoꞌ tiꞌ yʌn mac jach neyaꞌab u taqꞌuin quireꞌ u ruꞌum caj u netsꞌajaj u wich u pʌcꞌar.
17 A xiboꞌ a mac jach neyaꞌab u taqꞌuin caj u tucraj ich yor caj yaꞌaraj:
“Baꞌ quin bin in betej bajeꞌrer quireꞌ mʌꞌ tu quin wacsic in tsꞌʌpquin tin woꞌoch quireꞌ jach yaꞌab ten?”
18 Caj tsꞌoc u tucric a baꞌ cu bin u betic caj yaꞌaraj:
“In wer baꞌ quin bin in betic.
Jeꞌ in rʌc paꞌic tu quin wacsic u cancheꞌir in woch caꞌ in jach cochquintej u jer soc jach carem.
Soc tiꞌ quin bin in wacsic in woch yejer a baꞌ yʌn ten.”
19 A mac jach neyaꞌab u taqꞌuin caj u tucraj tu yor,
tan yaꞌaric tiꞌ u wʌcꞌʌs bʌjiriꞌ:
“Toc yʌn baꞌ a cꞌat tiꞌ yaꞌab yaxqꞌuin.
Tsireꞌej a beyaj chen jes a bʌj janen ucꞌurnen xan manen soc quiꞌ a wor.”
20 Mʌꞌ toy tsꞌocac u tꞌʌn caj araꞌb ten Cꞌuj:
“Jach chich a joꞌr,
a jeꞌ acꞌbiraꞌ cꞌuchij tu qꞌuinin a quimin.
Tu cotor a baꞌ a caj a ricꞌsaj mac cu bin u chꞌic?”
21 Baxuc u bin u betic tu cotor mac a cu tucric u nonoꞌj bʌjiriꞌ yejer u baꞌtac a mun u qꞌuinin cuxaꞌan ich yocꞌocab.
Chen mʌꞌ tu betaj a baꞌ cu bin u quiꞌquintic yor Cꞌuj.
Chen ʌcʌtan tu wich Cꞌuj jach otsir.
Cꞌuj cu cʌnantic u pararob
22 Caj tsꞌoc u camsic Jesús a pimoꞌ caj u yaꞌaraj tiꞌ u camsʌwinicob:
―Rajen quin wac tech:
Mʌꞌ ja yʌn tucriquex baꞌ ca bin a jantex quir a cuxtarex.
Mʌꞌ ja yʌn tucriquex a baꞌ ca bin a buquintex.
23 Mʌꞌ ja wirej,
jach noꞌj a cuxtarex chen a wochex mʌꞌ noꞌjiꞌ.
Baxuc xan,
jach noꞌj a winquirirex chen a noqꞌuex mʌꞌ noꞌjiꞌ.
24 Quiꞌ tucrex a baꞌ quin bin in wac techex.
A cꞌawojoꞌ,
mʌꞌ ju pʌqꞌuic baꞌ mʌꞌ ju jaqꞌuic yoꞌoch,
mʌꞌ cꞌuchaꞌan yor u ricꞌsic yoch ich cꞌancheꞌ soc caꞌ bin cꞌuchur tu qꞌuinin yʌn yoch.
Chen mʌꞌ ju wichʌjʌr quireꞌ Cꞌuj cu jansic.
Mʌꞌ wa jach manan cojechex a chꞌichꞌoꞌ,
mʌꞌ necojiꞌ.
25 Caj yaꞌaraj Jesús:
―Cax yaꞌab ca tucriquex u satsꞌʌr a baquerex,
mʌꞌ ju satsꞌʌr a baquerex,
mʌꞌ chichin.
26 A werechex mʌꞌ cꞌuchaꞌan a worex a sʌtsꞌiquex a baquerex quireꞌ mʌꞌ nenoꞌj aroꞌ.
Rajen mʌꞌ baꞌwir ca jach tucriquex a baꞌ ca bin a jantex,
a baꞌ ca bin a wuqꞌuex,
a baꞌ ca bin a buquintiquex.
27 ’Quiꞌ tucriquex a baꞌ quin bin in wac techex.
Caj a wirajex bic tabar u chꞌijir u topꞌ chʌcmʌncheꞌ a jach tsoy u topꞌ.
Ca wiric wa cu beyaj,
mʌꞌ ju cꞌuch.
A tenoꞌ quin wac techex.
A rey Salomónoꞌ,
u buquimʌn u nocꞌ uch,
jach tsoy chen mʌꞌ jach quet tsoyir yejer chʌcmʌn cheꞌ,
cax rey.
28 A Cꞌujoꞌ cu chꞌisic u topꞌcheꞌ a tiꞌ yʌn ich cꞌax soc tsoy u topꞌ,
chen tabar u tsꞌuꞌtsꞌur u topꞌ.
Cu cꞌuchur mac cu maric quir u toquic ich cꞌacꞌ.
Wa baxuc a Cꞌujoꞌ cu cʌnantic u topꞌcheꞌ.
Baxuc a Cꞌujoꞌ cu cʌnantic techex,
cax ca tucriquex mʌꞌ u cʌnantiquechex.
29 Quireꞌ a mac yer cʌnantaꞌan ten Cꞌuj,
mʌꞌ u yʌn tucric a baꞌ cu bin u jantej.
Baxuc a baꞌ cu bin yuqꞌuej.
Baxuc mʌꞌ u yʌn xacaꞌan tucur.
30 Chen a mac a mʌꞌ yerob Cꞌuj cu tus tucricob aroꞌ quireꞌ xacaꞌan u tucricob baꞌ cu bin u jantejob.
Baxuc a baꞌ cu bin u yucꞌurob chen ic Tet Cꞌuj,
jach yer a baꞌ a cꞌatex.
31 Barej cꞌajtex a baꞌ jach noꞌj tu cu bin u reyintic Cꞌuj.
Wa ca yʌn cʌxtiquex aroꞌ,
tu cotor a baꞌ a cꞌatex,
jeꞌ u tsꞌic techex Cꞌuj.
Cax a nocꞌ,
cax a woch,
cax a wucꞌur.
Jesús cu camsic u camsʌwinicob caꞌ u ricꞌsej a baꞌ jach coꞌoj soc yʌn ich caꞌanan
32 Jesús caj u yaꞌaraj tiꞌ u camsʌwinicob:
―Mʌꞌ ja chꞌiquex sajaquir quireꞌ cax mʌꞌ pimechex.
Mʌꞌ ja wirej,
jach tsoy caj u tucraj Cꞌuj u yacsiquechex a reyintex tu cu reyintej Cꞌuj.
33 Cʌnex a baꞌtaquex soc yʌn techex caꞌ a tsꞌic tiꞌ a mac otsirchʌjij.
Wa baxuc ca betiquex,
aroꞌ irej tan a ricꞌsiquex a baꞌ jach coꞌoj soc yʌn techex ich caꞌanan.
A ti taroꞌ mʌꞌ u xupur quireꞌ munt qꞌuin tiꞌ yʌnoꞌ.
Quireꞌ ti taroꞌ mʌnaꞌ mac cu yocar u muc u acꞌric.
Baxuc a taroꞌ mʌꞌ ju jantic cꞌʌmʌs.
34 Mʌꞌ ja wirej,
a tu yʌn a ricꞌsmʌnex jach coꞌoj tiꞌ ca pachiquex a bin xan.
Toc quiꞌ pajenex caꞌ bin uruc Cristo
35 Jesús caj yaꞌaraj tiꞌ u camsʌwinicob bic tabar u qꞌuinin caꞌ bin uruc:
―Toc pajenex caꞌ bin urquen ―quij Jesús―,
an ten bic mac cu cʌnanticob yatoch u tsꞌurir quireꞌ.
36 Bin u tsꞌurir,
bin yiric u chꞌic u racꞌ mac.
U winiquirob a tsꞌuroꞌ u toc buquimʌnob u nocꞌ.
Toc tꞌʌbaꞌan u quib caꞌ bin cꞌuchuc tꞌʌnbir.
Seb cu qꞌueyic u jor soc u yacsicob tiꞌ.
37 Quiꞌ yor a mac a cu toc pajicob u tar u jach tsꞌurirob caꞌ bin uruc.
Wa tu pajicob caꞌ bin uruc a ray u quininoꞌ,
quin bin in waꞌaric tiꞌob caꞌ curacob tu janʌnob.
Quin tsꞌabʌc tiꞌob quir u janʌnob.
38 Techex jach quiꞌ a worex wa tan a toc pajiquenex caꞌ bin urquen.
Cax chumuc acꞌbir.
Caꞌ bin urquen,
cax wa tan u sastar caꞌ bin urquen.
39 Uyex baꞌ quin waquex tech.
Jaj ixtʌcoj wa raꞌ u winquirir yatoch yer ixtʌcoj u qꞌuinin u tar yʌjacꞌrayʌjir baꞌtac caj u toc pajaj caꞌch soc mʌꞌ u chaꞌic yocar u yacꞌric.
40 Baxuc techex caꞌ a toc pajiquex quireꞌ wa raꞌ u qꞌuinin quin wuꞌur mʌꞌ tan a tucriquex in wuꞌur.
A tenoꞌ a mac tuchiꞌtaꞌb ten Cꞌuj baxuquenechexoꞌ.
A winicoꞌ a mʌꞌ u quibic u tꞌʌn u tsꞌurir baxuc a winicoꞌ a cu quibic u tꞌʌn u tsꞌurir xan
41 Caj yaꞌaraj Pedro:
―Wa chen tiꞌ tenob caj a waꞌaraj sam wa tiꞌ tu cotor mac xan.
42 Caj yaꞌaraj Jesús:
―Caꞌ a cʌnex u caꞌ tsꞌurir a mac jach tꞌaj,
a cu quib u tꞌʌn u Jach Tsꞌurir tsꞌaꞌb u cʌnantej a mac tiꞌ yʌn tu yatoch.
Tan u tsꞌic tiꞌob u janʌnob caꞌ bin cꞌuchuc tu qꞌuinin u janʌnob u winiquirob u Jach Tsꞌurir.
43 Rajen u caꞌ tsꞌurir quiꞌ yor quireꞌ irir ten u Jach Tsꞌurir tu quiꞌ quibaj u tꞌʌn caj ur tu yatoch.
44 Caj yaꞌaraj Jesús:
―Jach taj quin waꞌaric techex.
Jeꞌ u tsꞌabʌr u cʌnantej tu cotor baꞌ a tiꞌ yʌn ich yatoch.
45 Chen wa ju caꞌ tsꞌurir cu tucric tu yor tan yaꞌaric:
“In jach tsꞌurir amaꞌan cu cꞌuch,
tin tꞌʌn.”
Rajen tu yʌnxchun u jʌtsꞌicob u winiquirob cax xib cax xquic.
Tan u nejanʌn tan u neꞌucꞌur xan,
tan u carchʌj xan.
46 U jach tsꞌurir jeꞌ u yuꞌur tu qꞌuinin mʌꞌ tan u pajic u caꞌ tsꞌurir quireꞌ mʌꞌ tu yaꞌaraj tiꞌ ber caꞌ bin uruc.
Cu bin tsꞌabʌr u mucꞌyaj ten u jach tsꞌurir.
Quet cu bin u mucꞌyaj yejer a mac a mʌꞌ yerob Cꞌuj quireꞌ mʌꞌ tu betaj a baꞌ u cꞌat u jach tsꞌurir.
47 Caj yaꞌaraj Jesús:
―Chen a winicoꞌ a yer a baꞌ u cꞌat u jach tsꞌurir chen mʌꞌ tu quibaj a baꞌ araꞌb tiꞌ.
Rajen caꞌ bin uruc u jach tsꞌurir araꞌ u qꞌuinin mʌꞌ tan u pajic.
Jeꞌ u bin tsꞌabʌr u mucꞌyaj.
Jach yaj cu bin mucꞌyaj.
48 Chen a winicoꞌ,
quireꞌ caj u betaj baꞌ,
rajen bin u jatsꞌʌr u pach ten u jach tsꞌurir cax mʌꞌ yer a baꞌ u cꞌat u jach tsꞌurir caꞌch.
Barej mʌꞌ neyaj cu bin jʌtsꞌbir u pach ten u jach tsꞌurir.
Caꞌ bin u tsꞌabʌr u beyaj ten u jach tsꞌurir tiꞌ u cꞌurew yʌn u toc rʌc betic.
Cax mʌꞌ yaꞌab u beyaj yʌn u rʌc tsꞌocsic.
Cax yaꞌab u beyaj u tsꞌabʌr tiꞌ ten u tsꞌurir cu pajic u tsꞌocsic tiꞌ cax yaꞌab tiꞌ.
Jesús mʌꞌ u bin u pꞌeriꞌquintic yor yejer mac ich yocꞌocab
49 Caj yaꞌaraj Jesús:
―Quireꞌ taren a tenoꞌ ich yocꞌocab cu bin u pꞌujur yor mac aroꞌ irej cꞌacꞌ.
An bic in cꞌat toc tsꞌacaꞌan in beyaj ich yocꞌocab.
50 Chen yʌn in mucꞌyaj ―quij Jesús―,
baxuc yʌn in quimin soc toy tsꞌacaꞌan in beyaj.
Bic jach yaj in wor hasta caꞌ bin yʌnxchunuc in mucꞌyaj.
51 Quireꞌ taren ―quij Jesús―,
ca bin a tucrex a mac tiꞌ yʌn ich yocꞌocab mʌꞌ u bin u tsꞌictarob.
Chen a tenoꞌ quin wac techex mʌꞌ u bin sistar yor yejer u racꞌob mac cu bin u rʌc pacran tsꞌictarob.
52 Cu yʌnxchun bajeꞌrer hasta cu xur tꞌʌn wa tiꞌ yʌn cinco winic ich yatoch u tet.
A mʌnaꞌ u nupoꞌ cu bin u tsꞌictarob yejer a caꞌturoꞌ.
A caꞌturoꞌ cu bin u tsꞌictarob yejer a mʌnaꞌ u nupoꞌ.
53 U tet cu tsꞌictar yejer u parar xan.
U parar cu tsꞌictar yejer u tet xan.
U nʌꞌ cu tsꞌictar yejer xquic u parar.
A xquicoꞌ u parar cu tsꞌictar yejer u nʌꞌ.
Yixquit cu tsꞌictar yejer yixquit.
Cu pacran tsꞌictar yejer yixquit.
Jesús cu yaꞌaric tiꞌ a pimoꞌ
54 Jesús caj yaꞌaraj tiꞌ a pimoꞌ:
―Ca wiriquex u nacar u muyarir tu cu bin qꞌuin ca waquex jeꞌ u tar yaꞌrireꞌ.
Jach jaj cu tar yaꞌrir.
55 Wa cu tar yicꞌar ich nojar ca waquex bin u caꞌ chʌcʌrchʌjʌr qꞌuin.
Jach taj cu chʌcʌchʌjʌr qꞌuin.
56 Ca chen tusariquex caꞌ bin a wirex biquiraꞌ a caꞌananoꞌ.
Baxuc a ruꞌumoꞌ a werex wa cu tar jaꞌ wa cu bin chʌcʌwchʌjʌr.
Biquinin mʌꞌ a werex baꞌ u cꞌat yaꞌarej a baꞌ quin betic bajeꞌrer?
Jesús cu yaꞌaric: Caꞌ a sisquintic yor a mac a cu pꞌactiquechex
57 Caj yaꞌaraj Jesús:
―Biquinin mʌꞌ a bʌjiriꞌex ca tucriquex ta worex a baꞌ ca bin a betiquex?
58 Caj yaꞌaraj tiꞌ u camsʌwinicob:
―Wa yʌn mac cu bin u puriquech ʌcʌtan ich juez quir yiric wa yʌn a boꞌor tiꞌ.
Joqꞌuen sisquintej yor soc mʌꞌ u bin u puriquech ich juez.
Wa mʌꞌ a bin a sisquintej yor,
jeꞌ u bin u puriquech ich juez.
Caj tsꞌoc yiric yʌn a siꞌpir cu bin u cꞌubiquech tu cu maꞌcʌr winic.
59 A tenoꞌ ―quij Jesús―,
quin wac tech:
Mʌꞌ u bin u chaꞌic tech hasta ca rʌc boꞌotic a boꞌor.