Tetaꞌb ten Jesús a mac a cu bin tsecꞌticob u tꞌʌn
10
Caj tsꞌoc aroꞌ Jesús caj u muchꞌquintaj u camsʌwinicob doce.
Caj u tsꞌaja u mucꞌ tiꞌob tu cu bin u camsʌwinicob quir u jocꞌsicob quisin.
Cax baꞌ yajir,
cu jawsicob.
2 Yʌn u cꞌabaꞌ caj u tetaj doce xib.
A jeroj Simón,
caj caꞌ pach u jer u cꞌabaꞌ ten Jesús.
Caj pach u cꞌabaꞌ Pedro,
Jesús.
Pachir caj tetaꞌb Andrés ten Jesús.
Raꞌ u bʌjob Pedro,
Andrés.
U jer Jacobo u bʌjob Juan.
Caj tetaꞌb Juan xan.
Pꞌeriꞌ u tetob Zebedeo Jacobo yejer Juan.
3 Caj tetaꞌb Felipe ten Jesús.
U jer caj tetaꞌb Bartolomé.
U jer caj tetaꞌb Tomás.
U jer caj tetaꞌb Mateo yʌjcꞌʌmin u taqꞌuin gobernador romano.
Caj tetaꞌb Jacobo raꞌ u tet Alfeo.
U jer tetaꞌb Lebeo raꞌ pʌchaꞌan u jer u cꞌabaꞌ Tadeo.
4 Caj tetaꞌb u jer Simón raꞌ cu sayʌr tu pach cananista.
Caj tetaꞌb Judas Iscariote,
raꞌ caj u cꞌubaj Jesús,
Judas.
Jesús caj u tuchiꞌtaj u camsʌwinicob quir u bin u tsecꞌticob u tꞌʌn Cꞌuj
5 Jesús caj u tuchiꞌtaj u camsʌwinicob doce.
Caj yaꞌaraj tiꞌ u camsʌwinicob:
―Mʌꞌ a yʌn bin a tsecꞌtex u tꞌʌn Cꞌuj ich u cajar u winiquirob Samaria.
Mʌꞌ a yʌn binex a tsecꞌtex u tꞌʌn Cꞌuj ich a mʌꞌ u winiquirob judío.
6 Jariꞌ yʌn xenex a tsecꞌtex tu yʌn u jach winiquirob judío.
A caj u pꞌʌtob u tꞌʌn Cꞌuj.
Mʌꞌ ja wirej,
irob yʌrʌcꞌ tʌmʌn yuc a satʌrobeꞌ.
7 Caj yaꞌaraj Jesús tiꞌ u camsʌwinicob:
―Xenex,
tsecꞌtex in tꞌʌn.
Arex tiꞌob:
“Tabar u cꞌuchur a mac a cu bin u reyintejob Cꞌuj.”
8 Jawsex a mac u cʌnmʌnob iqꞌuer u caꞌob ―quij Jesús―.
A baꞌ yajirir,
jawsex ―quij Jesús―.
Rʌc jocꞌsex u quisinin ―quij Jesús.
Caj yaꞌaraj Jesús tiꞌ u camsʌwinicob:
―Ricꞌsex u quimirir.
Mʌꞌ in cꞌatej techex u boꞌorir in mucꞌ caj in tsꞌaja techex.
Baxuc xan,
a yamtiquex mac,
mʌꞌ a cꞌatiquex u boꞌorir.
9 Caj yaꞌaraj tiꞌ u camsʌwinicob,
Jesús:
―Mʌꞌ a chꞌaꞌex a taqꞌuinex.
10 Mʌꞌ a chꞌaꞌiquex u mucuquir a noqꞌuex,
chen a buquinmʌnex ―quij Jesús―.
Chen raꞌ a chꞌaꞌex.
Mʌꞌ a yʌn chꞌiquex u jer xʌnʌb,
cax tuririꞌ.
Baxuc a xonteꞌ,
mʌꞌ a chꞌiquex.
Quireꞌ a cu beyajoꞌ,
cu tsꞌabʌr yoꞌoch bayiriꞌ nocꞌ.
11 Caꞌ bin cꞌuchuquex chan cajar,
cax carem u cajar.
Cʌxtex a mac a tsoy yoroꞌ soc raꞌ cu yacsiquex.
Tsoy a wocarex tu yatoch hasta a caꞌ binex.
12 Jesús caj yaꞌaraj tiꞌ u camsʌwinicob:
―Caꞌ bin ocaquex ich mac yʌnin yatoch.
Tꞌʌnex Cꞌuj soc u quiꞌ cʌnantaꞌ ten Cꞌuj a mac a cu yacsiquechex.
13 Wa mʌꞌ u yacsechex tsoy a wʌcꞌʌs chꞌic a tꞌʌn ―quij Jesús―,
quireꞌ mʌꞌ u quiꞌ acsechexiꞌ.
Wa caj u quiꞌ acsechex cu pꞌatʌr a tꞌʌnex tiꞌ.
14 A mʌꞌ ju yacsexoꞌ,
a mʌꞌ u cꞌat u cꞌʌmicob a tꞌʌnex.
Mʌꞌ ju cꞌat yubejobiꞌ.
Joqꞌuenex tu yatoch,
cax tu cajar.
Pustex u ruꞌumin a woquex soc yerob u beriꞌ yʌn u siꞌpirob ―quij Jesús―.
15 Taj quin waꞌaric techex ―quij Jesús―.
Caꞌ bin cꞌuchuc tu qꞌuinin u tar Cꞌuj,
yaj cu bin yubic yerar,
a mʌꞌ u chaꞌj a wocarex a tsecꞌtex u tꞌʌn Cꞌuj.
Jach manan cu bin mucꞌyajob.
A tu cajar Sodoma quet yejer u cajar Gomorra mʌꞌ neyaj cu bin yubicob mucꞌyajob.
Jeꞌ u cꞌuchur tu qꞌuinin cu bin u chuquicob a pachex wa cu quinsiquechexob
16 Caj yaꞌaraj Jesús tiꞌ u camsʌwinicob:
―Uꞌyex baꞌ quin waꞌaric techex ―quij Jesús―.
Quin tuchiꞌquechex tu yʌn a netsꞌiqueꞌ ―quij Jesús―.
Aroꞌ irej a mac a caj u tuchiꞌtaj u yʌrʌcꞌ tʌmʌn yuc ich a bobochiꞌoꞌ.
Rajen quiꞌ cʌnantex a bʌjex ―quij Jesús―,
soc mʌꞌ nemʌꞌ biquechexiꞌ.
17 Caj yaꞌaraj Jesús tiꞌ u camsʌwinicob:
―Quiꞌ cʌnantex a bʌjex,
quireꞌ jeꞌ u chuquicob a pachechex.
Jeꞌ u chuquic u mʌchiquechex a jach tsꞌurir tu cajarob.
Jeꞌ u bin u puriquechex ʌcʌtan u jach tsꞌurir a pim mac.
Jeꞌ u jʌtsꞌiquechex a pachex tu chan najir tu cu naj cꞌujinticob Cꞌuj u winiquirob judío.
18 Caj yaꞌaraj Jesús tiꞌ u camsʌwinicob:
―Tiꞌ cu bin u puriquechex ʌcʌtan ich gobernadores baxuc ich reyes cu bin u puriquechexoꞌ,
quireꞌ caj a wacsajex ta worex in tꞌʌn.
A baywoꞌ ―quij Jesús―,
cꞌuchaꞌan a worex a tsecꞌtiquex in tꞌʌn tiꞌ reyes yejer gobernadores.
Cax mʌꞌ u winiquirob judío.
19 Caj yaꞌaraj tiꞌ u camsʌwinicob,
Jesús:
―Wa ber u puriquechex ʌcʌtan ich u jach tsꞌurirob u cajar.
Mʌꞌ ju jacꞌʌr a worex a baꞌ ca bin a tsicbarex tiꞌob.
An bic ca bin a tsicbarex tiꞌob mʌꞌ u jacꞌʌr a worex tiꞌ.
A Cꞌujoꞌ cu bin u yamtiquechex bic tabar ca bin a nunquiquex tiꞌob.
Toc raꞌ u qꞌuininoꞌ,
cu bin u yamtiquechex Cꞌuj.
20 Cax cu yubic techex a tꞌʌnex.
Mʌꞌ techex ca tꞌʌnexiꞌ ―quij Jesús―.
Chen u tꞌʌn u Tajꞌor u Pixam Cꞌuj cu tꞌʌn,
quireꞌ cu tar ich a Tetex Cꞌuj.
21 Caj yaꞌaraj tiꞌ u camsʌwinicob,
Jesús:
―Cax a bʌj cu bin u cꞌubiquechex quireꞌ yirob caj a wacsex ta worex.
Cax u wʌcꞌʌs parar cu bin u cꞌubic quinsbir ten u tet.
Cax u wʌcꞌʌs tet cu bin cꞌubic caꞌ quinsac ten u parar.
22 Tu cotor mac cu bin u pꞌactic techex quireꞌ caj a wacsajex ta worex tiꞌ in tꞌʌn.
Wa mac mʌꞌ ju pꞌʌtic u cʌnic in tꞌʌn hasta cu quimin,
raꞌ u quinin bin in taquej.
23 Wa mac cu chuquicob a pachex ich a cajarex.
Xenex tu yʌn u jer cajar.
Taj quin waꞌaric techexiꞌ.
Quireꞌ mʌꞌ toy rʌc manʌquechex a putsꞌurex quir a tsecꞌtex tiꞌ in tꞌʌn ich tu cotor u cajar tu ruꞌumin u winiquirob Israel,
caꞌ bin wʌcꞌʌs uren ten ―quij Jesús―.
Quireꞌ taren in yamtic mac tu cotor.
24 ’Cʌnex a jeraꞌ.
U camsʌwinic mac mʌꞌ u cꞌuchur u yor tiꞌ u yʌjcamsʌyʌjir.
Baxuc u cꞌurew mʌꞌ u cꞌuchur u yor tiꞌ u jach tsꞌurir.
25 Rajen a jeꞌ u camsʌwinic mac yʌn u quiꞌquintic yor a caj u cʌnaj u camsʌyʌjir.
Quireꞌ a baꞌ u ber tiꞌ u yʌjcamsʌyʌjir bayiriꞌ cu bin tar tiꞌ u camsʌwinic xan.
Bayiriꞌ xan,
u cꞌurew mac caꞌ u quiꞌquintac yor a caj cʌnaj u jach tsꞌurir.
Quireꞌ a baꞌ u ber tiꞌ u jach tsꞌurir bayiriꞌ cu bin tar tiꞌ u cꞌurew xan.
Caj yaꞌaraj Jesús tiꞌ u camsʌwinicob:
―An bic caj u tꞌʌnenob,
baxuc cu bin u tꞌʌniquechexob:
“U pararechex Beelzebú.”
Chen jach manan cu bin yaꞌaricob tiꞌ techex.
Chꞌajex sajaquir tiꞌ Cꞌuj
26 Caj yaꞌaraj tiꞌ u camsʌwinicob,
Jesús:
―Quireꞌ a werex baꞌ cu bin tar techex.
Mʌꞌ a sʌjtiquex mac.
Quireꞌ a baꞌ u mucuber tiꞌ mac jeꞌ u rʌc uꞌyicobeꞌ,
cax a baꞌ u mucuber tiꞌ.
27 Caj yaꞌaraj tiꞌ u camsʌwinicob,
Jesús:
―A baꞌ caj in camsechex ta junanex.
Caꞌ a manex a rʌc ariquex ich tu cotor mac.
A caj in camsex ta junanex caꞌ a puriquex a tꞌʌnex tu cotor soc yerob baꞌ quiriꞌ caj in camsajex.
28 Caj yaꞌaraj tiꞌ u camsʌwinicob,
Jesús:
―Mʌꞌ ja chꞌaꞌiquex sajaquir tiꞌ mac,
cax cu quinsiquex.
Mʌꞌ ju quinsejob a pixamex.
Caꞌ a sʌjtex Cꞌuj,
quireꞌ cꞌuchaꞌan yor u puriquechex ich cꞌacꞌ.
Tu cu yerar a winquirex quet yejer a pixamex.
29 Caj yaꞌaraj tiꞌ u camsʌwinicob,
Jesús:
―Wa ber ca mʌnex chꞌichꞌ caꞌtur quir a chiꞌiquex.
Ca boꞌotiquex turiꞌ centavo.
“Jot” ―quechex tiꞌ―,
quireꞌ mʌꞌ coꞌoj chꞌichꞌ.
Chen a chꞌichꞌoꞌ,
mʌꞌ u quimin wa mʌꞌ tsoy tu tꞌʌn Cꞌuj ic Tetex caꞌanan.
30 Chen a Cꞌujoꞌ,
jach manan u cʌnantic techex,
biquinin a joꞌrex cu cʌnantic xan.
31 Rajen baꞌwir ca tucriquex a bʌj quireꞌ a techexoꞌ jach yaꞌab a boꞌorirex,
a chan chꞌichꞌoꞌ,
mʌꞌ coꞌojiꞌ.
A mac cu tsicbar tiꞌ u racꞌob tiꞌ Cristo
32 Caj yaꞌaraj tiꞌ u camsʌwinicob,
Jesús:
―Bayiriꞌ tu cotor mac a taj cu yacsic tu yor tiꞌ ten,
aroꞌ chʌcaꞌan yiricob u racꞌob.
Raꞌ quin bin in quiꞌ acsic ʌcʌtan in Tet Cꞌuj caꞌanan.
33 Caj yaꞌaraj tiꞌ u camsʌwinicob,
Jesús:
―A mac a mʌꞌ ju yaꞌaraj tiꞌ u racꞌob wa ju yacsaj tu yoroꞌ.
Caꞌ bin xiquiquen ʌcʌtan ich in Tet Cꞌuj caꞌanan caꞌ bin xuruc tꞌʌn.
Jeꞌ in wac tiꞌ in Teteꞌ:
“Mʌꞌ in wer maquiꞌ.”
Jesús caj tar u jʌsic mac cax u wʌcꞌʌs bʌjob
34 Caj yaꞌaraj tiꞌ u camsʌwinicob,
Jesús:
―Mʌꞌ a chen quibiquex wa rʌc taren in quetquintic yor tu cotor mac.
Quireꞌ a mac a cu yacsic tu yor tiꞌ ten,
u racꞌob cu bin u tsꞌictarob yejer.
35 Mʌꞌ ja wirej,
a pararoꞌ,
cu bin u tsꞌictarob yejer u tet.
A xquicoꞌ,
cu bin u tsꞌictar yejer u nʌꞌ ―quij Jesús―.
A xquicoꞌ,
cu bin u tsꞌictar yejer yixquit.
36 Caj yaꞌaraj tiꞌ u camsʌwinicob:
―Cax u wʌcꞌʌs u bʌjob cu bin u pꞌactaꞌbir yejer.
37 Caj yaꞌaraj tiꞌ u camsʌwinicob,
Jesús:
―Wa mac jach manan u yajquintic u tet,
baxuc u nʌꞌ,
chen mʌꞌ u neyajquinten,
quireꞌ u tet jach yaj,
baxuc u nʌꞌ.
Baꞌwir quin waꞌaric:
“Ten yʌnin aroꞌ.”
38 Caj yaꞌaraj tiꞌ u camsʌwinicob,
Jesús:
―A mac cu bin yacsic tu yor tiꞌ ten,
bin u caꞌ mucꞌyaj an ten bic caj u bajij mac ich cruz.
Wa mʌꞌ u cꞌat,
baꞌwir cu yacsic tu yor ten?
39 Mʌꞌ ja wirej,
a mac u cꞌat u taquic u bʌj soc mʌꞌ u mucꞌyaj,
chen jeꞌ u saꞌtʌr u pixam,
quireꞌ caj u pꞌʌtaj u yacsic tu yor in tꞌʌn.
Chen a mac u cꞌat u quinsaꞌ tiꞌ ten,
quireꞌ caj u yacsaj tu yor tiꞌ ten.
Mʌꞌ u saꞌtʌr u pixam,
cax quinsaꞌb ten u racꞌob.
A mac a cu bin cuxtar ich caꞌanan
(Mr. 9.41)
40 Caj yaꞌaraj tiꞌ u camsʌwinicob,
Jesús:
―Wa mac cu yacsiquechex,
baxuc cu yacsiquen,
xan.
A mac cu yacsiquen cu yacsic Cꞌuj xan quireꞌ caj u tuchiꞌten Cꞌuj.
41 A mac a cu yacsic yʌjtseqꞌuir u tꞌʌn Cꞌuj quireꞌ tuchiꞌtaꞌb ten Cꞌuj quir u tsecꞌtic u tꞌʌn.
Quet caꞌ bin boꞌotaꞌc ten Cꞌuj.
A mac a cu yacsic xib,
a jach tsoy yoroꞌ,
quireꞌ yer jach tsoy yor xib.
Raꞌiriꞌ quet caꞌ bin boꞌotac ten Cꞌuj tiꞌ techex,
quireꞌ caj a wacsajex xib ta watochex.
42 Caj yaꞌaraj tiꞌ u camsʌwinicob,
Jesús:
―Yʌn mac a caj u yacsaj tu yor ten,
cu bin arbir ten a mʌꞌ yer Cꞌujeꞌ:
“Jot aro.”
Chen a mac a cu tsꞌic yucꞌur sisis jaꞌ tiꞌob,
Cꞌuj bin u caꞌ boꞌotej tiꞌob.