Jesús cu jawsic a mʌꞌ u chꞌitareꞌ
9
Caj tsꞌoc aroꞌ caj oc Jesús ich chem.
Caj bin pʌchir cꞌacꞌnab quir u bin ich u cajar Capernaum.
Caj urij ich Capernaum.
2 Caj tarob purbir a mech yoc ten u racꞌob.
A mech yocoꞌ xib,
characbar ich chꞌac.
Jesús caj u yiraj bic tabar caj u yacsajob tu yorob,
caj u tꞌʌnaj a mech yocoꞌ:
―Quiꞌquintej a wor in pararech.
Tsoy in wiriquech quireꞌ toc jaw a siꞌpir.
3 Tiꞌ yʌn yʌjcamsʌyʌjirob u tꞌʌn Moisés ich Jesús.
Mʌꞌ yaꞌab tiꞌ yʌnob.
Chen tu yorob caj u mucu arob,
caj yaꞌarob:
“Cu pachꞌic Cꞌuj,
Jesús wa ber cu yaꞌaric baxucoꞌ.”
4 A Jesúsoꞌ,
yer a baꞌ cu tucricob tu yorob a yʌjcamsʌyʌjirob u tꞌʌn Moisés.
Araꞌb tiꞌob ten Jesús:
―Mʌꞌ a yʌn tucriquex cꞌas.
5 Jesús caj yaꞌaraj tiꞌ yʌjcamsʌyʌjirob u tꞌʌn Moisés:
―Wa quin wac a jeꞌ mech yocaꞌ:
“Caj in jawsaj a siꞌpir”,
a techexoꞌ mʌꞌ a werex wa yʌn u mucꞌ Cꞌuj ten,
wa mʌnaꞌ u mucꞌ Cꞌuj ten.
Barej wa quin wac tiꞌ:
“Riqꞌuen caꞌ xiquech.”
Jeꞌ a werexeꞌ yʌn u mucꞌ Cꞌuj ten.
6 Caj araꞌb ten Jesús tiꞌ yʌjcamsʌyʌjirob u tꞌʌn Moisés:
―Ar in wesej techex in mucꞌ quir in jawsic u siꞌpir mac ich yocꞌocab,
quireꞌ taren in yamtej tu cotor mac.
Jesús caj u tꞌʌnaj a mac a mech yocoꞌ:
―Riqꞌuen ―quij―.
Chꞌaj a chꞌac caꞌ xiquech ich a watoch.
7 A mech yocoꞌ,
caj riqꞌuij caj bin ich yatoch.
8 Caj yirob u riqꞌuir a mech yoqueꞌ,
caj jaqꞌuij yorob u winiquirob judío.
Caj yaꞌarob u winiquirob judío:
―Jach caremech Cꞌuj,
quireꞌ ta tsꞌaja mucꞌ tiꞌ Jesús quir u jawsic a mech yocoꞌ.
Jesús caj u pʌyaj Mateo caꞌ tac cʌnbir u tꞌʌn Jesús
9 Jesús caj u pꞌʌtaj u cajar Capernaum jeroj caj yiraj tuririꞌ xib Jesús,
u cꞌabaꞌ Mateo.
Curucbar tu cu cꞌʌmic u taqꞌuin gobernador romano.
Caj pay Mateo ten Jesús:
―Cux ―quij Jesús―,
quir a cʌnic in tꞌʌn.
Caj riqꞌuij Mateo,
caj bin tu pach Jesús.
10 Jesús tiꞌ yʌn uch ich yatoch Mateo.
Curucbar janʌn Jesús yejer u camsʌwinicob,
yejer a cu cꞌʌmicob u taqꞌuin gobernador romano.
Tiꞌ yʌn ich Jesúseꞌ,
a yʌn u siꞌpirobeꞌ,
cu janʌnob xan.
Pꞌeriꞌoꞌ cu janʌnob yejer Jesús.
11 A farisejoꞌ,
caj yirob cu janʌnob yejer Jesús,
a yʌn u siꞌpirob,
yejer a cu cꞌʌmicob u taqꞌuin gobernador romano.
Caj cꞌataꞌb ten u winiquirob judío a fariseoboꞌ,
u camsʌwinicob Jesús:
―Biquinin a wʌjcamsʌyʌjirex cu janʌn yejer a yʌn u siꞌpireꞌ,
yejer a cu cꞌʌmicob u taqꞌuin gobernador romano?
12 Jesús caj yubaj a baꞌ cꞌataꞌbob tiꞌ u camsʌwinicob.
Jesús caj yaꞌaraj tiꞌ u winiquirob judío a fariseoboꞌ:
―A mʌꞌ yajoꞌ,
mʌꞌ u cꞌatic tsꞌac,
quireꞌ toc yʌn yor.
A mac a yajoꞌ,
raꞌ cu bin u cʌxtic yoꞌoch tsꞌac.
13 Caj araꞌb tiꞌ u winiquirob judío a fariseojoꞌ ten Jesús:
―Xen,
cʌnex a baꞌ tsꞌibaꞌan ich u tꞌʌn Cꞌuj,
a tu cu yaꞌaric:
“Caꞌ yajquinte mac baxuc u cꞌat Cꞌuj.
Mʌꞌ a chen quinsiquex a wʌrʌcꞌ wacʌx a sija ten”,
quij Cꞌuj.
Rajen tarenoꞌ.
Quireꞌ taren in pʌyic a mac yʌn u siꞌpirob caꞌ u cꞌaxej tu yorob soc u pꞌʌticob a cꞌasoꞌ.
Mʌꞌ taren in pʌyic a mac a cu yaꞌaric mʌnaꞌ u siꞌpirob.
A ray winicoꞌ,
caꞌ u quibob a baꞌ araꞌb tiꞌob ten Cꞌuj,
a tu cu yaꞌaric:
“Jach manan tsoyir caꞌ a yajquintej a racꞌob.
Mʌꞌ ja chen quinsiquex a wʌrʌcꞌ wacʌx a sijetenex.”
Biquinin mʌꞌ u pꞌʌticob u janʌnob u camsʌwinicob Jesús
14 Caj cꞌuchob mʌꞌ yaꞌab u camsʌwinicob Juan ich Jesús.
Raꞌ cu yacsic jaꞌ tu joꞌr mac.
Caj araꞌb tiꞌ Jesús ten u camsʌwinicob Juan:
―Biquinin mʌꞌ u pꞌʌticob u janʌnob a camsʌwinicob quir u cꞌujinticob Cꞌuj?
Biquinin a tenob in pꞌʌticob in janʌnob yejer u winiquirob judío a fariseoboꞌ?
15 Caj u nuncaj Jesús:
―A mac cu bin u chꞌic u raqꞌueꞌ,
cu pʌyic u racꞌob quir u quiꞌquiꞌ janʌnob.
A tarobeꞌ,
mʌꞌ tsoyiꞌ wa cu tucricob.
Barej caꞌ bin cꞌuchuc tu qꞌuinin cu bin,
a tu chꞌaj u raqꞌueꞌ,
jeroj raꞌ u qꞌuininoꞌ,
cu bin u pꞌʌticob u janʌnob.
Baxuc a tenoꞌ.
A mac a caj in pʌyaj mʌꞌ baꞌwir u pꞌʌticob u janʌnob.
Wa ber caꞌ bin xiquen,
a raꞌ u qꞌuininoꞌ,
jach taj cu bin u pꞌʌticob u janʌnob in camsʌwinicob.
16 Caj yaꞌaraj Jesús:
―Mʌꞌ tsoy xan caꞌ a xaxactiquex a baꞌ caj a cʌnex tiꞌ a nunquirex yejer a baꞌ tan a cʌniquex tiꞌ ten.
Mʌꞌ ja wirej,
mʌnaꞌ mac cu jompʌcꞌtic u rabir u nocꞌ yejer ricꞌben.
Cu mosar a ricꞌben cu jatar a raboꞌ cu cochtar u jor.
Jach carem u jorir u nocꞌ u cochtar.
17 Caj yaꞌaraj Jesús:
―Mʌnaꞌ mac cu tꞌajtic u cꞌab u wich uva ich u rabir yotꞌer chivo.
Quireꞌ caꞌ bin pajnʌc,
cu bujur.
Hasta u rʌc wecar u cꞌab uva cu rʌc jatʌr u yotꞌer chivo xan.
A ricꞌben u cꞌab uva yʌn u tꞌajic ich ricꞌben yotꞌer chivo soc mʌꞌ ju bujur soc mʌꞌ ju rʌc wecar u cꞌab uva.
U parar Jairo caj jawsaꞌb ten Jesús
18 Mʌꞌ toy tsꞌocac u camsic u bujur u yotꞌer chivo Jesús.
Caj tar pʌybir Jesús ten Jairo.
Raꞌ u jach tsꞌurir u winiquirob judío.
Caj araꞌb tiꞌ ten Jairo tu cu xonraj:
―Jach quimin in chan parar xquic.
Cojen,
chan tsꞌancꞌʌbtej caꞌ wʌcꞌʌs riqꞌuir in chan parar xquic.
19 Jesús caj riqꞌuij caj bin yejer u camsʌwinicob yejer Jairo.
20 Tiꞌ yʌn u jer xquic,
caj tar tu pach Jesús tu cu bin ich Jairo.
Mʌꞌ ju jawʌr u yajir.
Yʌn u yajir doce yaxqꞌuin.
Mʌꞌ ju jawʌr tu cu mucꞌyaj.
Mʌꞌ ju tsoytar.
Caj u jutsꞌaj u bʌj xquic ich Jesús.
Tu pach Jesús caj u tʌra u yoquir u nocꞌ Jesús ten xquic.
21 Caj u tucraj a xquicoꞌ,
caꞌ u tʌrej u yoquir u nocꞌ Jesús.
Caj yaꞌaraj xquic tu yor:
“Wa quin tʌric u yoquir u nocꞌ Jesús,
jeꞌ in jawareꞌ.”
22 A Jesúsoꞌ,
caj u sut u bʌj ich u pach quir yiric mac caj u tʌraj u yoquir u nocꞌ.
Caj yiraj xquic,
caj u tʌraj u nocꞌ Jesús.
Caj yaꞌaraj tiꞌ:
―Quiꞌquintej a wor in jach pararech.
Quireꞌ caj a wacsaj ta wor tiꞌ ten ―quij yaꞌaraj tiꞌ―,
rajen toc jawech.
Raꞌiriꞌ u qꞌuinin toc jaw a xquicoꞌ.
23 Caj cꞌuchij Jesús ich yatoch Jairo.
Raꞌ u jach tsꞌurir u winiquirob judío.
Caj yiraj Jesús cu churob mac,
quireꞌ tabar u mucur u baquer u parar Jairo,
quireꞌ baxuc nanij u betic u winiquirob judío.
Jach pim cu yocꞌarob tan yacꞌtaꞌr u parar Jairo.
24 Caj yaꞌaraj Jesús:
―Chan joqꞌuenex tancab ―quij Jesús―.
Mʌꞌ quimeniꞌ.
Wenʌn u caꞌ in wiric a tenoꞌ ―quij Jesús.
Caj pꞌastaꞌb Jesús ten a pimoꞌ quireꞌ yerob jach quimij u chan parar Jairo.
25 Caj tsꞌoc u rʌc jocꞌsic mac tancab Jesús.
Jesús caj oc ich yatoch,
caj mach u cꞌʌb ten Jesús caj riqꞌuij.
Caj u chꞌaꞌaj yor chan xquic,
u parar Jairo.
26 Caj man u rʌc tsicbʌticob ich tu cotor u ruꞌum.
Caj yaꞌaraj tiꞌ u racꞌob bic tabar caj ricꞌsaꞌb u parar Jairo ten Jesús.
Jesús caj u jawsaj a chꞌop u wichobeꞌ
27 Caj joqꞌuij Jesús ich yatoch Jairo.
Caj tar mʌnaꞌ u wich ich u pach Jesús.
Caꞌtur a chꞌop u wichobeꞌ.
Caj u purob u tꞌʌn tiꞌ Jesús:
―Yajquin tenob,
yamtej tenob quireꞌ u pararech ic nunquir David.
28 Jeroj,
caj oc Jesús ich yatoch mac quet caj ocob a chꞌop u wichobeꞌ.
Caj u jutsob u bʌjob ich Jesús.
Caj cꞌataꞌb tiꞌob ten Jesús:
―Ca tucriquex cꞌuchaꞌan in wor in jawsiquechex?
Caj yaꞌarob a chꞌop u wichobeꞌ:
―In werob Jaj Tsꞌurir cꞌuchaꞌan a wor a jawsiquenob.
29 Jesús caj u tʌr u wich a chꞌop u wichobeꞌ.
Caj yaꞌaraj tiꞌob:
―An ten bic tabar caj a wacsajex ta worex tiꞌ ten,
baxuc u jawʌr a wichex xan.
30 Caj quiꞌ jawʌc u wichob ten Jesús.
Caj u toc araj tiꞌob:
―Mʌꞌ a yʌn bin a waꞌarex wa jaw a wichex ―quij yaꞌaraj tiꞌob.
31 Tan tu tsꞌocar u jawar u wichob.
Caj toc rʌc bin yaꞌarej ich tu cotor an bic tabar caj jawsaꞌb u wich ten Jesús.
Jesús caj u jawsaj a mʌꞌ u jocꞌar u tꞌʌn
32 Caj jocꞌob ich Jesús,
a jaw u wichobeꞌ,
caj caꞌ tar purbir u jer.
A mʌꞌ u jocꞌar u tꞌʌn quireꞌ acaꞌan cꞌacꞌas quisin tiꞌ.
33 A Jesúsoꞌ,
caj u jocꞌsaj u cꞌacꞌas quisinin,
a mʌꞌ u jocꞌar u tꞌʌn.
Caj jocꞌ u cꞌacꞌas quisin,
caj jocꞌ u tꞌʌn.
Caj yirob u racꞌob caj jaqꞌuij yorob.
Caj yaꞌarob:
―Mʌnaꞌ ij quiric mac cu jocꞌsic quisin.
Cax tu cotor u ruꞌumin Israel.
34 Caj tsꞌoc yiricob u winiquirob judío a fariseojoꞌ u jocꞌsic quisin Jesús.
Caj u tus arob tiꞌ u yet winiquirob judío:
―A werex tub u tar u mucꞌ quir u jocꞌsic a quisinoꞌ?
Ich u jach tsꞌurir quisin.
Quin yajquintic mac
35 Jesús caj rʌc man u tsecꞌtic tiꞌob u jach tsoyir u tꞌʌn tu cotor u cajar.
Cax tu chan cajar cax tu carem u cajarob caj u tsecꞌtaj tiꞌob u jach tsoyir u tꞌʌn.
Tiꞌ cu man u camsic Jesús ich u chan najir tu cu naj cꞌujinticob Cꞌuj u winiquirob judío.
Caj u tsecꞌtaj Jesús tu cu bin u reyinticob Cꞌuj.
Jesús caj man u jawsaj mac,
cax a baꞌ yajir cu jawsic Jesús.
36 Caj yiraj Jesús jach pim mac,
caj u yajquinta Jesús,
quireꞌ caj u yiraj mʌnaꞌ mac caj u camsob tu cu bin u reyinticob Cꞌuj.
Yiraj Jesús u winiquirob judío irej wa tʌmʌn yuc,
quireꞌ mʌnaꞌ yʌjcʌnʌnyʌjirob u winiquirob judío.
37 Caj yaꞌaraj tiꞌ u camsʌwinicob,
Jesús:
―Taj quin waꞌaric techex.
Yʌn mac pim ―quij―,
u cꞌat yubicob u tꞌʌn Cꞌuj.
Barej a cu beyajoꞌ,
mʌꞌ pim yʌjtseqꞌuir u tꞌʌn Cꞌuj tiꞌob.
Aroꞌ irej wa tiꞌ yʌn jach yaꞌab nʌr quir u jaqꞌuic,
chen mʌꞌ tiꞌ yʌn mac quir u jaqꞌuic.
38 Rajen caꞌ tꞌʌnex Cꞌuj soc u tuchiꞌtic mac quir u bin u tsecꞌtic u tꞌʌn Cꞌuj soc cꞌuchaꞌan yorob u yubicob u tꞌʌn Cꞌuj.