Jesús cu jawsic a mac acaꞌan quisin tiꞌeꞌ
5
Caj cꞌuchob pichir cꞌacꞌnab Galilea,
tiꞌ u ruꞌumin a cu yaꞌaricob Gadarajoꞌ.
San Marcos 5.1-20
2 Jesús tan tu jocꞌar ich chem,
a jeroj seb caj jocꞌ tu tꞌajaꞌan u baquer u quimiriroꞌ tuririꞌ xib a mac acaꞌan quisin tiꞌeꞌ.
3 Tiꞌ cʌjaꞌan ich tu tꞌajaꞌan u baquer u quimiriroꞌ.
Mʌnaꞌ mac cꞌuchaꞌan yor u cꞌʌxic cax yejer mascab a irej sumoꞌ.
4 A uchoꞌ chuquij ten u racꞌob caj cꞌʌrij yoc yejer mascabir a irej sumoꞌ,
bayiriꞌ xan yejer u mascabir cꞌʌb chen caj u pꞌicaj u mascabir cꞌʌb caj u xexetꞌaj u mascabir yoc.
Mʌnaꞌ mac cꞌuchaꞌan yor u suquintic quireꞌ jach manan chich u mucꞌ.
5 U burur acꞌbir yejer u burur qꞌuin cu man uch awʌt u caꞌ ich tu tꞌajaꞌan u baquer u quimiriroꞌ,
bayiriꞌ xan,
ich wits,
bayiriꞌ xan,
cu man u cꞌubic u bʌj yejer tunich.
6 Barej caj u yiraj Jesús u tar nachir,
raꞌ caj u cꞌʌnaj yacab caj xonraj ich Jesús.
7 Cꞌam awʌtnʌjij caj u yaꞌaraj:
―Baꞌ a cꞌat ten Jesús?
A techoꞌ u pararech Cꞌuj a mac u Cꞌujir caꞌanan.
Quin chich cꞌatic tech tu quin chuquic Cꞌuj,
mʌꞌ a tsꞌic ten in mucꞌyaj.
8 Mʌꞌ ja wirej,
baxuc caj yaꞌaraj a mac a acaꞌan quisin tiꞌeꞌ quireꞌ sam araꞌb tiꞌ ten Jesús:
―Joqꞌuen tiꞌ a macaꞌ a techoꞌ quisinech.
9 Sam caj u cꞌataj tiꞌ quisin:
―Baꞌ a cꞌabaꞌ?
Caj u nuncaj,
tan yaꞌaric:
―Legión in cꞌabaꞌ.
Mʌꞌ ja wirej,
pimenob acaꞌanenob tiꞌ.
10 Rajraꞌ tan u cꞌataꞌ tiꞌ Jesús ten a mac a acaꞌan quisinoꞌ mʌꞌ u tuchiꞌtaꞌrob tanxer ruꞌum.
11 Mʌꞌ nenach tu yʌn Jesús yejer u camsʌwinicob,
tiꞌ yʌn yʌrʌcꞌ cajij qꞌuecꞌʌn,
jach pimob.
Cu manob u janʌnob xiw ich pꞌuc wits.
12 Caj u chich cꞌatajob tiꞌ tu cotor a quisinoboꞌ a acaꞌanob ich a ray xiboꞌ tan yaꞌaricob:
―Arej in binob ich a ray cajij qꞌuecꞌʌnob quir in caꞌ wocarob ich a ray qꞌuecꞌʌnob.
13 Seb chaꞌb tiꞌob ten Jesús,
a jeroj caj jocꞌob a quisinob caj ocob ich cajij qꞌuecꞌʌnob.
Tu cotor a cajij qꞌuecꞌʌnoꞌ caj u cꞌʌnajob yacab tu chꞌincaꞌan wits caj u rʌc purob u bʌj ich cꞌacꞌnab caj rʌc quimij.
Dos mil qꞌuecꞌʌn caj quimij.
14 Rʌc putsꞌob tun,
a mac a cu cʌnanticob yʌrʌcꞌ cajij qꞌuecꞌʌn quireꞌ jaquij yorob.
Jeroj caj binob u jumintejob ich u cajarob,
bayiriꞌ xan ich mac a tiꞌ yʌnob tu corob.
Caj jocꞌob u yirob a baꞌ u ber tiꞌ.
15 Caj rʌc cꞌuchob yicnʌn Jesús.
Caj u yirajob a mac a acaꞌan tiꞌ a quisinoꞌ Legión uch,
a jeroj caj u yirajob curucbar u buquinmʌn u nocꞌ,
bajeꞌrer yʌn yor xan,
robob caj u chꞌajob sajquir.
16 A yʌjꞌirirob caj u tsicbʌtajob baꞌ u ber tiꞌ a mac a acaꞌan quisin tiꞌeꞌ Legión u cꞌabaꞌ uch,
bayiriꞌ xan,
a baꞌ u ber tiꞌ a cajij qꞌuecꞌʌnoꞌ.
17 Rajen caj yʌnxchun u yaꞌaricob tiꞌ Jesús caꞌ xic Jesús nachir soc mʌꞌ tiꞌ yʌniꞌ.
18 Jesús caj u yocar ich chem caj cꞌuchij a mac a acaꞌan quisin tiꞌeꞌ a Legión u cꞌabaꞌ ucheꞌ,
caj u chich cꞌataj tiꞌ caꞌ xic tu pach Jesús.
19 Barej a Jesúsoꞌ mʌꞌ ju chaj u tar tu pachiꞌ barej caj u yaꞌaraj tiꞌ:
―Xen ich a watoch ich a bʌjob.
Xen jumintej an ten bic caj in yajquin tech.
Arej yubej u jach carem beyaj caj u betaj Cꞌuj tiꞌ tech.
Arej yubej bic jocꞌsaꞌb tech quisin ten Jaj Tsꞌur.
20 A ray xiboꞌ a jocꞌsaꞌb u quisininoꞌ caj jocꞌ caj yʌnxchun u tsicbʌtic u ruꞌumin Decápolis tu cotor baꞌ a betaꞌb tiꞌ ten Jesús.
Tu cotor mac a caj u yubajob caj jaqꞌuij yorob.
U parar a Jairojoꞌ xquic yejer a xquic a tu tʌraj u nocꞌ Jesús
21 Barej Jesús caj u wʌcꞌʌs chꞌʌctaj a cꞌacꞌnaboꞌ ich chem tanxer pichir.
Tiriꞌ ich chiꞌ cꞌacꞌnab caj u muchꞌquintajob u bʌj a pimoꞌ ich yicnʌn Jesús.
San Marcos 5.21-43
22 Caj cꞌuchij tuririꞌ xib u jach tsꞌurir u chan najir tu cu naj cꞌujinticob Cꞌuj u winiquirob judío,
Jairo u cꞌabaꞌ.
Barej caj u yiraj Jesús caj tar pꞌuxtar ʌcʌtan Jesús ich yoc.
23 Caj u chich cꞌataj tiꞌ,
tan yaꞌaric:
―Cojen ―quij―,
jawsej in chan parar xquic quireꞌ tabar u quimin.
Cojen caꞌ a tsꞌancꞌʌbtej caꞌ jawac,
soc u cuxtar.
24 Caj bin Jesús yejer rajiꞌ,
barej jach pim caj sayob tu pach Jesús,
cu rʌc nactanticob u bʌj yicnʌn Jesús.
25 Tiriꞌ ich a pimoꞌ a sayob tu pach Jesús tiꞌ yʌn tuririꞌ xquic.
Mʌꞌ u tsoytar uch.
Yʌn manij doce yaxqꞌuin caj u cʌnaj u yajir.
26 Cax tsꞌacʌc ten a mac a yerob tsꞌac mʌꞌ u tsoytar quireꞌ aroꞌ caj u rʌc xupaj u taqꞌuin yejer u baꞌtac,
barej mʌꞌ yamtaꞌbiꞌ chen cu jach quiꞌ cꞌastar.
27 A ray xquicoꞌ caj u yubaj tsicbʌtaꞌr Jesús.
Caj cꞌuchij ich u pimʌn a yajeꞌ caj tar tu pach Jesús caj u tʌraj u nocꞌ Jesús.
28 Quireꞌ cu yaꞌaric:
―Wa quin tʌric u noqꞌueꞌ,
chen u nocꞌ quin tʌriqueꞌ,
jeꞌ in tsoytareꞌ.
29 Seb caj tsꞌoc u tʌric u nocꞌ Jesús tsits u qꞌuiqꞌuer a xquicoꞌ,
caj u yubaj tu winquirir caj jawij.
30 Jeroj seb caj u yubaj Jesús caj u jawsaj u yajir mac quireꞌ caj u yubaj u bin u mucꞌ caj tsꞌoc u tarʌr u nocꞌ.
Jeroj caj u sut u bʌj caj u pʌctaj a pimoꞌ,
caj cꞌataꞌb tiꞌ:
―Mac,
tʌr in nocꞌ?
―quij Jesús.
31 U camsʌwinicob Jesús caj u yaꞌarajob tiꞌ:
―Iric a jach pim mac a cu nactanticob u bʌj ta wicnʌn,
biquinin ca waꞌaric:
“Mac tʌr in nocꞌ?”
32 Jesús rajiꞌ caj u pʌctaj a mac a u bʌcꞌrismʌnobiꞌ Jesús quir yiric a mac tʌr u nocꞌ.
33 A xquic tunoꞌ,
sajacchʌjij cu quiquirʌncʌr quireꞌ yer baꞌ u ber tu winquirir caj u nʌtsꞌaj u bʌj yicnʌn Jesús caj xonrʌj caj u yaꞌaraj tiꞌ tu cotor jach jaj.
34 Jesús caj u yaꞌaraj tiꞌ:
―Xquic,
quireꞌ caj a wacsaj ta wor tiꞌ ten rajen jawech.
Xen in jach yajech caꞌ quiꞌac a wor.
Caꞌ quiꞌ tsoyaquech.
35 Mʌꞌ toy tsꞌocaquiꞌ u tsicbar Jesús,
jeroj caj cꞌuchob jun yarob mac yicnʌn Jairo,
tiꞌ u tarob ich yatoch Jairo u jach tsꞌurir u chan najir tu cu naj cꞌujinticob Cꞌuj u winiquirob judío,
caj tarob caj u yaꞌarajob:
―Quimij ―quij yaꞌaraꞌ tiꞌ Jairo― a chan parar xquic.
Tsireꞌej,
cax mʌꞌ u tar a wʌjcamsayʌjir.
36 Barej seb caj u yubaj Jesús rajen caj u yaꞌaraj tiꞌ Jairo:
―Mʌꞌ a chꞌic sajaquir,
chen acsej ta wor ten.
Yʌn tsireꞌej yaꞌaricobeꞌ quim a chan parar xquiqueꞌ.
37 Mʌꞌ ju chaj u bin mac tu pach Jesús,
chen Pedro bin tu pach Jesús yejer Jacobo yejer Juan,
u yitsꞌin Jacobo.
38 Caj cꞌuchob taroꞌ tu yatoch u jach tsꞌurir u chan naj tu cu naj cꞌujinticob Cꞌuj u winiquirob judío caj u yiraj jumrac yocꞌarob quireꞌ cu yacꞌticob.
39 Caj tsꞌoc u yocareꞌ caj u yaꞌaraj tiꞌob:
―Biquinin a jumrac a wocꞌarex?
A tenoꞌ quin wiric wenʌn u caꞌ,
cax a techexoꞌ ca wiriquex quimen a chan xquicoꞌ.
40 Caj pꞌastaꞌb Jesús ten a mac a tiꞌ yʌnob tu yatoch Jairo quireꞌ yerob jach quimij a chan xquicoꞌ.
Barej rajiꞌeꞌ caj tsꞌoc u rʌc jocꞌsic tu cotor mac tancab,
caj acsaꞌb u tet yejer u nʌꞌ a chan xquicoꞌ yejer a mac a yet taracobeꞌ caj ocob tu quimen a chan xquicoꞌ.
41 Jesús caj u mʌchaj u cꞌʌb a chan xquicoꞌ caj u yaꞌaraj tiꞌ:
―Talita cumi ―u cꞌat yaꞌaric:
Chan xquic quin waꞌaric tech,
riqꞌuen.
42 Seb caj riqꞌuij a chan xquicoꞌ,
caj yʌnxchun u ximbar quireꞌ yʌn doce yaxqꞌuin tiꞌ uch.
Seb caj jaqꞌuij yorob,
jach manan caj jaqꞌuij u yorob.
43 Barej rajiꞌ caj u jach chich araj tiꞌob:
―Mʌꞌ a yʌn aquex tiꞌ mac.
Caj u yaꞌaraj caꞌ tsꞌabac u janʌn a chan xquicoꞌ.