A jeꞌ xquicaꞌ a cu yamticob Jesús uch
8
Caj tsꞌoc u beyaj ti taroꞌ Jesús caj bin ich tu cotor u cajarob,
cax ich u chan cajarob,
cax ich u yajaw cajarob xan.
Tiꞌ caj u tsecꞌtaj u jach tsoyir u tꞌʌn Cꞌuj tu cu bin u reyinticob Cꞌuj.
U yet binacob u doce u camsʌwinicob.
2 Baxuc xquic yet manob uch a mac jocꞌsaꞌb u cꞌacꞌas quisinin yejer a mac jawsaꞌb u yajirir.
Baxuc tiꞌ yʌn María Magdalena,
rajiꞌ jocꞌsaꞌb siete u quisinin.
3 Baxuc Juana raꞌ u mam Chuza,
raꞌ cu beyaj ich Herodes.
Tan u cʌnantic u baꞌtac Herodes.
Baxuc Susana,
baxuc tiꞌ rʌc yʌnob u jerob.
Caj u yamtob Jesús yejer u camsʌwinicob cax yejer u taqꞌuinob.
Cu camsic tiꞌ yʌjqꞌuichꞌin yʌjir u yijir trigo ich cor
4 Caj rʌc jocꞌob ich u cajarob quir yiricob Jesús.
Caj u rʌc muchꞌquintajob u bʌj ich Jesús quir u camsaꞌ ten Jesús.
Caj u yaꞌaraj tu cu camsaꞌ bic tabar u tꞌʌn Cꞌuj:
5 ―Caj binij mac quir u pʌqꞌuic tu cor trigo,
cu qꞌuichꞌintic u yijir.
Caj u pʌcꞌaj u cor trigo,
jumbuj yijir caj rub ich tanbej.
Caj tar mac caj u yajchꞌʌctaj.
Caj tar u ruqꞌuic chꞌichꞌ xan.
6 Jumbuj caj u qꞌuichꞌintaj yijir caj rub ich tunich.
Caj chꞌijij,
caj quimij quireꞌ mʌꞌ chꞌur u ruꞌumin.
7 Jumbuj caj u qꞌuichꞌintaj yijir caj rubij ich qꞌuiꞌix,
quet caj chꞌijij,
caj bobastaꞌb rajen mʌꞌ ju chꞌijir.
8 Jumbuj caj u qꞌuichꞌintaj yijir caj rub tub u necꞌat u ruꞌumin caj chꞌijir caj u netsꞌaja u wich hasta tu niꞌ.
Caj tsꞌoc yaꞌaric Jesús cꞌam caj yaꞌaraj:
―Wa cꞌuchaꞌan a worex a wuꞌyiquex tꞌʌn,
uꞌyex a baꞌ caj in camsaquechex tiꞌ u tꞌʌn Cꞌuj.
Lucas 8.1-56
Bʌꞌ wir Jesús caj u camsaj u tꞌʌn
―Tsajaꞌantechex ten Cꞌuj quir a najtiquex a baꞌ mʌꞌ yerob uch tu cu bin u reytinticob Cꞌuj.
Chen a mac mʌꞌ yerob Cꞌuj a cu yubicob in camsicob tu quin pꞌeriꞌquintic in tꞌʌn.
Cu chen uꞌyicob,
cax cu yubicob mʌꞌ ju najtejob.
Mʌꞌ ju bin u cꞌʌꞌoticob soc u yacsicob tu yor soc u tocar ten Cꞌuj.
Jesús cu camsic tiꞌ yʌjqꞌuichꞌin yʌjir yijir
11 ’Uꞌyex baꞌ u cꞌat yaꞌarej u tꞌʌn a caj in camsajechex:
Raꞌ u yijir caj u qꞌuichꞌintaj caj u qꞌuichꞌintaj irej u tꞌʌn Cꞌuj.
12 A yijirob caj rub ich tanbej irob a mac a cu yubicob u tꞌʌn Cꞌuj caj tarij quisin quir u taquic u tꞌʌn Cꞌuj tu pixamob soc mʌꞌ u yacsicob tu yor soc mʌꞌ ju tocar ten Cꞌuj.
13 Caj rub yijir ich tunich irob a mac cu yubicob u tꞌʌn Cꞌuj.
Quiꞌ yor caj u cꞌʌmajob u tꞌʌn Cꞌuj.
Chen irob yijir a mʌnaꞌ u motsob.
Tabar u yacsicob tu yorob,
caꞌ bin tumtaꞌc yorob ten quisin cu pꞌʌticob u tꞌʌn Cꞌuj.
14 Caj rub yijir ich qꞌuiꞌix irob a mac a cu yubicob u tꞌʌn Cꞌuj chen tiꞌ toy cuxaꞌanob teraꞌ.
Cu tucricob tiꞌ u bʌjiriꞌob,
u cꞌatob u nejaricob u taqꞌuin yejer u baꞌtac.
Cu chen tucricob tiꞌ a baꞌ cu bin u quiꞌquintic yorob.
Rajiꞌ cu tupsic u tꞌʌn Cꞌuj,
rajen mʌꞌ ju quiꞌ quibob u tꞌʌn Cꞌuj.
15 U yijir a rub ich tub u necꞌat u ruꞌumin irob a mac a cu quiꞌ yubicob u tꞌʌn Cꞌuj caj u nequiꞌ quibob u tꞌʌn Cꞌuj.
Caj u quiꞌ acsob tu yorob.
Caj u mucꞌtob baꞌ a cu tumticob yorob soc u quiꞌquinticob yor Cꞌuj.
Quir u camsic tiꞌ wa tꞌʌbaꞌan u quib
16 A baꞌ cu camsic tiꞌob irej wa tꞌʌbaꞌan u quib,
rajen Jesús caj u yaꞌaraj tiꞌob:
―A mac a cu tꞌʌbic u quib cu tsꞌocar u tꞌʌbic mʌꞌ u bʌric yejer baꞌ.
Mʌꞌ ju yacsic yaram u chꞌac.
Yʌn nacsic caꞌanan soc u yercꞌacꞌtic tu cotor mac a cu yocar.
Quireꞌ caꞌ bin u yercꞌacꞌtej a quiboꞌ,
chʌcaꞌan ij quirej ic bej soc mʌꞌ jic satʌr,
baxuc tiꞌ Jesús cu camsicoꞌon soc ic najtic caꞌ ij quer u tꞌʌn Cꞌuj.
17 Caj yaꞌaraj Jesús:
―Tu cotor baꞌ a mucu tacaꞌan tu cu bin u reyinticob Cꞌuj.
Bajeꞌrer caꞌ bin cꞌuchuc tu qꞌuinin jeꞌ u jocꞌar u tajireꞌ.
Baxuc tu cotor mac jeꞌ u cꞌʌꞌotej caꞌ bin cꞌuchuc tu qꞌuinin jeꞌ u yubiqueꞌ.
18 ’Rajen quiꞌ uꞌyex a baꞌ quin camsiquechex quireꞌ wa ca quibiquex in tꞌʌn jeꞌ in caꞌ camsiquechex yaꞌab.
Quireꞌ wa mʌꞌ a quibiquex in tꞌʌn a mun yaꞌabir ta cʌnex cu bin u tubur techex cax ca tucriquex jeꞌ u tubur techex.
U nʌꞌ Jesús yejer u yitsꞌinob
19 Caj tar u nʌꞌ Jesús yejer yitsꞌinob.
Caj cꞌuchob ich Jesús.
Mʌꞌ cꞌuchaꞌan yorob u cꞌuchurob ich Jesús quireꞌ tiꞌ yʌn a pimoꞌ,
jach pech.
20 Yʌn mac caj u tꞌʌnaj Jesús:
―Tiꞌ yʌnob a nʌꞌ yejer a witsꞌinob tar yʌnob tu xur a nepimoꞌ,
u cꞌat yiriquechob.
21 Caj yaꞌaraj tiꞌob Jesús:
―Quireꞌ a mac a cu yacsic tu yor u tꞌʌn Cꞌuj a cu quiꞌ quibicob u tꞌʌn Cꞌuj rajiꞌob in jach nʌꞌ,
raꞌ in witsꞌinob xan.
Jesús caj u tꞌʌnaj yicꞌar baxuc u yamin caꞌ chꞌenac
22 Turiꞌ u qꞌuinin caj binij Jesús.
Caj oquij ich chem yejer u camsʌwinicob.
Caj yaꞌaraj tiꞌob:
―Cuxex pʌchij cꞌacꞌnab.
Caj binob.
23 Caj u chꞌʌctajob cꞌacꞌnab Jesús caj wenij ich chem.
Caj u nupꞌob cꞌam yicꞌar rajen caj u burij u chem,
orac u jurur u chem.
24 Caj bin ʌsbir Jesús ten u camsʌwinicob caj yaꞌarajob:
―In wʌjcamsayʌjirechob,
tan ic jurur.
Caj riqꞌuij Jesús.
Caj u tꞌʌnaj yicꞌar yejer u yamin caj chꞌen u tar yicꞌar yejer u yamin.
25 Caj yaꞌaraj tiꞌ u camsʌwinicob:
―Mʌꞌ wa ja quiꞌ acsmʌnex a wor tiꞌ ten?
Quireꞌ jach jaqꞌuij yorob caj u chꞌajob sajquirob.
Caj yaꞌarajob ich u bʌjob a ju camsʌwinicob:
―A mac a jeꞌraꞌ,
cax icꞌ,
cax u yamin,
cu yubaꞌr u tꞌʌn?
Tiꞌ yʌn xib acaꞌan tiꞌ quisin ich u ruꞌumin Gadara
26 Caj cꞌuchob yejer chem ich u ruꞌumin Gadara.
Raꞌ ʌcʌtan u ruꞌumin Galilea.
27 Caj joqꞌuij Jesús ich chem.
Caj natsꞌij turiꞌ xib ich a ray cajaroꞌ,
tar bin ich Jesús.
Manij yaꞌab yaxqꞌuin acaꞌan tiꞌ quisin.
Rajen mʌꞌ u buquintic u nocꞌ,
mʌꞌ ju cʌjtar ich naj.
Tiꞌ cu cʌjtar ich u quimirir tu yʌn u japnin tunich.
Mʌꞌ ja wirej,
a uchoꞌ u racꞌob caj u chucajob u cꞌʌrejob yejer mascab.
Caj u cꞌʌrob u yoc yejer u cꞌʌb soc u cʌnanticob,
yaꞌab u teniꞌ caj u pꞌicaj u mascabirob u cꞌʌb yejer u mascabirob u yoc caj putsꞌij ich tʌcay ruꞌum quireꞌ acaꞌan tiꞌ cꞌacꞌas quisin.
28 Rajen caj u yiraj Jesús,
cꞌam caj awʌtnʌjij caj tar xontar ich Jesús.
Caj yaꞌaraj u quisinin:
―Biquinin ca pecsic in worob Jesús u pararech Cꞌuj,
a Cꞌujoꞌ a mac jach noꞌj?
Quin chich cꞌaticob tech soc mʌꞌ a tsꞌic in mucꞌyajob.
29 Baxuc caj yaꞌarob u quisinin quireꞌ sam arac ten Jesús caꞌ jocac tiꞌ a xiboꞌ.
30 Jesús caj u cꞌataj tiꞌob:
―Mac a cꞌabaꞌex?
Caj u nuncajob:
―Pimenob.
Baxuc caj u nuncajob tiꞌ quireꞌ jach pimob a quisinoꞌ a acaꞌan tiꞌ a xiboꞌ.
31 A quisinoꞌ caj u chich cꞌatajob tiꞌ Jesús:
―Mʌꞌ a tuchiꞌtiquenob ich cꞌacꞌ.
32 Caj yaꞌarob:
―Are in binob ich cajir qꞌuecꞌan tu cu janʌnob ich nʌcꞌ wits.
Jesús tu chaj u binob ich cajir qꞌuecꞌan.
33 A quisinoꞌ,
caj joqꞌuij ich xib caj ocob ich cajir qꞌuecꞌan,
caj u cꞌʌnajob yacab caj pitcꞌʌjob tu chꞌicaꞌan,
caj binob ich cꞌacꞌnab,
tiꞌ rʌc bint jaꞌ rʌc quimob.
34 A mac a cu cʌnanticob cajir qꞌuecꞌan caj yirob baꞌ u ber tiꞌ u cajir qꞌuecꞌan caj u cꞌʌnob yacab caj bin u jumbintajob ich u cajar cax ich u chan corob xan.
35 U racꞌob caj binob yirejob baꞌ u ber.
Caj cꞌuchob ich Jesús caj yirob xib a mac acaꞌan tiꞌ quisin caꞌch.
Tiꞌ curaꞌan tan yubic u tꞌʌn Jesús.
Toc yʌn u nocꞌ caj jep yor rajen jaqꞌuij yor a mac tar yiricob.
36 A mac caj u yirajob bic jawsaꞌb a xiboꞌ ten Jesús.
Tu tsicbʌtajob ich u racꞌob a tarob ich tu cotor u cajarob a baꞌ caj u betaj Jesús,
bic jawsaꞌb a xiboꞌ a mac acaꞌan cꞌacꞌas quisin tiꞌ caꞌch.
37 Tu cotor mac a tiꞌ yʌnob ich u ruꞌumin Gadara.
Baxuc a mac a cʌjaꞌanob bʌcris cajarob caj u chich cꞌatajob tiꞌ Jesús caꞌ xic tu pach quireꞌ jacaꞌan yorob.
Rajen Jesús caj wʌcꞌʌs oc ich chem quir u bin.
38 A mac jocꞌ u cꞌacꞌas quisinin caꞌch caj u chich cꞌataj tiꞌ Jesús:
―Ar in tar ta pach.
Chen Jesús caj yaraj tiꞌ:
―Mʌꞌ ja tar ―quij―.
39 Xen ta watoch,
xen jumintej a baꞌ tu betech Cꞌuj,
a baꞌ tsoyir caj u betaj tech.
A xiboꞌ caj bin u jumintej a baꞌ betaꞌb ten Jesús tiꞌ.
Baxuc caj u jumintaj ich tu cotor u racꞌob.
U parar Jairo a chan xquicoꞌ, yejer u jer xquic a tu tʌraj u nocꞌ Jesús
40 Caj sutnʌjij Jesús ich pʌchir cꞌacꞌnab.
A pimoꞌ quiꞌ yorob caj u yasajob Jesús quireꞌ tan u pajicob.
41 Caj cꞌuchij turiꞌ xib u cꞌabaꞌ Jairo,
u jach tsꞌurir u chan najir tu cu naj cꞌujinticob Cꞌuj u winiquirob judío.
Caj u pur u bʌj ich yoc Jesús caj u chich cꞌatej caꞌ xic tu yatoch.
42 Quireꞌ tu quimin u chan parar xquic quireꞌ mʌnaꞌ u jer u chan parar.
Yʌn doce u yaxqꞌuinin.
Caj bin Jesús yejer Jairo.
A pimoꞌ caj u rʌc nʌctantob u bʌj ich Jesús.
43 Tiꞌ yʌn ich a pimoꞌ turiꞌ xquic jach yaj quireꞌ yʌn doce u yaxqꞌuinin caj u cʌnaj u yajir.
Mʌꞌ ju jawʌr u pꞌoꞌic u nocꞌ.
Caj u rʌc xupaj u taqꞌuin tu cu bin tu cu tsꞌacʌr.
Mʌnaꞌ mac cꞌuchaꞌan yor u jawsic.
44 A xquicoꞌ caj u nʌts u bʌj ich Jesús caj cꞌuch ich u pach Jesús caj u tʌraj u xax u nocꞌ Jesús.
Sep caj jawij u yajir.
Caj tsits u qꞌuiqꞌuer.
45 Caj u cꞌataj Jesús:
―Mac caj u tʌraj in nocꞌ?
Mʌnaꞌ mac arej wa caj u tʌraj u nocꞌ.
Caj yaꞌarob Pedro yejer u yetcamsʌwinicob:
―In wʌjcamsʌyʌjirechob,
a jach pimoꞌ caj u nʌctantob tech,
caj u nechꞌintajechob.
Biquinin ca cꞌatic mac caj u tʌraj a nocꞌ?
46 Jesús caj yaꞌaraj:
―Yʌn mac caj u tʌraj in nocꞌ,
tin wuꞌyaj bin in mucꞌ caj u jawsaꞌb mac.
47 A xquicoꞌ caj yubaj yer Jesús caj tari,
tu babac caj xonraj ich Jesús caj u toc rʌc araj ʌcʌtan tu cotor mac biquinin caj a tʌraj u nocꞌ Jesús.
Caj yaꞌaraj biquinin seb caj jawij.
48 Jesús caj yaꞌaraj:
―In chan tiꞌarech jawech quireꞌ caj a wacsa ta wor caꞌ xiquech ta watoch,
quiꞌquintej a wor.
49 Tiꞌ toy cu tsicbar Jesús caj cꞌuchij turiꞌ mac,
tar u tar ich yatoch Jairo.
Raꞌ u jach tsꞌurir u chan najir tu cu naj cꞌujintic Cꞌuj u winiquirob judío.
Caj araꞌb tiꞌ Jairo:
―Quimij a chan parar,
xquic.
Mʌꞌ a pecsic yor yʌjcamsʌyʌjir,
tsireꞌej.
50 Caj yuba Jesús baꞌ araꞌb tiꞌ Jairo caj u yaꞌaraj Jesús tiꞌ:
―Mʌꞌ a chꞌic sajaquir,
chen acsej ta wor ten jeꞌ u jebar yoreꞌ.
51 Caj cꞌuchij ich yatoch Jairo.
Jesús mʌꞌ ju chabʌr u yocar mac,
chen Pedro yejer Juan yejer Jacobo,
quet yejer u tet yejer u nʌꞌ,
a quimen,
chan xquic.
52 A mac tiꞌ yʌnoꞌ caj u yacꞌtajob a chan xquic baxuc caj ocꞌarnʌjob.
Chen Jesús caj yaꞌaraj:
―Mʌꞌ a wacꞌtiquex quireꞌ mʌꞌ quimen,
chen wenen u caꞌ.
53 Caj u pꞌastajob Jesús quireꞌ yirajob jach quimen.
54 Caj u mʌch u cꞌʌb ten Jesús caj u cꞌam yaꞌaraj:
―Chan xquic riqꞌuen chꞌicren.
55 Caj u wʌcꞌʌs cuxrʌj.
Seb caj riqꞌuij.
Jesús caj yaꞌaraj:
―Tsꞌajex yoꞌoch.
56 U tet yejer u nʌꞌ caj jaqꞌuij yorob.
Chen Jesús caj yaꞌaraj tiꞌob:
―Mʌꞌ a yʌn ariquex tiꞌob mac a baꞌ u ber tiꞌ.