A xiboꞌ a mʌꞌ u jitir u cꞌʌbeꞌ
3
Caj wʌcꞌʌs oquij Jesús ich u chan najir tu cu naj cꞌujintiob Cꞌuj u winiquirob judío ich u cajar Capernaum.
Ti yʌn uch tuririꞌ xib a mʌꞌ u jitir u cꞌʌb.
San Marcos 3.1-19
2 Yʌn jun yarob u cꞌat u pacꞌʌrob u pach Jesús rajen caj u quiꞌquiꞌ pʌctob quir yiricob wa jeꞌ u jawsic mac tu qꞌuinin tu cu jesic u bʌjob u winiquirob judío.
3 Jesús tun,
caj u yaꞌaraj tiꞌ a mac a mʌꞌ u jitir u cꞌʌboꞌ:
―Riqꞌuen caꞌ taquech chumuc tu yʌnoꞌonex,
soc chʌcaꞌan yiriquech tu cotor mac.
4 Caj u yaꞌaraj tiꞌob
―Yʌn baꞌ quir in cꞌatic techex ―quij Jesús―.
Baꞌ cu chaꞌbʌr a toꞌonex caꞌ ic betex u tꞌʌn Moisés tu qꞌuinin tu quic jesic ic bʌj u winiquirob judío?
Cꞌuchaꞌan yor mac u betic a baꞌ jach tsoy,
wa cꞌuchaꞌan yor mac u betic a baꞌ cꞌas?
Cꞌuchaꞌan yor mac u yamtic mac u jer,
wa cꞌuchaꞌan yor mac u quinsic mac?
Barej a pimoꞌ mʌꞌ ju nucobiꞌ.
5 Jesús caj u rʌc pʌctaj yirej jujuntur,
jach tsꞌic u wich Jesús quireꞌ caj u yiraj mʌꞌ ju tucrob a mʌꞌ u jitir u cꞌʌb ten u yet winiquirob judío.
Caj u yiraj jach chich u joꞌrob.
Caj u yaꞌaraj tiꞌ a mac a mʌꞌ u jitir u cꞌʌboꞌ:
―Tichꞌ a cꞌʌb caꞌanan.
A xiboꞌ caj u tichꞌ u cꞌʌb seb caj toc quiꞌ jaw u cꞌʌb.
6 Caj jocꞌ tun u winiquirob judío a fariseojoꞌ caj u muchꞌquintob u bʌj yejer u yet winiquirob judío a cu yaꞌaricob herodiano quireꞌ cu sayʌrob tu pach u rey Herodes.
Caj u sebquintajob u muchꞌquinticob u bʌj quir u pꞌeriꞌquintajob u tucurob quir u quinsicob Jesús.
A pimoꞌ ich u chiꞌ cꞌacꞌnab
7 Barej Jesús caj bin yejer u camsʌwinicob tu chiꞌ cꞌacꞌnab.
Caj sayob tu pach ten Jesús a jach pim mac a tar u tarob tu ruꞌumin Galilea.
8 Bayiriꞌ tarob tiꞌ u ruꞌumin Judea yejer a mac a cʌjaꞌanob tu cajar Jerusalén,
yejer a mac a cʌjaꞌanob pichir u yaꞌarir Jordán tu cu tar qꞌuin,
yejer a mac a cʌjaꞌan tu ruꞌumin Idumea,
yejer a mac a cʌjaꞌanob baytʌc tu cajar Tiro yejer u cajar Sidón.
Pꞌencʌch pim tarob yicnʌn Jesús quireꞌ caj u yubob a baꞌ caj u betaj Jesús a baꞌ a mʌnaꞌ mac iramʌn biqꞌuin.
9 Quireꞌ jach manan pim a mac a tarob rajen Jesús caj u yaꞌaraj tiꞌ u camsʌwinicob caꞌ u cʌxejob chem quir u yocar.
Yubic cu maxʌr.
Yiric cu rʌc nactanticob u bʌj ich Jesús.
10 Mʌꞌ ja wirej,
caj u yirob caj u jawsaj yaꞌab mac rajen a mac a yajob cu nactanticob u bʌj ich Jesús caj u tʌrejob u nocꞌ quir u jawʌr u yajiriroꞌ.
11 Wa ber a mac a acaꞌan quisin tiꞌ caj tarob caj u purajob u bʌj ʌcʌtan tiꞌ Jesús,
cu cꞌam awʌt tu cu yaꞌaricob:
―A techoꞌ u pararech Cꞌuj.
12 Barej rajiꞌ Jesús caj u jach qꞌueyaj quisin soc mʌꞌ u yaꞌaricob mac Jesús.
Tetaꞌb ten Jesús a mac a cu bin u tsecꞌtaꞌr u tꞌʌn
13 A jeroj tuneꞌ,
Jesús caj u nacajtaj u pꞌuc wits caj u pʌyaj a mac u cꞌat u pʌyic.
Robob caj binob tiꞌ quir u camsaꞌrob.
14 Caj u tetaj doce xib soc tiꞌ yʌnob tu yicnʌn,
soc caꞌ bin tuchiꞌtacob ten Jesús quir u tsecꞌticob u tꞌʌn.
15 Bayiriꞌ xan,
tsꞌaꞌb u mucꞌ tiꞌob ten Jesús quir u jocꞌsicob quisin,
bayiriꞌ xan,
tsꞌaꞌb u mucꞌ tiꞌob ten Jesús quir u jawsicob a mac a yajoꞌ.
16 A jeraꞌ u cꞌabaꞌob a doce xiboꞌ a tetaꞌb ten Jesús.
A jeraꞌ Simón a mac caj u tsꞌaj u cꞌabaꞌ Pedro.
17 A jeraꞌ Jacobo u parar Zebedeo yejer Juan u yitsꞌin Jacobo,
tiꞌ mac caj u tsꞌaj u jer u cꞌabaꞌob Boanerges,
u cꞌat yaꞌariqueꞌ,
U Parar A Cu Pecoꞌ,
quireꞌ tsꞌicob.
18 A jeraꞌ Andrés,
a jeraꞌ Felipe,
a jeraꞌ Bartolomé,
a jeraꞌ Mateo,
a jeraꞌ Tomás,
a jeraꞌ Jacobo,
u parar Alfeo,
a jeraꞌ Tadeo,
a jeraꞌ Simón,
a cu sayʌr tu pach cananista.
19 A jeraꞌ Judas Iscariote,
a mac pachir caj u cꞌubaj Jesús.
Pacꞌ u pach Jesús acaꞌan quisin tiꞌ
Caj tsꞌoc u tetic Jesús tiꞌob yet binacob tu yatoch.
20 U jer jach pim tarob rajen mʌꞌ u chaꞌbʌr u janʌn quireꞌ jach pim cu tarob.
San Marcos 3.20-35
21 Barej caj u yubajob u jach u bʌjob Jesús,
rʌc tarob quir u chuquicob Jesús quireꞌ cu yaꞌaricob uch:
―Jaj ix tʌcoj,
mʌnaꞌ u yor a Jesúsoꞌ.
22 Bayiriꞌ xan,
u camsʌyʌjirob u tꞌʌn Moisés a tar u tarob tu cajar Jerusalén.
Pacꞌ u pach Jesús ten u camsʌyirob u tꞌʌn Moisés quireꞌ caj u yaꞌarob wa acaꞌan quisin tiꞌ:
―Acaꞌan Beelzebú tiꞌ mʌꞌ raꞌ tsꞌic u muqꞌuiꞌ u tsꞌurir quisin.
U mucꞌ u tsꞌurir quisin Beelzebú caj u jocꞌsej quisin.
23 Rajen Jesús caj u tꞌʌnajob caꞌ tacob u muchꞌquinticob u bʌj caj u yaꞌaraj tiꞌob tu cu camsicob:
―A Satanásoꞌ bic tabar u wʌcꞌʌs bʌjiriꞌ u jocꞌsic?
Mʌꞌ cꞌuchaꞌan yor u jocꞌsic u wʌcꞌʌs bʌjiriꞌ.
24 Mʌꞌ ja wirej,
wa ju wʌcꞌʌs bʌjiriꞌ cu bin tsꞌictar ich u ruꞌumin tu cu reyinticob rey,
jeꞌ u rʌc chꞌesicob u bʌj.
25 Cax wa ju wʌcꞌʌs bʌjob tu yatoch cu tsꞌictarob jeꞌ u rʌc quinsicob u bʌj.
26 Bayiriꞌ xan,
a quisinoꞌ,
u jach cꞌabaꞌ Satanás,
wa ju yet quisinin bin u jocꞌsejob,
jeroj caj u toc chꞌesob u bʌj,
jeroj mʌnaꞌ quisin.
27 ’Bic tabar in jocꞌsic quisin wa mʌꞌ tin yʌn chꞌesaj u mucꞌ u jach tsꞌurir quisin,
Satanás?
A baywoꞌ ―quij Jesús―,
cꞌuchaꞌan in wor in jocꞌsic quisin.
Quireꞌ aroꞌ irej a mac a oquij ich yatoch a mac chich u mucꞌ irej wa tu cꞌʌxaj soc u rʌc chꞌic u baꞌtac.
28 ’Taj quin waꞌaric techex,
tu cotor u siꞌpirob bin jawsac tiꞌ mac ten Cꞌuj,
cax a baꞌ pochꞌnʌjij uch bin jawsac tiꞌ xan.
29 Barej,
a mac a cu pꞌastic u Tajꞌor u Pixam Cꞌuj mʌꞌ biqꞌuin cu bin jawsabir u siꞌpir,
munt qꞌuin sipnʌjij.
30 Baxuc caj u yaꞌaraj Jesús quireꞌ yʌn jun yarob tus yarmʌnob uch:
“Yʌn quisin tiꞌ Jesús.”
U nʌꞌ yejer u yitsꞌinob Jesús
31 Caj tarob tun u yitsꞌinob yejer u nʌꞌ Jesús,
chen pꞌatob ich tancab yatoch tu yʌn Jesús,
caj u tuchiꞌtajob tꞌʌnbir.
32 A yaꞌab macoꞌ tiꞌ curaꞌanob yicnʌn Jesús,
robob caj u yaꞌarajob tiꞌ:
―Iric,
a nʌꞌ cu tꞌʌniquech,
tiꞌ yʌn yejer a witsꞌinob ich tancab cu cʌxtiquech yiriquech a nʌꞌ yejer a witsꞌinob.
33 Jesús caj u nuncaj tiꞌob tan yaꞌaric:
―Taj ca waꞌaric raꞌ in nʌꞌ yejer in witsꞌinob.
34 Caj u pʌctaj a jach yaꞌab mac a curaꞌanob yicnʌn Jesúsoꞌ,
caj u yaꞌaraj: