Jesús cu jawsic a mʌꞌ u chꞌictareꞌ
2
Mʌꞌ yaꞌab u qꞌuinin caj wʌcꞌʌs urij Jesús ich u cajar Capernaum.
A jeroj caj yubob u jumintaꞌb,
tiꞌ yʌn Jesús ich yatoch.
San Marcos 2.1-12
2 Seb caj u muchꞌquintajob u bʌj ich Jesús jach pim,
cax tu cu naj ocar mac ich yatoch mʌꞌ u pꞌatar tu cu yocar mac quireꞌ pech.
A Jesúsoꞌ caj u tsecꞌtaj u jach tsoyir u tꞌʌn Cꞌuj tiꞌob.
3 Caj tar purbirob yicnʌn Jesús a mac a mʌꞌ u chꞌictar.
Mʌꞌ yaꞌab caj tar purbirob cuatro xib tan u cꞌochicob tiꞌ.
4 Chen mʌꞌ cꞌuchaꞌan yorob u natsꞌarob yicnʌn Jesús quireꞌ a pimoꞌ.
Tar nacob ich pach naj,
caj u rʌc paꞌaj u pach naj soc u yensʌꞌr a mac a mʌꞌ u chꞌictar tu yicnʌn Jesús.
Yej u tas caj emsaꞌb ich Jesús.
Mʌꞌ ja wirej,
mʌꞌ cꞌuchaꞌan yorob u yocarob ich naj tu yicnʌn Jesús uch.
5 A Jesúsoꞌ caj u yiraj bic caj u yacsob tu yorob wa Jesús cꞌuchaꞌan yor u jawsic caj u yaꞌaraj tiꞌ a mac a mʌꞌ u chꞌictareꞌ:
―In yajech ―quij Jesús―,
toc jaw a siꞌpir.
6 Chen tiꞌ yʌn mʌꞌ yaꞌab yʌjcamsʌyʌjirob u tꞌʌn Moisés tiꞌ curaꞌanobiꞌ.
Tu yorob tu tucrajob tiꞌ Jesús:
7 “Biquinin baxuc cu tsicbar a ray xiboꞌ?
A baywoꞌ pochꞌ u caꞌ.
Jeꞌ wa ju chꞌuchur u yor u jawsic u siꞌpir maqueꞌ,
chen u bʌjiriꞌoꞌ Cꞌuj cꞌuchaꞌan yor u jawsic mac?”
8 Chen seb caj u yubaj Jesús tu pixam a baꞌ tu mucu tucrajob,
rajen caj u yaꞌaraj tiꞌob:
―Biquinin a baxucoꞌ ca tucriquex ta pixamex?
9 Wa quin wac tiꞌ a jeꞌ a mʌꞌ u chꞌictareꞌ:
“Tin jawsaj a siꞌpir”,
a techexoꞌ,
mʌꞌ a werex wa yʌn in mucꞌ tiꞌ Cꞌuj wa mʌꞌ yʌn in mucꞌ tiꞌ Cꞌuj.
Barej wa quin wac tiꞌ:
“Riqꞌuen caꞌ xiquech”,
jeꞌ a werex yʌn in mucꞌ tiꞌ Cꞌuj.
10 Caj araꞌb ten Jesús tiꞌ yʌjcamsʌyʌjir u tꞌʌn Moisés:
“Arej in wesej techex yʌn u mucꞌ ten Cꞌuj quir in jawsic u siꞌpir mac ich yocꞌocab quireꞌ baxuquenechexoꞌ,
quij.”
Jesús caj u tꞌʌnaj a mac a mʌꞌ u chꞌictareꞌ:
11 ―Riqꞌuen ―quij―,
chꞌaj a tas caꞌ xiquech ich a watoch.
12 A mac mʌꞌ u chꞌitareꞌ caj riqꞌuij caj u chꞌaj u tas caj joqꞌuij ʌcʌtan tu cotor mac rajen tu cotor mac jach jaqꞌuij yorob caj u rʌc quiꞌ tꞌʌntajob Cꞌuj:
―Jach caremech Cꞌuj.
Mʌꞌ biqꞌuin ij quiramʌnex a baxuc a jeraꞌ.
Leví tꞌʌn ten Jesús
13 Caj jocꞌ Jesús caj bin ich u chiꞌ cꞌacꞌnab u cꞌabaꞌ Galilea.
Tu cotor a pimoꞌ tarob tu yicnʌn Jesús,
a jeroj tuneꞌ,
caj u yʌnxchun u camsic tiꞌob.
San Marcos 2.13-28
14 Cariqueꞌ tan u man wa ber caj u yiraj Leví,
u parar Alfeo curucbar tu cuchir tu cu naj cꞌʌmic u taqꞌuin gobierno romano.
Caj pʌyir ten Jesús caj u yaꞌaraj tiꞌ:
―Cux ―quij Jesús―,
quir a cʌnic in tꞌʌn.
Caj riqꞌuij,
caj bin tu pach Jesús.
15 Pachir tiꞌ yʌn Jesús ich yatoch Leví.
Curucbar janʌn Jesús yejer u camsʌwinicob,
yejer a mac a cu cꞌʌmicob u taqꞌuin gobierno romano.
Tiꞌ yʌn xan,
a mac a mʌꞌ patarob,
pꞌeriꞌob u janʌnob yejer Jesús.
Quireꞌ yʌn yaꞌab mac cu sayob tu pach quir u cʌnicob u tꞌʌn Jesús.
16 U camsʌyʌjirob u tꞌʌn Moisés a fariseojoꞌ caj u yirajob curucbar janʌn u caꞌ Jesús yejer a mac a cu naj cꞌʌmicob u taqꞌuin gobierno romano yejer a mac a mʌꞌ patarob,
caj u yaꞌarob tiꞌ u camsʌwinicob Jesús:
―Biquinin a wʌjcamsʌyʌjirex ―quij yaꞌaraj tiꞌ― pꞌeriꞌ u janʌnob yejer a mac a cu naj cꞌʌmicob u taqꞌuin u gobierno romano,
bayiriꞌ xan,
yejer a mac a mʌꞌ patarobeꞌ?
17 A ber caj u yubaj Jesúseꞌ,
caj u yaꞌaraj tiꞌob:
―A mʌꞌ yajoꞌ,
mʌꞌ u cꞌatic tsꞌac,
quireꞌ toc yʌn yor.
A mac a yajoꞌ raꞌ cu bin cʌxtic yoꞌoch tsꞌac.
Rajen tarenoꞌ.
Quireꞌ taren in pʌyic a mac a yʌn u siꞌpirob caꞌ u cꞌaxej tu yorob soc u pꞌʌticob a cꞌasoꞌ.
Mʌꞌ taren in pʌyic a mac a cu yaꞌaricob mʌnaꞌ u siꞌpirob.
U cꞌatbar yubej wa cu pꞌʌtic u janʌn
18 U camsʌwinicob Juan yejer camsʌwinicob a fariseojoꞌ tan u jamach pꞌʌticob u janʌnob soc u quiꞌ cꞌujinticob Cꞌuj.
Caj tarob cꞌataꞌbir tiꞌ ten jun yarob mac caj u yaꞌarajob:
―Biquinin u camsʌwinicob Juan yejer u camsʌwinicob a farisejoꞌ cu jamach pꞌʌticob u janʌnob soc u quiꞌ cꞌujinticob Cꞌuj,
barej a camsʌwinicob mʌꞌ u jamach pꞌʌticob u janʌnob quir u quiꞌ cꞌujinticob Cꞌuj?
19 Jesús caj u yaꞌaraj tiꞌob:
―A mac a cu bin u chꞌic u raqueꞌ,
cu pʌyic u racꞌob quir u quiꞌ quiꞌ janʌnob.
A tarobeꞌ,
mʌꞌ tsoy wa cu tucricob.
20 Barej wa cu cꞌuchur tu qꞌuinin cu bin,
a tu chꞌaj u raqꞌueꞌ,
jeroj a ray u qꞌuininoꞌ cu bin u jamach pꞌʌticob u janʌnob.
Wa ber caꞌ bin xiquen a ray u qꞌuininoꞌ jach jaj cu bin u jamach pꞌʌticob u janʌnob in camsʌwinicob.
21 Caj u yaꞌaraj Jesús:
―Mʌꞌ tsoy xan,
caꞌ a xaxactiquex a baꞌ caj a cʌnex tiꞌ a nunquirex yejer a baꞌ ca cʌniquex tiꞌ ten.
Mʌꞌ ja wirej,
mʌnaꞌ mac cu jompʌcꞌtic u rabir u nocꞌ yejer ricꞌben.
Cu mosar a ricꞌbenoꞌ cu jatar,
cu cochtar.
Jach carim u jorir u nocꞌ u cochtar.
22 Bayiriꞌ xan,
mʌnaꞌ mac cu tꞌajic u cꞌab u wich uva ich u rabir yotꞌer chivo.
Quireꞌ caꞌ bin pajnʌc,
cu bujur,
hasta u rʌc wecar u cꞌab uva.
Cu rʌc jatar u yotꞌer chivo xan.
A ricꞌben u cꞌab u wich uva,
caꞌ u tꞌajej ich ricꞌben yotꞌer chivo soc mʌꞌ u bujur soc mʌꞌ u rʌc wecar u cꞌab uva.
U camsʌwinicob Jesús caj u jichꞌtob u pʌcꞌar u wich trigo tu qꞌuinin tu cu jesic u bʌjob winiquirob judío
23 Raꞌ u qꞌuinin tu cu jesic u bʌjob u winiquirob judío,
cu chꞌʌtob u cor mac Jesús,
quet yejer u camsʌwinicob.
Robob caj u tarob tu pach Jesús.
U camsʌwinicob Jesús caj u jichꞌtajob u pʌcꞌar u wich trigo,
u jantejob quireꞌ wichʌjob.
24 A winiquirob judío a fariseojoꞌ tun,
caj u yaꞌarob tiꞌ Jesús:
―Iric a camsʌwinicob.
Biquinin cu jichꞌticob u pʌcꞌar u wich trigo u qꞌuinin tu cu jesicob u bʌj u winiquirob judío.
Quireꞌ cu beyajob tu qꞌuinin tu cu jesic u bʌjob u winiquirob judío.
25 Jesús caj u yaꞌaraj tiꞌ u winiquirob judío a fariseojoꞌ:
―Mʌꞌ wa ta xacajex tu tsꞌibaꞌan u tꞌʌn Cꞌuj tiꞌ David uch ber caj wichʌjij David yejer u racꞌob uch?
26 Caj oquij David yejer u racꞌob ich naj tu tꞌinaꞌan yotꞌer chivo quir u cꞌujinticob Cꞌuj u winiquirob judío.
Caj tsꞌaꞌb yoꞌoch pan ten a sacerdote.
A ra u qꞌuininoꞌ tiꞌ yʌn u jach tsꞌurir sacerdote u cꞌabaꞌ Abiatar.
A jeroj tuneꞌ,
caj u jantajob David yejer u racꞌob quireꞌ wichʌjob,
cax mʌꞌ tsoy u jantic a caj tsꞌaꞌb tiꞌ David ten sacerdote.
Mʌꞌ ja wirej,
raꞌ quir u tsꞌabʌr tiꞌ Cꞌuj,
cu chen janticob a sacerdotejoꞌ.
27 Bayiriꞌ xan,
caj u yaꞌaraj tiꞌob:
―Mʌꞌ ja wirej,
u qꞌuinin tu cu jesic u bʌjob raꞌ betaꞌb tiꞌ winic quir u jesic u bʌjob.
Mʌꞌ betaꞌb winic ten Cꞌuj tiꞌ u qꞌuinin tu cu jesic u bʌjob.
28 A tenoꞌ,
baxuquenechex,
chen a tenoꞌ cu tsꞌuririntiquen tu cotor baꞌ,
inan a baꞌ cu yiric mac tu qꞌuinin tu cu jesicob u bʌj u winiquirob judío ―quij Jesús.