Jesús cu jansic cuatro mil xib
8
A ray u qꞌuininoꞌ,
caj tsꞌoc u muchꞌquinticob yaꞌab macob.
Mʌnaꞌ yoꞌoch pan bin u jantobiꞌ.
Jesús caj u tꞌʌnaj u camsʌwinicob tu yicnʌn,
caj u yaꞌaraj tiꞌob:
San Marcos 8.1-21
2 ―Quin yajquintic a yaꞌab macobaꞌ chen tsꞌoc u man mʌnaꞌ u nup u qꞌuinin tiꞌ yʌnob yejerenob bajeꞌrer,
u yoꞌochob tu rʌc xupajob.
3 Wa quin tuchiꞌticob caꞌ xicob tu yatochobeꞌ jeꞌ u rubur u mucꞌob ich bejeꞌ quireꞌ wiꞌij.
Mʌꞌ ja wirej,
yʌn jun yarob ich a yaꞌab macobaꞌ nach tub u tarob.
4 U camsʌwinicob caj u nuncajob tiꞌ:
―Jeꞌ wa ju cꞌuchur yor mac ich a jeꞌ tʌcay ruꞌumaꞌ caꞌ u naꞌajquintej yejer yoꞌoch pan a jeꞌ yaꞌab macobaꞌ?
Mʌꞌ ja wirej,
mʌnaꞌ mac teꞌ cʌjaꞌanobaꞌ.
5 Caj u cꞌataj tiꞌob:
―Mun pan yʌn techexiꞌ?
Robobeꞌ caj u yaꞌarajob:
―Siete pan yʌn a tenobiꞌ.
6 Caj u yaꞌaraj tiꞌ a yaꞌab macoboꞌ caꞌ curacob ich ruꞌum.
Jeroj caj u chꞌaj a siete panoꞌ caj u yaꞌaraj:
“Bayoꞌ Cꞌuj quireꞌ caj a tsꞌaj toꞌonex ij coꞌochex”,
jeroj tuneꞌ,
caj u xatꞌaj caj u tsꞌaj tiꞌ u camsʌwinicob quir u tsꞌicob ʌcʌtan a yaꞌab macoboꞌ.
Robob tuneꞌ caj u tsꞌajob ʌcʌtan a yaꞌab macoboꞌ.
7 Yʌn xan tiꞌob jun yarob majʌn cʌyob,
jeroj caj u tꞌʌnaj Cꞌuj:
“Bayoꞌ Cꞌuj quireꞌ caj a tsꞌaj toꞌonex ij coꞌoch cʌyex”,
caj u yaꞌaraj tiꞌ u camsʌwinicob caꞌ tsꞌabac xan ʌcʌtan a yaꞌab macoboꞌ.
8 Caj janobeꞌ caj naꞌajchʌjob,
jeroj tuneꞌ,
caj u marajob u xetꞌer,
caj u marajob siete xac chup yejer u xetꞌer.
9 A mac janoboꞌ tac cuatro mil.
Jeroj tuneꞌ,
caj u yaꞌaraj tiꞌob caꞌ xicob tu yatochob.
10 Seb caj oquij yejer u camsʌwinicob ich chem,
caj cꞌuchob tu ruꞌumin u cꞌabaꞌ Dalmanuta.
Cꞌataꞌb tiꞌ caꞌ iric carem u beyaj Jesús
11 Caj cꞌuchob a winiquirob judío a fariseojoꞌ caj yʌnxchun u nunquicob a baꞌ cu tsicbar Jesús,
caj u cꞌatob tiꞌ u esacob tiꞌ caꞌanan a baꞌ mʌnaꞌ mac yiramʌn uch mʌꞌ biqꞌuin yiramʌn.
Mʌꞌ ja wirej,
cu tumticob u yor Jesús.
12 Caj tsꞌoc yubic yaꞌaraꞌ tiꞌ ten u winiquirob judío a fariseojoꞌ caj u putaj yicꞌ,
caj u yaꞌaraj:
―A techexoꞌ,
a mac cuxaꞌanob tu qꞌuinin bajeꞌrer ca cꞌatic tenex caꞌ in wesej techex a baꞌ a mʌnaꞌ mac yiramʌn uch mʌꞌ biqꞌuin yiramʌn.
Jach taj quin waꞌaric techex mʌꞌ biqꞌuin quin bin in wesej tiꞌ techex a baꞌ a mʌnaꞌ mac yiramʌn uch a mʌꞌ biqꞌuin yiramʌnoꞌ.
13 Jeroj tuneꞌ,
caj u pꞌʌtajobeꞌ,
caj wʌcꞌʌs oc ich chem caj bin tanxer ruꞌum pichir cꞌacꞌnab.
U pʌj sʌcʌnob a winiquirob judío a fariseojoꞌ
14 U camsʌwinicob Jesús tuꞌub tiꞌob uch u chꞌicob yoꞌoch waj,
Chen tuririꞌ yoꞌoch waj caj u chꞌaj ich chem.
15 Caj u camsaj tiꞌob tan yaꞌaric:
―Quiꞌ cʌnantechex a bʌjex tiꞌ a baꞌ cu camsic techex u winiquirob judío a fariseojoꞌ yejer a baꞌ cu camsic techex a mac u yajob u bʌj Herodes.
A baꞌ cu camsicob irej a pʌj sʌcʌnoꞌ.
16 U camsʌwinicob Jesús caj u pacran tꞌʌnajob ich u yet camsʌwinicob caj yaꞌarob:
―Raꞌ ix tiꞌ cu yaꞌaric quireꞌ mʌnaꞌ toꞌonex waj quir ic janʌnex.
17 Jesús caj u cꞌʌꞌotaj u tucurob caj u yaꞌaraj tiꞌob:
―Biquinin ca pacran tꞌʌniquex a bʌjex quireꞌ tub techex a chꞌiquex a woꞌoch panex?
Biquinin mʌꞌ a toy cꞌʌꞌotiquex biquinin mʌꞌ a toy najtiquex?
Taquij u qꞌuinin bajeꞌrer chich a joꞌrex.
18 Yʌn a wichex biqinin mʌꞌ a wiriquex baꞌ?
Yʌn a xiquinex biquinin mʌꞌ a wuꞌyiquex tꞌʌn?
Mʌꞌ wa cꞌaj techex?
19 Barej caj in xatꞌaj a cinco yoꞌoch pan ich a cinco mileꞌ mun xac chup yejer u xetꞌer caj a marajex?
Robob caj u nuncajob:
―Doce xac caj in marob.
Jesús caj u wʌcꞌʌs cꞌataj tiꞌob:
20 ―Barej caj in xatꞌaj yoꞌoch pan yejer cʌy ich a cuatro mileꞌ,
mun xac chup yejer u xetꞌer caj a marex?
Robob caj u nuncajob:
―Siete xac caj in marobiꞌ.
21 Caj u yaꞌaraj tiꞌob:
―Biquinin mʌꞌ toy a najtajexiꞌ?
Ich u cajar Betsaida jawsaꞌb a chꞌop u wich ten Jesús
22 Jesús yejer u camsʌwincob caj cꞌuchob tu cajar Betsaida.
Caj tar purbir tiꞌ tuririꞌ chꞌop u wich,
caj u chich cꞌatajob tiꞌ caꞌ u tʌrej quir u jawʌr u wich.
San Marcos 8.22-38
23 Caj u mʌchaj tun u cꞌʌb a chop u wichoꞌ caj u jocꞌsaj tancab tu cajar tu yʌnob.
Caj tubaꞌb u wich,
caj u tsꞌan cꞌʌb tu boxer u wich caj u cꞌataj tiꞌ:
―Ca wiric wa baꞌ?
―caj cꞌataꞌb tiꞌ ten Jesús.
24 A chꞌop u wichoꞌ caj pacatnʌjij caj u yaꞌaraj:
―Quin wiric a macoꞌ an ten bic cheꞌ,
barej quin wiric u manobeꞌ irej cheꞌ cu manob.
25 Seb wʌcꞌʌs tsꞌancꞌʌbtaj yocꞌor u boxer wich caj u pacat,
jeroj quiꞌ tsoyquintaꞌb u wich,
cax nach cu quiꞌ yiric tu cotor.
26 Caj u tuchiꞌtaj u yatoch,
caj u yaꞌaraj tiꞌ:
―Mʌꞌ a yʌn bin a waꞌarej ich a jeꞌ cajaraꞌ.
Araꞌb ten Pedro tiꞌ Jesús: Cristojech
27 Caj jocꞌ Jesús yejer u camsʌwinicob,
caj binob ich u cajarob nʌtsꞌaꞌan,
u cajar u cꞌabaꞌ Cesarea Filipo.
A ich bejoꞌ caj u cꞌataj tiꞌ u camsʌwinicob,
caj yaꞌaraj tiꞌob:
―Caj u jumintajob a wuꞌyajex,
baꞌ cu yaꞌaricob ten,
a macoboꞌ?
28 Robob caj u nuncajob:
―Juanech ―quij―,
a cu yacsic jaꞌ tu joꞌr mac bin.
U jerob cu yaꞌaric,
Elíasech.
U jerob,
cu yaꞌaric jaj ix tiꞌ yʌjtseqꞌuirech u tꞌʌn Cꞌuj a tsꞌaꞌb u tucuric ten Cꞌuj quir u tsicbar a baꞌ u cꞌat Cꞌuj.
29 Rajiꞌ tuneꞌ caj u yaꞌaraj tiꞌob:
―Ten wa ca waquenex?
Pedro tuneꞌ,
caj u nuncaj caj u yaꞌaraj tiꞌ:
―A techoꞌ,
rajiꞌ Cristojech caj u tuchiꞌtajech Cꞌuj.
30 Rajiꞌ caj araꞌb tiꞌob ten Jesús:
―Mʌꞌ a yʌn bin a waꞌariquex tiꞌ mac wa Cristojen.
Jesús cu yaꞌaric bin in caj quimin
31 Jeroj tuneꞌ,
caj yʌnxchun u camsic tiꞌob bin in caj batꞌan mucꞌyaj a tenoꞌ baxuquenechexoꞌ.
Bin u caꞌob u xurpꞌʌtiquenob u jach tsꞌurirob u winiquirob judío,
a nuxiboꞌ yejer u jach tsꞌurirob sacerdote u winiquirob judío yejer yʌjcamsʌyʌjirob u tꞌʌn Moisés.
Bin in caj quinsbir barej caꞌ bin manac mʌnaꞌ u nup u qꞌuinin bin in caj wʌcꞌʌs riqꞌuir quir in cuxtar.
32 Tu quiꞌ toc rʌc araj tiꞌob quir u najticob.
Caj pay Jesús ten Pedro soc u tiriꞌ cu tsicbar caj u majquintaj Pedro caj yaꞌaraj:
―Mʌꞌ a yʌn aric a quinsaꞌ.
33 Rajiꞌ tuneꞌ,
caj u sutaj u bʌj caj u pʌctaj u camsʌwinicob caj qꞌueyaꞌb Pedro ten Jesús caj yaꞌaraj:
―Joqꞌuen Pedro irech a quisinoꞌ a Satanásoꞌ ―quij Jesús―.
Mʌꞌ a pꞌusic in wor ―quij Jesús―.
Mʌꞌ quet a wor yejer Cꞌuj,
quet a wor yejer a xiboꞌ Pedro.
34 Caj u tꞌʌnaj yaꞌab macob yejer u camsʌwinicob,
caj u yaꞌaraj tiꞌob:
―An ten bic ten caꞌ bin mucꞌyajnʌquen ich in cruz.
Baxuc techex caꞌ bin mucꞌyajnʌquechex quireꞌ caj a cꞌʌmajex in tꞌʌn cax ca quiminex ich a cruzex.
Baxuc xan,
caꞌ a pꞌʌtex a baꞌ ca pachtiquex ta worex wa ja cꞌatex a cʌniquex in tꞌʌn ―quij Jesús―.
35 Quireꞌ a mac a mʌꞌ u cꞌat u taquic u cuxtar tiꞌ u racꞌob tu cu chucurob u pach ten u racꞌob,
quireꞌ caj u yacsaj tu yor tiꞌ in tꞌʌn,
bayiriꞌ xan,
quireꞌ u jach tsoyir u tꞌʌn Cꞌuj,
raꞌ cu bin taquic u pixam.
36 Cax chen toc yʌn a baꞌtaquex ich yocꞌocab chen wa cu saꞌtar a pixamex jeroj tuneꞌ,
baꞌ wir a baꞌtaquex ich yocꞌocab?
37 Jeꞌ wa ju cꞌuchur u yor u boꞌotic u pixam yejer u baꞌtac wa yejer u taqꞌuin?
Mʌꞌ biqꞌuiniꞌ,
cꞌuchaꞌan yor u boꞌotic.
38 Wa mac cu chꞌic suraquir ten yejer a baꞌ quin tsecꞌtic,
quireꞌ a jeꞌ cuxaꞌanob mac bajeꞌrer,
a cu naj acsicob u siꞌpirob,
bayiriꞌ xan,
tiꞌ a jeꞌ cuxaꞌanob mac,
a cu naj manob,
baxuc ten caꞌ bin in chꞌaꞌej suraquir tiꞌ,
quireꞌ a tenoꞌ baxuquenechexoꞌ.
Quin bin in chꞌic suraquir tiꞌ caꞌ bin taquen ich u sasirir Cꞌuj in Tet yejer u mucꞌ u yʌjmasirob u tꞌʌn Cꞌuj caꞌanan.