Jesús cu camsic soc taj u beyajob
6
Caj yaꞌaraj tiꞌ u camsʌwinicob,
Jesús ich u joꞌr pꞌuc wits:
―Wa ca manex ta tsoyir soc chen yiric ten a racꞌob.
Mʌꞌ ju bin u quiꞌ boꞌotiquechex ic Tet Cꞌuj a mac tiꞌ yʌn ich caꞌanan.
Rajen cʌnantechex a bʌj tu ca manex tu tsoyir.
2 Rajen ―quij Jesús―,
quin waꞌaric techex.
Wa ca wiriquex mʌnaꞌ nocꞌ.
Cu tsꞌoc a jʌsiquex tiꞌ,
chen mʌꞌ a manex a waꞌarex tiꞌ tu cotor mac irex wa caꞌtur u tucur.
Mʌꞌ ja wirej,
aroꞌ cu man yaꞌaric soc yaꞌaric tiꞌ:
“Jach tsoyech quireꞌ caj a jʌsaj tiꞌ.”
Baxuc u cꞌat yubicob u jumintej tu cu man u cꞌujinticob Cꞌuj a fariseojoꞌ.
Baxuc u cꞌat yubicob u jumintej tu cu man u tꞌʌnicob u racꞌob a caꞌtur u tucuroꞌ.
Taj quin waꞌaric techex,
toc boꞌotaꞌb ten u racꞌob caj yaꞌarajob:
“Jach tsoyech.”
3 Chen a tenoꞌ ―quij Jesús―,
quin camsic techex.
Wa ca jʌsiquex mac mʌnaꞌ baꞌ tiꞌ.
Mʌꞌ ja manex a waꞌarex.
4 Muc u tsꞌajex tiꞌ baꞌ,
a mʌnaꞌ baꞌ tiꞌ.
A Cꞌujoꞌ,
cu yiric a muc u tsꞌiquex tiꞌ.
Jeꞌ u quiꞌ boꞌotic techexeꞌ caꞌ bin xiquechex caꞌanan.
Jesús cu camsic u camsʌwinicob bictabar u tꞌʌnicob Cꞌuj
5 Caj yaꞌaraj Jesús tiꞌ u camsʌwinicob:
―Mʌꞌ ja bin a tꞌʌnex Cꞌuj irechex caꞌturex a tucurex.
Quireꞌ cu chꞌictarob tu cu naj cꞌujinticob Cꞌuj u winiquirob judío caꞌ tus iric ten u racꞌob.
Baxuc a mac cu tꞌʌnicob ich tanbej,
caꞌ tus iric ten u racꞌob.
Jesús caj u yaꞌaraj:
―Taj quin wac techex.
Yʌn u boꞌorir quireꞌ irir ten u racꞌob.
6 Chen a tenoꞌ ―quij Jesús―.
Quin camsic techex,
caꞌ bin a tꞌʌnex Cꞌuj ta junanex.
Mʌꞌ ich tu yʌn pim winic.
Mʌc u jor jun cꞌas a watochex,
caꞌ a tꞌʌnex Cꞌuj ta junʌn,
soc mʌꞌ chʌcaꞌan yiricob techex a racꞌob.
A Cꞌujoꞌ,
cu yiric ca tꞌʌniquex ta junanex,
jeꞌ u boꞌotiquechex biqꞌuin.
7 Caj yaꞌaraj Jesús:
―Caꞌ bin a tꞌʌnex Cꞌuj,
mʌꞌ a caꞌcaꞌ ariquex irechex wa mac mʌꞌ yerob Cꞌuj.
Aroꞌ yaꞌab cu tsicbarob.
Cu tus tucricobeꞌ,
cu yubic tiꞌob u tus Cꞌuj a yaꞌab cu tsicbarob.
8 Caj yaꞌaraj Jesús:
―Rajen mʌꞌ ja yʌn cʌniquex,
a mac a mʌꞌ yerob Cꞌuj.
Mʌꞌ ja wirej,
cax a techex mʌꞌ toj a cꞌatex baꞌ tiꞌ.
A Cꞌujoꞌ,
yer baꞌ a cꞌatex,
cax mʌꞌ toj a tꞌʌniquex.
9 Caj u yaꞌaraj Jesús:
―A jeꞌ quin camsic techex.
Cʌnex a tꞌʌnex Cꞌuj.
Arex tiꞌ Cꞌuj:
Ic Tet caꞌanan,
ca waꞌariquex tiꞌ.
Caꞌ u sʌjtejob a cꞌabaꞌ tu cotor mac,
Cꞌuj.
10 Sebquintej a tar Cꞌuj quir a reyintic Cꞌuj ich yocꞌocab ―quechex tiꞌ―.
Caꞌ in quibob a tꞌʌn Cꞌuj teꞌ yocꞌocab an ten bic u quibicob a tar caꞌananoꞌ,
a yʌjmasirob a tꞌʌn tech Cꞌuj ―quechex tiꞌ―.
11 Chuquej tenob in woꞌoch waj,
soc tiꞌtiꞌ tenob.
12 Caꞌ a jawsej in siꞌpirob ―quechex tiꞌ Cꞌuj―,
an ten bic caꞌ in jawsej u siꞌpirob in racꞌob.
13 Taquej a tenob,
tu cu tumtic in worob a quisinoꞌ ―quechex tiꞌ Cꞌuj―.
A techoꞌ,
Cꞌuj,
cꞌuchaꞌan a wor a reyintic ich yocꞌocab.
A techoꞌ,
Cꞌuj,
yʌn a mucꞌ quir a reyintic ich yocꞌocab.
Caꞌ u quiꞌ cꞌujintiquech,
Cꞌuj,
tu cotor mac ich yocꞌocab.
Caꞌ u cꞌujintiquech munt qꞌuin ―quechex tiꞌ.
14 Caj yaꞌaraj tiꞌ u camsʌwinicob,
Jesús:
―Mʌꞌ ja wirej,
an bic tech,
ca jawsic u siꞌpir mac.
Baxuc tech cu jawsic a siꞌpir Cꞌuj.
Rajiꞌ a Tet caꞌanan.
15 Wa tech mʌꞌ ja jawsej u siꞌpir a racꞌob,
baxuc mʌꞌ ju jawsic a siꞌpir a Tet Cꞌuj xan.
Jesús cu camsic bic a jamach pꞌʌtic a janʌn soc a tꞌʌnic Cꞌuj
16 Caj yaꞌaraj tiꞌ u camsʌwinicob,
Jesús:
―Wa ber u qꞌuinin ca jamach pꞌʌtiquex a janʌnex soc a tꞌʌniquex Cꞌuj.
Mʌꞌ ja chaꞌiquex yiricob a racꞌobex,
caj a jamach pꞌʌtajex a janʌnex.
Quireꞌ a mac caꞌtur u tucurob,
cu yesicob tiꞌ u racꞌob tu jamach pꞌʌticob u janan.
Rajiꞌob cu tus tucurob soc irir ten u racꞌob.
Yaꞌaraj Jesús:
―A tenoꞌ,
taj quin camsic techex.
A caꞌtur u tucurob,
toc boꞌtaꞌan ten u racꞌob quireꞌ irir ten u racꞌob.
17 Caj yaꞌaraj tiꞌ u camsʌwinicob,
Jesús:
―Wa ber u qꞌuinin ca jamach pꞌʌtiquex a janʌnex quir a tꞌʌniquex Cꞌuj.
Quiꞌ tsictej a joꞌrex.
Quiꞌ pꞌoꞌej a wichex
18 soc mʌnaꞌ mac yer caj a pꞌʌtex a janʌnex.
Chen a Cꞌujoꞌ,
tiꞌ yʌn yejerechex tu junan,
caj u yiraj ta jamach pꞌʌtajex a janʌnex.
Rajiꞌ cu bin u boꞌotic techex biqꞌuin.
Jesús caj u yaꞌaraj bic tabar neyʌn a taqꞌuin caꞌanan
19 Jesús caj yaꞌaraj tiꞌ u camsʌwinicob ich u joꞌr pꞌuc wits:
―Mʌꞌ tsoy u netꞌajar a taqꞌuinex ich yocꞌocab quireꞌ jeꞌ u yajtar,
a worex tiꞌ.
Mʌꞌ ju xʌntar quireꞌ jeꞌ u rʌc jantaꞌ ten cꞌʌmʌs.
Bayiri ca sʌtiquex a taqꞌuinex xan.
Mʌꞌ ja wirej,
yʌn mac cu yocar ta watochex cu yacric a taqꞌuinex xan.
20 ’Rajen quiꞌ pꞌisex a bʌj quir a cuxtarex ich caꞌanan,
quireꞌ aroꞌ irechex a mac yʌn u taqꞌuin ich caꞌanan.
Tu mʌꞌ u jantaꞌ ten cꞌʌmʌs.
Mʌꞌ ju rapar,
mʌꞌ ju yocar mac u yaꞌcric techex.
21 Ca wiric ―quij Jesús―,
a tu yʌn a taqꞌuinex rajiꞌ ca pachtiquex.
Rajiꞌ ca pachtiquex a taqꞌuinex wa yʌn ich yocꞌocab.
Wa tiꞌ yʌn a taqꞌuinex caꞌanan,
tiꞌ ca pachtiquex a binex caꞌanan xan.
U sasir a winquirirex
22 Caj yaꞌaraj Jesús tiꞌ u camsʌwinicob:
―A wichexoꞌ irej quib.
Quireꞌ raꞌ ca cꞌʌniquex soc u yercꞌacꞌtic a berex.
Baxuc a wichexoꞌ,
wa sasirchʌji a wichex,
mʌꞌ ja manex tu yacꞌbirir,
quireꞌ sasirchʌjij a wichex.
23 Chen waj acꞌbirchʌjij a wichex ca manex tu yacꞌbirir.
Baxuc a tucurex xan.
Wa tsoy a tucurex,
ca bin a quiꞌ najtex tu cu bin u reyintej Cꞌuj.
Wa mʌꞌ ja cꞌʌmajex Cꞌuj,
mʌꞌ tsoy a tucurex,
irechex a cu manob tu yacꞌbirir,
a jach manan acꞌbiroꞌ.
Cu bin u tsꞌurintiquechex Cꞌuj wa ja taqꞌuinex ca bin a tsꞌurintex?
24 Caj yaꞌaraj tiꞌ u camsʌwinicob,
Jesús:
―Mʌnaꞌ mac cꞌuchaꞌan yor u beyaj a caꞌtur u tsꞌuriroꞌ.
A caꞌturoꞌ u tsꞌuriroꞌ,
cu pꞌactic junturiꞌ.
Tuririꞌ cu yajquintic u tsꞌurir.
A caꞌturoꞌ u tsꞌuriroꞌ,
mʌꞌ u quiꞌ beyaj tiꞌ.
Tuririꞌ u tsꞌurir cu quiꞌ beyaj tiꞌ.
Baxuc techex,
mʌꞌ cꞌuchaꞌan a worex a yajquintex Cꞌuj wa ca yajquintex a taqꞌuinex.
A Cꞌujoꞌ cu cʌnantic u parar
25 Caj yaꞌaraj Jesús tiꞌ u camsʌwinicob:
―Chich quin waꞌaric techex.
Mʌꞌ ja tucriquex baꞌ ca bin a jantex.
Mʌꞌ ja tucriquex a baꞌ ca bin a wuqꞌuiquex.
Mʌꞌ ja tucriquex bic ca bin cuxtarex.
Mʌꞌ ja tucriquex a noqꞌuex baꞌ ca bin a buquintex.
A Cꞌujoꞌ ―quij Jesús―,
raꞌ cu cʌnantic techex.
Mʌꞌ wa raꞌ cu bin u tsꞌic techex a woꞌochex,
cax a noqꞌuex xan?
26 Jesús caj yaꞌaraj tiꞌ u camsʌwinicob:
―Irej a wirex.
A chꞌichꞌoꞌ,
cu chꞌic u xicꞌ caꞌanan.
Mʌꞌ ju pʌqꞌuicob yoꞌoch irej winic.
Mʌꞌ ju jaqꞌuicob yoꞌoch a chꞌichꞌoꞌ,
irej winic.
Mʌnaꞌ u caꞌancheꞌir irej winiquir.
Chen a Cꞌujoꞌ cu tsꞌic yoꞌoch.
Mʌꞌ ja wirej,
jach manan cojir techex,
chen a chꞌichꞌoꞌ,
mʌꞌ cojiꞌ ʌcʌtan tu wich Cꞌuj.
Rajen a Cꞌujoꞌ cu cʌnantic techex quireꞌ u jach yajechex a Cꞌujoꞌ.
27 Caj araꞌb tiꞌob ten Jesús:
―Arej ten ―quij Jesús―,
tu yʌnechex a cꞌuchaꞌan yor u bʌjiꞌ caꞌ u betej caꞌ satsꞌac cu nesatsꞌar u baquer,
cax chumuc metro?
Mʌnaꞌ mac cꞌuchaꞌan yor u betic caꞌ satsꞌac u baquer chichin.
28 Caj yaꞌaraj Jesús tiꞌ u camsʌwinicob:
―Biquinin ca tucriquex a noqꞌuex?
Cʌnex irechex u topꞌcheꞌ tu cu wacꞌar u topꞌ.
Mʌꞌ ju beyaj,
mʌꞌ ju cꞌuch irej winic,
u topꞌ a cheꞌoꞌ.
29 Cax mʌꞌ ju beyaj,
cax mʌꞌ ju cꞌuch.
U topꞌ a cheꞌoꞌ,
u bʌjiriꞌ cu wacꞌar,
barej jach manan u tsoyir u topꞌ a cheꞌoꞌ.
Quin wac techex ―quij Jesús―.
A werex Salomón uch,
a cu reyintic a nunquirex uch.
Rajiꞌ mʌꞌ ju buquintej jach tsoy u nocꞌ.
A ju topꞌ cheꞌoꞌ jach manan tsoyir.
A Salomónoꞌ mʌꞌ jach tsoy u noqꞌuiꞌ.
30 Caj yaꞌaraj Jesús tiꞌ u camsʌwinicob:
―A Cꞌujoꞌ,
caj u betaj a suꞌuc a tiꞌ yʌn bajeꞌrer chen samʌn mʌnaꞌ.
Cu bin erar.
Cax a suꞌucoꞌ tabar u bin,
chen quiꞌquintex a worex,
quireꞌ a Cꞌujoꞌ jach manan u cʌnantiquechex.
31 Rajen mʌꞌ a yʌn tucriquex a baꞌ ca bin a jantex.
Mʌꞌ ja tucriquex a baꞌ ca bin a wuqꞌuiquex.
Mʌꞌ ca bin a tucriquex a baꞌ ca bin a buquintex.
32 A mac mʌꞌ yer Cꞌuj rajraꞌ cu cʌxticob baꞌ cu bin u jantejob.
Rajraꞌ cu cʌxtejob yuqꞌuej.
Rajraꞌ cu man u cʌxtejob u buquintejob nocꞌ.
Caj u yaꞌaraj Jesús:
―Yʌn a Tetex caꞌanan a mac cu cʌnantic techex.
Rajiꞌ yer a baꞌ a cꞌatex.
Rajiꞌ Cꞌuj caꞌanan.
33 Barej ―quij Jesús―,
pʌyber arex tiꞌ Cꞌuj:
Caꞌ a reyintex Cꞌuj.
Bayiriꞌ xan,
caꞌ quiꞌquintaquex yor Cꞌuj caꞌ manaquex ich u tsoyir.
Wa baxuc caj a quibex jeꞌ u tsꞌic techex tu cotor baꞌ a cꞌatex.
Cax a woꞌochex,
jeꞌ u tsꞌic techex.
Cax a noqꞌuex,
jeꞌ u tsꞌic techex.
Cax a wucꞌurex jeꞌ u tsꞌic techex.
34 Caj yaꞌaraj tiꞌ u camsʌwinicob Jesús:
―Rajen ―quij Jesús―,
baꞌwir ca wacꞌtiquex a baꞌ caꞌ bin tac samʌn.
Tiꞌ tiꞌ a baꞌ ca wacꞌtiquex bajeꞌrer.
Baꞌwir ca xaquiquex,
a ca wacꞌtiquex a baꞌ cu bin tar samʌn yejer a ca wacꞌtiquex bajeꞌrer.
Caꞌ ic tucriquex a baꞌ cu tar samʌn quireꞌ u qꞌuinin samʌniꞌ.