Jesús cu yaꞌaric tiꞌob tu cu camsic tiꞌ xquic a quimen u mam yejer juez
18
Jesús caj u yaꞌaraj tiꞌob tu cu pꞌeriquintic u tꞌʌn soc u cʌnicob:
―Caꞌ a tꞌʌnex Cꞌuj soc mʌꞌ u nacar a worex,
tu ca tꞌʌniquex Cꞌuj.
Lucas 18.1-43
2 Tiꞌ yʌn u cajar ―quij Jesús―,
tu cʌjaꞌan juez.
A juezoꞌ,
mʌꞌ u sʌjtic Cꞌuj,
mʌꞌ ju tucric mac xan.
3 Tiriꞌ ich u cajar xan,
tiꞌ yʌn xquic,
quimen u mam rajiꞌ caj bin ʌcʌtan juez.
Suꞌ suꞌ cu bin yaꞌaric tiꞌ:
“Yʌmtejen tiꞌ a mac a cu pꞌactiquen.”
4 Caj u yʌnxchun u tar xquic a juezoꞌ,
mʌꞌ ju quibaj u tꞌʌn.
Chen pachir caj u yaꞌaraj tu yor:
“Cax mʌꞌ in sʌjtic Cꞌuj ―quij―,
cax mʌꞌ in tucric tiꞌ mac.”
5 Caj yaꞌaraj a juezoꞌ:
“Bin in caꞌ in yamtej a jeꞌ xquicaꞌ,
a quimen u mam raꞌ cu pꞌactaꞌ xquiqueꞌ soc mʌꞌ u choquintic in wor quireꞌ rajraꞌ cu tar.
Quireꞌ caꞌan in wor in wuꞌyic yaꞌaric.”
6 Caj yaꞌaraj Jaj Tsꞌur:
―Cʌnex tiꞌ a baꞌ cu yaꞌaric juez cax mʌꞌ taj yor.
7 Chen mʌꞌ baxuc Cꞌuj quireꞌ taj yor.
Wa rajraꞌ ca cꞌatiquex tu ca tꞌʌniquex Cꞌuj u bur u qꞌuinin u bur u acꞌbir soc u cʌnantic a baꞌ a cꞌat.
A techexoꞌ a tetaꞌb ten Cꞌuj,
jeꞌ u tar u tajir techex.
A Cꞌujoꞌ mʌꞌ u tsꞌocar u yubic a tꞌʌnex.
8 A tenoꞌ ―quij Jesús―,
quin wac techex.
A Cꞌujoꞌ seb cu taꞌquic techex mac tiꞌ a cu pꞌactiꞌechoboꞌ.
Chen caꞌ bin uruquen ich yocꞌocab a tenoꞌ caj u tuchiꞌten Cꞌuj,
baxuquenechexoꞌ.
Jeꞌ wa jin wiric mac tan u yacsic tu yor ten.
Tan u pajicob ten caꞌ in taꞌquej tiꞌ a mac a cu pꞌactic tiꞌeꞌ.
Jesús cu camsic tiꞌ a fariseojoꞌ yejer yʌjcꞌʌmin u taqꞌuin gobierno
9 Jesús caj u caꞌ camsaj tu cu pꞌeriꞌquintic u tꞌʌn.
Yʌn mac cu tucric chen jach tsoy a tiꞌob ʌcʌtan tu wich Cꞌuj quireꞌ a baꞌ cu beticob.
Chen cu tucric tu yor:
“Jot u racꞌob.”
Rajen Jesús caj u yaꞌaraj baxuc aroꞌ,
caj yaꞌaraj Jesús:
10 ―Caꞌtur xib binob ich carem naj tu cu naj cꞌujinticob Cꞌuj u winiquirob judío quir u tꞌʌnicob Cꞌuj.
Tuririꞌ u winiquir judío a fariseojoꞌ,
u jer yʌjcꞌʌmin u taqꞌuin gobierno.
11 Caj chꞌiraj u winiquir judío a fariseojoꞌ soc yirir ten tu cotor mac caj u tus tꞌʌnaj Cꞌuj.
Tu yor,
caj u tꞌʌnaj Cꞌuj,
caj yaꞌaraj:
“Bayoꞌ Cꞌuj ―quij―,
mʌꞌ in betic an ten bic u jer winiquir judío cu betic.
A tenoꞌ,
mʌꞌ in tus chꞌic a baꞌ yʌn tiꞌ winic.
Baxuc mʌꞌ jin man tu cꞌasir,
mʌꞌ jin man in wiric xquic,
mʌꞌ cꞌas a tenoꞌ.
Mʌꞌ baxuquen a cu cꞌʌmic u taqꞌuin gobierno a tiꞌ yʌnoꞌ.
12 A tenoꞌ,
quin quiꞌ cꞌujintiquech,
quin jamach pꞌʌtic in janʌn caꞌtur u qꞌuinin ich a turiꞌ semana.
Tu cotor in taqꞌuin tu quin jaric quin chuquic tuririꞌ ich a diezoꞌ soc in tsꞌic tiꞌ a mac a cu jach beyaj tu cu naj cꞌujinticob Cꞌuj.”
13 Chen yʌjcꞌʌmin u taqꞌuin gobierno,
nach yʌn.
Tiꞌ yʌn tu pach u racꞌob tu cu tꞌʌnicob Cꞌuj.
Mʌꞌ ju cꞌat u nacsic u wich quir u tꞌʌnic Cꞌuj.
Cu chen pʌxic u tsem quireꞌ yer yʌn u siꞌpir.
Quireꞌ baxuc nanij cu betic u winiquirob judío.
Caj yaꞌaraj tiꞌ Cꞌuj ―quij―:
“Chan yajquin ten quireꞌ yʌn in siꞌpir a tenoꞌ.”
14 Quin waꞌaric techex ―quij Jesús―,
Cꞌuj caj u jawsaj u siꞌpir a cu cꞌʌmic u taqꞌuin gobierno.
Caj bin tu yatoch toc tsoyquintaꞌb yor ten Cꞌuj.
Chen a fariseojoꞌ,
mʌꞌ tsoyquintaꞌb yor ten Cꞌuj.
A mac a cu yac jach noꞌjen ―quij―,
chen a Cꞌujoꞌ cu bin yaꞌaric:
“Joꞌtech a techoꞌ”,
cu yiric mʌꞌ noꞌjiꞌ.
Chen a mac cu yac:
“Joꞌten a tenoꞌ.”
Chen a Cꞌujoꞌ cu yiric jach noꞌj.
Jesús yejer a chichanoꞌ
15 Caj tarob u purej tiꞌ Jesús a mac yajeꞌ,
baxuc yejer a chichanoꞌ.
Caj tar purbir a chichanoꞌ soc u pʌtʌxmecꞌtic.
Caj irir ten u camsʌwinicob baꞌ u ber.
Caj u qꞌuejajob:
―Joqꞌuen,
xen ―quij.
Quireꞌ mʌꞌ u cꞌat yiric u tarob ich Jesús a chichanoꞌ.
16 Jesús caj u pʌyaj caꞌ tacob.
Caj yaꞌaraj tiꞌ u camsʌwinicob:
―Tsꞌireꞌej u tarob a chichanoꞌ tin wicnʌn.
Mʌꞌ ja qꞌueyic an ten bic a jeꞌ chichanaꞌ.
Baxucoꞌ a mac cꞌuchaꞌan yor yocor tu cu reyinticob Cꞌuj.
Yʌn u cʌnic irej wa ja chichanoꞌ.
17 Jach taj quin wac techex ―quij Jesús―.
A mac a mʌꞌ ju cʌnic a chichanoꞌ soc u chabar ten Cꞌuj u reyinticob mʌꞌ u cꞌuchur yor,
u cꞌuchur ich caꞌanan tu cu bin u reyinticob Cꞌuj.
U tsꞌurir u winiquirob judío jach neyʌn u taqꞌuin, tan u tsicbar yejer Jesús
18 Caj tarij turiꞌ u jach tsꞌurir u winiquirob judío ich Jesús.
Caj u cꞌataj tiꞌ Jesús:
―Jach tsoyech in wʌjcamsʌyʌjirech.
Arej ten baꞌ yʌn in betic soc in cuxtar munt qꞌuin?
19 Jesús caj yaꞌaraj tiꞌ:
―Biquinin ca wac tsoyen?
Mʌnaꞌ mac jach tsoy chen jariꞌ Cꞌuj.
20 Tech a wer baꞌ caj u tsꞌibtaj Moisés uch.
Cu yaꞌaric:
“Mʌꞌ a yʌn man yejer xquic baxuc xquic,
mʌꞌ u yʌn man yejer xib.
Mʌꞌ ja quinsic mac.
Mʌꞌ ja wacꞌric baꞌ.
Mʌꞌ a yʌn man tus,
a caj a wiraj baꞌ.
Yʌn a sʌjtic a tet,
yʌn a sʌjtic a nʌꞌ xan.”
21 U jach tsꞌurir u winiquirob judío caj yaꞌaraj:
―Tu cotor aroꞌ ten caj in toc quibaj tin chichanin uch.
22 Rajen caj tsꞌoc yubic Jesús a baꞌ caj u yaꞌaraj.
Caj araꞌb tiꞌ:
―Yʌn turiꞌ baꞌ mʌꞌ ta quibaj caꞌ a betej aroꞌ.
Canej tu cotor a baꞌ yʌn tech.
Cu tsꞌocar a rʌc canic,
caꞌ a jʌsej a taqꞌuin tiꞌ a mac otsir.
Cu tsꞌocar aroꞌ,
caꞌ taquech tin pach quir a cʌnic in tꞌʌn.
Caꞌ bin cꞌuchuquech ich caꞌanan tu cu bin u reyinticob Cꞌuj.
Cu bin u tsꞌabʌr tech a baꞌ jach coꞌoj.
23 Caj tsꞌoc yubic a baꞌ caj u yaꞌaraj Jesús tiꞌ caj tucurnʌjij quireꞌ jach yʌn u taqꞌuin.
24 Jesús caj yiraj tucur u caꞌ a xiboꞌ caj u yaꞌaraj tiꞌ:
―Jach yaj yocar mac a neyʌn u taqꞌuin tu cu reyinticob Cꞌuj quireꞌ u yaj u taqꞌuin.
25 Jeꞌ wa ju cꞌuchur yor yocar yʌrʌcꞌ tsimin ich u jor yitꞌ putsꞌ?
Mʌꞌ ju cꞌuchur u yor quireꞌ chichin u jor yitꞌ putsꞌ.
Jeꞌ wa ju cꞌuchur u yor yocar ich caꞌanan a mac neyʌn u taqꞌuin?
Mʌꞌ ju yocar quireꞌ u yaj u taqꞌuin.
Jaj ixtʌcoj,
jeꞌ u yocar yʌrʌcꞌ tsimin ich u jor yitꞌ putsꞌ.
Chen a mac neyʌn u taqꞌuin mʌꞌ yocar,
tu cu bin u reyintejob Cꞌuj,
quireꞌ u yaj u taqꞌuin.
26 A mac a caj u yubaj u tꞌʌn caj yaꞌarajob:
―A mac cu bin taꞌcbir ten Cꞌuj tun?
27 Rajen Jesús caj yaꞌaraj:
―A Cꞌujoꞌ cꞌuchaꞌan yor tiꞌ a baꞌ mʌꞌ cꞌuchaꞌan yor tiꞌ mac.
28 Pedro caj yaꞌaraj:
―Jaj Tsꞌurir ―quij―,
caj in toc rʌc pꞌʌtajob a baꞌ yʌn tenob quir in tarob ta pach soc in cʌnicob a tꞌʌn.
29 Jesús caj yaꞌaraj tiꞌob:
―Jach taj quin wac techex.
Wa mac cu pꞌʌtic yatoch wa ju racꞌ wa ju tet.
Wa ju bʌjob wa ju pararob soc rajiꞌ cu reyinticob Cꞌuj wa cu chaꞌicob.
30 Cu bin u cꞌʌmej tiꞌ Cꞌuj a baꞌ jach tsoy bajeꞌrer.
Jach manan cu bin tsꞌabʌr tiꞌ.
Baxuc xan,
caꞌ bin xuruc tꞌʌn jeꞌ u tsꞌabʌr tiꞌ u cuxtar munt qꞌuin.
Jesús cu caꞌ aꞌaric: Bin in caꞌ quinsbir
31 Jesús caj u pʌyaj u doce u camsʌwinicob soc u tsicbar tiꞌob tu junanob:
―Bajeꞌrer ―quij―,
quic wʌcꞌʌs bin ich u cajar Jerusalén.
Tu cotor a baꞌ caj u tsꞌibtajob yʌjtseqꞌuirob u tꞌʌn Cꞌuj tiꞌ ten uch.
Jeꞌ u tar ten quireꞌ caj u tuchiꞌtajen Cꞌuj baxuquenechexoꞌ.
32 Tiꞌ cu bin u cꞌubiquenob tiꞌ a mac a mʌꞌ u winiquirob judío.
Tiꞌ cu bin u pꞌastiquenob.
Tiꞌ cu bin u cʌrʌxbetiquenob.
Tiꞌ cu bin u tubiquenob xan.
33 Tiꞌ cu bin u chich jʌtsꞌicob in pach.
Cu tsꞌocar aroꞌ cu bin u quinsiquenob.
Chen caꞌ bin manʌc mʌnaꞌ u nup u qꞌuinin,
jeꞌ in riqꞌuir tin quimirir.
34 U camsʌwinicob,
mʌꞌ tu najtajob a baꞌ caj u yubajob yaꞌaric Jesús quireꞌ mʌꞌ yerob baꞌ u cꞌat yaꞌaric u tꞌʌn.
Jesús cu jawsic a chꞌop u wichoꞌ ich u cajar Jericó
35 Tabar u cꞌuchur Jesús ich u cajar Jericó.
Tiꞌ curaꞌan a chꞌop u wichoꞌ ich nʌcꞌ bej.
Tan u cꞌatic u taqꞌuin quir u janʌn.
36 Caj u rʌc uꞌyaj u manob a pimoꞌ a chꞌop u wichoꞌ caj u cꞌata tiꞌ mac bʌytʌc baꞌ u ber.
37 Caj araꞌb tiꞌ:
―Jesús a cu tar ich u cajar Nazaret,
rajiꞌ caj a wuꞌyaj u man ʌcʌtan tech.
38 A chꞌop u wichoꞌ caj u puraj u tꞌʌn tiꞌ:
―Jesús ―quij―,
u pararech a nunquir u rey David,
chan yajquin ten.
39 Chen a mac a cu binob pʌybej caj u yaꞌarajob tiꞌ:
―Mʌc a chiꞌ ―quij.
Chen caj u jach cꞌamquintaj yawʌt tꞌʌn:
―U pararech a nunquir u rey David,
chan yajquint ten.
40 Caj xurij Jesús ich bej caj yaꞌaraj caꞌ tac purbir tiꞌ.
Caj u jutsꞌ u bʌj ich Jesús caj cꞌataꞌb tiꞌ:
41 ―Baꞌ a cꞌat in betej tech?
A chꞌop u wichoꞌ caj u nuncaj:
―Jaj Tsꞌurir ―quij―,
in cꞌat u sasichʌjʌr in wich.
42 Caj araꞌb tiꞌ ten Jesús:
―Caꞌ tac u sasirir a wich quireꞌ caj a wacsaj ta wor ten.
43 Rajen sasichʌjij u wich.
Rajen seb caj sasichʌjij u wich caj say tu pach Jesús caj yaꞌaraj:
―Jach caremech Cꞌuj.
Baxuc a mac a caj u yirob u jawʌr u wich caj yaꞌarajob xan:
―Jach caremech Cꞌuj.