Jesús cu camsic tiꞌ mac cu pʌyic u jer quir u beyaj
20
Caj yaꞌaraj Jesús:
―Tu cu bin u reyinticob Cꞌuj caꞌanan an ten bic u bin mac caj bin u pʌyic mac quir u beyaj,
quir u tꞌaquic u wich uva tu cor.
Aꞌacꞌbir caj bin u pʌybir ten u tsꞌurir.
2 Caj tsicbajnʌjij u tsꞌurir yejer yʌjtꞌaquirob u wich uva mun u boꞌorir cu bin boꞌotbir.
Tres pesos turiꞌ u qꞌuinin u boꞌorir quir u tꞌaquic u wich uva.
Baxuc u boꞌorir uch cu boꞌotaꞌr.
Caj u tuchiꞌtaj beyajob ich u cor.
3 Caj jocꞌ u jach tsꞌurir a las nueve caj yiraj u jerob.
Tiꞌ yʌnob ich tu naj coꞌonan yoꞌoch.
Mʌnaꞌ u beyajob cu manob.
4 Caj araꞌb tiꞌob ten u jach tsꞌurir:
“Xenex ta beyajex tin cor.
Tꞌaquex u wich uva.
Jeꞌ in boꞌotiquex caꞌ bin xiquechex ta beyajex.
A baꞌ tsoy tin tꞌʌn jeꞌ in boꞌotiquex.”
5 Caj jocꞌ u jach tsꞌurir caj bin u tsꞌurir tu cu naj mʌnic yoꞌoch.
Cꞌacꞌchunqꞌuin caꞌ u caꞌ iraj u jerob.
Caj u tuchiꞌtaj beyajob ich u cor.
A las tres caj u caꞌ irajob u jerob caj u tuchiꞌtaj beyajob.
6 Caj wʌcꞌʌs bin u jach tsꞌurir tu cu naj mʌnic yoꞌoch a las cinco.
Caj u caꞌ iraj u jerob.
Mʌnaꞌ u beyajob.
Caj araꞌb tiꞌob:
“Biquinin u bur u qꞌuinin ca manex teraꞌ?
Biquinin mʌnaꞌ a beyajex?”
7 Caj araꞌb tiꞌ u jach tsꞌurir ten a mac mʌnaꞌ u beyajob:
“Mʌnaꞌ mac caj u pʌyoꞌon tic beyaj.”
Caj araꞌb tiꞌob ten u jach tsꞌurir:
“Xenex ta beyajex ich in cor.
Jeꞌ in tsꞌic techex a baꞌ tsoy tin tꞌʌn.”
8 U jach tsꞌurir caj u tuchiꞌtaj yʌjtꞌʌnin.
Oqꞌuin caj u tuchiꞌtaj quir u boꞌotaꞌr yʌjtꞌaquirob u wich uva.
Yʌn boꞌotaꞌr a mac pachir caj tarob.
Caj tsꞌoc u boꞌotic a pachir,
caj tarob caj u boꞌotaj a mac chꞌic tarob sam.
9 Quet bayiriꞌ u boꞌorir caj tsꞌaꞌb tiꞌ.
Cax pachir caj tarob tu beyajob.
Tres pesos caj boꞌotaꞌb.
10 Caj cꞌuchij tu qꞌuinin u boꞌotic a mac yʌn chꞌic tarob.
Cu tucricobeꞌ yerob jach coꞌoj cu bin boꞌotbir.
Caj boꞌotaꞌbeꞌ tres pesos u boꞌorir.
11 Caj tsꞌoc u boꞌotaꞌr caj choquij yorob yejer u jach tsꞌurir.
12 Caj yaꞌarajob tiꞌ u jach tsꞌurir:
“Baxuc a pachirob xan,
caj beyajnʌjob cax turiꞌ hora.
Bayiriꞌ caj boꞌotaꞌb xan.
Cax a tenob tin jach mucꞌob chʌcʌr qꞌuin tu quin beyajob.”
13 Caj u nuncaj tiꞌob u jach tsꞌurir caj yaꞌaraj:
“Biquinin ca chen tsꞌiquintiquenex in tus yaj in bʌj.
Toc tsicbanʌjen techex uch caj in tuchiꞌtechex ta beyajex.
Tin toc araj tres pesos.
14 Chꞌaꞌex u boꞌorir a beyajex caꞌ xiquechex.
A tenoꞌ,
wa jin cꞌat in tsꞌic techex bayiriꞌ u boꞌorir a beyajex cax pachir caj tarob.
Bayiriꞌ quin tsꞌic tiꞌob u boꞌorir u beyajob xan.
15 Mʌꞌ wa tsoy quin tsꞌic in taqꞌuin a mun u boꞌorir in cꞌat in boꞌotic tiꞌob quireꞌ ten in taqꞌuin?
Biquinin choquex a worex ten quireꞌ mʌꞌ tsꞌuꞌten?”
16 Bayiriꞌ baxuc,
caꞌ bin xuruc tꞌʌn xan ich yocꞌocab.
A mac pachir tar tu beyaj tiꞌ Jaj Tsꞌur cu tucric mʌꞌ coꞌoj cu bin boꞌotbir,
chen quet cu bin boꞌotbir.
Barej a mac a yʌn tarij tu beyaj cu tucric jach coꞌoj cu bin boꞌotbir a tiꞌob,
chen quet cu bin boꞌotbir ten Jaj Tsꞌur.
Mʌꞌ ja wirej,
cax yaꞌab mac cu yubic u tꞌʌn Cꞌuj,
mʌꞌ u rʌc quibicob u tꞌʌn Cꞌuj.
Cu wʌcꞌʌs caꞌ aric Jesús bin u caꞌ quinsbir
17 Jesús caj bin ich u berir Jerusalén.
Tu junan caj u pʌyaj u camsʌwinic a docejoꞌ.
Caj yaꞌaraj tiꞌob:
18 ―Jeroj,
cuꞌuxex ich u cajar Jerusalén.
Tiꞌ cu bin u quinsiquenob.
Tiꞌ cu yʌn cꞌubiquenob tiꞌ u jach tsꞌurirob sacerdote yejer u yʌjcamsʌyʌjirob u tꞌʌn Moisés.
Robob cu bin u yaꞌarejob caꞌ quinsaquen.
19 Robob u winiquirob judío cu bin u cꞌubiquenob tiꞌ u winiquirob romano soc u pꞌastiquenob.
Soc u rʌc jʌtsꞌicob in pach,
soc u bʌjiquenob ich cruz soc in quimin.
Mʌnaꞌ u nup u qꞌuinin caꞌ bin caꞌ riqꞌuiquen tiꞌ in quimin.
Caj tar u nʌꞌob Jacobo yejer Juan ich Jesús
20 Caj u jutsꞌ u bʌj u nʌꞌob Jacobo yejer Juan.
Raꞌ u tet Zebedeo.
Quet caj tar yejer u pararob.
Caj xonrʌj ich Jesús
21 quir u cꞌatic baꞌ tiꞌ:
―Baꞌ a cꞌat ten?
―quij.
Caj yaꞌaraj tiꞌ:
―Caꞌ bin cꞌuchur tu qꞌuinin caꞌ bin u reyinticob Cꞌuj.
Arej u cutarob tuririꞌ ta noj,
bayiriꞌ tuririꞌ ta tsꞌic soc u sʌjtaꞌr ten u racꞌob.
22 Caj u nuncaj Jesús:
―A techoꞌ,
mʌꞌ a wer baꞌ ca cꞌatic ten.
Arej ten wa cꞌuchaꞌan yorob a parar u mucꞌyajob an ten bic ten caꞌ bin mucꞌyajnʌquen ich cruz.
Caj yaꞌarajob Juan yejer Jacobo:
―Cꞌuchaꞌan ij cor ic mucꞌyaj an bic tech.
23 Jesús caj yaꞌaraj tiꞌob:
―Taj quin waꞌaric techex.
Jeꞌ a mucꞌyaj an ten biquen.
Chen mʌꞌ cꞌuchaꞌan in wor in curquintechex ich in noj mʌꞌ ich in tsꞌic,
quireꞌ mʌꞌ ten yʌnin.
Quireꞌ in Tet Cꞌuj yʌnin quir u curquintic mac u cꞌat Cꞌuj.
U yʌn ricsmʌn uch.
24 Caj yubob a diez a yet camsʌwinicob caj pꞌujob yejer Juan yejer Jacobo.
25 Jesús caj u tꞌʌnaj caj u muchꞌquinticob u bʌj u camsʌwinicob quir u camsic.
Caj yaꞌaraj:
―A werex a mac u jach tsꞌurir u cajar a mʌꞌ u winiquirob judío.
Cu jach tsꞌictarob tu cu tsꞌurinticob u winiquirob.
Bayiriꞌ a mac a cu yamticob tiꞌob cu jach pꞌasticob a mac cu tsꞌurinticob u jach tsꞌurir.
26 Mʌꞌ ja yʌn cʌniquex a baxuc u tsꞌurirob a mʌꞌ u winiquirob judío.
A mac u cꞌat u tsꞌurintic u yet acsaꞌorir.
Arej tiꞌ,
caꞌ u yamtej u yet acsaꞌorir.
27 Cax a mac ichechex u cꞌat u tsꞌurintic u yet camsʌwinicob.
Arej caꞌ u yamtej u yet camsʌwinicob soc irej wa ju cꞌurew.
28 Caj yaꞌaraj Jesús:
―Caꞌ a cʌnenex.
A tenoꞌ taren in yamtic tu cotor mac.
Mʌꞌ taren quir u yamtiquenob.
Taren quir in quinsaꞌr soc in rʌc taquic tu cotor mac.
Jesús caj u jawsaj chꞌop u wich caꞌtur
29 Caj jocꞌob Jesús yejerob u camsʌwinicob ich u cajar Jericó.
Jach pim caj sayob tu pach Jesús.
30 Tiꞌ yʌn chꞌop u wich caꞌtur curaꞌanob ich nʌcꞌ bej.
Quireꞌ cu cꞌaticob u taqꞌuin wa mac cu man ich nʌcꞌ bej.
Caj yubob yaꞌaraj cu man Jesús ich bej caj awʌtnʌjob:
―Jaj Tsꞌurir,
u pararech wa ja nunquir David.
Yajquinte tenob otsirenob,
yam tenob.
31 Caj qꞌueyaꞌb ten a pim soc mʌꞌ yawʌtob.
Mʌꞌ yubob yaꞌaraj tiꞌob.
Mʌꞌ tsꞌocar yawʌtob.
Tu jach cꞌamquintajob yawʌt:
―Yajquinte tenob,
otsirenob yam tenob,
Jaj Tsꞌur,
u pararech wa David.
32 Jesús caj xurij ich bej caj u pʌyaj chꞌop u wichob.
Caj tarob caj cꞌataꞌb tiꞌob:
―Baꞌ a cꞌatex ten quir in yamtiquechex?
33 Caj u nuncob tiꞌ:
―Jaj Tsꞌurir,
arej caꞌ sasichʌjʌc in wichob soc chʌcaꞌan in wiricob in berob.
34 Jesús caj u yajquintob a chꞌop u wichob.
Caj tar u wichob.
Sep caj toc jaw u wichob.
Caj binob tu pach Jesús.