Caj waysaꞌb Jesús ʌcʌtan ich u camsʌwinicob
17
Tiꞌ yʌn uch Jesús ich u cajar Cesarea de Filipo tu caj u camsej tiꞌob u camsʌwinicob.
Caj manij seis u qꞌuinin Jesús caj u pʌyaj Pedro yejer Juan yejer Jacobo.
U bʌjob Jacobo,
Juan.
Caj binob ich u joꞌr wits tu caꞌanan u joꞌr wits.
Caj binij Jesús yejer u camsʌwinicob mʌꞌ yaꞌab.
Mʌnaꞌ u nup.
2 Ʌcʌtan u camsʌwinicob caj waysaꞌb Jesús.
Caj waysaꞌb u sasirir u wich Jesús,
irej u sasirir ic yum qꞌuin.
Baxuc u jach chaꞌaj u nocꞌ,
irej u sasirir ic yum.
3 Seb caj irir ix baꞌ Moisés yejer ix baꞌ Elías ten u camsʌwinicob.
Caj tsicbanʌjob yejer Jesús,
caj ir ten u camsʌwinicob Jesús.
4 Pedro caj u tꞌʌnaj Jesús:
―Jaj Tsꞌurir ―quij―.
Jach tsoy teꞌ yʌnoꞌonaꞌ teraꞌ.
Arej in chan tʌsej paser.
U tiririꞌ tech.
U tiririꞌ tiꞌ Moisés.
U tuririꞌ tiꞌ Elías.
5 Caj u yub u tꞌʌn Cꞌuj Pedro caꞌanan.
Caj yiraj u tar u muyarir,
jach sʌc tꞌinaꞌan,
rʌc bʌcristaꞌb tu cotor.
Caj yubaj u tꞌʌn ich u muyarir.
Caj yubaj yaꞌaric Pedro:
―A jeꞌ in jach parar,
in jach yaj.
Jach quiꞌ in wor.
Caꞌ a uꞌyex u tꞌʌn.
Tiꞌ toy cu tꞌʌn Pedro yejer Jesús caj yir u tar u muyarir.
6 Caj tsꞌoc yubic u tꞌʌn ich u muyarir u camsʌwinicob Jesús,
caj rʌc nacrʌjob ich ruꞌum.
Jach jaqꞌuij yorob.
7 Jesús caj u jutsꞌ u bʌj ichob u camsʌwinicob.
Caj u tʌraj tiꞌob soc yerob tiꞌ yʌn Jesús.
Caj yaꞌaraj tiꞌob:
―Riqꞌuenex mʌꞌ a chꞌic sajaqꞌuirex.
8 Caj ricꞌob u camsʌwinicob Jesús caj yirob mʌnaꞌ ix baꞌ Moisés,
bayiriꞌ ix baꞌ Elías.
Mʌnaꞌ mac chen Jesús tu junan.
9 Cu yemenob ich u joꞌr pꞌuc wits.
Jesús caj u toc tꞌʌnaj u camsʌwinicob soc mʌꞌ yaꞌaricob wa yirob ix baꞌ Moisés yejer ix baꞌ Elías,
cax a baꞌ yubmʌnob xan,
hasta in caꞌ riqꞌuir caꞌ bin quimiquen,
a tenoꞌ a mac tar u yamtic mac tu cotor.
Jeroj arex a baꞌ caj a wirex.
10 Caj u cꞌatajob u camsʌwinicob tiꞌ Jesús:
―Quireꞌ tech caj a waꞌaraj toꞌon.
Mʌꞌ a yʌn bin a waꞌarex wa caj in wirob ix baꞌ Elías yejer ix baꞌ Moisés.
Biquinin cu yaꞌaric yʌjcamsʌyʌjirob u tꞌʌn Moisés:
“Rajiꞌ cu yʌn bin tar ix baꞌ Elías,
pachir cu tar a Cristojo”?
11 Caj u nuncaj tiꞌob Jesús:
―Taj ―quij Jesús―.
Ix baꞌ Elías cu yʌn bin tar uch quir u pʌyic u ber Cristo soc u cꞌaxicob yorob,
soc u rʌc pꞌʌticob cꞌas u winiquirob judío.
12 A tenoꞌ,
―quij Jesús―,
quin waꞌaric techex,
toc tarij Elías chen mʌꞌ u cꞌʌꞌotajob Elías.
Mʌꞌ tu yacsajob tiꞌ,
caj quinsaꞌb tiꞌ,
quireꞌ baxuc u cꞌatob a mac caj u chucajob tiꞌ.
Baxuc a tenoꞌ ―quij Jesús―,
quin bin in mucꞌyaj caꞌ bin u chuquenob xan.
13 U camsʌwinicob caj yubob baꞌ yaꞌaraj Jesús caj u jach najtajob rajiꞌ Juan cu tsicbʌtic Jesús.
Raꞌ Juan a cu yacsic jaꞌ tu joꞌr mac.
Jesús caj u jawsaj chan xib a cu yʌn saj quimin
14 Caj urob Jesús ich u joꞌr caꞌanan wits.
Caj cꞌuchij tu yʌnob a pimoꞌ.
Caj u juts u bʌj turiꞌ xib ich tu yʌn Jesús.
Caj xonrʌj ʌcʌtan ich Jesús.
15 Caj yaꞌaraj:
―Jaj Tsꞌurir ―quij―.
Caꞌ yajquintej in parar.
Yamtej tiꞌ,
cu sʌj quimin.
Tiriꞌ cu rʌc rubur ich jaꞌ.
Cu jach mucꞌyaj.
16 Caj tar in puric ich a camsʌwinicob mʌꞌ tu jawsajobiꞌ.
A camsʌwinicob,
mʌꞌ cꞌuchaꞌan yorob u jawsej.
17 Caj yaꞌaraj Jesús tiꞌ:
―A techexoꞌ,
a mac cuxaꞌan tu qꞌuinin bajeꞌrer,
mʌꞌ ca wacsiquex ta worex.
Mʌꞌ ca quibiquex in tꞌʌn.
Mʌꞌ yaꞌab u qꞌuinin tiꞌ yʌnen tu yʌnechex.
Arex mun u qꞌuinin quin mucꞌtic techex quireꞌ mʌꞌ a quibex in tꞌʌn.
Arex caꞌ tac purbir chan xib teraꞌ.
18 Jesús caj u jocꞌsaj cꞌacꞌas quisin.
Caj u qꞌueyaj.
Raꞌiriꞌ u qꞌuinin caj toc jaw chan xib.
19 Caj tarob u camsʌwinicob yicnʌn Jesús caj tsicbanʌjob yejer Jesús,
quireꞌ rʌc binob a pimoꞌ.
Caj cꞌataꞌbi tiꞌ:
―Biquinin a tenobeꞌ mʌꞌ cꞌuchaꞌan in worob in jocꞌsicob quisin?
20 Caj yaꞌaraj Jesús tiꞌob.
―Mʌꞌ ca wacsiquex ta worex,
rajen mʌꞌ cꞌuchaꞌan a worex a jocꞌsex.
Taj quin waꞌariquex tech,
an ten bic yijir u wich mostaza.
Mʌꞌ ja wirej,
jach mijin.
Wa bayiriꞌ ca wacsiquex ta worex,
cax an ten bic mijin u yijir mostaza,
cax a baꞌ cu tar techex cꞌuchaꞌan a worex tiꞌ.
Cꞌuchaꞌan a worex tiꞌ tu cotor baꞌ wa ca wacsiquex ta worex tiꞌ ten.
21 A jeꞌ quisin caj in jocꞌsajoꞌ juntur quisin.
Chen a techexoꞌ caꞌ a tꞌʌnex Cꞌuj.
Bayiriꞌ caꞌ a pꞌʌtex a janʌnex soc cꞌuchaꞌan a worex a jocꞌsiquex.
Bin in caꞌ quimin
22 Tiꞌ cu manob Jesús yejer u camsʌwinicob ich u ruꞌumin Galilea.
Jesús caj yaꞌaraj:
23 ―A tenoꞌ bin in caꞌ quinsbir.
Cu yʌn tarob u chuquiquenob mac quir in quinsaꞌ.
Caꞌ bin mʌnac mʌnaꞌ u nup u qꞌuinin jeꞌ in caꞌ riqꞌuireꞌ.
Caj yubob yaꞌaric Jesús caj jach tucraꞌb Jesús ten u camsʌwinicob.
Cu boꞌotic u boꞌorir tu cu yocar u cꞌujinticob Cꞌuj u winiquirob judío ich carem naj
24 Caj cꞌuchob Jesús yejerob u camsʌwinicob ich u cajar Capernaum.
Caj tar yʌjcꞌʌmin u taqꞌuin tu cu naj cꞌujinticob Cꞌuj u winiquirob judío.
Caj bin ich Pedro caj cꞌataꞌb tiꞌ Pedro:
―Cu boꞌotic wa ja wʌjcamsʌyʌjir tu cu yocar ich carem naj tu cu naj cꞌujinticob Cꞌuj u winiquirob judío?
25 Caj nuncaj Pedro:
―Cu boꞌotic u boꞌorir tu cu yocar.
Caj tsꞌoc u yaꞌaric aroꞌ,
caj oc ich yatoch tu yʌn Jesús.
Caj u yʌn tꞌʌnaj Pedro,
Jesús.
Caj cꞌataꞌb tiꞌ Pedro ten Jesús:
―Baꞌ ca tucric tech Pedro.
A mac a cu tar nach yʌn u cꞌatic u boꞌorir ten gobierno.
A mac a tiriꞌ cʌjaꞌan mʌꞌ u cꞌataꞌr u boꞌorir?
26 Caj yaꞌaraj Pedro:
―Raꞌ cu cꞌatic u boꞌorir a mac nach u tar.
Caj yaꞌaraj Jesús:
―Rajen cax mʌꞌ in boꞌotic tu cu yocar u naj cꞌujinticob Cꞌuj u winiquirob judío.
27 Caj araꞌb ten Jesús tiꞌ Pedro:
―Soc mʌꞌ u pʌqꞌuicob in pach soc mʌꞌ yaꞌaric caj in pꞌastaj carem naj tu cu naj cꞌujinticob Cꞌuj u winiquirob judío.
Joqꞌuen xen ich chiꞌcꞌacꞌnab joqꞌuen rutsej cʌy.
A ca yʌn rutsiqueꞌ jʌp u chiꞌ a wirej wa yʌn u taqꞌuin.
Raꞌ soc quir a boꞌotic quir ij cocar carem naj tu cu naj cꞌujinticob Cꞌuj u winiquirob judío.
Joqꞌuen a boꞌotej tiꞌob.