Caj tumtaꞌb yor Jesús ten quisin
4
Caj joqꞌuij Jesús ich u chiꞌ yaꞌarir Jordán quir u bin ich Galilea,
Jesús jach tsꞌurintaꞌb ten u Tajꞌor u Pixam Cꞌuj.
Caj pay u ber Jesús ten u Tajꞌor u Pixam Cꞌuj quir u bin ich tʌcay ruꞌum.
2 Quir u tumtaꞌr yor ten quisin quir yirir wa cu yacsic u siꞌpir.
Tiꞌ taroꞌ,
tiꞌ yʌn ich tʌcay ruꞌum cuarenta u qꞌuinin.
Caj u jamach pꞌʌtaj u janʌn u burur qꞌuin,
u burur acꞌbir.
Caj tsꞌoc u jamach pꞌʌtic u janʌn,
Jesús caj wichʌjij.
3 Caj tar quisin caj yaꞌaraj quisin tiꞌ Jesús:
―Wa jach taj u pararech Cꞌuj waysej a jeꞌ tunichaꞌ caꞌ wayac a woch waj,
quir a jantic.
4 Jesús caj u nuncaj:
―Baxuc tu tsꞌibaꞌan cu yaꞌaric:
“Mʌꞌ chen a woch cu cuxquintiquech.
A xiboꞌ cu cuxtar wa cu yaꞌaric Cꞌuj.”
5 Caj tsꞌoc yaꞌaric aroꞌ caj pay ten quisin caj bin purbir ich joꞌr yajaw wits tu caꞌanan.
Caj tus rʌc esaꞌb tiꞌ ten quisin tu cotor u ruꞌumin tu cu reyinticob rey.
Tabar caj tsꞌoc yesaꞌr tiꞌ ten quisin.
6 A quisinoꞌ caj yaꞌaraj:
―Tu cotor a baꞌ ca wiriqueꞌ a cu nequiꞌquintic u yor mac quireꞌ caj u tsꞌaj ten Cꞌuj,
tu cotor wa jin cꞌat in tsꞌic,
cꞌuchaꞌan in wor in tsꞌic.
Bayiriꞌ xan,
tu cotor u mucꞌ a caj a wirajeꞌ.
7 Wa ca xontar tub yʌnen caꞌ a cꞌujinten jeꞌ in rʌc tsꞌic tech tu cotor a baꞌ caj a wiraj sam,
soc tech yʌnin.
8 Caj u nuncaj Jesús:
―Joqꞌuen xen,
Quisinech.
Quireꞌ u tꞌʌn Cꞌuj cu yaꞌaric:
“Cꞌujintej a Jaj Tsꞌurir Cꞌuj.
Chen rajiꞌ ca beyaj tiꞌ.”
9 Caj pay Jesús ten quisin ich u cajar Jerusalén.
Caj nac purbir Jesús tu jach caꞌanan u joꞌr carem naj tu cu naj cꞌujinticob Cꞌuj u winiquirob judío.
Caj araꞌb tiꞌ ten quisin:
―Wa jach jaj u pararech Cꞌuj,
pur a bʌj caꞌ rubuquech ich ruꞌum.
10 Baxuc cu yaꞌaric tu tsꞌibaꞌan u tꞌʌn Cꞌuj:
Tu toc araj tiꞌ yʌjmasirob u tꞌʌn Cꞌuj caꞌ u quiꞌ cʌnatech.
11 Baxuc cu yaꞌaric tu tsꞌibaꞌan u tꞌʌn Cꞌuj,
tu cu yaꞌaric:
“Jeꞌ a ricꞌsiquex yejer a cꞌʌbex,
cax mʌꞌ u yaꞌ chꞌʌtic tunich soc mʌꞌ u yajtar u yoc ten tunich.”
Baxuc cu yaꞌaric u tꞌʌn Cꞌuj.
12 Caj u nuncaj Jesús:
―Baxuc tu tsꞌibaꞌan cu yaꞌaric xan:
“Mʌꞌ tsoy ic tumtic yor ic Jaj Tsꞌurir Cꞌuj soc ij quirej wa taj a baꞌ caj u yaꞌaraj.”
13 Caj tsꞌoc u yʌn rʌc tumtaꞌr yor Jesús ten quisin.
Jamach pꞌat Jesús ten quisin jeꞌ u caꞌtar tumtaꞌbir yor Jesús u jer u qꞌuinin.
Jesús caj u yʌnxchun u beyaj ich ruꞌumin Galilea
14 Jesús caj sutnʌj ich u ruꞌumin Galilea.
Jach tsꞌurintaꞌb ten u Tajꞌor u Pixam Cꞌuj Jesús.
Caj rʌc man u jumintej tiꞌ u racꞌob a baꞌ tsoyir caj u betaj Jesús.
Lucas 4.14-44
15 Tu caj u camsaj Jesús ich u chan najir tu cu naj cꞌujinticob Cꞌuj u winiquirob judío.
U racꞌob caj araꞌb tiꞌ Jesús ich u racꞌob caj yaꞌaraj:
―Jach tsoy Jesús quireꞌ cu tsecꞌtic u tꞌʌn Cꞌuj.
Jesús tiꞌ yʌn ich u cajar Nazaret
16 Caj urij Jesús ich u cajar Nazaret tub chꞌijij Jesús uch.
An ten bic nanij u cꞌujintic Cꞌuj caj oquij ich u chan najir tu cu naj cꞌujinticob Cꞌuj u winiquirob judío.
Quireꞌ raꞌ u qꞌuinin quir u jesicob u bʌj u winiquirob judío.
Caj ricꞌ u chꞌictar u xaquej u tꞌʌn Cꞌuj Jesús quir yubicob u racꞌob.
17 Caj tsꞌaꞌb tiꞌ u juꞌunin a baꞌ caj u tsꞌibtaj Isaías uch.
Caj tsꞌaꞌb tiꞌ ten u tsꞌurir u chan najir tu cu naj cꞌujinticob Cꞌuj u winiquirob judío.
Caj u choraj u juꞌunin Jesús,
mʌꞌ ja wirej,
catsꞌaꞌan.
Caj yiraj tu tsꞌibaꞌan ten Isaías a cu yaꞌaric,
caj u xacaj Jesús:
18 A tenoꞌ,
quij Isaías,
tu tsꞌurinten u Tajꞌor u Pixam Cꞌuj.
Rajen caj u teten Cꞌuj quir in bin in tsecꞌtic u jach tsoyir u tꞌʌn Cꞌuj ich a mac jach otsireꞌ.
Caj u tuchiꞌten quir in waꞌaric tiꞌ a mac tsꞌurintaꞌb ten u siꞌpirob,
caj u toc siptaj Cꞌuj tiꞌ u siꞌpirob.
Caj aren in yamtic a mac cu manob tu cꞌasir soc u manob tu tsoyir,
irej a mac chꞌop u wich cu bin sasichʌjʌr u wich.
Caj taren in chichquintic yorob a mac tupsaꞌan yorob ten u yajirob.
19 Caj taren in toc aric techex cꞌuchij tu qꞌuinin u tar ic Jaj Tsꞌurir quir u taꞌquic tu cotor mac.
20 Jesús caj tsꞌoc u xaquic caj u caꞌ catsꞌaj u juꞌunin caj u tsꞌaj tiꞌ u cꞌurew u jach tsꞌurir u chan najir.
Caj cura Jesús.
Tu cotor mac a tiꞌ curaꞌanob tu cu naj cꞌujinticob Cꞌuj tan u quiꞌ pʌtaꞌrob Jesús quireꞌ jacꞌaꞌan yorob.
21 Caj u yʌnxchun u tsicbar Jesús,
caj yaꞌaraj:
―A caj in xacaj bajeꞌrer toc nupꞌaꞌan a baꞌ tsꞌibtaꞌb.
22 Tu cotor a mac tiꞌ yʌn tu cu naj cꞌujinticob Cꞌuj u winiquirob judío caj yaꞌarob:
―Jach tsoy Jesús.
Jacꞌaꞌan yorob quireꞌ yubob jach tsoy u tꞌʌn Jesús.
Caj u cꞌaxajob u tucurob rajen caj yaꞌarob:
―A jeꞌraꞌ u chen parar José.
Caj u pꞌastob Jesús.
23 Jesús caj yaꞌaraj tiꞌ a mac a tiꞌ yʌn ich u chan najir tu cu naj cꞌujinticob Cꞌuj:
―In wer techex caꞌ bin a waꞌariquenex:
“Wa ja cꞌat a yamtic u jer mac,
a wʌcꞌʌs bʌjiriꞌ caꞌ a batꞌan yamtej quireꞌ yajech.”
Raꞌ u cꞌat yaꞌaric:
“Biquinin a techeꞌ,
Jesús,
mʌꞌ a betaj carem beyaj ta cajar Nazaret tu chiꞌjech an ten bic caj a betaj carem beyaj ich u cajar Capernaum?”
24 Tiꞌ toy cu tsicbar Jesús caj yaꞌaraj:
―Jach taj quin waquex tech.
Mʌꞌ ju yacsʌr yʌjtseqꞌuir u tꞌʌn Cꞌuj a cu tar ich cajarireꞌ.
25 Taj quin bin in cꞌasej techex,
soc a cꞌʌꞌotiquex baꞌ u ber uch yʌjtseqꞌuir u tꞌʌn Cꞌuj,
quireꞌ caj u betaj carem beyaj tiꞌ a mʌꞌ u winiquirob judíojoꞌ.
Cꞌaj wa techex tu qꞌuinin yʌjtseqꞌuir u tꞌʌn Cꞌuj Elías uch.
Mʌꞌ ju tar yaꞌarir caj mʌn tres yaxqꞌuin yejer u jer chumuc yaxqꞌuin.
Mʌꞌ ju tar yaꞌarir,
caj u rʌc wichʌjob quireꞌ mʌꞌ ju chꞌijir u pʌcꞌar.
26 Chen a Cꞌujoꞌ caj u tuchiꞌtaj Elías tu ruꞌumin Sidón tu yʌn yatoch a xquic a quimen u mamoꞌ.
Sarepta u cꞌabaꞌ u cajar.
Caj bin jansbir Elías cax mʌꞌ u winiquir judío a xquicoꞌ.
Biquinin mʌꞌ tu jansaj a tiꞌ yʌn ich u winiquirob judío a xquic a quimen u mam quireꞌ yʌn yaꞌab?
Quireꞌ tuchiꞌtaꞌb Elías ich u jer cajar.
27 Cꞌajtechex wa Eliseo caj jawsaꞌb iqꞌuer u caꞌ tiꞌ Naamán a cu tar tu ruꞌumin Siria.
Biquinin mʌꞌ tu jawsaj u winiquirob judío cax yʌn yaꞌab iqꞌuer u caꞌ ich u winiquirob judío?
Quireꞌ mʌꞌ araꞌb ten Cꞌuj u jawsej ich u winiquirob judío,
rajen mʌꞌ ju jawsej.
28 Caj yubob yaꞌaric Jesús a tiꞌ rʌc muchꞌaꞌanob tu cu naj cꞌujinticob Cꞌuj caj rʌc pꞌujob.
29 Caj rʌc ricꞌob jocꞌsaꞌbir Jesús caj bin purbir tu joꞌr wits tu chꞌicaꞌanin wits.
Bʌytʌc yatochob tu cʌjaꞌan ich u jꞌor wits.
U cꞌat u nechꞌintaꞌr Jesús quir u quinsicob Jesús.
30 Chen Jesús caj man chumuc tu rʌc muchꞌaꞌanob,
chan ber caj man Jesús chumuc caj bin.
Tiꞌ yʌn xib tuririꞌ yʌn u cꞌacꞌas quisinin
31 Jesús caj u pꞌʌtaj u cajar Nazaret caj bin ich u cajar Capernaum tu ruꞌumin Galilea.
Caj cꞌuchij tu qꞌuinin u jesicob u bʌj u winiquirob judío caj oc u camsej Jesús tu cu naj cꞌujinticob Cꞌuj u winiquirob judío.
32 Caj jacꞌob u yorob barej caj u yubob a pimoꞌ u camsaꞌrob ten Jesús,
quireꞌ rajiꞌ tsicbanʌjij an ten bic mac a yʌn u mucꞌ.
33 Tiꞌ yʌn tuririꞌ xib tu cu naj cꞌujinticob Cꞌuj u winiquirob judío.
Rajiꞌ yʌn u cꞌacꞌas quisinin,
a cu yawatoꞌ.
Caj u yʌwtaj Jesús,
caj yaꞌaraj:
34 ―Ay,
baꞌ a cꞌat tiꞌ a tenob,
Jesúsech,
a cu tar ich u cajar Nazaret?
Taraꞌanech quir a chꞌesiquenob?
In werob maquech,
a techoꞌ,
a mac a cu tar ich Cꞌuj,
a mac a caj u ricꞌsaj u wʌcꞌʌs bʌjiriꞌ tiꞌ Cꞌuj.
35 Jesús caj u qꞌueyaj cꞌacꞌas quisin:
―Nupꞌ a chiꞌ,
caꞌ jocꞌaquech,
caꞌ a pꞌʌtej a jeꞌ xibaꞌ.
Caj pichꞌintaꞌb xib ten cꞌacꞌas quisin caj rub ich ruꞌum ʌcʌtan u racꞌob.
Mʌꞌ yaj caj jocꞌ u quisinin.
36 Caj jacꞌob yorob u racꞌob caj irir u jocꞌar cꞌacꞌas quisin.
Caj tsicbanʌjob ich u racꞌob:
―Baꞌ tꞌʌnin a jeꞌ xibaꞌ a mʌꞌ cax cꞌacꞌas quisin cu quibir u tꞌʌn ten cꞌacꞌas quisin?
Inan cu jocꞌarob.
37 A baꞌ irir u betic Jesús caj u rʌc man u jumintej ich tu cotor u racꞌob ich u ruꞌumin Galilea.
Jesús caj u jawsaj yixquit Simón Pedro
38 Caj jocꞌ Jesús tu cu naj cꞌujinticob Cꞌuj u winiquirob judío,
caj oc ich yatoch Simón.
Yaj yixquit Simón,
jach ar u joꞌr.
Caj cꞌataꞌb tiꞌ Jesús quir u jawsic.
39 Caj oc Jesús tu charaꞌan yixquit Simón.
Caj pꞌuxraj u tꞌʌnej Jesús,
caj u jawsa u yajir u joꞌr.
Caj jawij,
seb caj riqꞌuij quir u jansaꞌr Jesús yejer a mac a tiꞌ yʌnob tu yatoch.
Jesús caj u jawsaj u yajir yaꞌab mac
40 A ray u qꞌuininoꞌ tan u bin ic yum,
caj tar purbir u yajir a mac cʌjaꞌan tu cajar Capernaum cax a baꞌ yajir yʌn tiꞌob Jesús caj u rʌc tʌraj caj rʌc jaw u yajir.
41 Bayiriꞌ xan,
yʌn mac acaꞌan tiꞌ cꞌacꞌas quisin.
Caj jocꞌob,
caj qꞌueyaꞌb ten Jesús caj awʌtnʌjob caj jocꞌob,
caj yaꞌarajob:
―A techoꞌ,
u pararech Cꞌuj.
Jesús caj u qꞌueyaj caꞌ u nupꞌob u chiꞌ quireꞌ a quisinoꞌ yer tiꞌ u tar ich Cꞌuj,
rajij Cristo.
Jesús cu tsecꞌtic u tꞌʌn Cꞌuj ich u ruꞌumin tu cʌjaꞌanob u winiquirob judío
42 Caj sasij caj jocꞌ Jesús tar u wich u bin ich tacay ruꞌum.
Chen a pimoꞌ caj bin u cʌxtejob hasta caj u yirajob Jesús.
Caj chich araꞌb u pꞌatʌr Jesús ich u cajar Capernaum.
43 Jesús caj yaꞌaraj tiꞌob:
―Yʌn in bin in tsecꞌtej u jach tsoyir u tꞌʌn Cꞌuj tu cu bin u reyintejob Cꞌuj,
ich u jer u cajarob.
Rajen caj u tuchiꞌten Cꞌuj quir in tsecꞌtic u jach tsoyir u tꞌʌn.
44 Rajen tiꞌ rajraꞌ cu man Jesús u tsecꞌtej tu cu naj cꞌujinticob Cꞌuj u winiquirob judío ich u ruꞌumin tu cʌjaꞌanob u winiquirob judío.