Tumtaꞌb yor Jesús ten quisin quir yiric wa cu yacsic u siꞌpir
4
Caj pay u ber Jesús ten u Tajꞌor u Pixam Cꞌuj soc cu tumtaꞌr yor ich tʌcay ruꞌum.
A quisinoꞌ,
cu bin tumtic yor Jesús,
quir yirir wa cu yacsic u siꞌpir.
2 Tiꞌ yʌn ich tʌcay ruꞌum cuarenta u qꞌuinin.
Caj u jamach pꞌat u janʌn u burur qꞌuin u burur acꞌbir.
Caj tsꞌoc u jamach pꞌʌtic u janʌn.
Jesús caj wichʌjij.
3 A quisinoꞌ,
caj u nʌtsꞌ u bʌj ich Jesús soc u tumtic yor Jesús.
Caj araꞌb tiꞌ Jesús:
―Wa tech,
jach taj u pararech Cꞌujeꞌ,
waysej a jeꞌ tunichaꞌ waj caꞌ a waysej a woꞌoch waj quir a jantic.
4 Barej Jesús caj u nuncaj.
Caj yaꞌaraj Jesús:
―Baxuc tu tsꞌibaꞌan u tꞌʌn Cꞌuj,
cu yaꞌaric toꞌon:
“Mʌꞌ chen a woch waj cu cuxquintiquech.
A xiboꞌ cu cuxtar wa cu yaꞌaric Cꞌuj.”
5 Caj payir Jesús ten quisin soc u bin ich u cajar Jerusalén.
U winiquirob judío tiꞌ cu naj cꞌujinticob Cꞌuj ich u cajar Jerusalén.
Caj payir Jesús ten quisin caꞌanan tu joꞌr carem naj tu cu naj cꞌujinticob Cꞌuj u winiquirob judío.
6 Caj araꞌb ten quisin tiꞌ Jesús:
―Wa jach taj u pararech Cꞌuj,
pur a bʌj caꞌ rubuquech.
Quireꞌ ―quij quisin― cu yaꞌaric u tꞌʌn Cꞌuj:
Quireꞌ a Cꞌujoꞌ cu yaꞌaric tiꞌ u yʌjmasir u tꞌʌn Cꞌuj:
“Caꞌ a cʌnantej a mac in jach yaj.
Jeꞌ a ricꞌsiquex yejer a cꞌʌbex cax mʌꞌ u nac chꞌʌctej tunich,
soc mʌꞌ u yajtar u yocob ten tunich.”
Baxuc caj u yaꞌaraj quisin.
7 Jesús caj u nuncaj caj yaꞌaraj tiꞌ quisin:
―Baxuc cu yaꞌaric tu tsꞌibaꞌan u tꞌʌn Cꞌuj xan:
“Mʌꞌ tsoy ic tumtic yor ic Jaj Tsꞌurirex Cꞌuj soc ij quirej wa taj a baꞌ cu yaꞌaric.”
8 Tu caꞌ ten wʌcꞌʌs payir Jesús ten quisin.
Bin yejer quisin ich joꞌr wits.
Jach caꞌanan u witsir.
Caj esaꞌb tiꞌ ten quisin soc yiric Jesús tu cotor u ruꞌumin tu cu reyinticob rey.
Caj yiraj Jesús,
jach tsoy u ruꞌumin tu cu reyinticob.
9 Caj araꞌb tiꞌ Jesús ten quisin:
―Jeꞌ in tsꞌic tech a jeꞌ baꞌ tu cotor,
a jeꞌ tsoyaꞌ ich yocꞌocab,
wa ca xontar tu yʌnen caꞌ a cꞌujinten ―quij quisin.
10 Jesús caj u yaꞌaraj tiꞌ quisin:
―Joqꞌuen xen,
quisinech.
Quireꞌ u tꞌʌn Cꞌuj cu yaꞌaric:
“Cꞌujintej a Jaj Tsꞌur Cꞌuj.
Jariꞌ rajiꞌ ca beyaj tiꞌ.”
11 Caj tsꞌoc u tumtaꞌ yor Jesús,
caj binij quisin,
caj tarob u yʌjmasir u tꞌʌn Cꞌuj ich Jesús.
Caj tarob yamtaꞌbir Jesús ten yʌjmasirob u tꞌʌn Cꞌuj.
Jesúsoꞌ u yʌnxchun u beyaj ich u ruꞌumin Galilea
12 Caj yubaj Jesús mac Juan ich tu cu naj maꞌcʌr winiquir.
Caj wʌcꞌʌs bin Jesús ich u ruꞌumin Galilea.
13 Jesús mʌꞌ wʌcꞌʌs cajij ich u cajar Nazaret.
Caj bin u cʌjtar ich u cajar Capernaum.
Tiꞌ yʌn ich u chiꞌcꞌacꞌnab.
A Capernaum tiꞌ yʌn ich u ruꞌumin Zabulón.
Baxuc xan,
ich u ruꞌumin Neftalí.
14 Caj bin cʌjtar Jesús ich u cajar Capernaum quir u nupꞌsic u tꞌʌn Cꞌuj,
baxuc caj u tsꞌibtaj Isaías uch.
15 Isaías caj yaꞌaraj uch,
cax mʌꞌ toy tac Jesús uch.
Caj u toc araj Isaías:
Tar yʌn ich u ruꞌumin Zabulón.
Tar xan ich u ruꞌumin Neftalí.
Raꞌ u berir ich chiꞌcꞌacꞌnab.
Chen pʌchir yaꞌarir Jordán tu cu tar ic yum.
Raꞌ u ruꞌumin Galilea,
tiꞌ cʌjaꞌan a mʌꞌ u winiquirob judío.
16 A mac yʌn u siꞌpirob,
a cʌjaꞌanob ich u ruꞌumin Zabulón yejer u ruꞌumin Neftalí.
Jeꞌ yiricob yʌjtaquirobeꞌ a mac a yʌn u siꞌpirob.
A mac tiꞌ cʌjaꞌan ich yacꞌbirir quireꞌ yʌn u siꞌpirob,
tiꞌ cu bin cꞌuchur Cristo tu yʌnob soc u yacsic tiꞌob a mʌꞌ u winiquirob judío ich u sasirir Cꞌuj.
Baxuc caj u yaꞌaraj Isaías uch.
17 Caj cꞌuchij tu cʌjtar Jesús ich u cajar Capernaum.
Caj u yʌnxchun u tsecꞌtic u tꞌʌn Cꞌuj Jesús:
―Cꞌaxex a wor ―quij Jesús―.
Caꞌ a pꞌʌtex a cꞌasiroꞌ,
quireꞌ cꞌuchij tu qꞌuinin bin u caꞌ u reyinticob Cꞌuj weꞌ.
Jesús caj u tꞌʌnaj a cu chuc cʌyeꞌ caꞌ xicob yicnʌn Jesús; cuatro caj u tꞌʌnaj
18 Jesús caj bin ich chiꞌ cꞌacꞌnab.
U cꞌabaꞌ u cꞌacꞌnabir Galilea.
Caj irir Pedro ten Jesús.
U jer u cꞌabaꞌ Pedro,
Simón.
Cu puric u chimin u chuc cʌy.
Tiꞌ yʌn yitsꞌin Pedro,
u cꞌabaꞌ Andrés.
Quireꞌ raꞌ u beyajob Simón yejer Andrés,
cu chuc cʌyob.
19 Caj araꞌb tiꞌob ten Jesús:
―Cojenex caꞌ in camsechex tiꞌ u tꞌʌn Cꞌuj,
soc a camsiquex a racꞌobex.
Raꞌ a beyajex bajeꞌrer.
20 Seb caj u pꞌʌtob u chuc cʌyob caj binob ich u pach Jesús.
Simón yejer yitsꞌin,
caj binob tu pach Jesús.
21 Sansameꞌ caꞌ u caꞌ ir u jer.
Baꞌiriꞌ caꞌtur xan.
Caꞌtur yejer yitsꞌin.
Sucuꞌunbir Jacobo.
Itsꞌinbir Juan.
Pꞌeriꞌ u tetob.
Zebedeo u cꞌabaꞌ u tetob.
Tiꞌ yʌnob ich chem yejer u tetob cu chuwicob u chimin u chuc cʌyob,
quireꞌ tꞌoc u chimin.
Jesús caj u payaj caꞌ tacob tu pach u cʌnicob u tꞌʌn Jesús.
22 Seb caj u pꞌʌtob u tetob yejer u chem quir u cʌnicob u tꞌʌn Jesús.
Jesús cu camsic jach pim mac
(Lc.6.17-19)
23 Pachir caj man Jesús u camsic tu cotor u cajar ich u ruꞌumin Galilea.
Cu yocar u camsej tu cu naj cꞌujinticob Cꞌuj u winiquirob judío ich u chan najir.
Jujuntur u cajar cu yocar u camsej u tꞌʌn Cꞌuj.
Caj u tsecꞌ tiꞌob bic cu bin u reyintic Cꞌuj ich yocꞌocab.
Cax a baꞌ yajir yʌn tiꞌob cu rʌc jawsic Jesús.
24 Caj yubob u jumintaꞌ tiꞌ yʌn Jesús ich u ruꞌumin Galilea hasta tu ruꞌumin Siria.
Caj u yubob u jumintaꞌ bic cu jawsic mac,
rajen tarob u puricob a mac yajob ich Jesús.
Tu cotor a baꞌ yajireꞌ yʌn tiꞌob,
caj tar u purob ich Jesús.
A macob mʌꞌ u riqꞌuir chꞌictareꞌ,
cu tar purbir.
A macob acaꞌan quisin tiꞌeꞌ,
cu tarob purbir ich Jesús.
A macob cu sʌjquimin,
cu tarob purbir ich Jesús caj rʌc jawsaꞌb u yajirob ten Jesús.
25 Caj tarob ich Jesús quir yubicob.
Tiꞌ u tarob ich pʌchir yaꞌarir Jordán.
Tiꞌ u tarob ich u ruꞌumin Galilea.
Tiꞌ u tarob ich u cajarob Decápolis.
Tiꞌ u tarob ich u cajar Jerusalén.
Tiꞌ u tarob ich u ruꞌumin Judea.
Jach pim rʌc tarob ich Jesús.